1-2. Ifa ewe feiéch Jiowa a suuki ngeni néún kewe aramas mi túppwél?

 IKÁ emén a eisinuk, ‘Ié Jiowa me reom?’ Eli kopwe apasa, ‘Jiowa i Semei, ái Kot, me Chiechiei.’ Eli ka pwal ekieki ekkóch itelap are kapas ka tongeni áweweei ussun Jiowa. Iwe nge, ka fen pwal ekieki pwe i ewe a wisen awasélaéchuk?

² King Tafit a aléllééi án Jiowa chiechi ngeni néún kewe aramas mi túppwél ngeni ewe riri lefilen emén mi wisen awasélai aramas me néún kewe waséla. Tafit a eisini: “Jiowa, ié epwe tongeni waséla lón imwom imw mangaku? Ié epwe tongeni nónnóm wóón chukum mi pin?” (Kölf. 15:​1, NW) Seni ena wokisin, sia silei pwe sia tongeni néún Jiowa waséla, weween sia tongeni wiliiti chiechian. A ifa me feiéchúch!

JIOWA A ETIWAKICH ACH SIPWE NÉÚN WASÉLA

3. Ié we néún Jiowa áeménún waséla, me met meefien Jiowa me néún na waséla?

³ Me mwen án Jiowa féraatá mettóch meinisin, i a chék áláemén. Nge mwirin, a féraatá Néún we mwánichi. Jiowa a ussun emén mi wisen awasélaéchú aramas, i a etiwa néún we áeménún waséla ngeni imwan imw mangaku, me i a fókkun pwapwa le féri ena. Ewe Paipel a apasa pwe Jiowa a fókkun “pwapwa” ren Néún na. Iwe, néún na waséla a “meseik me fän mesan fansoun meinisin.”—SalF. 8:30.

4. Ié kewe ra pwal wiliiti néún Jiowa waséla?

 ⁴ Mwirin Jiowa a féraatá ekkewe chónláng. Iir ra ketiw ar repwe pwal néún waséla. Ewe Paipel a eita ngeni ekkena chónláng néún Kot me a pwal apasa pwe iir ra pwapwa le nónnóm ren. (Hiop 38:7; Tan. 7:10) Ren fite fite ier, chókkewe chék mi nónnóm ren Kot lón láng, iir néún kewe waséla. Ló, ló, ló, a féraatá aramas wóón fénúfan me iir ra pwal tongeni wiliiti néún waséla are chiechian. Ikkeei iir ekkóch me leir, Inok, Noa, Eperiam, me Jop. Ewe Paipel a apasa pwe iir ra chiechien Jiowa pokiten ra álleasochisi i.—Ken. 5:24; 6:9; Hiop 29:4; Ais. 41:8.

5. Met sia tongeni káé seni ewe oesini lón Isikiel 37:​26, 27?

⁵ Seni lóóm tori iei, Jiowa a sópweeló le etiwa chiechian kewe ar repwe néún waséla. (Álleani Isikiel 37:​26, 27.) Áwewe chék, sia kúna seni án Isikiel we oesini pwe Kot a fókkun mochen án néún kewe mi túppwél repwe ririéch ngeni. A pwonei pwe epwe féri “eu pwonen kinamwe ngeniir.” Ena oesini a weneiti ewe fansoun lupwen chókkewe mi eáni ápilúkúlúkún manaw lón láng me chókkewe mi eáni ápilúkúlúkún manaw wóón fénúfan repwe nómfengen lón imwan imw mangaku ussun “eú mwichen siip.” (Jon 10:16) Ina met a fiffis iei!

KOT A TÚMÚNÚKICH ESE LIFILIFIL IA SIA NÓM IE

6. Ifa ussun emén a tongeni wiliiti néún Jiowa waséla lón imwan imw mangaku? Ia ka tongeni kúna me ia imwan na imw mangaku?

⁶ Lón fansoun lóóm, eú imw mangaku ina eú leeni emén a tongeni asésé ie me kúna túmún atun fansoun akkar are ngawen rán. Emén wasélato lón ena esin imw, a ésúkúsúkú án ewe chón imw epwe túmúnú. Atun sia fangoló manawach ngeni Jiowa, sia wiliiti néún waséla lón imwan we “im mangaku.” (Kölf. 61:​4, Testament mi Fö) A wor rech mettóch meinisin mi lamot ngenikich pwe epwe péchékkúleló ach ririin chiechi ngeni Jiowa, me sia pwal chiechi ngeni chókkewe mi wiliiti néún Jiowa waséla. Nge ewe imw mangaku Jiowa a etiwakich ach sipwe tolong lón, ese chék nónnóm lón eú leeni. Neman ka sái ngeni eú fénú mi towaw me fiti eú mwichelap ikewe ka chuuri ekkewe ekkóch iir mi pwal pwapwa le nóm lón imwen Kot we imw mangaku. Imwen Jiowa na imw mangaku, a nónnóm ikewe ia néún kewe aramas mi túppwél ra nóm ie.—Pwár. 21:3.

7. Pwata sia tongeni apasa pwe ekkewe mi túppwél mi fen máló ra chúen waséla lón imwen Jiowa we imw mangaku? (Pwal ppii ewe sasing.)

⁷ Nge ifa ussun ekkewe mi túppwél ra fen  máló? Ra chúen waséla lón imwen Jiowa we imw mangaku? Ewer! Pwata sia tongeni apasa ena? Pún Jiowa a fókkun chechchemeniéchúúr. Iei met Jises a apasa: “Ren ekkewe mi máló repwe manawetá, pwal mwo Moses a pwáraaló me lón ewe pwóróus ussun ewe irá félúfél atun a kér ngeni Jiowa ‘ewe Koten Eperiam me Koten Aisek me Koten Jekop.’ I emén Kot, án ekkewe mi manaw nge esap án ekkewe mi máló, pún me ren, iir meinisin mi manaw.”—Luk 20:​37, 38.

FEIÉCH ME MET MI LAMOT SIPWE FÉRI

8. Menni feiéch a tongeni torikich pokiten sia nónnóm lón imwen Jiowa imw mangaku?

⁸ Ussun chék eú wesewesen imw mangaku aramas ra eáni leenien asésé me leenien túmún atun fansoun akkar are ngawen rán, imwen Jiowa we imw mangaku a pwal túmúnú néún kewe waséla seni ekkewe mettóch mi tongeni angawaaló ar riri ngeni me ngeniir ápilúkúlúkéch fán iten mwachkkan. Atun sia ririéch ngeni Jiowa, ese wor met Setan a tongeni féri pwe epwe efeiengawakich tori feilfeiló. (Kölf. 31:23; 1 Jon 3:8) Lón ewe ótót séfé, Jiowa epwe sópweeló le túmúnú chiechian kewe mi túppwél. Epwe túmúnú seniir feiengaw lón pekin lúkú me pwal mwo nge seni máló.—Pwár. 21:4.

9. Met Jiowa a mochen án néún kewe waséla repwe féri?

⁹ A wesewesen eú watteen feiéch ach sipwe emén waséla lón imwen Jiowa we imw mangaku. Sia tongeni eáni eú ririéch ngeni tori feilfeiló. Met sipwe féri iká sia mochen ach sipwe néún waséla tori feilfeiló? Iká emén a etiwok óm kopwe néún waséla lón imwan, eli kopwe mochen silei met a lamot kopwe féri pwe ena emén epwe pwapwa. Áwewe chék, neman epwe mochen óm kopwe pwiliti noum suus mwen kopwe tolong lón imwan, me ina met kopwe féri. Pwal ina chék ussun kich, sia mochen silei met Jiowa a mochen ach sipwe féri pwe sipwe néún waséla tori feilfeiló. Ach tongei i epwe amwékútúkich ach sipwe achocho úkúúkún ach tufich pwe sipwe “unusen apwapwaai i.” (Kol. 1:10) Me inaamwo iká me rech, Jiowa i Chiechiach, nge sia mirititi pwe pwal i ach Kot me Semach, emén mi fichiiti ach sipwe súféliti. (Kölf. 25:14) A lamot sisap fókkun ménúkaaló ena, me fansoun meinisin sipwe fókkun súféliti. Ena esin súfél epwe álisikich ach sisap féri ekkewe féffér epwe eletipengawa i. Fansoun meinisin, sia mochen chiechifengen me ach na Kot fán “tipetekison.”—Mik. 6:8.

JIOWA ESE LIFILIFIL NGENI EKKEWE CHÓN ISRAEL

10-11. Ifa ussun féfférún Jiowa ngeni ekkewe chón Israel lón ewe fénúpéén Sinai a pwáári an ese lifilifil aramas?

¹⁰ Jiowa ese lifilifil are aapaap lón féfférún ngeni néún kewe waséla. (Rom 2:11) Sia tongeni káé ena seni féfférún ngeni ekkewe chón Israel me lón ewe fénúpéén Sinai.

¹¹ Mwirin án Jiowa angasaaló néún kewe aramas seni ar slave lón Isip, a seikaatá souasor ar repwe angang lón ewe imwenfel mangaku. Jiowa a ewisa ngeni ekkewe chón Lifai ar repwe túmúnú ekkóch angangen lón ewe imwenfel mangaku. Iwe, itá Jiowa a kon túmúnúéchú chókkewe mi angang lón ena imwenfel mangaku, are chókkewe mi nóm kkan ngeni, lap seni an túmúnú ekkewe ekkóch? Aapw! Jiowa ese lifilifil aramas.

12. Ifa ussun napanapen Jiowa ngeni ekkewe chón Israel a pwáári pwe ese lifilifil aramas? (Ekistos 40:38) (Pwal ppii ewe sasing.)

¹² Emén me emén ekkewe chón Israel a tongeni emén chiechien Jiowa ese lifilifil iká a angang lón ewe imwenfel mangaku are nónnóm kkan ngeni. Áwewe chék,  Jiowa a túmúnú pwe unusen ewe mwúún Israel epwe tongeni kúna ewe úrekuchu me ewe úreekkei mi nóm asen ewe imwenfel mangaku. (Álleani Ekistos 40:38.) Lupwen ewe kuchu a poputá le mwékút ngeni eú mineféén leeni, pwal mwo chókkewe mi imweimw towaw seni ewe imwenfel mangaku ra tongeni kúna, iwe ra ammólnatá pisekiir kewe, éúraatiw imwer kewe imw mangaku, me fiti unusen ewe mwichen aramas le mwékút. (Num. 9:​15-23) Meinisin ekkewe aramas ra tongeni rong ttikin ekkewe ruuofóch rappwa seni silifer mi esile ngeniir pwe repwele poputá le mwékút. (Num. 10:2) Iwe, a ffat pwe án emén nóm kkan ngeni ewe imwenfel mangaku esap weween nge a fókkun chiechiéch ngeni Jiowa lap seni chókkewe mi nóm towaw seni ewe imwenfel mangaku. Meinisin ekkewe chón Israel ra tongeni néún Jiowa waséla me lúkúlúk pwe epwe emmweniir me túmúnúúr. Pwal ina chék ussun lón ei fansoun, ese lifilifil ia sia nóm ie me wóón ei fénúfan, Jiowa a tongekich, chúngúkich, me túmúnúkich.

JIOWA ESE LIFILIFIL ARAMAS LÓN EI FANSOUN

13. Pwata sia tongeni apasa pwe Jiowa ese lifilifil aramas lón ach ei fansoun?

¹³ Ekkóch me lein néún Kot kewe aramas lón ei fansoun ra nóm kkan ngeni ewe ofesilap lón New York are kkan ngeni eú keangen ofesilap án Chón Pwáraatá Jiowa. Ekkóch leir ra pwal angang lón ekkena leeni. Ina minne, ra tongeni fiti chómmóng lein ekkewe mettóch mi kan fiffis ikena ie me pwal chiechi ngeni chókkewe mi wisen emmwen. Ekkóch ra wiseni ewe wis chónemmwen mi wisen sáifetál are fiti ekkóch sókkun angang fán iten Jiowa full-time. Iká en emén me lein néún Jiowa kewe chómmóngun aramas rese kapachelong lein chókkana, kopwe lúkúlúk pwe ka chúen emén néún Jiowa waséla me i a tongeek. A fókkun silefichuk me fang ngonuk met ka osupwangan. (1 Pit. 5:7) Jiowa a fang ngeni meinisin néún kewe aramas ener mwéngé lón pekin ngún, emmweniir, me túmúnúúr.

14. Pwal ifa eú alen án Jiowa pwáári pwe ese lifilifil aramas?

 ¹⁴ Pwal eú alen án Jiowa pwáári pwe ese lifilifil aramas, ina an nochchei án aramasen unusen fénúfan repwe tongeni álleani ewe Paipel. Ewe Taropwe mi Pin, a ákkáeúin mak lón ekkeei úlúngát fósun fénúfan, Ipru, Aramaik, me Krik. Itá chókkewe mi tongeni álleani ewe Paipel lón ekkena fósun fénúfan ra kon ririéch ngeni Jiowa lap seni chókkewe rese tongeni? Aapw.—Mat. 11:25.

15. Ifa ewe pisekin ánnet ussun án Jiowa ese lifilifil aramas? (Pwal ppii ewe sasing.)

¹⁵ Án Jiowa chiechi ngenikich, ese lóngólóng wóón iká sia fiti sukul tekia are iká sia sile ekkewe fósun fénúfan ewe Paipel a ákkáeúin mak lón. Jiowa a awora an we tipáchem esap chék ngeni chókkewe mi fiti sukul tekia, nge pwal ngeni aramasen unusen fénúfan ese lifilifil iká iir mi fiti sukul tekia are rese. Án Kot we Kapas ewe Paipel, a afféú lón fitengéréú fósun fénúfan, ina minne aramas wóón unusen fénúfan ra tongeni kúna feiéch seni áitian kewe, me silei ifa ussun repwe tongeni wiliiti chiechian.—2 Tim. 3:​16, 17.

SIPWE NÉÚN JIOWA WASÉLA TORI FEILFEILÓ

16. Me ren Féffér 10:​34, 35, ifa ussun sia tongeni néún Jiowa waséla tori feilfeiló?

¹⁶ A eú watteen feiéch ach ketiw me ren Jiowa pwe sipwe néún waséla lón imwan we imw mangaku lón kapas áwewe. A fókkun kirekiréch, uren tong, me a awasélaéch seni meinisin. Pwal och, ese lifilifil aramas. A etiwakich meinisin ese lifilifil ia sia nónnóm ie, met nónnómun manawach, ifa úkúúkún ach sukul, met ach einang, fite ierich, are iká kich mwán are fefin. Iwe nge, Jiowa a etiwa chókkewe chék mi álleasochisi ar repwe néún waséla.—Álleani Féffér 10:​34, 35.

17. Ia sia tongeni kúna me ie pwal ekkóch pwóróus ussun ach sipwe néún Jiowa waséla lón imwan we imw mangaku?

¹⁷ Lón Kölfel 15:1 NW, Tafit a apasa: “Jiowa, ié epwe tongeni waséla lón imwom imw mangaku? Ié epwe tongeni nónnóm wóón chukum mi pin?” Jiowa a néúnéú Tafit le pélúweni ekkena kapas eis. Ewe lesen mwirin ei, epwe pwóróus wóón ekkóch mettóch a lamot sipwe féri pwe sipwe apwapwaai Jiowa me sópweeló le chiechi ngeni.