EKICWEKA C’OKWEGA 23
ECESHONGORO CA 28 Okuba Munywani wa Yehova
Yehova natweta ngu tube abagenyi beye
‘Obutaho bwange buryaba omuri bo, mbe Ruhanga wabo na bo babe abantu bange.’—EZEK 37:27.
ENTEGO
Twaza kureba oku turi kubasa kukizaho kusima Yehova ahabw’obutumire bweye bw’okuba abagenyi b’omu ihema ryeye ry’ekigereraniso n’oburyo obu ari kutwakiramu.
1-2. Ni buha butumire obu Yehova ari kuha abahereza beye b’abesigwa?
YEHOVA nomureba ota? Nobasa kugarukamu ku ori kumureba nka Sho, Ruhanga wawe ninga munywani wawe. Konka nihabasa kuba hariho obundi buryo obu ori kurebamu Yehova. Konka shi nambwenu nomureba nk’omwakizi wawe?
2 Omugabe Dawudi akageranisa obunywani obu Yehova ayine n’abahereza beye b’abesigwa n’obunywani obu omuntu ari kuba ayine n’abagenyi beye. Akagamba ati: ‘Yehova, ni oha oritura omu ihema ryawe? Ni oha oritura aha kibungo cawe ekiri kwera?’ (Zab 15:1) Ebyo bigambo nibyereka ku turi kubasa kuba abagenyi ba Yehova, ni okugamba okuba banywani beye. Mbehi ogwe ti omugisha g’omutano oguri kuruga ahari Yehova?
YEHOVA NAYENDA NGU TUBE ABAGENYI BEYE
3. Ni oha owabire omugenyi wa Yehova w’okubanza, kandi shi ni bata oku buri omwe yabire ari kwehurira ku yabire nareba mugenzi weye?
3 Yehova atakahangire ebintu byona, akaba ari wenka. Konka bwanyima akahanga Omwana weye w’emfura. Yehova akaba ari nk’owayakira omugenyi weye w’okubanza omu ihema ryeye, kandi eco kikamushemeza. Bibuli negamba ku Yehova yabire ari ‘kushemerererwa’ Omwana weye. Kandi ogo mugenyi wa Yehova w’okubanza na we akaba ‘nayesimira omu misho geye burizoba.’—Emi 8:30.
4. Ni baha abandi ababire abagenyi ba Yehova omu ihema ryeye?
4 Bwanyima, Yehova akahanga abandi ba marayika ngu na bo babe abagenyi beye. Abo ba marayika nibetwa ‘abana ba Ruhanga’ kandi nibashemerererwa kuba hamwe na Yehova. (Yob 38:7; Dan 7:10) Hakahwa obwire Yehova ari kwikiririza abu yabire ari kutura na bo omu iguru na bo ngu bagire obunywani na we. Konka bwanyima akatumira n’abantu ngu babe abagenyi beye omu ihema ryeye. Bamwe omuri abo hakaba harimu Enoka, Nowa, Aburahamu na Yakobo. Bibuli negamba ku abo bantu babire bari banywani ba Ruhanga ninga shi ku babire bari kugenda ‘na Ruhanga’—Kut 5:24; 6:9; Yob 29:4; Isa 41:8.
5. Ni enki eki turi kwegera aha buhanuzi oburi omuri Ezekiyeli 37:26, 27?
5 Oku obwire bwagenzire buri kuhwa, Yehova akagumizamu kweta banywani beye ngu babe abagenyi beye. (Shoma omuri Ezekiyeli 37:26, 27.) Ecokureberaho: Omu buhanuzi bwa Ezekiyeli, nitwega ku Ruhanga ari kwenda ngu abahereza beye b’abesigwa bagire obunywani burungi na we. Naraganisa kugira na bo ‘endagano y’obusinge.’ Obwo buhanuzi nibugamba aha bwire obu abine amasiko g’okutura omu iguru n’abine amasiko g’okutura omu nsi barije kugira obumwe omu ihema ryeye ry’ekigereraniso bari ‘obusyo bumwe.’ (Yoh 10:16) Kandi obwo bwire ni bwo obu turimu!
RUHANGA NATUFAHO AHU TWAKUBA TURI HONA
6. Ni bata oku omuntu ari kubasa kuba omugenyi omu ihema rya Yehova, kandi shi ni nkahe ahu eryo ihema riri kubasa kuboneka?
6 Omu bwire bwa Bibuli, ihema ry’omuntu rikaba riri ery’okuhumuriramu kandi arindirwamu empinduka z’ekirere ninga z’obwire. Omugenyi owabire naba ari omuri eryo ihema akaba namanya ku babire baramufeho. N’itwe twagira obunywani na Yehova, nituba twaba abagenyi omu ihema ryeye ry’ekigereraniso. (Zab 61:4) Nitutunga ebyokurya byingi by’omwika kandi tugirana obunywani n’abandi bagenyi ba Yehova. Ihema ryeye ry’ekigereraniso eri ari kutwetamu, tiriri omu mwanya gumwe. Nobasa kuba wagire omu rindi ihanga ori kuza omu kiterane c’omutano, rero wabuganayo abandi bantu abatungire omugisha g’okuba omu ihema rya Ruhanga. Eryo ihema riri ahantu hona ahu ori kubasa kubona abahereza ba Yehova b’abesigwa.—Kush 21:3.
7. Ahabw’enki turi kubasa kugamba ku abahereza ba Yehova b’abesigwa abafire, bacari abagenyi omu ihema ryeye? (Nambwenu reba ekishushani.)
7 Mbwenu shi nitubasa kugamba ku n’abahereza ba Yehova abafire bacari abagenyi omu ihema ryeye? Yego! Ahabw’enki twagamba tusyoya? Ni ahabw’okuba Yehova acabijuka. Yesu akashoborora ati: ‘Ebiri kukwata aha by’okuzoka kw’abafu, na Musa akabyoreka omu byahandikirwe aha byabire aha rushaka, ahu yayetire Yehova Ruhanga wa Aburahamu, Ruhanga wa Isaka, kandi Ruhanga wa Yakobo. Ruhanga ti Ruhanga w’abafu, kureka ow’abahurire.’—Luk 20:37, 38.
N’abahereza ba Yehova b’abesigwa abafire, acabareba nk’abagenyi b’omu ihema ryeye (Reba paragurafu ya 7)
EMIGISHA Y’OKUBA ABAGENYI BA YEHOVA N’EBI TURI KUSHABWA
8. Ni eha migisha eyi turi kutunga ahakuba turi abagenyi ba Yehova omu ihema ryeye?
8 Nk’oku ihema erishangirwe riri kubasa kuba omwanya g’okuhumuriramu n’okurindirwamu empinduka z’ekirere, ihema rya Yehova naryo niriha abahereza beye oburinzi bw’omu by’omwika kandi kituma bagira amasiko g’ebiro by’omu misho. Ku turagumizemu kuba banywani ba Yehova, Sitane tarije kutuhisaho akabi k’ebiro byona. (Zab 31:23; 1 Yoh 3:8) Omu nsi ensya, Yehova nayija kugumizamu kurinda banywani beye b’abesigwa omu by’omwika kandi abarinde n’orufu.—Kush 21:4.
9. Ni enki eki Yehova ari kushaba abagenyi beye?
9 Mazima, ni omugisha kuba turi abagenyi ba Yehova omu ihema ryeye, ni okugamba okwesimira obunywani burungi obu twine na we. Konka shi ni enki eki tushemerire kukora kugira ngu tugumizemu kuba abagenyi beye? Hagira owakweta omu ka yeye ngu omubere omugenyi, noba ori kwenda ngu omubere omugenyi murungi. Ecokureberaho: Nabasa kukushaba kujura engito otakatahire omu nju yeye, kandi okora ebi yakushaba. Ni co kimwe, tushemerire kumanya ebi Yehova ari kutushaba kugira ngu tugume turi abagenyi omu ihema ryeye. Rukundo eyi turi kukunda Yehova ni yo eri kutuma twakora cona eki turi kubasa kugira ngu ‘tumushemeze omuri byona.’ (Kol 1:10) Kandi n’obu turi kureba Yehova nka munywani witu, nambwenu tushemerire kumureba nka Ruhanga witu kandi Tata witu, owu tushemerire kuha ekitinisa. (Zab 25:14) Twayijuka ebyo, nibituma twamuha ekitinisa kingi ekimushemerire. Nambwenu nikija kutuma twayerinda kukora ekintu cona ekiri kumushasha. Nituba turi kwenda ‘kugenda na Ruhanga witu n’obucurezi.’—Mik 6:8.
YEHOVA AKEREKA KU ATARI KUSHORORA OMU BUTAYO
10-11. Oku Yehova yatwarize Abisirayeli bari omu butayo nibyereka bita ku atari kushorora?
10 Yehova tari kushorora omu ku ari kutwariza abagenyi beye. (Rom 2:11) Nitubasa kumanya ku Yehova atari kushorora twareba oku yatwarize Abisirayeli bari omu butayo ninga omu ihamba ry’omushenyi ry’omuri Sinayi.
11 Yehova ku yamazire kucungura abantu beye ari kubiha omuri Egiputa, akatorana abatambi ngu bagume nibamukorera omu ihema ryeye. Akaha Abalevi emirimo y’okukorera omuri eryo ihema ryeye eriri kwera. Mbehi ababire bari kukorera omuri eryo ihema ninga ababire batwire hihi yaryo, Yehova akaba nabafaho kukira abandi? Ingaha! Yehova tari kushorora.
12. Ni biha bikorwa ebi Yehova yakorire Abisirayeli ebyayerekire ku atari kushorora? (Kuruga 40:38) (Nambwenu reba ekishushani.)
12 Buri omwe owabire ari omu nkambi, akaba nayesimira obunywani burungi na Yehova nk’abandi, omwanya ogu yakuba ayine ninga shi ahu yakuba atwire hona. Ecokureberaho: Yehova akakora cona ekiri kubasika kugira ngu ihanga ryona rigume kureba enkingi y’ekicu n’enkingi y’omuriro ebyabire nibiza ah’iguru y’ihema. (Shoma omu Kuruga 40:38.) Kandi ekicu ku cabire nikiza omu gundi mwanya, n’ababire batwire hare y’ihema bakaba nibabasa kukireba, rero bateraniriza hamwe ebintu byabo, bashenya n’amahema gabo, bagendera hamwe n’abandi bona. (Kub 9:15-23) Abantu bona bakaba bari kubasa kuhurira amaraka g’enzamba ibiri ezi babire nibatera bari kumanyisa abantu ku bashemerire kutandika kugenda. (Kub 10:2) Kuba omuntu yabire atwire hihi y’ihema kikaba kitari kumanyisa ku ayine obunywani bw’omutano na Yehova kukira abandi. Omu mwanya gw’eco, buri omwe akaba ari kubasa kugira obunywani na Yehova, rero atunga obuhabuzi bwa bweye n’oburinzi bweye. N’omuri obu bwire, ahu twakuba tutwire hona, Yehova natukunda, atufaho kandi atuha oburinzi bweye.
Ihema eryabire riri ahagati y’enkambi ni ekihamya ekiri kwereka ku Yehova atari kushorora (Reba paragurafu ya 12)
YEHOVA AKEREKA KU ATARI KUSHORORA OMURI OBU BWIRE
13. Ni bata oku Yehova ari kwereka ku atari kushorora omuri obu bwire?
13 Abamwe omu bahereza ba Ruhanga b’omuri obu bwire batwire hihi ya ofisi nkuru y’Abahamya ba Yehova ninga hihi ya za ofisi z’amahanga. Abandi nibakorera omuri ezo za ofisi. Eco nikibaha oburyo bwingi bw’okukora emirimo myingi eri kukorerwamu kandi bekwatanisa n’abari kwebembera. Hine n’abandi abari kukora omurimo g’okutayayira ebibina ninga shi endijo mirimo y’obwire bwona y’omutano. Waba otari omwe omuri bo, guma oyesige ku Yehova ari kukunda abagenyi abu ari kwikiriza bona. Kandi nafa ahari buri omwe omuri bo. (1 Pet 5:7) Abahereza ba Ruhanga bona nabaha ebyokurya by’omwika, kandi abaha obuhabuzi n’oburinzi obu bari kwetenga.
14. Ni buha bundi buryo obu Yehova yayerekiremu ku atari kushorora?
14 Ekindi cokureberaho ekiri kwereka ku Yehova atari kushorora ni oku yayikiririze abantu b’omu nsi yona kutunga Bibuli. Ebyahandikirwe ebiri kwera bikahandikwa omu ndimi ishatu z’okubanza ari zo, Oruheburayo, Oruramayika, n’Orugurika. Mbwenu shi abantu abari kumanya ezo ndimi, ni bo bonka abari kubasa kugira obunywani na Yehova kukira abandi? Ingaha mazima.—Mat 11:25.
15. Ni biha bihamya ebiri kwereka ku Yehova atari kushorora? (Nambwenu reba ekishushani.)
15 Yehova tari kutwikiriza akuratize amashomo agu twayegire n’endimi ezi turi kumanya. Omu mwanya gw’eco, naha obwenge abantu bona b’omu nsi yaba bashomire ninga batarashomire. Ekigambo ceye, Bibuli, kikahandikwa omu ndimi nyingi kugira ngu abantu bingi abari omu nsi bagasirwe n’ebi ari kutwegesa kandi bamanye eki bari kubasa kukora kugira ngu babe banywani beye.—2 Tim 3:16, 17.
Ni bata oku kuba Bibuli yahindwirwe omu ndimi nyingi kiri kwereka ku Yehova atari kushorora? (Reba paragurafu ya 15)
GUMA ORI KWIKIRIZIBWA NA YEHOVA
16. Tukuratize ebiri omu Byakozirwe 10:34, 35, ni enki eki turi kubasa kukora kugira ngu Yehova agumizemu kutwikiriza?
16 Ni omugisha gw’amani kuba Yehova ari kutwakira omu ihema ryeye ry’ekigereraniso turi abagenyi beye. Ayine embabazi na rukundo kandi nayakira ge abagenyi beye. Nambwenu natwakira twena atarebire ahu tutwire, embera ezi twakuriremu, amashomero agu twayegire, obwoko, emyaka ninga shih yaba turi abashija ninga abakazi. Konka abagenyi abu ari kwakira ni abari korobera emisinge yeye.—Shoma omu Byakozirwe 10:34, 35.
17. Ni enki eki turije kwega omu kicweka ekiri kukurataho?
17 Nk’oku biri kugambwa omuri Zaburi ya 15:1, Dawudi akabuza ngu: ‘Yehova, ni oha oritura omu ihema ryawe? Ni oha oritura aha kibungo cawe ekiri kwera?’ Ogo muhandiki wa zaburi akahumecerwa yagarukamu ebyo bibuzo. Omu kicweka ekiri kukurataho, turyashwijuma ebiri kushabwa ebi tushemerire kwijuza kugira ngu Yehova agume ari kutwikiriza.
ECESHONGORO CA 32 Guma Ohamiire Ahari Yehova!
