1, 2. Ka lubuidun chansi líchugubei Heowá woun?

 LUN hamuga halügüdǘn ida liña lan harihini Heowá, másiñati hóunabuña lan hamuga: “Ariha numuti keisi numada, keisi Núguchi ani kei Nubungiute”. O gayaraati híridun amu katei líbeina lira. Hariñaguña hamugati ariha humani keisi aban Bungiu le eresibirubadün buidu?

² Góubaguagüda lumuti meha urúei Dawidi lumadagua Heowá hama lubúeingu ha úaraguabaña luma lubuidun ligaburi lóuserun aban agunbirahati gürigia lúbiñoun, álügüdahati: “Aburemei, Ka gayaraabei laganóun biñuarü? Ka gayaraabei laganóun lidan buwübüri le sándubei?” (Sal. 15:1). Arufudati dimurei burí le, gayara lan waganóun liñúarü Heowá, lidan amu dimurei, gayara lan lumadagu wamá. Ma lubuidun chansi le wámabei!

BUSENTI HEOWÁ LUN WAGANÓUN TIDAN LIKIANPUN

3. Ka furumiñeti gürigia lagunbirahabei Heowá lurugabun kamá hamuga tidoun likianpun, ani ida liña hasandiragun biángubei hagía houngua?

³ Lábuguarügüñein meha Heowá lubaragiñe ladügüni sun katei. Hesusu le Lisaani Heowá, ligía furumiñetibei aganóuti lurugabu, kamá hamuga tidan likianpun. Ma meha lueirin lugundan Heowá lau lagunbirihani Liráü tidoun likianpun. Ariñagatu Bíbülia weiri lan lugundan Heowá lau Lisaani ani gúndaati Hesusu luagu ñein lan luma (Ari. 8:30).

4. Ka burí agunbiraha láañabaña Heowá aganóua tidan likianpun?

⁴ Dan lárigiñe, adüga lumutiña Heowá ánheligu ani agunbiraha lumutiña giñe lun haganóun tidan likianpun. Watu Bíbülia houn ánheligu lisaanigu Bungiu, ani ariñagatu giñe gunda  hamá lau liñúarüñanu lan Heowá (Hob. 38:7; Dan. 7:10). Luagu saragu dan, hámarügüñein meha ha awinwandubaña luma yágüta sielu, gamadagua lan Heowá. Dan lárigiñe, aba ladügüniña Heowá gürigia ani aba giñe lagunbirahaniña tidoun likianpun. Ru lumuti giñe Heowá chansi le houn fiu lubúeingu ha úaraguabaña kéiburi Enoku, Noé, Abüraámü luma Hobu. Ani ariñagatu Bíbülia lumadagu lan meha Heowá hagía (Agu. 5:24; 6:9; Hob. 29:4; Isa. 41:8).

5. Ka wafurendeirubei lídangiñe profesía le áfuachubei lidan Esekiéli 37:​26, 27?

⁵ Lau lásügürün dan, sigiti Heowá agunbirahaña lumadagu lun haganóun liñúarü (aliiha huméi Esekiéli 37:​26, 27). Arufudati profesía le, weiri lan labusenrun Bungiu lun gamadagua hamá lubúeingu ha úaraguabaña luma. Ariñagati meha Heowá: “Nadügüba aban daradu hama lun nachoururun aban ibagari darangilati houn”. Lagunfuliruba meha dimurei le lau hóundarun kristiánugu ha hemenigibaña hawinwandun ubouagu hamoun kristiánugu anuadirúaaña lun heseriwidun úara liñúarü Heowá, kamá hamuga lídanñanu “aban fárüga” tidan aban kianpu (Huan 10:16). Ani lagunfuliruña profesía le uguñe weyu.

MEBERESENGA HALÍAÑADIWA LAN, GÓUNIGI LUMUTIWA HEOWÁ

6. Ka lunbei ladügüni aban gürigia lun lebelurun tidoun likianpun Heowá ani halíañoun kianpu to?

⁶ Lidan tidaani Bíbülia, yusu lumutu meha aban gürigia likianpun lun lemeraagun ani daruguatu meha kianpu tuguya lau luéi liñawan dan. Agurabúati meha lun buidu lan letenirún lun aban gürigia le achülürüti tidoun kianpu tuguya. Dan le wederegeruni wabagari lun Heowá, ítara liña kamá hamuga webeluruña tidoun likianpun (Sal. 61:4). Ñein, weresibira saragu ariñahani tídangiñeti Bíbülia, sügǘ wagía lubuidun dan hama amu gürigia ha giñe lagunbirahabaña Heowá ñeinhin. Kianpu to, mama lídanñoun ábanrügü fulasu, lídanñoun sun fulasu le ñein habéi lubúeingu Heowá ha gaganbadibaña lun. Rúhaña saragu íbirigu ha aweiyasuhaañabaña lidoun amu ageiraü fe luagu ítara liña lan katei le, háfuga dan le houdin lidoun aban adamurini espechaliti, ani aba hasubudirun amu burí íbirigu ha tídanbaña likianpun Bungiu (Aruf. 21:3).

7. Ka uagu gayara lubéi wariñagun añahagua lan lubúeingu Heowá ha úaraguabaña lun tidan likianpun? (Ariha humóun giñe iyawaü).

⁷ Ka asuseredubei houn lubúeingu Heowá ha óunwegubaña úaraguñu lun? Gayaraati  san wariñagun añahagua lan tidan likianpun Heowá? Anha. Ka uagu wariñagei le? Ladüga ariñaga tan Bíbülia wínwangiña lan lidan lisaminan Heowá. Ariñaga lumuti meha Hesusu: “Moisesi guánarügü arufuda lumuti luagu anihein lan ásaaruni lídangiñe óunweni lidan le labürühanbei libügürü búbugati durungu-umuti. Lariñahare ñein luagu Bungiu lan Lubungiutebei Abüraámü, Isaakü luma Hakobu. [ . . . ]; ladüga mama Habungiute hilaaña Bungiu, Habungiute ha wínwangiñabaña. Wínwangiña lanügüniña Bungiu sun gürigia!” hagía (Luk. 20:​37, 38).

BUITI LE WIBIHIBEI LAU TIDAN WAMÁ LIKIANPUN HEOWÁ

8. Ka buiti wibihibei lau tidan wamá likianpun Heowá?

⁸ Ítara kei gayara lan wemeraagun tidan aban kianpu ani gayara ligía tadouragun wau luéi liñawan dan, góunigi tumutiwa giñe likianpun Heowá luéi wagadeiruni wamadagua luma ani rutu emenigini woun. Dan le yarafa wamá lun Heowá, siñati ladügün Satanási damichi le máraninati woun (Sal. 31:23; 1 Huan 3:8). Lídanme iseri ubóu, lasigiruba Heowá óunigiraña lumadagu ha úaraguabaña lun, mámarügü luéi katei le gayaraabei lagadeiruni hamadagua luma, lesefurubaña giñe luéi óunweni (Aruf. 21:4).

9. Ida luba hóuserun gürigia ha lagunbirahabaña Heowá tidoun likianpun?

⁹ Ma lubuidun chansi le líchugubei Heowá woun lau lígirun lun werederun tidan likianpun luma gamadagua wamá luma lun súnwandan! Ida lubati wóuserun anhein busén wabéi lun werederun tidan likianpun Heowá? Ánhawa hamuga lagunbiraha aban gürigia lúbiñoun, busenbadiwa hamuga wasubudiruni ka lan lagurabubei wámagiñe. Kéiburi hamuga anhein busenbei lubéi lun waragachunu wasabadun lubaragiñe webelurun lúbiñoun, ani chóuruti waragachuñoun lan hamuga lau sun wagundan. Ítarameme, busentiwa giñe wasubudiruni ka lan lagurabubei Heowá hámagiñe ha tídanbaña likianpun lun gayara lan wakipuragun woungua ñein. Wéiriti línsiñe Heowá woun darí lun aranseñu wamá lan lun wadügüni sun wayaraati lun wagundaaragüdüni lidan sun katei (Kol. 1:10). Lau sun inarüni lan luagu wamada lan Heowá, Wabungiute giñe ani Wáguchi, ligía gadüna lubéi lun warufudun aban óunwenbu inebesei lun (Sal. 25:14). Ligía moun lumuti lubéi wabulieiduni káteiñein lan. Líderagubadiwa warufudun inebesei lun Heowá lun wadisedun luéi furumiñeguarügü igaburi le aubei magundan lan, ladüga busentiwa lun manaagun wamá woungua ligibugiñe (Mik. 6:8).

ABAN MEHA LABU LÓUSERUNIÑA HEOWÁ SUN ÍSÜRAELINA LIDAN FULASU MAGEIRAWATI

10, 11. Ka hénpulu arufudubalin aban lan labu lanügüniña Heowá sun lubúeingu?

¹⁰ Súnwandan lóuseruniña Bungiu sun gürigia lau ábameme igaburi (Rom. 2:11). Gayaraati gunfuranda wamani katei le lidan ligaburi lóuseruniña Heowá ísüraelina lidan fulasu mageirawati Sinaí.

¹¹ Lárigiñe lesefuruniña Heowá lumutuniña lídangiñe amudirawaguni Ehiptu, aba líridun fádirigu lun heseriwidun tidan sanduariu. Ruti giñe amu dasi houn lewitagu tidan sanduariu. Buídutimati meha san hounigirún ha tídanbaña sanduariu o ha awinwandubaña yarafa tun hawéi ha híbiri ísüraelina? Uá, aban labu lóunigiruniña Heowá súngubei.

12. Ida liña meha lóuseruniña Heowá ísüraelina lidan fulasu mageirawati? (Áfuriduni 40:38; ariha huméi giñe dibuhu).

¹² Sun meha ha awinwandubaña tidan  kianpu-agei, gachansintiña meha lun lumadagu hamá Heowá, meberesenga ka lan hadasinbei ni anhein yarafa habéi o dise hamá tuéi sanduariu. Kei hénpulu, adügati meha Heowá lun harihini sun ísüraelina dúeri luma ligemeri watu le áfuachubei tóugiñe sanduariu (aliiha huméi Áfuriduni 40:38). Ítarati, danha le liñuragun dúeri, aba hagumeserun ísüraelina awansera, íbini ha dísebaña, aba hapakühani hálagu ani ragagua hamóun hakianpun ani aba hawanserun úara hama ha híbiri gürigia (1 Lur. 9:​15-23). Sun hagía, gayaraati meha haganbuni tinwinrún bián fidu lun hawanserun (1 Lur. 10:2). Mama meha ladüga yarafa lan lawinwandun aban gürigia tun sanduariu gayara lubéi gamadagua lan luma Heowá. Lugundun sun meha lílana néchani le lanúadirubei Heowá, gayaraati meha gamadagua hamá luma, gayara ligía hasandiruni ida liña lan lóunigiruniña luma líchugun adundehani houn. Susereti ligiaméme uguñe weyu, meberesenga halía lan wawinwanda, hínsiñetiwa lun Heowá ani góunigi lumutiwa.

ARUFUDA LUMUTI HEOWÁ ABAN LAN LABU LANÜGÜNIÑA SUN LUMUTUNIÑA UGUÑE WEYU

13. Ida liña aban lan labu lanügüniña Heowá sun lubúeingu uguñe weyu?

¹³ Añahein kristiánugu awinwandutiña yarafa tun áfisi to arihiboun lau hadasin gefentiña luagu Heowá lidan sun ubóu o ha erederubaña yarafabaña tun somu sukursáli. Ani añahein amu, seriwitiña tidan. Adügati katei le lun gayara lan hídehan lidan saragu dasi le adügǘbei ñein luma lun gamadagua hamá hama íbirigu ha alidihabalin dasi burí le. Lanwoun lira, añahein eseriwidutiña kei óunigirutiña sirkuitu o ha eseriwidubaña lan lidan amu dasi espechaliti lánina dan dayarüti. Ánhañati hiibe-agei íbirigu, meseriwiduntiña lidan burí dasi libe le. Anhein ligía lubéi hikesinbei, chouru huméi hínsiñe humá lun Heowá íbini meseriwidun humá lidan burí dasi le, gayaraati gamadagua humá luma Heowá ani lóunigiruñadün (1 Fe. 5:7). Ítara liña: ruti Bungiu ariñahani tídangiñeti  Bíbülia houn sun lubúeingu, góunigi lumutiña ani ru lumuti sun adundehani le hemegeirubei houn.

14. Ka igaburi ídanbei larufudei Heowá ua lan himei lan aban gürigia luéi aban, ani resibi lániña súngubei buidu?

¹⁴ Ábanya katei le arufudubalin uguñe weyu ua lan himei lan Bungiu aban gürigia luéi aban, lau ladügün lun ñein tan Bíbülia houn sun gürigia lidan sun Ubóu. Bürüwatu Lererun Bungiu lidan hererun ǘrüwa néchanigu: lidan ebüréu, lidan araméu luma lidan güriegu. Gürigiarügüñanu funa san ha gayaraabei haliihanu Lererun Bungiu lidan iñeñein burí le gayara gamadagua hamá luma Bungiu? Uá, mítaranti (Mat. 11:25).

15. Ida liña larufuduni Bungiu aban lan labu lanügüniña sun gürigia? (Ariha huméi giñe dibuhu).

¹⁵ Mama ladüga galeskuelan wamá ni luagu gariñagadi wamá ítaga iñeñein lachawahanbaliwa Heowá luouguoun lun lumadagu wamá. Mámarügüñein houn gürigia ha íñubei haleskuelahan líchiga lichú aau, ru lumuti giñe houn sun gürigia ha ubouagubaña, meberesenga anhein galeskuelan habéi o maleskuelan hamá. Sügügüdawatu Lererun Bungiu lidoun saragu milu iñeñein. Ligíati, sun gürigia ubouagu gayaraati hafurendeirun tídangiñe Lererun Bungiu luma lun gamadagua hamá luma (2 Tim. 3:​16, 17).

SIGÍ WAMÁ AGUNDAARAGÜDEI HEOWÁ

16. Según Adügaü 10:​34, 35, ka hawuyeri gürigia únbaña lánhara Heowá tidan likianpun?

¹⁶ Aban lubuidun chansi tidan wamá likianpun Heowá. Resibi lumutiwa lau ínsiñeni luma areini kei ladügüni aban gürigia le buiti leresibiruniña amu lúbiñe. Arufuda lumuti giñe aban lan labu lanügüniña sun gürigia, meberesenga halía lan hagüriahóua, ka lan hageirabei, ka lan héchunbei, ka lan harasanbei, ka lan harumudiri, anhein galeskuelan habéi o maleskuelan hamá ni anhein wügüriña habéi o würiña hamá. Ábanrügüñein katei lamuriahan Heowá wama: lun inebe lan lilurudun woun (aliiha huméi Adügaü 10:​34, 35).

17. Kaba wariha lidan leweñegua aturiahani?

¹⁷ Lidan Sálumu 15:1 adüga lumuti meha Dawidi álügüdahani burí le: “Aburemei, Ka gayaraabei laganóun biñuarü? Ka gayaraabei laganóun lidan buwübüri le sándubei?”. Dawidi guánarügü óunabubalin álügüdahani burí le lau lídehan Heowá. Lidan leweñegua aturiahani, warihiba kaba lan wadüga lun werederun tidan likianpun Heowá.