LARTIK LETID 23
KANTIK 28 Ganny lanmitye Zeova
Zeova i anvi ki nou vin son bann envite
“Mon latant pou avek zot, mon pou vin zot Bondye.”—EZEK. 37:27.
TOPIK
Nou pou vwar ki i vedir pour vin en envite dan latant Zeova e lafason ki Zeova i pran swen avek nou konman sa Enn ki’n envit nou.
1-2. Ki lenvitasyon Zeova in donn son bann adorater fidel?
KI Zeova i ete pour ou? Petet ou pou dir: ‘Zeova i mon Papa, mon Bondye e mon Zanmi.’ I kapab ki ou’n mazin lezot tit oubyen lezot fason pour dekri Zeova. Me eski ou vwar Zeova konman sa Enn ki’n envit ou?
2 Lerwa David ti konpar sa lanmitye ki Zeova i annan avek son bann serviter fidel avek sa relasyon ki Zeova i annan avek bann ki I’n envite. David ti dir: “O Zeova, lekel ki pou ganny envite dan ou latant? Lekel ki pou reste lo ou montanny sen?” (Ps. 15:1) Dan sa bann verse, nou aprann ki nou kapab vin bann envite dan latant Zeova setadir son bann zanmi. Pa sa i en gran loner!
ZEOVA I ANVI KI NOU VIN SON BANN ENVITE
3. Lekel ki ti sa premye envite dan latant Zeova e ki mannyer Zeova ek son envite i santi anver kanmarad?
3 Avan ki Zeova ti konmans kree tou keksoz, Zeova ti li tousel. Me pli tar, i ti kree son premye Garson e i ti akey li dan son latant. Zeova ti vreman kontan pour envit son premye envite dan son latant. Labib i dir ki Zeova ti “kontan” son Garson e konman sa premye envite dan latant Zeova, i ‘ti toultan kontan ler i ti avek Zeova.’—Prov. 8:30.
4. Lekel ankor ki Zeova ti envit dan son latant?
4 Apre sa, Zeova ti kree bann lanz e zot osi zot ti vin bann envite dan latant Zeova. Labib i dir ki bann lanz i bann “garson Bondye” e ki zot kontan pour o bor Zeova. (Zob 38:7; Dan. 7:10) Pour en serten letan, zis bann ki ti dan lesyel ki ti kapab vin bann envite Zeova. Pli tar, i ti kree bann imen e zot osi zot ti kapab vin son bann envite. Serten sa bann envite ti Enok, Noe, Abraam ek Zob. Labib i dekri sa bann serviter konman bann zanmi Bondye oubyen konman bann dimoun ki ti mars “avek sa vre Bondye.”—Zen. 5:24; 6:9; Zob 29:4; Iza. 41:8.
5. Ki nou kapab aprann avek sa profesi ki dan Ezekyel 37:26, 27?
5 Pandan bann syek ki’n pase, Zeova in kontinyen envit son bann zanmi dan son latant. (Lir Ezekyel 37:26, 27.) Par egzanp, dan profesi Ezekyel, nou aprann ki Bondye i vreman anvi ki son bann serviter i annan en lanmitye pros avek li. I promet ki i pou fer “en lalyans lape avek zot.” Sa profesi i koz lo en letan kot bann ki annan lespwar pour al viv dan lesyel ek bann dimoun ki annan lespwar pour viv lo later pour touzour, pou ini ansanm konman “en sel troupo” anba latant Zeova. (Zan 10:16) Nou pe viv dan sa letan ozordi!
BONDYE I KONTAN NOU NENPORT LANDRWA KOT NOU ETE
6. Ki mannyer en dimoun i kapab vin en envite dan latant Zeova e kote latant Zeova i ete?
6 Dan letan Labib, en latant ti en landrwa kot en dimoun ti kapab repoze e ganny proteze kont letan. Ler en dimoun i ganny envite dan en latant, i ti ekspekte ki sa dimoun ki’n envit li i pran swen avek li. Ler nou dedye nou lavi avek Zeova, nou vin bann envite dan son latant. (Ps. 61:4) Nou annan en kantite manze spirityel e nou zanmi avek lezot dimoun ki dan latant Zeova. Dimoun sorti partou dan lemonn i kapab vin bann envite dan latant Zeova. Petet ou’n al dan en lot pei pour asiste en lasanble spesyal e ou’n zwenn lezot dimoun ki bann envite dan latant Zeova. Nenport landrwa kot nou ete, si nou fidel avek Zeova nou kapab vin en envite dan son latant.—Rev. 21:3.
7. Akoz nou kapab dir ki bann serviter fidel Zeova ki’n mor i ankor bann envite dan latant Zeova? (Vwar portre.)
7 Ki nou pou dir konsernan bann serviter fidel Zeova ki’n mor? Eski zot ankor bann envite dan latant Zeova? Wi! Akoz nou kapab dir sa? Parski Zeova i ankor rapel zot sitan byen ki i konmsi zot ankor vivan pour li. Zezi ti dir: “Dan sa resi lo sa brousay, menm Moiz ti fer kler ki bann mor i resisite, ler i ti apel Zeova ‘Bondye Abraam, Bondye Izaak ek Bondye Zakob.’ I pa Bondye bann ki’n mor, me Bondye bann ki vivan parski pour li zot tou zot vivan.”—Lik 20:37, 38.
Menm bann serviter fidel Zeova ki’n mor i ankor bann envite dan latant Bondye (Vwar paragraf 7)
BANN BYENFE EK BANN RESPONSABILITE
8. Ki byenfe nou gannyen ler nou dan latant Zeova?
8 Bann ki dan latant Zeova i ganny proteze kont okenn keksoz ki kapab gat zot lanmitye avek Zeova e zot annan en lespwar pour lavenir. Ler nou reste pros avek Zeova, Satan pa pou kapab fer nou okenn ditor ki Zeova pa kapab repare. (Ps. 31:23; 1 Zan 3:8) Dan nouvo lemonn, Zeova pou kontinyen protez son bann zanmi fidel kont bann keksoz ki kapab gat zot lanmitye avek li e osi kont lanmor.—Rev. 21:4.
9. Ki mannyer Zeova i ekspekte son bann envite i konport zot?
9 I vreman en gran loner pour nou vin bann envite dan latant Zeova. Nou kapab annan en bon lanmitye avek li e sa lanmitye i kapab dire pour touzour. Ki mannyer nou devret konport nou si nou anvi reste konman en envite dan latant Zeova? Si en dimoun i envit ou dan son lakour, ou pou anvi konnen ki sa dimoun i ekspekte avek ou. Par egzanp, i kapab ki i ekspekte ki ou tir ou soulye avan ki ou antre dan son lakaz e ou pou anvi fer sa. Pareyman, nou anvi konnen ki Zeova i ekspekte avek bann ki anvi reste konman en envite dan son latant. Sa lanmour ki nou annan pour Zeova i motiv nou pour fer tou sa ki nou kapab pour “fer [Zeova] vreman plezir.” (Kol. 1:10) Menm si nou vwar Zeova konman nou Zanmi, nou realize ki Zeova i osi nou Bondye e nou Papa, ki merit nou respe. (Ps. 25:14) Alor nou devret toultan annan en gran respe pour li e pa zanmen oubliye ki Zeova i ete. Sa gran respe ki nou annan pour Zeova pou ed nou evit okenn kondwit ki pou ofans li. Nou toultan anvi mars avek nou Bondye avek limilite.—Mik. 6:8.
ZEOVA PA TI FER LAPREFERANS ANVER BANN IZRAELIT
10-11. Ki mannyer Zeova ti tret tou bann Izraelit ler zot ti dan dezer Sinai?
10 Zeova pa fer lapreferans anver bann dimoun ki bann envite dan son latant. (Rom. 2:11) Nou aprann sa avek lafason ki Zeova ti tret bann Izraelit ler zot ti dan dezer Sinai.
11 Apre ki Zeova ti’n liber son pep dan lesklavaz Lezip, Zeova ti apwent bann pret pour servi kot tabernak. I ti donn bann Levit responsabilite pour fer lezot travay kot tabernak. Eski Zeova ti pran pli byen swen avek bann ki ti servi kot tabernak oubyen ki ti reste o bor tabernak? Non! Zeova pa fer lapreferans.
12. Ki lezot detay ki montre ki Zeova ti tret tou Izraelit dan menm fason? (Egzod 40:38) (Vwar portre.)
12 Tou Izraelit ti annan sa loportinite pou vin zanmi Zeova ki swa zot ti servi kot tabernak oubyen zot ti reste pros avek tabernak. Par egzanp, Zeova ti fer sir ki nasyon Izrael antye ti kapab vwar sa kolonn nyaz ek sa kolonn dife ki ti par lao tabernak. (Lir Egzod 40:38.) Ler sa nyaz ti bouz dan en nouvo direksyon menm bann ki ti pe kanpe pli lwen avek tabernak ti kapab vwar sa nyaz. Alor zot ti kapab anmas zot bann keksoz, demont zot bann latant e kit landrwa an menm tan avek lezot dimoun. (Nom. 9:15-23) Tou dimoun ti kapab tann son sa de tronpet annarzan ki ti pe ganny soufle pour fer tou dimoun konnen ki zot ti bezwen konmans bouze. (Nom. 10:2) Alor menm si en dimoun ti reste pros avek tabernak, sa pa vedir ki i ti annan en pli bon lanmitye avek Zeova ki bann ki ti reste pli lwen avek tabernak. O kontrer sak Izraelit ti kapab vin bann envite dan latant Zeova e asire ki Zeova ti pou gid e protez li. Ozordi keksoz i ankor parey. Nenport landrwa kot nou reste, Zeova i kontan nou, i pran swen avek nou e i protez nou.
Tabernak ti dan milye kan bann Izraelit e sa ti montre ki Bondye pa fer lapreferans (Vwar paragraf 12)
ZEOVA PA FER LAPREFERANS OZORDI
13. Ki en fason ki Zeova i montre ki i pa fer lapreferans ozordi?
13 I annan serten parmi pep Bondye ozordi ki reste dan bann landrwa o bor biro prensipal Temwen Zeova oubyen o bor en biro brans Temwen Zeova. I annan lezot ki travay dan sa bann landrwa. Sa i fer ki sa bann frer ek ser i kapab partisip dan plizyer aktivite ki ganny fer dan sa bann landrwa e pas letan avek bann frer ki pe dirize dan lorganizasyon. Serten i servi konman sirveyan rezyonal oubyen dan lezot form servis spesyal a plen tan. Me si i pa leka pour ou, ou kapab asire ki ou ankor en envite dan latant Zeova e ki Zeova i kontan tou son bann envite. I konn ou byen e i donn ou sa ki ou bezwen. (1 Pyer 5:7) Zeova i donn manze spirityel tou son bann serviter, i gid zot e protez zot.
14. Ki en lot fason Zeova i montre ki i pa fer lapreferans?
14 En lot fason ki Zeova i montre ki i pa fer lapreferans i par fer sir ki dimoun partou dan lemonn i kapab lir Labib. Labib ti ganny ekrir orizinalman dan trwa langaz. Sa i Ebre, Arameen ek Grek. Eski bann ki kapab lir Labib dan sa bann langaz orizinal i annan en pli bon lanmitye avek Zeova ki bann ki pa kapab? Non.—Mat. 11:25.
15. Kwa ankor ki montre ki Zeova pa fer lapreferans? (Vwar portre.)
15 I pa neseser pour en dimoun annan en gran ledikasyon oubyen pour li konn bann langaz orizinal ki Labib in ganny ekrir ladan pour li ganny laprouvasyon Zeova. Zeova i fer son lasazes disponib pour tou dimoun partou lo later ki swa zot annan en gran ledikasyon oubyen non. Son Parol enspire Labib, in ganny tradwir dan plizyer milye langaz. Alor dimoun partou dan lemonn i kapab ganny bann byenfe atraver son lansennyman e zot kapab aprann ki mannyer pour vin zanmi Bondye.—2 Tim. 3:16, 17.
Lefet ki Labib in ganny tradwir dan plizyer langaz, ki mannyer sa i montre ki Bondye pa fer lapreferans? (Vwar paragraf 15)
KONTINYEN RESTE DAN LATANT ZEOVA
16. Dapre Akt 10:34, 35, ki mannyer nou kapab reste dan latant Zeova?
16 I en gran privilez pour Zeova akey nou konman bann envite dan son latant. Konman sa Enn ki’n envit nou, i napa en lot ki kapab ganny konpare avek li. Zeova i sa enn ki pli bon, ki demontre plis lanmour e ki demontre plis lospitalite. Osi, Zeova pa fer lapreferans. I akey nou tou nenport landrwa kot nou ete, nenport fason ki nou’n grandi, nenport laz ki nou annan e nenport ras oubyen tribi ki nou sorti ladan. I osi akey nou ki swa nou annan en gran ledikasyon oubyen non e ki swa nou en madanm oubyen en msye. Me zis bann ki swiv son bann standar ki kapab vin enn son envite.—Lir Akt 10:34, 35.
17. Kote nou pou vwar lezot lenformasyon ki pou ed nou reste dan latant Zeova?
17 Dan Psonm 15:1, David ti demande: “O Zeova, lekel ki pou ganny envite dan ou latant? Lekel ki pou reste lo ou montanny sen?” Apre sa, Zeova ti enspir David pour reponn sa bann kestyon. Dan sa lartik ki swiv, nou pou vwar serten keksoz ki nou bezwen fer pour nou reste dan latant Zeova.
KANTIK 32 Pran kote avek Zeova!
