1, 2. ¿Kunatakis Jehová Diosajj invitistu?

 “¿KUNAS Jehová Diosajj jumatakejja?” sasin jisktʼapjjeristam ukhajj inas akham sasin jayschisma: “Jehová Diosajj amigojawa, Awkijawa, Diosajarakiwa” sasa. Jan ukajj Jehová Diosat parlañatakejj inas yaqha arunakamp aytchisma. Ukampis ¿“nayar katoqtʼiriwa” sasin jupat sasmati?

² Jehová Diosajj kunjamsa jupat jan jitheqtir servirinakapampejj apasi uka toqet parlañatakejja, kunjamsa maynejj invitadonakapar uñji uka toqetwa David reyejj parläna. Akham sasaw Diosar jisktʼäna: “Jehová Dios Tata, ¿khitirak carpaman suma katoqatäspasti? ¿Khitirak sagrado qolluman jakaspasti?” sasa (Sal. 15:1). Diosan amuytʼayat uka arunakajja, Jehová Diosan carpapan suma katoqatäsnawa, mä arunjja amigonakapäsnawa, ukwa yatichistu. ¿Jehová Diosan carpapankañajj wali sumajjaya?

JEHOVÁ DIOSAJJ INVITADOPÄSNA UKWA MUNI

3. ¿Khitis Jehová Diosan nayrïr invitadopänjja, ukat kunjamas panpachanejj jikjjatasipjjäna?

³ Janïr taqe kun lurkasajja, Jehová Diosajj sapakïnwa. Ukhamajj jilïr Yoqapaw carpapan nayrïr invitadopänjja. ¡Yoqapar katoqasajj wali kusisitäpachänwa! Jehová Diosajj Yoqapat “wal kusisïna”, nayrïr invitadopajj ‘jupa nayraqatan kusisitapunïnwa’ sasaw Bibliajj qhanañchi (Prov. 8:30).

4. ¿Khitinakarus Jehová Diosajj carpapar invitarakïna?

⁴ Mä qhawqha tiempotjja, Jehová Diosajj angelanak luräna, jupanakarojj carpaparuw invitarakïna. Bibliarjamajja, ‘Diosan wawanakapa’ satäpjjewa. Jehová Diosan jakʼapankasajj  wali kusisitäpjjänwa sasaw Bibliajj saraki (Job 38:7; Dan. 7:10). Walja maranakajja, Jehová Diosajj jupamp chik alajjpachan jakapkäna ukanakan amigopakïnwa. Ukampis qhepatjja, jaqenakaruw luräna, jupanakat mä qhawqhaniruw carpapar invitarakïna. Carpapar invitatäpkäna ukanakat yaqhepajj Enoc, Noé, Abrahán ukat Job chachanakänwa. Jupanakajj Diosan amigonakapata jan ukajj ‘cheqpach Diosamp’ sarnaqerinakat uñtʼatäpjjänwa (Gén. 5:24; 6:9; Job 29:4; Is. 41:8).

5. Ezequiel 37:26, 27 textonkir profeciajj ¿kunsa yatichistu?

⁵ Walja maranakas pasjjchïnjja, Jehová Diosajj amigonakapar carpapar invitaskakïnwa. Ezequiel 37:26, 27 (liytʼäta) textonkir profeciat amuytʼañäni. ¿Kunsa uka profeciajj yatichistu? Diosajj jupat jan jitheqtir servirinakapajj jupamp sum apasis kusisitäpjjaspa uk wal munatapwa yatichistu. “Jupanakampejj sumankañ pacto luräjja” sasaw Jehová Diosajj arsuwayäna. Alajjpachar sarañatak ajllitanakampi aka oraqen jakañ suytʼasipki ukanakampejj Diosan carpapan ‘mä sapa tamakëjjapjje’ ukhaw uka arunakajj phoqasiñapäna (Juan 10:16). Cheqas jichhürunakanwa uka profeciajj phoqasiski.

JEHOVÁ DIOSAW TAQE CHEQANS CUIDISTANI

6. ¿Kunapachas Jehová Diosan carpapar manttanjja, ukat kawkinkis uka carpajja?

⁶ Bibliajj qellqaskäna uka tiemponakanjja, mä carpanwa maynejj samartʼaspäna, jallutsa, thayatsa, lupits jarkʼaqasirakispäna. Kunapachatï maynejj mä carpar mantäna ukhajja, katoqtʼkitu ukajj sum uñjitani sasaw confiyaspäna. Jehová Diosar jakäwis katuyastan ukhajja, jupan ‘carpaparuw’ manttanjja (Sal. 61:4). Ukanwa Biblian yatichäwinakap manqʼar uñtat walj katoqtanjja, Jehová Diosan mayni invitadonakapampis chikachasiraktanwa. Ukampis ¿kawkinkis uka carpajja? Janiw mä sapa lugarankkiti. Kawkjankapkitï Jehová Diosat jan jitheqtir servirinakapajj ukankiwa. Taqe khitinakatï yaqha markar viajipki ukanakajj ukwa uñjawayapjje. Inas jupanakajj mä asamblear sarasajj Diosan carpapankir yaqha jilat kullakanakar uñtʼapjjchi (Apoc. 21:3).

7. Jehová Diosat jan jitheqtas jiwawayapki ukanakajj Diosan carpapankasipkakiwa sasajj ¿kunatsa sissna? (Foto uñjjattʼarakïta).

⁷ ¿Jehová Diosat jan jitheqtas jiwawayapki ukanakat kamsaraksnasa? ¿Jupanakajj Diosan carpapankasipkakiti? Jïsa, ukhamawa. ¿Kunatsa ukham sistanjja? Kuna laykutejj  Bibliarjamajja, Jehová Diosan amuyupan jakasipkakiwa. Jesusajj akham sänwa: “Jiwatanakan jaktaniñapatjja, Moisés pachpaw aqaskir chʼapit parlkasajj qhanañchäna. Jehová Diosajj ‘Abrahanana, Isaacana ukhamarak Jacobun Diosapawa’ sasaw säna. Jupajj janiw jiwatanakan Diosapäkiti, jan ukasti jakirinakan Diosapawa. Jupatakejj taqe uka jaqenakajj jakasipkiwa” sasa (Luc. 20:37, 38).

¿KUNA BENDICIONANAKS KATOQTANJJA, UKAT KUNANAKS LURAÑASA?

8. ¿Kuna bendicionanaksa Jehová Diosan carpapankasajj katoqtanjja?

⁸ Kunjamtï mä carpajj jallutsa, thayatsa, lupits jarkʼaqkistojja ukat samartʼaykarakistojja, ukhamarakiw Jehová Diosan carpapajj kunanaktï jupamp sum apasitas aptʼasiykistaspa ukanakat jarkʼaqestu, mä suytʼäw churarakistu. Jehová Diosan jakʼapankaskaktan ukhajja, Supayajj janiw wiñayatak kuna jan wals lurkistaspati (Sal. 31:23; 1 Juan 3:8). Machaq mundonjja, Jehová Diosajj jupat jan jitheqtir amigonakaparojj kunanakatï jupamp sum apasiñ aptʼasiykaspa ukanakatsa jiwañats jarkʼaqaskakiniwa (Apoc. 21:4).

9. ¿Kunanaksa Jehová Diosan invitadonakapajj lurapjjañapa?

⁹ ¡Jehová Diosan carpapankañajj mä jachʼa bendicionapuniwa! Ukanwa Jehová Diosampejj wiñayatak sum apassna. Ukampis ¿Diosan carpapankaskakiñatakejj kunanaksa lurañasa? Maynitï utapar invitistaspa ukhajja, kunanak lurañassa munaspa uk yatiñwa munsna. Utapar janïr mantkasajj zapatonakas apstʼasiñ mayistaspa ukhajj taqe chuymaw apstʼassna, Jehová Diosan invitadonakapajj ukhamarakiw carpapankaskakiñatakejj kunanak lurañassa muni uk yatiñ muntanjja. Jupar wal munasitasatwa taqe kunan ‘jupar wal kusisiyañatak’ chʼamachastanjja (Col. 1:10). Jehová Diosajj amigosäkchisa, Diosasawa, Awkisarakiwa, ukatwa wali respetomp jupar uñjañasa (Sal. 25:14). Ukhamajj khitis jupajj uk janipuniw armasiñasäkiti. Jupar ajjsarañajja, kunanakatï jupan chuymap ustʼaykaspa ukanak jan lurañataki, ‘altʼat chuymampipun Diosamp sarnaqañatakiw’ yanaptʼistani (Miq. 6:8).

ISRAELITANAKAROJJ MÄ IGUALAK UÑJÄNA

10, 11. ¿Kunjamsa Jehová Diosajj Sinaí wasarankir israelitanakar uñjäna, ukat kunjamsa ukajj taqe servirinakapar mä igualak uñjatap uñachtʼayistu?

¹⁰ Jehová Diosajj taqe invitadonakaparojj mä igualak uñji (Rom. 2:11). Sinaí wasaran carpanakan jakapkäna uka israelitanakarojj kunjamsa Diosajj uñjäna uk amuytʼañäni.

¹¹ Egipto markan esclavot serviñat markapar salvkäna uka qhepatjja, Jehová Diosajj sacerdotenakaruw Tabernaculon servipjjañapatak uttʼayäna. Uka sagrado carpan kuna yaqha lurañanakatï utjkäna ukanakamp phoqapjjañapatakiw levitanakar mayïna. ¿Tabernaculon servirinakampi jan ukajj uka jakʼan servirinakampikit suma uñjatäpjjäna? Janiwa, Jehová Diosajj taqeniruw mä igualak uñjäna.

12. ¿Kunjamsa Jehová Diosajj israelitanakar mä igualak wasaran uñjäna? (Éxodo 40:38; dibujonak uñjjattʼarakïta).

¹² Campamenton taqeniw Jehová Diosan amigopäpjjaspäna. Tabernaculon servirinakasa, jan ukan servirinakasa, uka jakʼan jakirinakasa jan ukajj ukat jayan jakirinakas taqeniw Jehová Diosamp amigöpjjaspäna. Tabernáculo patjjan uñstkäna uka qenayampiru ninampir taqe markpach uñjapjjañapatakejj Jehová Diosaw encargasïna (Éxodo 40:38 liytʼäta). Ukhamajj kunapachatï qenayajj mä cheqat  yaqha cheqar onjjtäna ukhajja, tabernaculot wali jayan jakirinakas uñjapjjaspänwa. Ukhamatwa utjirinakapa carpanakap apthapisajj markankirinakamp chik sarjjapjjaspäna (Núm. 9:15-23). Ukatjja qollqet lurat pä trompetanakaw wali jachʼat tuktʼasirïna, ukhamatwa sarjjapjjañapätap yatipjjäna (Núm. 10:2). Ukhamajj tabernaculot wali jakʼan jakañajja, maynejj Jehová Diosamp suma amigöpkaspas ukham janiw sañ munkänti. Jan ukasti taqpach israelitanakaw Jehová Diosan invitadonakapäpjjaspäna, irpatäpjjarakispäna, jarkʼaqatäpjjarakispäna. Jichhürunakan ukhamarakiwa, kawkjansay jakstanjja, Jehová Diosajj munasistuwa, cuidistuwa, jarkʼaqarakistuwa.

JICHHA TIEMPON JEHOVÁ DIOSAJJ MÄ IGUALAK UÑJISTU

13. ¿Kunjamsa Jehová Diosajj jichha tiempon taqenir mä igualak uñjirïtap uñachtʼayi?

¹³ Yaqhep jilat kullakanakajja, Jehová Diosan Testigonakapan utjki uka sede mundial jakʼana jan ukajj mä sucursal jakʼanwa jakapjje. Yaqhepanakajj uka utanakanwa Diosar servipjje, ukhamatwa kunayman lurañanakamp yanaptʼapjje, Diosan markapan sarayapki uka jilatanakampis chikachasipjje. Yaqhepanakajj superintendente de circuitotwa servipjje, jan ukajj yaqha toqenakatwa Diosar sapürunjam servipjjaraki. Ukampis jilaparte jilat kullakanakajj janiw uka bendicionanak katoqapkiti. Jumatï uka jilat kullakanak taypinkstajja, Jehová Diosajj jumar munastamwa, invitadopjamaw katoqtʼastamjja, cuidaraktamwa, janipun ukat payachasimti (1 Ped. 5:7). Cheqas Jehová Diosajj taqe servirinakaparuw Biblian yatichäwinakap manqʼar uñtat churi, jupanakarojj irpiwa, jarkʼaqarakiwa.

14. ¿Kunjamsa Jehová Diosajj taqenir mä igualak uñjatap uñachtʼayaraki?

¹⁴ Oraqpachankir taqe jaqenakar Biblia churasaw Jehová Diosajj taqenir mä igualak uñjirïtap uñachtʼayaraki. Diosan Arupajj hebreo, arameo, griego arunakanwa qellqasïna.  ¿Uka arunakan Biblia liytʼapki ukanakakit Diosampejj jukʼamp sum apasipjjpacha? Janiw ukhamäkiti (Mat. 11:25).

15. Kunjamsa Jehová Diosajj taqenir mä igualak uñjatap uñachtʼayi uk qhanañchtʼam (fotonak uñjjattʼarakïta).

¹⁵ Jehová Diosajj janiw wali yatjjatatätasatsa, Bibliajj qellqaskäna uka arunak yatitasats amigopäñasatak invitkistuti. Jupajj janiw wali yatjjatat jaqenakarukejj yatiñ churkiti, jan ukasti taqeniruw churi. Bibliajj waranq waranqa arunakaruw traducisiwayi, ukhamatwa kunayman markankir jaqenakajj Biblian yatichäwinakapat beneficiasipjjaspa, Diosan amigopäñs yateqapjjarakispa (2 Tim. 3:16, 17).

JEHOVÁ DIOSAN INVITADOPÄSIPKAKIÑÄNI

16. ¿Khitinakarus Jehová Diosajj carpapan katoqe? (Hechos 10:34, 35).

¹⁶ Jehová Diosan carpapankañajj mä jachʼa bendicionapuniwa. Carpapar invitkistu uka Jehová Diosajj khuyapayasiri, wali munasiri, wali katoqtʼasiri ukhamawa. Maynejj kawkitäskpasa, kuna markatäskpasa, kuna costumbrenïskpasa, yatjjatatäskpas janisa, kuna kasta jañchinïskpasa, wawäskpas jilïrïskpasa jan ukajj chachäskpasa warmïskpasa, taqeniruw Jehová Diosajj mä igualak katoqestu. Invitadonakaparojj leyinakapar respetapjjaspa ukakwa mayi (Hechos 10:34, 35 liytʼäta).

17. ¿Kunsa jutïr yatichäwin yatjjataskañäni?

¹⁷ Salmo 15:1 textonjja, Davidajj akham sasaw Diosar jisktʼäna: “Jehová Dios Tata, ¿khitirak carpaman suma katoqatäspasti? ¿Khitirak sagrado qolluman jakaspasti?” sasa. Ukatsti Jehová Diosan amuytʼayatäsajj jupa pachpaw uka jisktʼanakar jaysäna. Jutïr yatichäwinjja, Jehová Diosan invitadopäskakiñatakejj kuna mayitanakampis jan ukajj requisitonakampis phoqañasa ukwa mä qhawqha yatjjataskañäni.