1, 2. ¿Iyi ode panʉrãra sama jʉ̃ẽmarẽã jarabʉ Jeowabara?

 ẼBẼRA baduba bʉaʼa wididara kʼai Jeowara, ¿bʉa sãwũã panʉi? Bʉa panʉseabʉ Jeowara mʉ̃ Zeze, mʉ̃ neũdukʼawua akʉza Daizeze. Edaʉde bʉa krĩchabaribaibara sãwũã jara ũrĩbita kʼaita Jeowara. Mamina, ¿bʉa kʼawuabʉka Jeowabara trʉ̃bʉta iyi deda zemarẽã ẽbẽraba obʉ kĩrãkʼa?

² Ẽbẽra abaʉba iyi deda kʼãĩ wãmarẽã trʉ̃bʉrʉdera naʉ̃ba ũdubibʉ maʉ̃ ẽbẽrarã iyi neũdukʼawuaʼarata. Abarika Davidba jarasi Jeowabara dayirãta iyi deda trʉ̃bʉta Davidba jarasi: «Jeowa, ¿kʼaita bʉ karpa dede baseabʉ? ¿Kʼaitrʉ baseabʉ bʉ katʉmanera?» (Sal. 15:1). Naʉ̃neba dayirãbara kʼawuapanʉ Jeowa deda baseabʉta. Maʉ̃ba jarakĩrãbʉ iyi neũdukʼawua baseapanʉta. Kʼãrẽ yibia mawũã Jeowaba iyi deda trʉ̃bʉ baera.

JEOWABARA KÃGABɄ DAYIRÃRA IYI NEŨDUKʼAWUA BAMARẼÃ

3. ¿Jeowabara kʼaita nããra trʉ̃si iyi dedara akʉza ãyira sãwũã sentisida?

³ Jeowaba nekʼãrẽ parãi nããra iyira abapai basi, maʉ̃ tẽã iya nãã parãsi yi Warrata. Maʉ̃ne iyira yi dekaʉ kĩrãkʼa besi, yi Warrara iyi deda trʉ̃na kĩrãkʼa basi. Jeowaba mawũã yi Warra iyi dedaʼa trʉ̃bʉrʉdera Jeowara mejãcha sobiabasi. Daizeze Bedʼeabara jarabʉ Jeowabara mejãcha kãgabasita yi Warrara akʉza yi Warrabida jarabʉ «mʉ̃ra ewari jõmaʉ̃nẽ sobiabasi iyi nãã» (Prov. 8:30).

4. ¿Jeowabara tẽã kʼairata trʉ̃si iyi deda jʉ̃ẽmarẽãra?

 ⁴ Maʉ̃ tẽã Jeowabara parãsi angelerata, maʉ̃rasida iyi dedaʼa trʉ̃si. Daizeze Bedʼeabara jarabʉ naʉ̃ra angelerãra Daizeze warrarata akʉza ãyira mejãcha sobiabʉta Jeowa kʼawa panʉ baera (Job 38:7; Dan. 7:10). Poaga biobayeda, yi warrata akʉza naʉ̃ra angeleratrʉ iyi neũdukʼawuabasi. Mamina tẽã Jeowaba parãsi ẽbẽrarãta, naʉ̃rasida iyi neũdukʼawua baseapanasi. Naʉ̃ra neũdukʼawuadebemara naʉ̃ra basi, Enoc, Noé, Abrahán akʉza Job. Daizeze Bedʼeabara jarabʉ ãyira Jeowa neũdukʼawua basita Jeowaba jarabʉta opanasi baera (Gén. 5:24; 6:9; Job 29:4; Is. 41:8).

5. ¿Kʼãrẽta kʼawuapanʉ Ezequiel 37:​26, 27​de propesia jarabʉdebara?

⁵ Dããraba Jeowaba iyi neũdukʼawuara iyi deda trʉ̃bʉta (akʉra Ezequiel 37:​26, 27). Ezequielba propesiabʉdade jarabʉ Daizezera neũdukʼawua bia bakĩrãbʉta iyi ode kʼẽrẽpa panʉraʉ̃me, iya jarabʉ maʉ̃ra ẽbẽraʉ̃me bedʼea abarika zeita mawũã aduʼa panaita. Naʉ̃ propesiade jarabʉ yi ʉ̃ta wãirata akʉza nama egorode panairata iyi deda ãba panaita (Juan 10:16). Maʉ̃ra idi ewade aripe berabarinʉmʉ.

JEOWABA AKɄBɄ DAYIRÃ BɄMAE

6. (1) ¿Sõbede Daizeze de karpade panaseabʉ? (2) ¿Sama chʉ Daizeze de karpara?

⁶ Daizeze Bedʼeabara jarabʉ karpadera yibia basita ẽbẽra bʼaita adewara mama enaʉ̃seabasita, adewara ẽbẽrarã mirʉseabasita mama bisiadeba akʉza kʉrãzadeba. Yi ẽbẽra maʉ̃ karpa deda jʉ̃ẽnabara bia kʼawuabasi mamara bia edadaibasita. Dayirãba Daizeze Jeowaʼa dayirã bebʉ diaya abʉrʉdera, Daizeze deda jʉ̃ẽbʉrʉ kĩrãkʼabʉ (Sal. 61:4). Idi ewadera dayirãbara nekʼãrẽ jõma erbʉ sãwũã audre Jeowa neũdukʼawua bʼaita adewara erpanʉ neũdukʼawuara Jeowa kãgapanʉta. Mamina Jeowa de karpara pʉwʉrʉ abapaide chʉ ẽ. Bari jaraita, bʉta awuru pʉwʉrʉeda wãbʉrʉde mainʉ asamblea babʉrʉde bʉa ũdubaribaibara mama panʉta ẽbẽrarã mejãcha sobiabʉta, Jeowa deda panʉ baera. Mawũẽra naʉ̃ba jarakĩrãbʉ Jeowara de ara barabʉ ẽãta, awuarabʉrʉ Jeowa de karpara bʉta iyi ode kʼẽrẽpa panʉra bʉmae (Apoc. 21:3).

7. ¿Sãwũã kʼawuapanʉ ẽbẽrarã Jeowa ode bʉ kʼẽrẽpa beidara Jeowa karpa eda bʉta? (Akʉra potota).

 ⁷ Ẽbẽrarã Jeowaʉ̃me kʼẽrẽpanʉra beidara, ¿wabida Jeowa karpa deda panʉka? Panʉ, Jeowaba biʼia kĩrãbebʉ baera ãyira. Jesuba jarasi: «beidarãra jẽda piradrʉita, Moisésbida maʉ̃ta ũdubisi bakʉrʉ zake pʉrea nʉmana ʉ̃rʉ nebʉraside, iya jarasi Jeowara Abrahán Daizezeta, Isaac Daizezeta akʉza Jacob Daizezeta. Iyira beidapeadara Daizeze ẽ awuarabʉrʉ zokʼaipanʉra Daizeze, iyimara maʉ̃ra jõmaʉ̃ta zokʼaipanʉ baera» (Luc. 20:​37, 38).

¿KʼÃRẼ NEBIATA ŨDUPANɄ AKɄZA KʼÃRẼTA OIBARA?

8. ¿Kʼãrẽ nebiata ũdupanʉ dayirãbara Daizeze de karpade panʉnera?

⁸ De karpaba kʼarebabʉ kĩrãkʼa dayirã enaʉ̃ita, bisiaba ba ẽ marẽã akʉza kʉrãzaba ʉra ẽ marẽã, abarika Daizeze de karpabida kʼarebabʉ dayirã iyideba jĩga wã ẽ baita akʉza nebia jʉ̃ãita ʉ̃ra zeide. Dayirãta Jeowa kʼawa panʉbʉrʉ Diaruba dayirã zʉbʉriabibʉra maʉ̃ra ara oseabʉ (Sal. 31:23; 1 Juan 3:8). Adewara ẽjũã kĩrãwãreãnẽbida Jeowabara kʼarebayi iyi ode panʉra iyiʉ̃me ewari jõmaʉ̃nẽ kʼẽrẽpa panamarẽã (Apoc. 21:4).

9. ¿Kʼãrẽta odaibara ẽbẽrarã Daizeze de karpade panʉrabara?

⁹ Jeowa de karpade eda bʼaira arigʉ yibia dayirãra iyiʉ̃me ewari jõmaʉ̃nẽ yi neũdukʼawua baseabʉ baera. Dayirãta Jeowa de karpade bakĩrãpanʉbʉrʉ, ¿kʼãrẽta odaibara? Bari jaraita, ẽbẽra abaʉba dayirãta iyi deda trʉ̃ra, dayirãbara kʼawuakĩrãpanʉ iya daya kʼãrẽta omarẽã kãgabʉta. Iya dayirãʼa jarara botata wẽãmarẽã maʉ̃ra dayirãbara sobiade oyi. Abarika Daizeze ode panʉraba kʼawuakĩrãpanʉ kʼãrẽta omarẽã kãgabʉta Jeowaba mawũã iyi deda bʼaita. Dayirãba Jeowa mejãcha kãgabʉ baera zarea opanʉ daya nekʼãrẽ obʉdeba Jeowa sobiabita (Col. 1:10). Jeowara dayirã neũdukʼawua maʉ̃ daʉcha dayirã Daizeze akʉza Zeze, maʉ̃ba dayirãbara iyaʼa wawia ũdubidaibara (Sal. 25:14). Dayirãbara kĩrãduada ẽ baibara Daizezera yi zromata, maʉ̃ba dayirãba wawia ũdubipanʉbʉrʉ oda ẽ bayi iya nekʼãrẽ kãga ẽãta. Maʉ̃ kʼarea ũdubikĩrãpanʉ sainʉ oita kʼawuabʉta Daizeze nãã (Miq. 6:8).

JEOWABARA ISRAELITARÃRA JÕMA DAɄCHA BIA AKɄSI

10, 11. ¿Kʼãrẽ yizaba ũdubibʉ Jeowabara jõmaʉ̃ta daʉcha akʉbʉta?

¹⁰ Jeowabara bia edabʉ iyi de karpade eda jʉ̃ẽpanʉ ẽbẽrarãra (Rom. 2:11). Maʉ̃ra dayirãbara bia kʼawuabʉ iya israelitara sãwũã bia edadadeba Sinaíne drʉa ibʉawabʉde.

¹¹ Iyi pʉwʉrʉ Egiptodeba ẽdrʉbida tẽã Jeowabara ʉ̃kʉrʉta saserdote babisi akʉza awuru lebitarata jidasi tabernakulode nekʼãrẽ bʉta odamarẽã. ¿Jeowaba biʼia akʉbasika ẽbẽrarã tabernakulode trajabadatrʉ mawũã ẽ bʉrʉ maʉ̃ kʼawa pananatrʉ? Mawũã ẽ, Jeowabara jõmaʉ̃ta daʉcha akʉbasi.

12. ¿Sãwũã ũdubisi Jeowabara israelitara jõma daʉcha akʉbʉta? (Éxodo 40:38 akʉza akʉra potota).

¹² Drʉa ibʉawabʉ israelitara pananamaera, jõmaʉ̃ta ãyi neũdukʼawua basi, kʼãrẽ ẽ basi tabernakulode trajapanʉta  mawũã ẽ bʉrʉ maʉ̃ kʼawa bʉta, Jeowaba jõmaʉ̃ta daʉcha akʉbasi. Bari jaraita, Jeowabara bʉsi jãrãrata ewaride tabernakulo ʉ̃rʉ bamarẽã, diamasira ʉ̃tʉba pʉreabibasi tʉbʉta tabernakulo ʉ̃rʉ, mawũã jõma israelitaraba ũdudamarẽã (akʉra Éxodo 40:38). Mawũã jõmaʉ̃ba ũdupanʉ baera, jãrãrata aña wãbʉrʉdera israelitara jõmaʉ̃ta maʉ̃ kʼaidu wãseabasi ãya nekʼãrẽ erbada jʉrepedape (Núm. 9:​15-23). Adewara israelitarabara bia kʼawuaseabasi sõbede aña wãibarata, bʼiabipanasi baera ponchiru plata omata (Núm. 10:2). Mawũẽra bia kʼawuatabeda tabernakulo kʼawa panʉtrʉ Jeowa neũdukʼawua basea ba ẽ basita, awuarabʉrʉ jõmaʉ̃ta daʉcha akʉbasi, adewara jõmaʉ̃ta iyi neũdukʼawua baseabasi. Idi ewade abarikabʉ, kʼãrẽ ẽ dayirã sama bʉta Jeowabara dayirãra akʉbʉ akʉza kãga ũdubibʉ.

IDI EWADE JEOWABA JÕMAɄ̃TA DAɄCHA AKɄBɄ

13. ¿Idi ewade Jeowaba sãwũã ũdubibʉ dayirã jõmaʉ̃ta daʉcha akʉbʉta?

¹³ Ʉ̃kʉrʉ mebẽrã Jeowa ʉ̃rʉ Kʼawuabipanʉrãra sentral mundial kʼawa mawũã ẽ bʉrʉ Betel ãyi de kʼawa bʉmae panʉ. Adewara ʉ̃kʉrʉ mebẽrãbara maʉ̃ra Betelʼrane kʼarebapanʉ, maʉ̃ kʼarea ãyira Jeowa organizasion nãã edepanʉ kʼawa panʉ. Ʉ̃kʉrʉ mebẽrãra kongregasionʼra akʉbari zõrãrã mawũã ẽ bʉrʉ ewari jõmaʉ̃nẽ Jeowaita trajapanʉ. Mamina mebẽrã mejãchaʉba maʉ̃ta opanʉ ẽ, maʉ̃ba bʉa maʉ̃ta obʉ ẽ bʉrʉ, biʼia kʼawuabara Jeowabara bʉra ewari jõmaʉ̃nẽ bia edaita iyi dedara akʉza iya diaita nekʼãrẽ bʉa nesidabʉra (1 Ped. 5:7). Jeowabara iyi ode panʉra jõmaʉ̃a diabʉ ãya kʼãrẽ nesidabʉra, bʉaʼabida diayi yiko jauredebemata, jaradiayi kʼãrẽta oita akʉza bia akʉyi.

14. ¿Adewara kʼãrẽba ũdubibʉ Jeowabara jõmaʉ̃ta daʉcha akʉbʉta?

 ¹⁴ Jeowaba adewara nekʼãrẽ awurudeba ũdubibʉ dayirã jõmaʉ̃ta daʉcha akʉbʉta. Bari jaradaita, Daizeze Bedʼeara idi ewadera ẽbẽrarã jõmaʉ̃ba ãyi bedʼea awuara awuarakade akʉseabʉ. Nawedara Daizeze Bedʼeara bʉsida bedʼea ũbeade ebreode, arameone akʉza griegode, mamina maʉ̃ba jarakĩrãbʉ ẽ ẽbẽrarã maʉ̃ bedʼea bedʼeapanʉratrʉ audre Daizeze neũdukʼawua biarata (Mat. 11:25).

15. ¿Kʼãrẽba ũdubibʉ Jeowabara dayirã jõmaʉ̃ta daʉcha akʉbʉta? (Akʉra potota).

¹⁵ Jeowaba dayirãta biʼia akʉmarẽãra nesida ẽ unibersida eda wãita, mawũã ẽ bʉrʉ awuru bedʼea kʼawuaita. Jeowabara iyi buru biara ẽbẽrarã unibersida eda jʉ̃ẽna peadarabʉrʉ diabʉ kʼãrẽ ẽ, iyara maʉ̃ra diabʉ kʼãrẽ ẽbẽrarã naʉ̃ drʉade panʉra jõmaʉ̃a. Maʉ̃ kʼarea Daizeze Bedʼeara bedʼea awuara awuarakade tradusibisi, mawũã ẽbẽrarã mejãchaʉba kʼawuadamarẽã sãwũã iyi neũdukʼawua bia ba zeseabʉta (2 Tim. 3:​16, 17).

JEOWA DE KARPADEBA ÃĨ WÃRÃRA

16. ¿Hechos 10:​34, 35​ba jarabʉdebara Jeowabara kʼaira ẽbẽrarãta iyi deda babibʉ?

¹⁶ Jipade yibia dayirãra Jeowa de karpade eda panʉ baera, iyara jõmaʉ̃a kãga ũdubibʉ, jõmaʉ̃ta bia edabʉ, iya mawũã obʉ kĩrãkʼara mia abaʉ ẽbẽraba oẽ. Iyara jõmaʉ̃ta bia akʉbʉ, krĩcha ẽã dayi samabemata, kʼãrẽ estudiasita, sõbe poaga bʉta, saʉ̃ drʉadebemata, kʼãrẽ kultura erbʉta, iyitara audre yibia daya ewari jõmaʉ̃nẽ obʼaita nekʼãrẽ iyima biga bʉta (akʉra Hechos 10:​34, 35).

17. ¿Kʼãrẽ ʉ̃rʉ kʼawuadai yi wuarebema artikulodera?

¹⁷ Salmo 15:1ne Davidba naʉ̃ta widisi: «Jeowa, ¿kʼaita bʉ karpa dede baseabʉ? ¿Kʼaitrʉ baseabʉ bʉ katʉmanera?». Tẽã Jeowa kʼarebadeba iya panʉsi naʉ̃ bedʼeara. Yi wuarebema artikulode kʼawuadayi dayirãba kʼãrẽta oseabʉta Jeowa de karpadeba ãĩ wã ẽ baita.