1-2. Jehovah nih zumhfek tein amah a biami hna kha zeidah a sawm hna?

 MI PAKHAT nih na caah Jehovah cu zei bantuk mi dah a si? tiah aan hal ahcun zeitindah na leh lai? ‘Jehovah cu ka Pa, ka Pathian le ka Hawi’ a si tiah na leh men lai. Cun a dang Jehovah i upatnak a min kong hna zong kha na ruah khawh men. Asinain Jehovah kha na Inn-ngeitu in tah na hmu maw?

² Siangpahrang David nih Jehovah le zumhfek tein amah a biami hna an i hawikomhnak kha inn-ngeitu le a khual he a tahchunh. Jehovah kha hitin a hal: “BAWIPA, na biakinn [thlam, NWT] chung ah ahodah a um lai? Na tlang thiang Zion cung ah ahodah a um lai?” (Salm 15:1) Mah Baibal caang in Jehovah khual le a hawikom kan si kho ti kha kan hngalh. Mah cu zeitluk in dah a sunglawimi a si.

Jehovah Nih A Khual Si Hna Seh Ti A Kan Duh

3. Jehovah i a hmasa bik a khual cu ahodah a si, Jehovah le a khual cu pakhat le pakhat cung ah zeitindah an um?

³ Zeizong vialte a ser hlanah Jehovah cu amah lawng a rak si. A hnuah a fater a simi a Fapa kha a ser. Jehovah cu a thlam chung ah khual a sawm hmasa bikmi Inn-ngeitu bantuk a si i cutin tuah kha a duh tuk. Baibal ah Jehovah cu a Fapa cung ah ‘aa lawm’ tiah a ti. A hmasa bik a khual a simi a Fapa zong ‘amah [Jehovah] hmaiah khan aa lawm zungzal ve.’—Ptb. 8:30.

4. A hnuah Jehovah nih a thlam ah khual si ding in ahote dah a sawm hna?

 ⁴ A hnuah Jehovah nih a dang vancungmi pawl kha a ser hna i annih zong a khual si awkah a sawm ve hna. Baibal ah vancungmi pawl kha “Pathian fapa” tiah a auh hna i Jehovah he an umṭi caah an i nuamhnak kong kha a langhter. (Job 38:7; Dan. 7:10) Kum tampi chung amah he vancung ah a umṭimi hna lawng kha Jehovah khual an rak si. A hnuah minung a ser hna i annih zong a khual an hung si kho ve. Mah a khual lakah cheukhat cu Enok, Noah, Abraham le Job an si. Baibal ah annih cu nawl an ngaih caah ‘Pathian hawi’ in a langhter hna.—Gen. 5:24; 6:9; Job 29:4; Isa. 41:8.

5. Ezekiel 37:26, 27 chimchungbia in zeidah kan hngalh khawh?

⁵ Kumzabu tampi chung Jehovah nih a hawile kha a khual si ding in a sawm peng rih hna. (Ezekiel 37:26, 27 rel.) Tahchunhnak ah, Ezekiel chimchungbia in Pathian nih zumhfek tein amah a biami hna he a ṭhami pehtlaihnak ngeih a duh ti kha kan hngalh. ‘Anmah he daihnak biakamnak ka ser lai’ tiah bia aa kam. Mah chimchungbia nih vancung ruahchannak a ngeimi le vawlei ruahchannak a ngeimi hna kha “tuurun runkhat” in langhternak a thlam chung ah an umṭi lai caan kha a chim duhmi a si. (Johan 10:16) Mah caan cu atu hi a si.

Khoika Hmun I Kan Um Hmanh Ah Pathian Nih A Kan Zohkhenh

6. Mi pakhat cu Jehovah thlam ah zeitindah khual a hung si khawh, Jehovah thlam cu khoika ah dah a um?

⁶ Baibal chan lioah mi pakhat nih thlam kha i dinhnak ca le ni a linh caan le ruah a sur caan ah i dornak hmun caah a hman. Thlam ah a phanmi khual pakhat nih ṭha tein zohkhenh ka si lai tiah aa ruahchanh khawh. Jehovah sinah kan i pumpek tikah langhternak a thlam chung ah khual kan hung si. (Salm 61:4) Thlaraulei rawl tampi kan ngei i Jehovah khual a hung simi midang he zong kan i hawikom kho. Hmun kip ah a ummi hna zong a thlam ah khual an hung si kho. Civui zawh awkah ram dang ah na kal kho men i Pathian thlam chung ah nuam tein a ummi hna he nan i tong kho men. Cucaah zumhfek tein Jehovah kan biak ahcun khoika hmun kan um hmanh ah a thlam ah khual kan si kho.—Biat. 21:3.

7. A thimi zumhfekmi hna cu Jehovah thlam ah khual an si rih tiah zeicah kan chim khawh? (Hmanthlak zong zoh.)

⁷ A thimi zumhfekmi hna tah zeitin? Annih  tah Jehovah thlam ah khual an si rih maw? An si rih. Zeicah cutin kan chim khawh? Jehovah nih aa cinken rih hna caah a si. Jesuh nih hitin a ti: “Moses nih a thimi hna cu nunnak ah thawhter ṭhan an si lai ti cu fiang tein a chim ko. A alhmi burbuk kong a chimnak ah khan aa thawh i, ‘Bawipa cu Abraham Pathian, Isak Pathian Jakob Pathian a si,’ a ti. Cu nih cun Pathian cu a nungmi hna Pathian a si i a thimi hna Pathian a si lo ti kha a fianter, zeicahtiah annih cu amah sinah [hmuhnak ah, NWT] cun mi vialte kha an nung dih.”—Luka 20:37, 38.

Kan Hmuhmi Ṭhathnemhnak Le Kan Rian

8. A thlam chung um pengnak in Jehovah khual pawl cu zeitindah ṭhathnemhnak an hmuh?

⁸ Thlam taktak cu dinhnak le dornak hmun ah hman khawh a si bantuk in Jehovah thlam nih a khual pawl kha thlaraulei ah harnak a pe khomi thil in a huhphenh khawh hna i hmailei ruahchannak a pek khawh hna. Jehovah he naih tein kan um peng ahcun Satan nih caan saupi tiang harnak a kan pe kho lai lo. (Salm 31:23; 1 Johan 3:8) Vawlei thar ah Jehovah nih zumhfekmi a hawile pawl kha thlaraulei harnak lawng si loin thihnak zong in a khamh cang hna lai.—Biat. 21:4.

9. A khual pawl nih zeidah an tuah lai tiah Jehovah nih aa ruahchan?

⁹ Jehovah thlam ah khual pakhat si cu tinvo sung taktak a si. Jehovah he zungzal in hawikom kan si kho. A khual si peng kan duh ahcun zeidah kan tuah a hau? Mi pakhat inn ah sawm na si ahcun na sinin aa ruahchanmi kha hngalh na duh ko lai. Tahchunhnak ah, innchung na luh hlanah a phanah aa phoih lai tiah aa ruahchan men lai i nangmah zong nih lungtho tein cutin na tuah ko lai. Cu bantuk in a thlam ah khual si peng a duhmi hna nih Jehovah nih a halmi hna kha hngalh an duh. Jehovah kan dawtnak nih “amah duhnak kha” kan si khawh chung in tuah awkah a kan forh. (Kol. 1:10) Jehovah cu kan Hawi a si ti cu a hmaan ko nain upatnak hmuh awkah aa tlakmi kan Pathian le kan Pa zong a si. (Salm 25:14) Mah kha i cinken peng in amah kha kan upat peng awk a si. Mah nih a thin a hunter dingmi tuahsernak hna kha hrial awkah a kan bawmh lai. “Pathian hmai i fim tein khuasak” peng kha kan duh.—Mik. 6:8.

Jehovah Nih Israel Mi Kha Duhdanhnak Ngei Loin A Pehtlaih Hna

10-11. Jehovah nih Sinai thetse ram ah Israel mi pawl a pehtlaih hna ning in duhdanhnak a ngeih lo kha zeitindah a langhter?

¹⁰ Jehovah nih a khual pawl kha duhdanhnak ngei loin a pehtlaih hna. (Rom 2:11) Mah kha Israel mi pawl Sinai thetse ram ah a pehtlaih hna ning in kan hngalh khawh.

¹¹ Izipt sal sinak in a miphun pawl a khamh hna hnuah Jehovah nih puan biakinn ah rian ṭuan ding in tlangbawi pawl kha rian a pek hna. Levih mi pawl kha puan biakinn ah a dang rian ṭuan ding in rian a pek hna. Jehovah nih puan biakinn ah rian a ṭuanmi asiloah puan biakinn pawng ah a ummi hna kha midang nakin ṭha deuh in a zohkhenh hna maw? A zohkhenh hna lo! Jehovah cu duhdanhnak a ngei lo.

12. Jehovah nih thetse ram ah Israel miphun pawl a pehtlaih hna ning in duhdanhnak a ngeih lo kha zeitindah a langhter? (Exodus 40:38) (Hmanthlak zong zoh.)

¹² Puan biakinn ah rian a ṭuanmi an si zong, si lo zong ah asiloah biakinn pawng i a ummi an si zong, si lo zong ah Israel mi kip cu Jehovah hawikom an si kho. Tahchunhnak ah, Isreal miphun dihlak nih puan biakinn cung ah minmei le mei tom an hmuh nakhnga Jehovah nih a timhtuah. (Exodus 40:38 rel.)  Puan biakinn cung in minmei cu a dang ah aa ṭhial ahcun puan biakinn he aa hlatnak hmun ah a ummi hna hmanh nih an hmuh khawh. Mah tikah an thilri kha an tom, an thlam kha an ṭheh i midang he cuka hmun in an chuak. (Nam. 9:15-23) An riah hmun in i ṭhial awkah ngun muko pahnih an tum thawng kha mi kip nih an theih khawh. (Nam. 10:2) Cucaah puan biakinn pawng ah a ummi hna cu Jehovah he an i naih deuh tinak a si lo. Mah canah Israel mi kip cu Jehovah khual an si kho i Jehovah lamhruainak le huhphenhnak an hmu kho. Tuchan zong ah khoika hmun i a ummi kan si hmanh ah Jehovah nih a kan dawt, a kan zohkhenh i a kan huhphenh.

Tuchan Zong Ah Jehovah Cu Duhdanhnak A Ngei Lo

13. Tuchan ah Jehovah nih duhdanhnak a ngeih lo a langhter ning lamkhat cu zeidah a si?

¹³ Tuchan ah Pathian miphun cheukhat cu vawleicung pumpi zungpi le zung ṭengnge he aa naihnak hmun ah an um. Mi chuekhat cu cuka hmun ah rian an ṭuan. Cucaah annih cu cuka hmun i rianṭuannak tampi ah an i tel kho i hruaitu pawl he zong pumpak in an i hawikom kho. Cun cheukhat cu khualtlawng rianṭuantu le a dang special hmaikal rian a phunphun hna an ṭuan. Mah bantuk rian a ṭuan lomi na si hmanh ah Inn-ngeitu Jehovah nih a khual dihlak a dawt hna ti kha na zumh khawh. Ṭha tein aan hngalh i na herhmi kha aan pek. (1 Pet. 5:7) Pathian miphun dihlak cu thlarau rawl, lamhruainak le an herhmi huhpenhnak an hmu.

14. Jehovah nih duhdanhnak a ngeih lo a langhter ning a dang lamkhat cu zeidah a si?

¹⁴ Jehovah nih duhdanhnak a ngeih lo a langhter ning a dang lamkhat cu vawleicung pumpi ah a ummi hna nih Baibal an rel khawh nakhnga a timhtuahnak thawng in a si. A hrampi Baibal cu Hebru, Aramaic le Greek holh tiah phunthum in ṭial a rak si. A hrampi holh in Baibal a rel khomi hna cu a rel kho  lomi hna nakin Jehovah he a ṭha deuhmi pehtlaihnak an ngei maw? An ngei lo.—Matt. 11:25.

15. Jehovah cu duhdanhnak a ngei lo ti kha zeinihdah a langhter? (Hmanthlak zong zoh.)

¹⁵ Jehovah nih fimnak sang asiloah a hrampi holh kan theih ruang ah a khual in a kan sawmmi a si lo. Jehovah nih fimnak sang a cawngmi hna lawng si loin vawleicung pumpi ah a ummi dihlak nih a fimnak an hmuh nakhnga a timhtuah. A Bia, Baibal kha holhphun thong tampi in leh a si caah vawleicung pumpi ah a ummi hna cu a cawnpiaknak in ṭhathnemhnak an hmu kho i a hawikom an hung si kho.—2 Tim. 3:16, 17.

Jehovah ‘Cohlanmi’ Si Peng

16. Lamkaltu 10:34, 35 ning in zeitindah Jehovah cohlanmi kan si peng khawh?

¹⁶ Langhternak a thlam chung ah Jehovah nih khual pakhat in a kan conglawmhmi cu tinvo sung taktak a si. Anih cu zaangfahnak, dawtnak le khual dawtnak a ngei bikmi Inn-ngeitu a si. Mah leng ah duhdanhnak zong a ngei lo. Kan umnak hmun, hnulei sining, fimthiamnak, miphun, kum le nupa ti loin kan dihlak in a kan conglawmh. Asinain Jehovah nih a nawl a ngaimi hna lawng kha a khual in a cohlan hna.—Lamkaltu 10:34, 35 rel.

17. Jehovah thlam ah khual sinak kong he aa tlaiin a dang a konglam hna kha khoika ah dah kan hmuh lai?

¹⁷ Salm 15:1 ah ṭial a si bantuk in David nih hitin biahalnak a tuah: “BAWIPA, na biakinn chung ah ahodah a um lai? Na tlang thiang Zion cung ah ahodah a um lai?” Mah biahalnak leh awkah salm caṭialtu pa cu thawhchuahhnawh a si. A changtu capar ah Jehovah cohlanmi kan si peng nakhnga cuset khaset tiin a kan halmi cheukhat kong kha kan i ruah hna lai.