ASU AYÉ’É 23
JIA 28 Asu na bi bo bemvôé be Yéhôva
Yéhôva a yi na bi bo beyeñe bé
“Tabernacle wom a ye fe tabe be be, ma ye bo Zambe wop.”—ÉZÉK 37:27.
BETA BE MAME BIA ZU YEN
Ayé’é di da zu volô bia na bi tu’a wôk atinane ya e bo beyeñe ya nda éndelé Yéhôva, a avale Yéhôva Mba’ale wongan a nyoñe ngap a bia.
1-2. Yéhôva a bañete benya bebo bisaé bé na be bo jé?
NGE môt éziñ a sili wo na, wo yene Yéhôva aya? Ô ne yalane na: ‘Yéhôva a ne Ésa wom, Zambe wom a Mvôé jam.’ Yéhôva a bili fe biyôlé mese’esa bife ô ne belane bie. Ve ye wo yene fe nye ane Mba’ale wôé?
2 Njô bôte David a nga ve’e amvôé é ne zañe Yéhôva a benya bebo bisaé bé a élat é ne zañe mie ndaa a beyeñe bé. A nga sili na: “A Yéhôva, za a ye tabe nda éndelé jôé? Za a ye tabe nkôle wôé ô ne étyi?” (Bsa. 15:1) Éfus éte ja ye’ele bia na, bi ne bo beyeñe ya nda éndelé Yéhôva, nge ke bemvôé bé. Ngo’o abime beta mbañete te!
YÉHÔVA A YI NA BI BO BEYEÑE BÉ
3. Za Yéhôva a nga taté bañete nda éndelé jé, a aval avé Yéhôva ba nneñe wé be mbe be wô’ôtan?
3 Yéhôva a mbe étam ôsusua na a taté na a té biôme bise. Ve ane éyoñ é nga lôt, a nga bañete ntôle Mone wé nda éndelé jé. Yéhôva a mbe angôndô ya meva’a ya ba’ale nneñe wé. Kalate Zambe a jô na nye’ane Yéhôva a mbe a nye’e Mone wé ô mbe “ngum aval.” A Mone wé a nga “fôn asu dé nnôm éto.”—Mink. 8:30.
4. Beza Yéhôva a nga ke ôsu a bañete nda éndelé jé?
4 Yéhôva a nga té fe beéngele, ane a nga bañete be na be fe be zu bo beyeñe bé. Kalate Zambe a loone beéngele na “bone be Zambe” a ba liti na be ne meva’a ya tabe a Yéhôva. (Job 38:7; Dn. 7:10) Zambe a nga bo angôndô ya abui mimbu a bili bemvôé fo’o ve yôp été, vôm a nyiñ. Mvuse ya valé, a nga té bôt a bo na be fe be bo beyeñe bé. Ane éyoñ é nga lôt, Zambe a nga tobe Hénoc, Noé, Abraham, a Job ane bemvôé bé. Kalate Zambe a loone benya bebo bisaé be Zambe bete na bemvôé be Yéhôva amu “be nga wulu a [nya] Zambee.”—Mett. 5:24; 6:9; Job 29:4; Ésa. 41:8.
5. Jé nkulan ajô bia koone wô e kalate Ézéchiel 37:26, 27 ô ne ye’ele bia?
5 Ane mimbu mi nga lôt, Yéhôva a nga ke ôsu a bañete bemvôé bé na be zu bo beyeñe bé. (Lañe’e Ézéchiel 37:26, 27.) Éve’an é ne na, nkulan ajô Ézéchiel wo ye’ele bia na Zambe a yi na benya bebo bisaé bé be bi ngul élat a nye. A ka’ale na a ye bo “élate ya mvo’é a be.” Nkulan ajô ôte wo kobô ajô ya éyoñe bôte be bili ndi nleme ya ke nyiñe yôp a ba be bili nji nleme ya nyiñe si va ba ye bo nlatane nda éndelé jé ane “mbame wua.” (Jean 10:16) Éyoñ éte ébiene ñhe ji!
ZAMBE A NYOÑE NGAP A BIA VÔM ASE BI NE
6. Jé môt a yiane bo asu na a bo nneñe ya nda éndelé Yéhôva, a vé nnye bi ne koone nda éndelé Jé?
6 Kalate Zambe a jô na melu mvuse nda éndelé môt, é mbe mbamba vôme ya wo’on a sobô. Nneñ a mbe a yange na môt a te nye bañete a kôme nyoñe ngap a nye. Éyoñe bia ve biabebiene ngumba be Yéhôva, bia bo beyeñe ya nda éndelé jé. (Bsa. 61:4) Bia bu’uban a abui bidi ya nsisim, bia late fe mbamba memvôé a beyeñ be Yéhôva bevok. Ve nda éndelé Jé é nji tebe ngume vôm. Ô yianeya ke mesi mefe éko éziñ asu étôkan é ne ngum aval, a tôbane bôte bevo’o be nga bi ébotane ya zu tabe nda éndelé Zambe. Nda éndelé Yéhôva é ne vôm ase benya bebo bisaé bé be ne.—Nlitan 21:3.
7. Amu jé bi ne jô na benya bebo bisaé be Zambe be nga wu be ngenane be vee nda éndelé Yéhôva? (Fombô’ô fe fôtô.)
7 Jé ke bi ne jô a lat a biwôlô bebo bisaé bi Zambe bi nga wu? Ye bi ne jô na be fe be ngenane beyeñe ya nda éndelé Yéhôva? Ôwé! Amu jé bi ne jô nalé? Amu môt ase ya be be a ngenane vevee ôsimesane Yéhôva. Yésus a nga jô na: “Mfa’a ya ñwômane miñwuan, to’o Moïse a nga kobô de nkañete mon élé a be’e biyo, éyoñ a loone Yéhôva na, ‘Zambe Abraham a Zambe Isaac a Zambe Jacob.’ A nji bo Zambe miñwuan, a ne Zambe bevevee, amu e mise mé, bese be vee.”—Luc 20:37, 38.
To’o benya bebo bisaé be Zambe be nga wu be ngenane beyeñe ya nda éndelé Yéhôva (Fombô’ô abeñe 7)
MAME BIA YIANE BO A BIBOTANE BIA BI ÉYOÑE BI NE BEMVÔÉ BE YÉHÔVA
8. Mvome fé beyeñe be Yéhôva ba bu’ubane je nda éndelé jé?
8 Aval ane nya nda éndelé a ne mbamba vôme ya wo’on a sobô, nda éndelé Yéhôva ja ba’ale beyeñe bé asu na jôm éziñ é bo te ndamane mbamba élate be bili a nye, a ja ve be nya ndi nlem asu melu ma zu. Nge bia ke ôsu a wulu ba’aba’a a Yéhôva, Satan a ye ke kui na a bo na bi tôbane nju’u wo ye tabe nnôm éto. (Bsa. 31:23; 1 Jean 3:8) Mfefé émo, Yéhôva a ye ke ôsu a ba’ale benya bebo bisaé bé sake fo’o ve mfa’a ya nsisim étam, a ye fe bo na be bo te beta wu.—Nlitan 21:4.
9. Jé Yéhôva a yi na beyeñe bé be bo?
9 E bo nneñe ya nda éndelé Yéhôva a ne beta mvom.—Bi ne bo benya bemvôé bé a amvôé éte é ne tabe nnôm éto. Avale ntaban avé bia yiane bi nge bia yi na bi ke ôsu a bo beyeñe be Yéhôva? Nge môt éziñ a te wo bañete nda jé, wo ye jeñe na ô yeme jôm a yi na ô bo. Éve’an é ne na, éko éziñe mie ndaa a ne yi na ô vaa bikôndé ôsusua na wo nyiine nda été, a wo ye de bo a nlem ôse. Avale te da da, bia fe bia kômbô yeme jame Yéhôva a yi na bôte ba kômbô ke ôsu a bo beyeñe ya nda éndelé jé be bo. Nye’ane bia nye’e Yéhôva wo tindi bia na, bi bo jam ése bi ne ngule ya bo asu na bi “ve nye nleme mvaé mimfa’a mise.” (Col. 1:10) É ne été na Yéhôva a ne Mvôé jangan, ve a ne fe Zambe wongan, Ésa wongan a nyu a yian ésemé jangan. (Bsa. 25:14) Bi nji yiane ve’ele vuane jam éte, bia yiane fe bi beta ésemé asu dé éyoñ ése. Éyoñ bia semé Yéhôva avale te, bia ye bo te bo jam é ne ve nye nlem abé a bia ye “wulu a nje’ebane nlem” a Zambe wongan.—Mich. 6:8.
YÉHÔVA A NGA LITI NA A NJI BO ÔBANGAM AVAL A NGA BELANE BONE BE ISRAËL
10-11. Aval avé Yéhôva a nga belane bone be Israël nkôte si ya Sinaï, a aval avé jam éte é nga liti na a nji bo ôbangam?
10 Yéhôva a ne te bo ôbangam éyoñ a belane beyeñe bé. (Rom. 2:11) Bi ne fe yene na Yéhôva a nji bo ôbangam éyoñe bia yen aval a nga belan ayoñe Israël nkôte si ya Sinaï.
11 Éyoñe Yéhôva a nga kôté ayoñ Israël minkôm Égypte, a nga telé beprêtre asu na be saé e tabernacle. A nga jô fe belévite na be nyoñe ngap a bisaé bife bi mbe bi boba’ane tabernacle. Ye Yéhôva a nga dañe nyoñe ngap a bôte be mbe be saék tabernacle, nge ki a bôte be mbe be nyiñe fefele tabernacle a lôte bôte bevok? Momo! Yéhôva a nji ve’ele bo ôbangam.
12. Nta’ane mam ôvé Yéhôva a nga bo nkôte si ô nga liti na a nji bo ôbangam? (Nkôlan 40:38) (Fombô’ô fe fôtô.)
12 Mone Israëlite ase a mbe ngule ya bo mvôé Yéhôva, to’o a mbe a saék tabernacle nge momo, to’o nda éndelé jé é mbe ôyabe nge bebé a tabernacle. Éve’an é ne na, Yéhôva a nga vé mise na ayoñ Israël ése é bo ngule ya yene nsume nkut a nsume nduan ô mbe ô tele ôsu tabernacle. (Lañe’e Nkôlan 40:38.) Éyoñe nkut ô nga taté na wo ke afôla afe, to’o bôte be mbe ôyap a tabernacle be mbe ngule ya yene wô, a ka’a biôme biap a ba’a menda me éndelé map a ke nsamba a bôte bevok. (Nlañan. 9:15-23) Bôte bese be mbe ngule ya wô’ô ane metoñe ma loñ, nalé a mbe a volô môt ase na a yeme na be nga yiane kôlô vôm éziñ a ke vôme mfe. (Nlañan. 10:2) Da kôme yené ne ngeññ na sa ke amu na môt a mbe fefele tabernacle nde a mbe a bili mbamba élat a Yéhôva a dañe bôte be mbe be too ôyap a tabernacle. Ve mone Israëlite ase a mbe ngule ya bo nneñe Yéhôva a tabe ndi na A ye wulu a nye a na a ye ba’ale nye. Avale te da da, to’o bia nyiñ abôta si avé melu ma, bi ne tabe ndi na Yéhôva a nye’e bia, a nyoñe ngap a bia, a na a ba’ale fe bia.
Tabernacle a mbe a tele zañ ayoñ Israël a mbe ndeme ja liti na Yéhôva a ne a be (Fombô’ô abeñ 12)
YÉHÔVA A LITI FE NA A NJI BO ÔBANGAME MELU MA
13. Amu jé bi ne jô melu ma na Yéhôva a nji bo ôbangam?
13 Melu ma, bebo bisaé be Zambe béziñe be too fefele Tin ékôane nge ke fefele Béthel Bengaa be Yéhôva. Bôte bevo’o ba saé bevôme bete, ajô te be ne ngule ya nyoñe ngap a abui bisaé da bobane wôé, a saé fufulu a bôte ba wulu a ékôane Yéhôva. Bôte bevo’o ba bo avale bisaé afe é ne ngum aval asu Yéhôva, ba bevo’o ki ba saé ane bejome bikôane bekristen. Nge ô ne môte wua ya mbame bôte wo bu’ubane ki a ésaé jia ya été éyoñe ji, ô ne tabe ndi na wo fe ô ne nneñe Yéhôva a na a nye’e wo. Yéhôva a nye’e beyeñe bé bese a nga bañete, nde fe a nyoñe ngap a môt ase ya be be. (1 P. 5:7) Yéhôva a ve mbo ésaé wé ase bidi ya nsisim, a liti nye zen a ba’ale fe nye.
14. Jam avé afe da liti na Yéhôva a nji bo ôbangam?
14 Jam afe da liti na Yéhôva a nji bo mba’ale a ne ôbangam é ne na, Mba’ale wongan a nga bo na bôte bese ya si ése meku’u menyine be bi fane ya lañe Kalate Zambe den. Atata’a, mimfufube mintilane mi nga tilibane minkobô milal: nkobô Hébreu, nkobô Araméen, a nkobô Grec. Ye bôte be ne lañe Kalate Zambe minkobô be nga taté nye tili be bili ngule élat a Yéhôva a dañe bôte be vo’o ki lañe nye minkobô mite. Momo, sa ke nde é ne nalé.—Matt. 11:25.
15. Mame mevé ma bo’olô na Yéhôva a nji bo ôbangam? (Fombô’ô fe fôtô.)
15 Yéhôva a bañete ke bia na bi bo bemvôé bé amu bi ne beta beyeme sikôlô nge ke amu bia yeme minkobô milale be nga taté tili Kalate Zambe. Yéhôva a kañese na bôte bese ya si ése be bi fe’e ja so be nye, sa ke ve bôte be nga bo beta besikôlô. Kalate Zambe a nga tiliban a ngule ya mfufube nsisim, a ntoo nkôñelane dene minkobô betoyini, nalé a volô bôte ya si ése na be bi fane ya bu’uban a ñye’elane wo so be Yéhôva a yé’é aval avé be ne bo bemvôé bé.—2 Tim. 3:16, 17.
Aval avé nkôñelane Kalate Zambe abui minkobô wo liti na Yéhôva a nji bo ôbangam? (Fombô’ô abeñ 15)
KELE’E ÔSU A BO “MAME MA VE” YÉHÔVA NLEM AVAK
16. Avale kalate Mame minlôman 10:34, 35 a liti, aval avé bi ne ke ôsu a yené mvaé mise me Yéhôva?
16 A ne beta mvom asu dangane na Yéhôva a nyoñe bia ane beyeñe ya nda éndelé jé. A ne mbamba nlem, angôndô ya nye’an, a avale anyebe ô vo’o ve’ele simesan. Nde fe, a nji bo ôbangam, a nyoñe bia bese mvo’é teke ajô a vôme bi too, vôme bi nga yaé, abime besikôlô bi boya, nyul ékôbe jangan, ayoñe dangan, ôkala wongan, to’o bi ne fame nge minga. Ve bôte Yéhôva a kañese ane beyeñe bé be ne fo’o ve ba ba bo nye mewôk.—Lañe’e Mame minlôman 10:34, 35.
17. Jé bia ye yen ayé’é da zu?
17 Avale kalate Besam 15:1 a jô, David a nga bôône minsili mi: “A Yéhôva, za a ye tabe nda éndelé jôé? Za a ye tabe nkôle wôé ô ne étyi?” Yéhôva a nga belane David asu na a yalane minsili mite e Besam 15. Ayé’é da zu, bia ye yene mame méziñe bi ne bo asu na bi ve Yéhôva nlem avak a ke ôsu a bo bemvôé bé.
JIA 32 Tebe’e ngame Yéhôva!
