1-2. Weh invitayshan Jehoava gi ih peepl?

 IF SOHNBADI aks yu, ‘Hoo Jehoava tu yoo?ʼ Weh yoo wuda seh? Maybi yu mait seh dat hihn da yu Pa, yu Gaad, ahn yu Fren. Er maybi yu mait tink bowt sohn ada taitl fi Jehoava. Bot yu eva tink bowt Jehoava az sohnbadi weh invait yu eena ih tent?

² King Dayvid kompyaa di rilayshanship weh Jehoava ga wid Ih peepl tu sohnbadi weh invait adaz az wahn ges eena ih hows. Hihn mi seh: “Oa Jehoava, da hoo ku bee wahn ges eena yu tent fareva? Da hoo ku liv pahn yu hoali mongtin?” (Saa. 15:1) Fahn dis vers, wi laan dat wi ku bee Jehoava fren. Yu noh tink dat dis da wahn wandaful invitayshan fahn Jehoava?

JEHOAVA WAAHN WI BEE WAHN GES EENA IH TENT

3. Hoo da-mi di fers ges eena Jehoava tent ahn how Jehoava an ih ges mi feel bowt eech ada?

³ Bifoa Jehoava mi mek eniting, hihn mi deh bai ihself. Bot wen hihn mi kriyayt ih fersbaan Son, hihn mi invait ahn fi bee wahn ges eena ih tent. Jehoava mi hapi fi du dis. Di Baibl seh dat Jehoava mi “espeshali laik” ih son, an ih son mi “rijais fronta [Jehoava] aal di taim.”—Prov. 8:30.

4. Hoo els Jehoava mi invait fi bee wahn ges eena ih tent?

 ⁴ Afta dat Jehoava mi kriyayt aynjelz ahn hihn mi invait dehn eena ih tent tu. Di Baibl rifaa tu di aynjelz az “Gaad son dehn,” an ih seh dat dehn hapi fi deh wid Jehoava. (Joab 38:7; Dan. 7:10) Fi wahn lang taim onli dehn wan weh mi deh wid Jehoava eena hevn kuda mi bee ih fren. Bot laytaraan, Jehoava mi invait hyoomanz fi bee wahn ges eena ih tent. Som a dehn da-mi Eenak, Noawa, Aybraham, ahn Joab. Di Baibl seh dat dehn da-mi Jehoava frenz, ahn dehn liv “eena wahn way weh pleez Gaad.”—Jen. 5:24; 6:9; Joab 29:4; Isa. 41:8.

5. Weh wi laan fahn Ezekiel 37:​26, 27?

⁵ Jehoava kantinyu fi invait ih peepl fi kom eena ih tent. (Reed Ezekiel 37:​26, 27.) a Eena Izeekyel prafesi wi laan dat Jehoava reeli waahn mek peepl weh laayal tu hihn bee ih fren. Hihn pramis fi mek “wahn kovenant wid dehn fi mek shoar dat dehn ga pees.” Dis prafesi taak bowt how aala Jehoava peepl, weda dehn ga di hoap fi liv da hevn er pahn ert, wahn deh tugeda eena Jehoava tent laik “wan flak.” (Jan 10:16) Ih noh amayzin fi si dat dis di hapm rait now?

NOH MATA WEHPAAT WI DEH JEHOAVA WAHN TEK KAYR A WI

6. Weh wi ku du fi bee wahn ges eena Jehoava tent, ahn wehpaat fi hihn tent deh?

⁶ Eena di Baibl wahn tent da sohnweh wehpaat sohnbadi ku res ahn protek ihself fahn di weda. Wahn ges weh geh invaitid fi goh eena da tent noa dat ih wuda geh chreet gud. Sayhn way soh, wen wee dedikayt wi laif tu Jehoava, wi geh fi bee wahn ges eena ih simbolik tent. (Saa. 61:4) Eena da tent wi ga evriting weh wi need fi kip wi frenship wid Jehoava schrang, ahn wi injai wahn gud rilayshanship wid wi bradaz ahn sistaz weh deh eena da tent. Bot yoo tink da tent deh da jos wan plays? No, wi ku fain it eniway wehpaat Jehoava peepl deh. (Rev. 21:3) Fi egzampl, if yu mi vizit wahn nada konchri fi wahn kanvenshan  yu geh fi si ada peepl weh hapi fi deh eena Jehoava tent. Noh mata wehpaat wi goh, az lang wi obay Jehoava, wee wahn ku bee wahn ges eena fi hihn tent.

7. How wi noa dat Jehoava frenz weh ded da stil wahn ges eena fi hihn tent? (Koment pahn di picha.)

⁷ How bowt Jehoava fren dehn weh ded? Yu tink dehn stil deh eena Jehoava tent? Yes! Bikaaz Jehoava memba dehn; tu hihn dehn stil alaiv. Jeezas mi seh: “Eevn Moaziz, eena di akonk bowt di prikl bush weh mi-di bon op, mi seh dat di ded wahn kohn bak tu laif. Hihn mi kaal Jehoava ‘di Gaad a Aybraham ahn di Gaad a Aizak ahn di Gaad a Jaykop.ʼ Hihn da di Gaad a di livin, kaaz aala dehn livin tu hihn. Hihn da noh wahn Gaad a di ded.”—Look 20:​37, 38.

HOW WI BENIFIT AHN WEH WI NEED FI DU?

8. How Jehoava frenz benifit wen dehn deh eena ih tent?

⁸ Jos laik how wahn tent shelta wi ahn mek wi feel kaam, Jehoava tent protek wi fahn eniting weh ku damij wi rilayshanship wid hihn ahn gi wi wahn reel hoap fi di fyoocha. Az lang az wi stay kloas tu Jehoava, notn weh Saytan du ku laas fareva. (Saa. 31:23; 1 Jan 3:8) Eevn eena di fyoocha, Jehoava wahn kantinyu fi protek wi fahn eniting weh ku damij wi rilayshanship wid hihn ahn hihn wahn geh rid a det.—Rev. 21:4.

9. Weh Jehoava ekspek ih ges dehn fi du?

⁹ Da wahn privilij fi bee Jehoava fren ahn fi mek da frenship groa. Bot weh wi need fi du fi kantinyu bee ih fren? If sombadi invait yu da dehn hows, yu wuda waahn noa weh yu ku du fi bee wahn gud ges. Fi egzampl, dehn mait aks yu fi tek aaf yu shooz bifoa yu goh eena dehn hows, ahn fi shoar yu wuda waahn du eniting fi pleez da persn. Sayhn way soh, wen Jehoava invait wi eena fi hihn tent wi waahn noa weh wi need fi du fi kantinyu bee wahn ges eena ih tent. Wi lov fi Jehoava wahn moov wi fi du eniting wi kud fi “bring prayz tu hihn.” (Kol. 1:10) Eevn doa Jehoava da wi fren, wi neva waahn ferget fi shoa ahn rispek bikaaz hihn da wi Gaad ahn Faada. (Saa. 25:14) Sayka di rispek weh wi ga fi Jehoava, wi noh waahn du notn weh wahn hert ahn. Wi waahn du wi bes fi “liv wahn modes laif.”—Mic. 6:8.

JEHOAVA MI CHREET AALA DI IZRELAIT DEHN DI SAYHN WAY EENA DI WILDANES

10-11. How Jehoava mi chreet di Izrelait dehn eena di wildanes ahn how dat proov dat ih mi fyaa wid dehn?

¹⁰ Jehoava chreet evribadi eena ih tent di sayhn way. (Roam. 2:11) Wi laan dis fahn di way hihn mi chreet di Izrelait dehn da di wildanes da Sainai.

¹¹ Afta Jehoava mi free ih peepl fahn Eejip, hihn mi chooz som a di Izrelait dehn az prees fi serv da di tabernakl. An ih mi chooz di Leevait dehn fi du difrent werk da di tabernakl. Yu tink Jehoava mi chreet di peepl weh mi-di serv da di tabernakl er di peepl weh mi-di liv kloas tu it beta dan di ada Izrelait dehn? No! Jehoava chreet evribadi di sayhn way.

12. How di way how Jehoava chreet di Izrelait dehn eena di wildanes shoa dat hihn fyaa? (Eksodos 40:38) (Koment pahn di picha.)

¹² Aala di Izrelait eena di kyamp mi ga di privilij fi ga wahn kloas frenship wid Jehoava, noh mata if dehn mi serv eena  di tabernakl er nat ahn noh mata wehpaat dehn mi liv. Joorin di day, di hoal nayshan kuda mi si di klowd oava di tabernakl, ahn joorin di nait dehn kuda mi si di faiya oava it. (Reed Eksodos 40:38.) Soh weneva di klowd mi staat moov, evribadi kuda mi seeʼt, eevn dehn wan weh mi liv faar fahn it. Dehn kuda mi pak op dehn tingz, tek dong dehn tent, ahn staat tu chravl wid evribadi els. (Num. 9:​15-23) An evribadi kuda mi hyaa di lowd song fahn di too silva chrompit ahn noa dat da mi taim fi goh. (Num. 10:2) Soh jos bikaaz som a dehn mi liv kloasa tu di tabernakl noh meen dat dehn mi ga wahn kloasa frenship wid Jehoava. Insted, evribadi kuda mi bee Jehoava ges ahn noa dat hihn mi wahn gaid ahn protek dehn. Sayhn way soh, tudeh noh mata wehpaat wi liv Jehoava lov wi, ih tek kayr a wi, an ih protek wi.

JEHOAVA CHREET EVRIBADI DI SAYHN WAY TUDEH

13. Wat da wan way Jehoava shoa dat ih chreet evribadi di sayhn way tudeh?

¹³ Som a wi liv kloas tu wahn branch aafis er werl hed kwaataz, bot dat noh meenz dat Jehoava wahn chreet wi difrent; hihn chreet evribadi di sayhn way. Som a wi bradaz ahn sistaz eevn werk da dehnya plays. Sayka dis, dehn geh fi tek paat eena lata difrent tingz weh hapm da dehnya plays, ahn dehn geh fi spen taim wid di bradaz weh di tek di leed. Som serv az serkit oavaseeya er eena wahn difrent kaina speshal ful-taim servis. Eevn if dehn du tingz weh yoo noh geh fi du, yu ku bee shoar dat yoo da stil wahn ges eena Jehoava tent ahn hihn lov yu. Hihn noa eech an evri wan a wi ahn hihn gi wi weh wi need. (1 Peet. 5:7) Jehoava gi aala ih peepl spirichwal food an ih gaid ahn protek dehn.

14. Wat da wahn neks way Jehoava shoa dat ih chreet evribadi di saym?

 ¹⁴ Wahn neks way how Jehoava shoa dat ih chreet evribadi di sayhn way da dat hihn mek di Baibl avaylabl tu evribadi rong di werl. Di Baibl mi fers geh rait eena Heebroo, Aramayik, ahn Greek. Yoo tink dat di peepl weh noa dehndeh langwij ga wahn kloasa rilayshanship wid Jehoava bikaaz a dat? No, da noh soh tingz werk.—Mach. 11:25.

15. Wat els bowt di Baibl proov dat Jehoava chreet evribadi di sayhn way? (Koment pahn di picha.)

¹⁵ Yu noh need wahn hai ejukayshan er noa di orijinal langwij a di Baibl fi mek yu ku bee Jehoava fren. Jehoava mek it pasabl fi evribadi geh wizdom fahn di Baibl noh mata weh kaina ejukayshan dehn ga. Di Baibl geh chranslaytid eena towznz a langwij, ahn bikaaz a dat peepl aal oava di werl ku reed it ahn laan how dehn ku bee Jehoava fren.—2 Tim. 3:​16, 17.

KANTINYU BEE JEHOAVA GES

16. Bays pahn Aks 10:​34, 35, how wee ku kantinyu bee Jehoava ges?

¹⁶ Da wahn aana fi mek Jehoava invait wi az wahn ges eena ih tent. Dehn noh ga nobadi weh lov wi ahn tek kayr a wi az gud az Jehoava. Hihn invait aala wi fi bee ih fren noh mata wehpaat wi liv, how wi groa op, how moch ejukayshan wi ga, weh langwij wi taak, noh mata if wi yong er oal, er if wi da man er wuman. Bot, onli dehn wan weh du weh hihn seh ku bee wahn ges eena fi hihn tent.—Reed Aks 10:​34, 35.

17. Wehpaat wi wahn fain moa infamayshan bowt how wi ku kantinyu bee Jehoava ges?

¹⁷ Da Saam 15:​1, Dayvid mi aks dehnya kweschan: “Oa Jehoava, da hoo ku bee wahn ges eena yu tent fareva? Da hoo ku liv pahn yu hoali mongtin?” Jehoava mi yooz Dayvid fi ansa dehnya kweschan. Eena di neks aatikl, wi wahn taak bowt som a di tingz weh wi need fi du fi pleez Jehoava ahn kantinyu bee ih ges.