ARTIKEL PELAJAREN 23
LAGU 28 Jadi Teman Jahwe
Luar Biasa Kel Banci Jadi Tamu Jahwe
“KemahKu lit i tengah-tengah kalak e. Aku jadi Dibata kalak e.”—ESEK. 37:27.
INTINA
Guna nampati kita ngangkai kai kin maksudna jadi tamu bas kemah Jahwe, janah uga Jahwe mperdiateken kita.
1-2. Kai undangen Jahwe man umatNa si setia?
ADI lit si nungkuni kam bagenda, ‘Ise nge anggapndu Jahwe e?’ Banci saja nindu, ‘Jahwe e Bapakku, Dibataku, ras Temanku.’ Tapi banci saja lit ka si deban si banci katakenndu kerna Jahwe. Pernah nge anggapndu Jahwe e selaku Si Mpuna Kemah si ngundang kam jadi tamuNa?
2 Ipeseri Raja Daud Jahwe bagi Si Mpuna Kemah janah umatNa si setia bagi tamuNa. Nungkun Raja Daud, “O Jahwe, ise si banci jadi tamu bas kemahNdu? Ise si banci tading bas gunungNdu si badia?” (Ms. 15:1) Arah kata-kata enda siteh maka banci kita jadi tamu Jahwe, maksudna banci kita jadi temanNa. Pasti luar biasa kel siakap iundang Jahwe kita jadi tamuNa.
UNDANG JAHWE KITA JADI TAMUNA
3. Ise nge tamu Jahwe si pertama, janah uga nge perasan Jahwe ras tamuNa e?
3 Sope lit ciptan Jahwe, sisada ngenca Ia. Tapi, kenca ciptakenNa Jesus eme AnakNa sintua, Jesus me si jadi tamuNa si pertama si undangNa ku kemahNa. Kemah e sada gambaren ngenca. Meriah kel ukur Jahwe jadi Si Mpuna Kemah e. Nina Pustaka, AnakNa e me si jadi “sumber keriahen ukurNa” janah Jesus pe ‘lalap meriah ukurna i lebe-lebe Jahwe.’—Kua. 8:30.
4. Ise ka si undang Jahwe jadi tamu bas kemahNa?
4 Kenca si e, iciptaken Jahwe me malekat-malekatNa janah iundangNa malekat-malekat e jadi tamuNa. Bas Pustaka, malekat-malekat e igelari “anak-anak Dibata.” Meriah kel ukur malekat-malekat e ras Jahwe. (Jop 38:7; Dan. 7:10) Bas piga-piga waktu, si jadi tamu Dibata eme ciptanNa si tading bas surga ngenca. Tapi kenca ciptakenNa manusia, kalak e pe banci jadi tamuNa. Piga-piga tamu Jahwe e eme Enoh, Nuah, Abraham, ras Jop. Bas Pustaka, kalak e ikataken teman-teman Jahwe perban erdalan kalak e “ras Dibata si benar.”—Kej. 5:24; 6:9; Jop 29:4; Jes. 41:8.
5. Kai si banci siteh arah nubuat si lit bas Esekiel 37:26, 27?
5 Mbarenda nari seh ngasa gundari, terus iundang Jahwe teman-temanNa jadi tamuNa. (Baca Esekiel 37:26, 27.) Contohna, arah nubuat Esekiel siteh maka merhat kel Dibata gelah umatNa si setia banci rembak ras Ia. Erjanji Ia erban “perjanjin dame ras kalak e.” Nubuat e terjadi sanga kalak si ipilih ku surga ras kalak si arapenna nggeluh i doni, ersada bas kemah Jahwe selaku “sada rarasen.” (Joh. 10:16) Enda me si terjadi gundari!
IPERDIATEKEN JAHWE KITA I JAPA PE KITA TADING
6. Uga sekalak jelma banci jadi tamu bas kemah Jahwe, janah i ja nge kemah Jahwe e?
6 Bas jaman Pustaka, kemah eme ingan ngadi-ngadi janah banci kita erlindung i je adi la mejile cuaca. Tamu si lit bas kemah e pe pasti ijaga janah iperdiateken alu mehuli. Sanga sibaktiken geluhta man Jahwe, kita jadi tamu bas kemahNa. (Ms. 61:4) Melala kel sidat pangan rohani janah banci ka kita erteman ras tamu-tamu Jahwe si debanna. Tapi kemah Jahwe labo bas sada ingan saja. Contohna lawes kam ku luar negri, ikut atendu bas acara pertemuan istimewa. I je banci kam jumpa ras tamu Jahwe si debanna. Emaka adi setia kita ngelayani Jahwe, banci kita jadi tamu bas kemahNa la soal i japa pe kita tading.—Ket. 21:3.
7. Engkai maka sikataken kalak si setia si enggo mate tetap denga jadi tamu bas kemah Jahwe? (Nen ka gambar.)
7 Uga kerna kalak si setia si enggo mate? Kalak e tetap denga jadi tamu bas kemah Jahwe. Engkai? Perban kalak e tetap denga nggeluh bas ingeten Jahwe. Nina Jesus, “Kerna kekeken kalak mate, Musa sendiri si ngataken kerna si e bas kejadin i rambah duri, sanga lebuhna Jahwe ‘Dibata Abraham, Dibata Isak, ras Dibata Jakup.’ Ia labo Dibata kalak mate, tapi Dibata kalak si nggeluh. Sebap menurut Dibata, kerina kalak e nggeluh.”—Luk. 20:37, 38.
Umat Dibata si setia si enggo mate pe, tetap denga nge jadi tamu bas kemah Dibata (Nen paragrap 7)
MANPAAT RAS TANGGUNG JAWAP TAMU JAHWE
8. Kai saja nge manpaat si banci idat tamu Jahwe?
8 Bali bagi sada kemah si banci jadi inganta erlindung ras ngadi-ngadi, kemah Jahwe pe banci ngelindungi kita arah bahaya rohani janah erban tetap lit arapenta. Adi tetap kita ndeher ras Jahwe, kerina si la mehuli si arus siadapi perban ulah Setan, labo kari lit seh rasa lalap. (Ms. 31:23; 1 Joh. 3:8) Bas doni si mbaru pagi, terus lindungi Jahwe teman-temanNa si setia labo saja arah bahaya rohani, tapi termasuk ka arah kematen.—Ket. 21:4.
9. Kai si iarapken Jahwe ilakoken tamuNa?
9 Pasti sada kehamaten si mbelin kel siakap banci jadi tamu bas kemah Jahwe, janah banci jadi temanNa seh rasa lalap. Tapi gelah banci kita lalap jadi tamuNa, kai nge si perlu silakoken? Adi iundang kita jadi tamu ku rumah kalak, pasti siusahaken kel jadi tamu si mehuli. Siikutken kai sura-sura si mpuna rumah e. Adi la atena kita ersepatu masuk ku rumahna, pasti silakoken bage. Bage ka pe, adi terus ateta jadi tamu bas kemah Jahwe, perlu siteh kai sura-suraNa. Selain si e, perban keleng ateta Jahwe, siusahaken kel asa ngasupta gelah banci ‘tuhu-tuhu sisenangken Ia.’ (Kol. 1:10) Amin pe Jahwe e Temanta, perlu siinget maka Ia pe Dibatata ras Bapakta si patut sihamati. (Ms. 25:14) Adi terus siinget kerna si e janah tuhu-tuhu siergai Ia, la silakoken kai pe si la ngena ateNa. Pasti terus ateta ‘erdalan ras Dibatata alu meteh bana.’—Mi. 6:8.
JAHWE LA ERPILIHEN BAS JAMAN ISRAEL
10-11. Kai buktina Jahwe la erpilihen man kalak Israel?
10 Jahwe la erpilihen man tamu-tamuNa. (Rom. 2:11) Enda jelas teridah arah caraNa erurusen ras kalak Israel bas Taneh Mesawang Sinai.
11 Kenca kalak Israel ibebasken arah perbudaken i Mesir, ipilih Jahwe imam-imam guna ngelayani bas kemah ingan ersembah. Kalak Lewi pe isuruh ngelakoken tugas-tugas si deban bas kemah ingan ersembah. Perban kalak e ngelayani bas kemah ingan ersembah janah tading i deher ingan e, labo ertina kalak e buen iperdiateken Jahwe asangken kalak Israel si debanna. Engkai? Perban Jahwe la erpilihen.
12. Kai buktina maka Jahwe la erpilihen man kalak Israel? (Keluaren 40:38) (Nen ka gambar.)
12 Kerina kalak Israel banci jadi teman Jahwe amin pe kalak e la banci ngelayani bas kemah ingan ersembah, ntah pe ndauh inganna tading je nari. Contohna, ipastiken Jahwe gelah kerina bangsa Israel banci ngidah tiang embun ras tiang api si lit i datas kemah ingan ersembah. (Baca Keluaren 40:38.) Sanga pindah tiang embun e, kalak si tading bas ingan si ndauhna kel pe arah kemah ingan ersembah e, tetap denga banci idahna tiang embun e. Banci pepulungina barang-barangna, bongkarna kemahna, janah berkat ia radu ras kalak Israel si debanna. (Bil. 9:15-23) Kerina kalak Israel pe banci begina alu jelas sora dua trompet si jadi tanda kalak e arus berkat je nari. (Bil. 10:2) Emaka, adi sekalak jelma tading i deher kemah ingan ersembah, labo ertina deheren hubungenna ras Jahwe asangken kalak Israel si debanna. Tapi, kerina kalak Israel banci jadi tamu Jahwe, janah tek kalak e pasti kalak e iarak-arak Jahwe ras ilindungiNa. Gundari pe bage, keleng ate Jahwe kita, perdiatekenNa kita, janah lindungiNa kita, la soal i japa pe kita tading.
Pengaturen si iban Dibata kerna kemah ingan ersembah, mbuktiken maka Ia la erpilihen (Nen paragrap 12)
JAHWE LA ERPILIHEN BAS JAMANTA GUNDARI
13. Engkai maka banci sikataken Jahwe la erpilihen bas jamanta gundari?
13 Gundari lit umat Jahwe si tading ndeher ras kantor pusat ntah pe kantor cabang Saksi-Saksi Jahwe. Lit ka si ngelayani bas kantor-kantor e. Erkiteken si e, banci kalak e ikut bas erbage-bage kegiaten si lit i je janah ergaul ras kalak si lit tanggung jawapna i je. Selain si e, lit ka si ngelayani selaku pertua keliling ntah pe bas dinas sepenuh waktu khusus si debanna. Tapi adi kam la termasuk arah kalak e, teklah kam tetap denga nge kam banci jadi tamu Jahwe janah keleng ateNa kam. ItandaiNa kita sekalak-sekalak janah iberekenNa keperlunta. (1 Pet. 5:7) Ibereken Jahwe pangan rohani man tiap umatNa, iarak-arakNa kalak e, janah ilindungiNa.
14. Kai nge contoh si deban si mbuktiken Jahwe e la erpilihen?
14 Kai deba nari si mbuktiken Jahwe e la erpilihen? Ipastiken Jahwe gelah kerina jelma si lit i sebelang doni banci mbaca Pustaka. Tangtangna, Kitap-Kitap si Badia lit bas telu bahasa eme bahasa Heber, Aram, ras Junani. Tapi enda labo ertina kalak si banci mbaca Pustaka bas bahasa aslina, deheren hubungenna ras Jahwe asangken kalak si deban.—Mat. 11:25.
15. Kai buktina Jahwe la erpilihen? (Nen ka gambar.)
15 Labo perban meganjang sekolahta ntah pe perban siangkai bahasa asli Pustaka maka iundang Jahwe kita jadi temanNa. Iban Jahwe kepentarenNa banci idat kerina kalak i belang-belang doni, labo man kalak si meganjang sekolahna saja. KataNa eme Pustaka enggo iterjemahken ku bas ribun bahasa. Emaka, kerina jelma si lit i doni banci ndatken manpaat arah ajaren Pustaka janah banci erlajar uga carana jadi teman Jahwe.—2 Tim. 3:16, 17.
Pustaka si Badia lit bas erbage-bage bahasa. Engkai maka e mbuktiken maka Dibata e la erpilihen? (Nen paragrap 15)
TETAPLAH JADI TAMU JAHWE
16. Menurut Perbahanen Rasul-Rasul 10:34, 35, uga carana gelah banci kita jadi tamu bas kemah Jahwe?
16 Sada kehamaten si mbelin kel banci jadi tamu bas kemah Jahwe. Mehuli kel Ia, perkeleng, janah melumbar kel, la lit tandingenna. Selain si e, Jahwe la erpilihen. Alo-aloNa kerina kita jadi tamuNa, la soal i ja inganta tading, uga latar belakangta, sekolahta, sukuta, budayata, umurta, janah la soal kita dilaki ntah pe diberu. Amin pe bage, kalak si patuh man baNa ngenca si ialo-aloNa jadi tamuNa.—Baca Perbahanen Rasul-Rasul 10:34, 35.
17. I ja banci sidat terbuen keterangen kerna syarat jadi tamu bas kemah Jahwe?
17 Bas Masmur 15:1, nungkun Daud, “O Jahwe, ise si banci jadi tamu bas kemahNdu? Ise si banci tading bas gunungNdu si badia?” Alu penampat Jahwe, ikataken Daud jawapenna bas masmur e ka. Bas artikel seterusna, sibahas kari piga-piga syarat gelah banci kita terus jadi tamu bas kemah Jahwe.
LAGU 32 Ikutkenlah Jahwe
