1-2. Ngu txihi txirambo txi Jehovha a mahelako vakhozeli vakwe vo thembeka?

 NGAKU m’thu a txo ku wotisa ti to Jehovha i mani kwako, u nga khawe txani? Ti nga maha awe u txi khawe: ‘Ene i Tate wangu, Txizimu txangu ni mngana wangu.’ Ni ku ku ni sithopo simwani ni mapswi aya Jehovha a nga dhanwako ngu ona. Kambe, u ti nga ema u alakanya ti to Jehovha ni kona Muamukeli wako?

² Dhavhidha a txi womba-womba ngu wungana ni Jehovha a fananisile Jehovha ni Muamukeli, vakhozeli vakwe ni vapfhumba. Dhavhidha a wotisile tiya: “Mkoma i mani a no zumba dithepeleni [ditendani] kwako ko sawuleka kani? I mani a no zumba ka mmango wako wo sawuleka kani?” (Mas. 15:1) Ngu konaha ka ndimana yiya, athu ha pfisisa ti to hi nga va vapfumba ditendani ka Jehovha, mwendo ku, hi nga va vangana vakwe. Ina awe khu txi woni i di txirambo txo xamalisa a txi Jehovha a hi mahelako?

JEHOVHA WA RAMBA VAPFHUMBA VAKWE

3. I ve mani mpfhumba wo khata wa Jehovha, ni ku va ti ni wuxaka wo zumbisa kutxani?

³ A si se khata kuvanga sotshe so maha, Jehovha a di ekha. Se e vanga mwanana wakwe wo khata. Ti txo fana ni ku Jehovha kota Muamukeli a di rambile mpfhumba wakwe wo khata ka ditenda dakwe ni ku a tsakile ngutu ngu kumaha toneto. Bhiblia yi womba ti to mwanana wa Jehovha a txi “m’tsakisa.” Ngu didhawa dimwani, mwanana wakwe, “a txi zilimuka masoni kwakwe.”—Mav. 8:30.

4. Mba mani vamwani ava va nga va vapfhumba va Jehovha?

 ⁴ Ngu msana Jehovha a mahile tingelozi i ku vapfhumba vakwe ni tona. Tingelozi ti dhanwa ku “vanana va Txizimu” ni ku Bhiblia yi womba ti to ti tsakile ngutu ngu kuva kumweko ni Jehovha. (Jobe 38:7; Dhan. 7:10) Ngu malembe o tala vapfhumba va Jehovha, i ti vale basi a nga txi hanya navo nzumani. Kambe ngu kutsimbila ka mbimo, Jehovha a engetete ditenda dakwe, kasi ku pata, vathu va hamafuni kota vapfhumba vakwe ni vona. Vamwevo va vapfhumba vonevo i ve Enoki, Nowa, Abrahamu ni Jobe. Bhiblia yi womba ti to vona i ti vangana va Txizimu nguko va engisile, ni kutsimbila “kumweko ni Txizimu” txa ditshuri.—Gen. 5:24; 6:9; Jobe 29:4; Isaya 41:8.

5. Hi nga gonda txani ka wuprofeti wa Ezekhiyele 37:26, 27?

⁵ Ngu mazana a mangi a malembe Jehovha a simamile e ramba vangana vakwe, ti to ve va vapfhumba vakwe. (Lera Ezekhiyele 37:26, 27.) Ngu txikombiso, ka wuprofeti wa Ezekhiyele athu hi gonda to Jehovha a lava ti to vakhozeli vakwe ve va ni wuxaka wo tsana nayo. A thembisa kumaha “navo txitumelelanu txa kuthutha.” Wuprofeti wonewo wu womba-womba ngu mbimo yi ava va ku ni themba yo hanya nzumani ni va va ku ni themba ya ku hanya hamafuni va no va kumweko ka ditenda dakwe, kota “mtxhambi wumwewo.” (Joh. 10:16) Wuprofeti wonewo wa hetiseka nyamsi.

JEHOVHA WA HI KHATALELA TI SI KHATALISEKI MU HI MANEKAKO KONA

6. M’thu a mahisa kutxani mpfhumba ka ditenda da Jehovha, ni ku, di maneka hani ditenda donedo?

⁶ Ka timbimo ti ti nga pinda ditenda i ti wukhalo wu m’thu a nga ndi no humula ka wona ni kuva a di vhikelekile. Mpfhumba ka ditenda a ndi na tipfa a di txhatxhekile ngu kuziva to a na xayiswa kwati. Mbimo yi hi tiningetelako ka Jehovha hi khata ku va vapfhumba ka ditenda dakwe. (Mas. 61:4) Ka ditenda donedo athu hi ni sakudya sa moya asi si lavekako kasi ku hi simama hi va vangana va Jehovha ni ku pangalatwa ngu vamwani a va ni vona i ku vapfhumba va Jehovha. Ti si nga ni mhaka ni mu hi zumbako kona, hotshethu hi nga va vapfhumba ka ditenda da Jehovha. Ngu txikombiso, ti nga maheka u di endete matiko mamwani kasi ku ya xalela kongresu yo sawuleka se u zivana ni vamwani ava ni vona va ku ni litsako ngu kuva ka ditenda da Jehovha. Ditenda da Jehovha di ka otshe makhalo aya ku ku ni vakhozeli vakwe.—Mtu. 21:3.

7. Ngu kutxani hi nga wombako ti to malanda ya Jehovha ya ma nga fa i ngadi vapfhumba ka ditenda dakwe? (Wona ni mfota.)

 ⁷ Ku wombwa txani ngu malanda a Jehovha aya ma nga fa? Ina hi nga womba ti to ni vona i ngadi vapfhumba ka ditenda da Jehovha? Ina! Ngu kutxani hi nga wombako toneto? Nguko ka mialakanyo ya Jehovha vathu vonevo va ngadi va txi hanya. Jesu a txhamusete atxi: “Ni ti to vafi va na wuka Mosi a kombisile mbimo yi a nga womba ngu ta txipopo txo tura atxi khene ‘Mkoma i Txizimu txa Abrahamu, Txizimu txa Isaake ni Txizimu txa Jakobe,’ ngu toneto Txizimu hi nga Txizimu txa vafi aniko nja va vo hanya, nguko ka txona votshe va hanya.”—Luka 20:37,38.

WUYELO NI WUTIXAMULELI WU HI KU NAWO

8. Ngu yihi wuyelo ayi vapfhumba va Jehovha va ku nayo?

⁸ Kufana ni ditenda do toloveleka, i ku wukhalo wo humula ka wona ni txivhikelo ka matxelo, ditenda da Jehovha di vhikela vapfhumba va dona ka tiphango tihi ni tihi ti nga onhako wuxaka wathu ni Jehovha, ni ku tshumela di hi ninga themba ya mbimo yi yi tako. Ngako hi di hafuhi ni Jehovha, Sathani kha na kusikota ku hi xanisa ngu ha ku si gumiko. (Mas. 31:23; 1 Joh. 3:8) Ni ku ka mafu a maphya Jehovha a na simama e vhikela vangana vakwe vo thembeka, i singa ka tiphango ti ti nga onhako wuxaka wawe nayo dwe kambe ni ka lifo.—Mtu. 21:4.

9. Jehovha a emela ti to vapfhumba vakwe ve tiñola ngu nzila muni?

⁹ Ditshuri ti to i lungelo ya hombe kuva mpfhumba ka ditenda da Jehovha, ni kukota ku va ni wuxaka wo tsana nayo awu wu no simama ngu ha ku si gumiko. Hi fanete ku ti ñola ngu nzila muni ngako hi txi lava kusimama hi va vapfhumba vakwe? Ngako u txi rambwa mtini ka m’thu u na tsakela ku ziva ti to nyamne wa mti a emela ti to u maha txani. Ngu txikombiso, nyamne wa mti a nga lava ti to u thavisa sifambo u si se bela nyumbani ni ku awe u nga tumelelana nato toneto. Ngu ha kufanako nathu hi lava kuziva a ti Jehovha a lavako ti to vapfhumba vakwe ve maha ka ditenda dakwe. Lirando lathu ngu Jehovha li na hi susumetela kumaha totshe ti hi nga tikotako kasi ku “mtsakisa ka totshe timhaka.” (Vakl. 1:10) Jehovha mngana wathu kambe hi fanete ku khumbula ti to ene Txizimu ni Tate wathu, ngu toneto wa fanelwa ngu ku hi m’xonipha. (Mas. 25:14) Kha ha fanela ku ti divala toneto, ni ku hi fanete ku va ni txixonipho txa hombe ngu ngene yotshe mbimo. Kupimisa ngu nzila yiya ti na hi vhuna kuvayilela tximwani ni tximwani atxi txi nga henyisako Jehovha. Ti hakubasani ti to athu hi lava “kutsimbila ngu kutinamisa” ni Txizimu txathu.—Mika 6:8.

JEHOVHA A KOMBISILE KWAMBI NA TXISAWU-SAWU KA VAISRAYELI

10-11. Nzila yi Jehovha a nga ñola ngu yona Vaisrayeli txiwulani ka Sinayi, yi kombisa ngu nzila muni ti to kha nga ni txisawu-sawu?

¹⁰ Jehovha kha nga ni txisawu-sawu ka nzila yi a ñolako ngu yona vapfhumba vakwe. (Var. 2:11) Athu hi nga pfisisa kwati kwambi na txisawu-sawu ka Jehovha, ngu kuwona nzila yi a nga ñola ngu yona Vaisrayeli mbimo yi va nga ti txiwulani ka Sinayi.

¹¹ Msana ka ku va a di txhatxhisile vathu vakwe wukhumbini ka Egipta, Jehovha a avete vaphaxeli ti to ve thuma ka ditenda da msengeletano. Valevhi va avetwe ku khatalela yimwani mithumo yi nga txi tsimbitisana ni wukhalo wule wo sawuleka. Ina vale va nga txi thuma ka ditenda da msengeletano, mwendo ava va nga txi zumba hafuhi nado, va txi khatalelwa ngu nzila ya tshuko ngu Jehovha kupinda vamwani? Ahim-him!  Ka Jehovha votshe vathu va fana, ene kha nga ni txisawu-sawu.

12. Mbimo yi a nga wonisana ni Vaisrayeli txiwulani ka Sinayi, Jehovha a kombisile ngu nzila muni ti to kwakwe votshe vathu va fana? (Eksodha 40:38) (Wona ni mfota.)

¹² Votshe va ndi na va ni wungana wo tsana ni Jehovha ti si khataliseki ti to va thuma ka ditenda da msengeletano, mwendo va zumba hafuhi nado. Ngu txikombiso, Jehovha a mahile ti to votshe vanana va ka Israyeli ve sikota kuwona direfu, kumweko ni mndilo awu wu nga txi zumba txitimwi ka ditenda da msengeletano. (Lera Eksodha 40:38.) Mbimo yi direfu di nga txi khukha txitimwi ka ditenda da msengeletano, hambi va va nga ti zumba kule ti ndi na koteka ku ve di wona. Se timwaya ti ndi na tshanganisa tithundu ta tona, ni kutxhatxhelela matenda ni ku ti pata ni vathu vamwani. (Mit. 9:15-23) Hahanze keto, votshe va ndi na kupfa kwati kuvetwa ka mipundu yimbidi ya silivhela, a yi yi nga txi ningela txiziviso ka votshe vathu kasi ku ve khukha wugoveloni. (Mit. 10:2) Ngu mapswi mamwani, hi nga womba ti to kuzumba hafuhi ni ditenda da msengeletano, ti si lavi kuwomba ti to m’thu a ndi na va ni wungana wo tsana ni Jehovha kupinda vale va nga ti zumba kule. Kuhambana ni eto, votshe va ka Israyeli va ndi na va vapfhumba va Jehovha, ni kuamukela mkongomiso ni kuvhikelwa. Ngu ha kufanako nyamsi, ti singa ni mhaka ni mu hi zumbako kona, hotshethu hi nga pfa lirando la Jehovha, kukhatalelwa ni kuvhikelwa ngu ngene.

NI NYAMSI JEHOVHA KHA NGA NI TXISAWU-SAWU

13. Nyamsi, Jehovha a kombisa ngu nzila muni ti to kha nga ni txisawu-sawu?

¹³ Vamwani ka vathu va Jehovha nyamsi, va zumba hafuhi ni mzinda wa hamafuni kotshe, mwendo ni Bhetele yo kari. Vamwani va so maha ngu kuzumba ka makhalo oneyo. Ngu toneto wungi wawe va nga pateka ka mithumo ya yingi ayi yi mahwako ka makhalo oneyo ni kuthuma kumweko ni vanathu vale va thangelako ka sengeletano. Vamwani va thuma kota vawoneleli va sigava, ni ka sienge simwani sa mthumo wo sawuleka wa mbimo yotshe. Ngako  etxo i si nga txiemo txako u nga tsaniseka ti to Muamukeli wathu Jehovha, wa randa votshe vapfhumba vakwe kupata ni nawe. Ni ku Ene a na kuninga totshe ti u ti lavako. (1 Pedro 5:7) Votshe ava va mahako txienge txa vathu va Txizimu va amukela sakudya sa moya, mkongomiso ni kuvhikelwa ku ku lavekako.

14. Ngu txihi tximwani txikombiso txi vekako hakubasani ti to ni nyamsi Jehovha kha nga ni txisawu-sawu?

¹⁴ Txikombiso tximwani txi kombisako ti to Jehovha kha nga ni txisawu-sawu kota Muamukeli wa mnene, ngu ti to wa maha tikoteka ti to vathu hamafuni kotshe ve mana Bhiblia. Mibhalo yo sawuleka makhatoni ka kubhalwa ka Bhiblia yi bhatwe ngu tidimi tiraru: Txihebheru, Txiaramaiko ni Txigriki. Ina ti lava kuwomba ti to ava va sikotako kulera tidimi ti Bhiblia yi nga bhalwa ngu tona makhatoni, va ni wungana wo tsana ni Jehovha kupinda va va si ti kotiko kuwomba-womba tidimi toneto? Ahim-him.—Mat. 11:25.

15. Ngu wuhi wufakazi wu hi ku nawo wa ti to Jehovha kha nga ni txisawu-sawu? (Wona ni mfota.)

¹⁵ Kasi ku hi va vangana va Jehovha kha ti lavi ti to hi gonda sikolwa sa hombe mwendo kuziva tidimi tatingi. Jehovha wa ninga wungana wakwe ni wuzivi ka vathu votshe hamafuni i si nga ka vale basi va nga gonda ngutu txikolwa. Dipswi di di nga huhutelwa da Jehovha i ku Bhiblia, se di hunduluxetwe ngu tidimi ti ti pindako 1.000. Ngu nzila eyo vathu hamafuni kotshe va nga wona ti to ndinene kuengisa ti Jehovha a ti gondisako ni kuhunduka ve va vangana vakwe.—2 Tim. 3:16,17.

SIMAMA U VA MPFHUMBA WA JEHOVHA

16. Ngu kuya ngu Mithumo 10:34, 35, ngu tihi ti hi fanelako kumaha kasi ku hi simama hi va vapfumba va Jehovha?

¹⁶ I lungelo ya hombe ngutu, kurambwa ngu Jehovha kasi ku hi va vapfhumba ka ditenda dakwe. Jehovha Muamukeli wa mnene ngutu, wa lirando, wo amukela ngutu vapfhumba kupinda ti hi nga ti pimisako. Hahanze keto, masoni kwakwe votshe vathu va fana. Ene a ramba votshe ti si nga ni mhaka ni mu va zumbako kona, nzila yi va nga wunjwa ngu yona, txikolwa txi va nga txi gonda, lixaka, lihunzu, tanga, mwendo limbewu lawe. Kambe avale va simamako va engisa Jehovha, ngu vona basi ava va nga amukelwako kota vapfhumba vakwe.—Lera Mithumo 10:34, 35.

17. Hi na ti mana hani to engeteleka mayelano ni ku va vapfhumba ka ditenda da Jehovha?

¹⁷ Ka Masalmo 15:1, Dhavhidha a maha siwotiso siya: “MKOMA, i mani a no zumba dithepeleni [ditendani] kwako ko sawuleka kani? I mani a no zumba ka mmango wako wo sawuleka kani?” Jehovha a thumisile ene Dhavhidha kasi kuxamula siwotiso soneso. Ka gondo yi yi londiselako, hi na wona simwani sa silaveko asi ti lavako hi si hetisisa kasi ku hi simama hi va vapfhumba ka ditenda da Jehovha.