1-2. Unsay imbitasyon ni Jehova para sa iyang maunongong mga magsisimba?

 KINSA si Jehova sa imong kinabuhi? Tingali moingon ka, ‘Siya ang akong Amahan, ang akong Diyos, ug ang akong Higala.’ Pero nahibalo ba ka nga si Jehova sama pod ug tagbalay nga nangimbitar nimo?

² Si Haring David naghisgot bahin sa imbitasyon ni Jehova para sa Iyang maunongong mga magsisimba. Siya nangutana: “Oh Jehova, kinsa man ang mahimong dinapit sa imong tolda? Kinsa man ang makapuyo sa imong balaang bukid?” (Sal. 15:1) Niini nga teksto, atong makat-onan nga puwede tang mahimong mga dinapit ni Jehova—sa ato pa, iyang mga higala. Nindot kaayo ni nga imbitasyon gikan kang Jehova!

GIDAPIT TA NI JEHOVA SA IYANG TOLDA

3. Kinsa ang unang dinapit ni Jehova, ug unsay ilang pagbati sa usag usa?

³ Kaniadto, sa wala pa malalang ang tanang butang, si Jehova lang ang naglungtad. Pero sa ngadtongadto, gilalang ni Jehova ang iyang panganay nga Anak, ang unang dinapit sa iyang tolda. Nalipay kaayo si Jehova tungod niana. Gani ang Bibliya nag-ingon nga “labaw niyang gikalipayan” ang iyang Anak. Ang Anak nalipay pod sa atubangan sa iyang Amahan sa tanang panahon.—Prov. 8:30.

4. Kinsay sunod nga nahimong dinapit sa tolda ni Jehova?

⁴ Human niana, si Jehova naghimog ubang anghel ug gidapit sila sa iyang tolda. Ang mga anghel gitawag nga mga  “anak sa Diyos,” ug gipakita sa Bibliya nga malipayon silang nakig-uban kang Jehova. (Job 38:7; Dan. 7:10) Sa primero, kadto rang nagpuyo uban ni Jehova sa langit ang iyang mga higala. Pero sa ulahi dihang naa nay mga tawo sa yuta, gidapit pod niya sila sa iyang tolda. Apil sa iyang mga dinapit mao si Enoc, Noe, Abraham, ug Job. Sila naglakaw “uban sa matuod nga Diyos,” ug tungod ana, nahimo silang iyang mga higala.—Gen. 5:24; 6:9; Job 29:4; Isa. 41:8.

5. Unsay atong makat-onan sa tagna sa Ezequiel 37:​26, 27?

⁵ Hangtod karon, si Jehova padayon gihapong nangimbitar sa iyang mga higala ngadto sa iyang tolda. (Basaha ang Ezequiel 37:​26, 27.) Pananglitan, sa tagna ni Ezequiel atong makat-onan nga gusto gyod ni Jehova nga ang iyang maunongong mga magsisimba naay suod nga relasyon kaniya. Siya nag-ingon nga maghimo siyag “pakigsaad sa pakigdait uban kanila.” Kini nga tagna nagtumong sa panahon dihang ang tanang magsisimba ni Jehova—langitnon man o yutan-on ang ilang paglaom—mag-uban ingong “usa ka panon” diha sa iyang simbolikong tolda. (Juan 10:16) Kini nga tagna nagakatuman na karon!

ATIMANON TA SA DIYOS BISAG ASA PA TA

6. Sa unsang paagi ang usa mahimong dinapit sa tolda ni Jehova, ug ang Iya bang tolda naa lang sa usa ka partikular nga lokasyon?

⁶ Sa Bibliya, ang tolda maoy pahulayanan ug dangpanan gikan sa dili maayong panahon. Dahomon sa usa ka dinapit nga atimanon gyod siya sa nag-imbitar niya. Sa dihang gidedikar nato ang atong kinabuhi kang Jehova, nahimo tang mga dinapit sa iyang simbolikong tolda. (Sal. 61:4) Tungod ana, kitang tanan nga mga dinapit ni Jehova nakapahimulos sa abundang espirituwal nga pagkaon ug nag-enjoy sa atong panag-ubanay. Ang simbolikong tolda ni Jehova wala sa usa ka partikular nga lokasyon. Basin nakaadto na ka sa laing nasod, tingali aron motambong ug espesyal nga kombensiyon, ug didto nailaila nimo ang ubang dinapit sa simbolikong tolda sa Diyos. Busa kini nga tolda makita bisan asa pa nagpuyo ang iyang matinumanong mga magsisimba.—Pin. 21:3.

7. Matawag ba gihapon nga mga dinapit sa tolda ni Jehova ang iyang matinumanong mga alagad nga namatay na? (Tan-awa sab ang hulagway.)

⁷ Komosta kon bahin sa matinumanong mga alagad nga namatay na? Makaingon ba ta nga mga dinapit gihapon sila sa tolda ni Jehova?  Oo! Ngano? Kay sila buhi sa panumdoman ni Jehova. Si Jesus miingon: “Gipakita pa gani ni Moises sa iyang asoy bahin sa tunokong tanom nga ang mga patay banhawon dihang iyang gitawag si Jehova nga ‘ang Diyos ni Abraham, ang Diyos ni Isaac, ug ang Diyos ni Jacob.’ Diyos siya sa mga buhi, ug dili sa mga patay, kay para niya silang tanan buhi.”—Luc. 20:​37, 38.

MGA BENEPISYO UG RESPONSIBILIDAD SA MGA DINAPIT

8. Unsang mga benepisyo ang madawat sa mga dinapit ni Jehova?

⁸ Sama nga ang literal nga tolda makahatag ug kapahulayan ug proteksiyon, ang tolda ni Jehova manalipod nato gikan sa espirituwal nga kadaot ug makahatag natog tinuod nga paglaom. Kon magpabilin tang suod kang Jehova, walay mahimo si Satanas nga makadaot nato hangtod sa hangtod. (Sal. 31:23; 1 Juan 3:8) Sa bag-ong kalibotan, padayong proteksiyonan ni Jehova ang iyang matinumanong mga higala gikan sa espirituwal nga kadaot ug bisan sa kamatayon.—Pin. 21:4.

9. Unsay gidahom ni Jehova nga himoon sa iyang mga dinapit?

⁹ Dako gyod nga pribilehiyo nga mahimong dinapit sa tolda ni Jehova—nagpasabot ni nga puwede tang makabaton ug suod nga relasyon kang Jehova hangtod sa hangtod. Unsay angay natong himoon aron magpabilin ta sa iyang tolda? Kon naay nangimbitar nimo, seguradong gusto nimong mahibaloan kon unsay iyang gidahom. Pananglitan, magdahom tingali siya nga huboon nimo ang imong sapatos sa dili pa ka mosulod, ug mao gyod nay imong himoon. Sa samang paagi, gusto pod natong mahibaloan kon unsay gidahom ni Jehova sa iyang mga dinapit. Tungod kay gimahal nato si Jehova, mapalihok ta nga himoon ang tanan “aron bug-os . . . siyang mapalipay.” (Col. 1:10) Dugang pa, takos pod siya sa atong pagtahod kay gawas nga Higala nato si Jehova, siya pod ang atong Diyos ug Amahan. (Sal. 25:14) Busa, kinahanglang naa tay lawom nga pagtahod niya ug dili gyod nato kalimtan kon kinsa si Jehova. Kon lawom ang atong pagtahod kaniya, dili gyod ta mohimog bisan unsa nga dili makapalipay niya. Maningkamot ta nga ‘maglakaw nga mapainubsanon’ uban sa atong Diyos.—Miq. 6:8.

PATAS ANG PAGTRATAR NI JEHOVA SA MGA ISRAELINHON DIDTO SA KAMINGAWAN

10-11. Unsay nagpakita nga patas ang pagtratar ni Jehova sa mga Israelinhon didto sa kamingawan sa Sinai?

¹⁰ Patas ang pagtratar ni Jehova sa tanan niyang mga dinapit. (Roma 2:11) Makita nato ni sa iyang pagtratar sa mga Israelinhon didto sa kamingawan sa Sinai.

¹¹ Human luwasa ni Jehova ang iyang katawhan gikan sa pagkaulipon sa Ehipto, nagtudlo siyag mga saserdote aron mag-alagad sa tabernakulo. Ang mga Levihanon giasayn nga mag-atiman sa ubang buluhaton sa maong balaang dapit. Pero kadto bang nag-alagad sa tabernakulo o kadtong mga nagkampo duol niini mas naatiman ni Jehova kay sa uban? Siyempre dili! Si Jehova patas nga Diyos.

12. Unsang espesipikong mga pananglitan ang nagpakita nga patas si Jehova sa iyang pagtratar sa mga Israelinhon? (Exodo 40:38) (Tan-awa sab ang hulagway.)

¹² Ang tanang Israelinhon naay kahigayonan nga masuod kang Jehova, bisan unsa pay ilang pribilehiyo sa pag-alagad o bisan asa pa sila nagkampo—duol man o layo sa tabernakulo. Pananglitan, giseguro niya nga ang  tibuok nasod makakita sa milagroso nga haligi nga panganod ug haligi nga kalayo ibabaw sa tabernakulo. (Basaha ang Exodo 40:38.) Dihang ang panganod mobalhin sa laing direksiyon, bisan kadtong nagkampo nga layo kaayo gikan sa tabernakulo makakita niana, makaandam sa ilang mga gamit, makahipos sa ilang tolda, ug makabiya kauban ang tibuok nasod. (Num. 9:​15-23) Ang tanan makadungog pod sa kusog nga tingog sa duha ka trompeta nga plata, nga magpaila nga kinahanglan na silang mobalhin. (Num. 10:2) Busa klarong gipakita niini nga kon ang usa nagkampo duol sa tabernakulo, wala ni magpasabot nga mas suod siya kang Jehova kay sa niadtong naa sa layo. Ang tanang sakop sa bag-ong natukod nga nasod ni Jehova puwedeng mahimong iyang higala ug makasalig sa iyang paggiya ug proteksiyon. Sa susama, bisag asa pa ta nagpuyo, makabenepisyo ta sa gugma, pag-atiman, ug proteksiyon ni Jehova.

PATAS ANG PAGTRATAR NI JEHOVA SA IYANG MGA ALAGAD KARON

13. Unsa ang usa ka paagi nga gipakita ni Jehova nga patas ang iyang pagtratar sa iyang mga alagad karon?

¹³ Ang ubang alagad ni Jehova karon nagpuyo duol sa hedkuwarter o sa sangang buhatan sa mga Saksi ni Jehova. Ang uban nila nagboluntaryo pa gani niini nga mga pasilidad. Tungod ana, makaapil sila sa mga kalihokan nga ginahimo didto ug personal nilang makauban ang mga nagapanguna sa organisasyon. Ang uban pod naasayn sa sirkitong buluhaton o sa uban pang klase sa special full-time nga pag-alagad. Pero ang kadaghanan sa mga alagad ni Jehova wala makabaton niini nga mga pribilehiyo. Kon mao ni ang imong kahimtang, wala ni magpasabot nga dili ka importante. Ang tanang dinapit ni Jehova iyang gimahal ug ginaatiman. (1 Ped. 5:7) Kitang tanan nakadawat sa espirituwal nga pagkaon, paggiya, ug proteksiyon nga atong gikinahanglan.

14. Unsay gitagana ni Jehova nga nagpakita nga patas siya?

 ¹⁴ Ang laing pananglitan nga patas si Jehova mao nga iyang giseguro nga ang Bibliya mabatonan sa mga tawo sa tibuok kalibotan. Ang Balaang Kasulatan orihinal nga gisulat sa tulo ka pinulongan: Hebreohanon, Aramaiko, ug Grego. Pero kadto bang makabasa niining orihinal nga mga pinulongan sa Bibliya mas suod kang Jehova kay sa niadtong dili makamaong mobasa niini? Siyempre dili!—Mat. 11:25.

15. Unsa pay ebidensiya nga patas si Jehova? (Tan-awa sab ang hulagway.)

¹⁵ Ang pag-uyon ni Jehova kanato wala magdepende kon taas ba tag edukasyon o kon makabasa ba ta sa orihinal nga mga pinulongan sa Bibliya. Gihatagan ni Jehova ug kahigayonan ang tanang tawo nga makakat-on sa iyang kaalam—edukado man sila o dili. Ang iyang Pulong, ang Bibliya, gihubad ngadto sa libolibo ka pinulongan aron ang mga tawo sa tibuok kalibotan mahibalo sa gitudlo niini ug makakat-on kon unsaon nga mahimo silang mga higala sa Diyos.—2 Tim. 3:​16, 17.

PANINGKAMOTI NGA PADAYON KANG UYONAN NI JEHOVA

16. Base sa Buhat 10:​34, 35, unsay atong buhaton aron padayon tang uyonan ni Jehova?

¹⁶ Dako gyong pribilehiyo nga gidawat ta ni Jehova sa iyang simbolikong tolda. Siya buotan, mahigugmaon, ug maabiabihon kaayo sa iyang mga dinapit. Patas pod siya, ug kitang tanan iyang gidapit bisag asa pa ta nagpuyo ug bisag unsa pay atong kagikan, edukasyon, rasa, tribo, o edad. Pero kadto lang makakab-ot sa iyang mga sukdanan ang iyang dawaton ug padayong uyonan ingong mga dinapit.—Basaha ang Buhat 10:​34, 35.

17. Asa ta makakitag dugang impormasyon bahin sa pagkahimong dinapit sa tolda ni Jehova?

¹⁷ Sa Salmo 15:​1, si David nangutana: “Oh Jehova, kinsa man ang mahimong dinapit sa imong tolda? Kinsa man ang makapuyo sa imong balaang bukid?” Gigiyahan ni Jehova ang salmista sa pagtubag sa maong mga pangutana, nga maoy atong hisgotan sa sunod nga artikulo. Kining dugang nga impormasyon makatabang nato nga mahibaloan kon unsay atong himoon aron padayon tang uyonan ni Jehova.