1-2. Undangan aha do na dilehon Jahowa tu akka naposona na setia?

 ISE do Jahowa i di hamu? Olo do didok hamu, ‘Bapakku do Ibana, Debatakku, dohot Ale-alekku.’ Tutu do i. Alai hea do tarpikkir hamu Jahowa boi dipatudos songon jolma na mangundang hamu gabe tamuna?

² Dipatudos Raja Daud do Jahowa songon tuan rumah, jala naposona na setia songon tamu ni Jahowa. Didok si Daud, “Ale Jahowa, ise do na boi gabe tamu di kemahmu? Ise do na boi tinggal di dolokmu na badia i?” (Ps. 15:1) Sian on taboto ma, boi do hita gabe tamu di kemah ni Jahowa manang gabe ale-alena. Tottu sada hasangapon do on di hita.

LOMO DO ROHA NI JAHOWA ASA GABE TAMUNA HITA

3. Ise do na parjolo gabe tamu di kemah ni Jahowa? Boha do perasaan ni Jahowa tu Anakna, jala boha do perasaan ni Anakna tu Jahowa?

³ Andorang so ditoppa Jahowa manang aha, holan sasada Ibana dope na adong. Dung i ditoppa Jahowa ma Anakna. Las do roha ni Jahowa manjakkon Anakna i gabe tamu na parjolo di kemahna. Didok do di Bibel, ‘hasian ni Jahowa’ do Anakna i. Jala ‘marlas ni roha do Anakna i di jolo ni Jahowa ganup tikki’.—Poda 8:30.

4. Ise do muse na gabe tamu di kemah ni Jahowa?

 ⁴ Dukkon i ditoppa Jahowa ma suru-suruan, jala diundang Jahowa do nasida gabe tamuna. Akka suru-suruan i didok do “anak ni Jahowa”, jala marlas ni roha do nasida raphon Jahowa. (Job 38:7; Dan. 7:10) Di tikki i, holan akka na mangolu di surgo do na gabe tamu ni Jahowa. Alai dukkon i ditoppa Jahowa ma jolma, jala boi do nasida gabe tamuna. Piga-piga sian nasida, i ma si Henok, si Noak, si Abraham, dohot si Job. Didok di Bibel, ale-ale ni Jahowa do nasida ala dioloi nasida Jahowa.—1 Mus. 5:24; 6:9; Job 29:4; Jes. 41:8.

5. Aha do na boi taboto sian surirang di Hesekiel 37:​26, 27?

⁵ Saleleng marratus taon, diundang Jahowa do akka halak asa gabe tamuna. (Jaha Hesekiel 37:​26, 27.) Contohna, sian surirang ni si Hesekiel taboto do na lomo roha ni Jahowa asa marale-ale naposona dohot Ibana. Dibahen Jahowa do “parjanjian dame” dohot nasida. Saut do surirang i tikki dibahen Jahowa marsada akka halak na lao mangolu di surgo dohot akka halak na lao mangolu salelengna di tano on. Dibahen Jahowa do nasida gabe “sada punguan” na tinggal di kemahna. (Joh. 10:16) Saut do surirang i di jamanta saonari!

DISARIHON JAHOWA DO HITA MANANG DIDIA PE HITA TINGGAL

6. Songon dia do sasahalak boi gabe tamu di kemah ni Jahowa, jala holan di sada inganan do kemah ni Jahowa?

⁶ Najolo dipakke jolma do kemah gabe inganan maradi dohot inganan parlinggoman sian cuaca. Molo adong na gabe tamu di kemah ni sasahalak, pasti disarihon do ibana. Dos songon i ma hita. Tikki talehon ngolutta tu Jahowa, hira na gabe tamu di kemah ni Jahowa do hita disi. (Ps. 61:4) Godang do tadapot makanan rohani, jala boi do hita marale-ale dohot halak asing na gabe tamu di kemah ni Jahowa. Alai holan di sada inganan do kemah ni Jahowa? Daong. Boasa boi tadok songon i? Molo lao hamu tu luar negeri misalna naeng kebaktian internasional, boi ma hamu pajuppang dohot akka halak na marlas ni roha gabe tamu di kemah ni Jahowa. Jadi manang didia pe hita tinggal, boi do hita gabe tamu di kemah ni Jahowa molo toktong setia hita manomba Ibana.—Pgk. 21:3.

7. Boasa boi tadok naposo ni Jahowa na setia naung mate toktong gabe tamu ni Jahowa? (Ida gambar.)

⁷ Boha do taringot akka naposo ni Jahowa na setia naung mate? Boi do tadok tamu di kemah ni Jahowa dope nasida? Ido. Boasa? Alana toktong dope diingot Jahowa nasida. Didok Jesus, “Tikki didok si Musa taringot  ramba na marsuga, dipaboa ibana do taringot tu halak na mate na lao dipahehe. Didok ibana do molo Jahowa i, ‘Debata ni si Abraham, Debata ni si Isak, dohot Debata ni si Jakkob’. Dang Debata ni na mate Ibana, alai Debata ni na mangolu do. Ai mangolu do nasida sude di adopanna.”—Luk. 20:​37, 38.

MANFAAT NA TADAPOT DOHOT NA IKKON TAULAHON

8. Aha do manfaatna molo gabe tamu di kemah ni Jahowa hita?

⁸ Songon kemah na gabe inganan maradi dohot inganan parlinggoman sian cuaca, dos songon i ma kemah ni Jahowa. Boi do i mangalinggomi hita sian akka na boi manegai hubungatta dohot Ibana. Jala dilehon Jahowa do janji taringot ari na naeng ro. Molo toktong jonok hita tu Jahowa, dang salelengna hita susa alani sitaonon na dibahen Sibolis. (Ps. 31:23; 1 Joh. 3:8) Di tano na imbaru, apusan ni Jahowa ma hamatean. Jala toktong do dilinggomi Jahowa akka naposona na setia sian akka na boi manegai hubungan ni nasida tu Ibana.—Pgk. 21:4.

9. Aha do na diharappon Jahowa sian tamuna?

⁹ Tottu sada hasangapon do di hita boi gabe tamu di kemah ni Jahowa. Gabe boi ma hita marlas ni roha ala marale-ale dohot Ibana sahat tu salelengna. Alai ikkon songon dia do pangalahotta asa boi toktong gabe tamuna? Molo diundang sasahalak hamu tu jabuna, lomo do rohamuna mamboto aha na diharappon ibana sian hamu. Contohna dipangido ibana do ra asa dibukka hamu sipatumuna tikki naeng masuk, jala dioloi hamu do i. Dos songon i ma, lomo do rohatta mamboto aha na dipangido Jahowa tu akka halak na naeng toktong gabe tamu di kemahna. Holongta tu Jahowa do na mangonjar rohatta mangulahon aha pe “na hombar tu lomo ni roha ni Jahowa”. (Kol. 1:10) Memang Ale-aletta do Jahowa, alai taingot ma Debata jala Bapakta do Ibana na ikkon tapasangap. (Ps. 25:14) Molo taingot on jala tapasangap ma Jahowa, tottu dang olo hita mangulahon manang aha pe na mambahen haccit rohana jala “marserep ni roha” di jolo ni Debata.—Mik. 6:8.

DANG DIBEDA-BEDAHON JAHOWA HALAK ISRAEL

10-11. Aha do buktina dang dibeda-bedahon Jahowa halak Israel tikki di padang gurun Sinai?

¹⁰ Dang dibeda-bedahon Jahowa akka tamuna. (Rom 2:11) Tarida do i sian cara ni Jahowa maradoppon halak Israel tikki di padang gurun Sinai.

¹¹ Dung dipalua Jahowa halak Israel sian Mesir, dipillit Ibana do akka malim lao marhobas di tabernakel. Dipillit Jahowa do muse halak Lepi lao mangulahon tugas na asing di tabernakel. Alai na gabe umholong do roha ni Jahowa tu nasida manang tu akka halak na tinggal di jonok ni tabernakel i sian halak Israel na asing? Daong. Dang dibeda-bedahon Jahowa naposona.

12. Bahen ma contoh pengaturan na dibahen Jahowa na mambuktihon dang dibeda-bedahon Ibana halak Israel. (2 Musa 40:38) (Ida gambar.)

¹² Sude do halak Israel boi gabe ale-ale ni Jahowa, dang soal adong tugasna di tabernakel manang na dang. Jala boi do nasida gabe ale-ale ni Jahowa dang soal jonok kemahna sian tabernakel i manang na dang. Sian dia taboto? Misalna, dipastihon Jahowa do asa boi diida sude bangso i api dohot ombun na songon tiang di atas ni tabernakel i. (Jaha 2 Musa 40:38.) Molo naik ombun i jala bergerak tu arah na asing, boi do i diida sude halak Israel. Bahkan halak na dao hian kemahna sian tabernakel i pe boi do mangida i. Gabe boi ma nasida paradehon barangna, manutup  kemah, jala rap borhat dohot halak Israel na asing. (4 Mus. 9:​15-23) Asing ni i, sude halak Israel boi mambege soara ni dua tarompet na sian perak, na dipakke lao manjou bangso i asa borhat. (4 Mus. 10:2) Takkas ma, dang gabe umholong roha ni Jahowa tu halak Israel na tinggal di jonok ni tabernakel dibandingkon halak Israel na tinggal dao sian tabernakel. Gariada sude halak Israel boi do gabe tamu ni Jahowa, jala boi do pos roha ni nasida na ditogu-togu jala dilinggomi Jahowa do nasida. Suang songon i ma hita saonari. Dilinggomi, disarihon, jala dihaholongi Jahowa do hita dang soal didia hita tinggal.

DANG DIBEDA-BEDAHON JAHOWA NAPOSONA DI TIKKITTA SAONARI

13. Boasa boi tadok dang dibeda-bedahon Jahowa naposona di tikkitta saonari?

¹³ Adong do naposo ni Jahowa na tinggal di jonok ni kantor pusat manang kantor cabang. Adong do muse na karejo di akka kantor i. Gabe boi ma nasida mangulahon akka ulaon di akka inganan i, jala rap bergaul dohot akka donganta na martanggung jawab disi. Adong do muse na gabe pengawas wilayah manang na dohot tu dinas sepenuh waktu khusus. Molo dang dapotmuna kesempatan na sarupa songon nasida, unang ma metmet rohamuna. Pos ma rohamuna, tamu ni Jahowa do tong hamu. Holong do roha ni Jahowa tu hamu sude, jala dilehon Ibana do sude na dihaporluhon hamu. (1 Ptr. 5:7) Sude do naposo ni Jahowa mandapot makanan rohani, petunjuk, dohot parlinggoman sian Jahowa.

14. Aha do muse buktina dang dibeda-bedahon Jahowa jolma?

¹⁴ Aha do muse buktina dang dibeda-bedahon Jahowa jolma? Dipastihon Ibana do asa boi Bibel dijaha sude halak di liat portibi on. Memang bahasa asli ni Bibel, i ma bahasa Heber, Aram, dohot Junani. Alai holan akka halak na boi manjaha Bibel di bahasa aslina do na gabe unjonok hubunganna tu Jahowa? Dang songon i.—Mat. 11:25.

15. Ise do na boi mandapot bisuk ni Jahowa, jala aha do na boi taparsiajari taringot Jahowa sian on? (Ida gambar.)

 ¹⁵ Dang ikkon timbo sikkolatta manang taboto godang bahasa asa boi gabe ale-ale ni Jahowa. Alana dilehon Jahowa do bisukna tu sude halak di liat portibi on, dang holan tu akka halak na timbo sikkolana. Dipastihon Jahowa do asa boi Bibel dijaha sude halak. Nungnga diterjemahon be Bibel tu marribu bahasa. Jadi sude halak boi do mandapot manfaat sian Bibel jala marsiajar songon dia carana gabe ale-ale ni Jahowa.—2 Tim. 3:​16, 17.

TOKTONG MA GABE TAMU NI JAHOWA

16. Songon na disurat di Ulaon ni Apostel 10:​34, 35, halak na songon dia do na boi gabe ale-ale ni Jahowa?

¹⁶ Sada hasangapon do di hita boi gabe tamu di kemah ni Jahowa. Parholong do Jahowa, burju do Ibana, jala disarihon Ibana do sude tamuna. Dang adong na songon Ibana. Asing ni i, dang dibeda-bedahon Jahowa akka naposona. Dijakkon Ibana do hita sude, dang soal bawa manang borua hita, didia hita tinggal, songon dia latar belakangta, aha pendidikanta dohot sukutta, jala sadia umurta. Alai holan akka halak na mangulahon na sittong do na boi gabe tamuna.—Jaha Ulaon ni Apostel 10:​34, 35.

17. Aha do na lao tabahas di artikel na mangihut?

¹⁷ Di Psalmen 15:​1, didok si Daud do, “Ale Jahowa, ise do na boi gabe tamu di kemahmu? Ise do na boi tinggal di dolokmu na badia i?” Marhite panogu-noguon ni tondi parbadia, disurat si Daud do alus ni sukkun-sukkun i di Psalmen 15. Di artikel na mangihut, lao tabahas ma aha do na ikkon taulahon asa toktong gabe ale-ale ni Jahowa.