ESTUDIO 23
CʼAY 28 ¿Bajcheʼ mi lac sujtel tiʼ yamigo Jehová?
Jehová miʼ pʌyonla ochel tiʼ yotot
«Yaʼ tiʼ tʼejl cotot mi caj i chumtʌlob. Mi caj cochel tiʼ Dios» (EZ. 37:27).
TEMA
Ili estudio mi caj i coltañonla, chaʼan mi lac ñumen qʼuel ti ñuc cheʼ Jehová miʼ pʌyonla chaʼan mi la cajñel tiʼ yotot yicʼot chaʼan mi lac ñumen chʼʌmben i sujm bajcheʼ miʼ cʌntañonla.
1, 2. ¿Bajcheʼ yilal miʼ qʼuel Jehová jiñi i wiñicob?
CHEʼ muqʼuic a cʼajtibentel, ¿chuqui a chaʼan Jehová? Tajol maʼ wʌl chaʼan a wamigo, a Tat yicʼot a Dios. Pero ¿am baʼ ñaʼta Jehová bajcheʼ juntiquil muʼ bʌ i pʌyet ochel tiʼ yotot?
2 Jiñi rey David tsiʼ yʌlʌ chaʼan jiñi i yamigojob Jehová jiñobʌch jiñi xucʼuloʼ bʌ i tsiʼ yʌlʌ chaʼan Jehová lajal miʼ qʼuel bajcheʼ invitadojob i chaʼan. David tsiʼ cʼajti: «C Yum, ¿majqui miʼ caj ti ajñel ti a wotot? ¿Majqui miʼ caj ti chumtʌl ti chʼujul bʌ a bujtʌl?» (Sal. 15:1). Ili miʼ pʌsbeñonla chaʼan mucʼʌch lac mejlel ti ochel tiʼ yotot, yom i yʌl chaʼan mi lac mejlel ti sujtel tiʼ yamigo. ¿Mach ba utsʼatic maʼ wubin iliyi?
JEHOVÁ MIʼ PɅYONLA OCHEL TIʼ YOTOT
3. ¿Majqui jiñi ñaxam bʌ invitado i chaʼan Jehová, i bajcheʼ yubil tsiʼ yubiyob i bʌ?
3 Ti ñaxan, Jehová i bajñel jach. Pero cheʼ bʌ tsiʼ mele jiñi ñaxam bʌ i Yalobil, lajal bajcheʼ jiñʌch jiñi ñaxam bʌ invitado tsaʼ bʌ i pʌyʌ ochel tiʼ yotot. ¡Jiñi tsaʼʌch i wen aqʼue i tijicñʌyel! Jiñi Biblia miʼ yʌl chaʼan jiñi tsaʼ bʌ i ñumen aqʼue i tijicñʌyel jiñʌch i Yalobil, i jiñi i Yalobil tijicña tsiʼ yubi i bʌ jaʼel (Pr. 8:30, TNM).
4. ¿Majqui tsaʼ caji i pʌy Jehová chaʼan miʼ yochel tiʼ yamigo?
4 Ti wiʼil, Jehová tsiʼ mele jiñi ángelob i lajal bajcheʼ tsiʼ yotsayob tiʼ yotot jaʼel. Jiñi Biblia miʼ yʌl chaʼan jiñi ángelob «i yalobilob Dios» i chaʼan wen tijicñayob yicʼot jaʼel (Job 38:7; Dn. 7:10). Ti ñaxan, cojach jiñi ángelob tsaʼ mejliyob ti sujtel tiʼ yamigo Jehová. Pero ti wiʼil, Jehová tsiʼ mele jiñi wiñicob xʼixicob (quixtañujob) i tsaʼ caji i pʌyob chaʼan miʼ sujtelob tiʼ yamigo, bajcheʼ Enoc, Noé, Abrahán yicʼot Job. Ti jujuntiquil miʼ yʌjlel chaʼan i yamigojob Dios come xucʼul tsaʼ ajñiyob «tiʼ bijlel Dios» (Gn. 5:24; 6:9; Job 29:4; Is. 41:8).
5. ¿Chuqui miʼ pʌsbeñonla jiñi profecía am bʌ ti Ezequiel 37:26, 27?
5 Jehová wajalix cajel i subeñob jiñi i yamigojob chaʼan miʼ cʌytʌlob tiʼ yotot. Jumpʼejl ejemplo jiñʌch muʼ bʌ lac taj ti Ezequiel 37:26, 27 (pejcan). Ili profecía miʼ pʌsbeñonla chaʼan Dios yom chaʼan jiñi i yamigojob tijicña miʼ chʌn ajñel yicʼotob. Jehová tsiʼ yʌcʼʌ i tʼan chaʼan ñʌchʼʌl mi caj i yajñel yicʼotob. Ili mi caj i tsʼʌctiyel cheʼ bʌ juntemel miʼ yajñelob jiñi muʼ bʌ caj i majlelob ti panchan yicʼot jiñi muʼ bʌ caj i chumtʌlob ila ti Pañimil (Juan 10:16). Jiñi profecía woli (choncol) i tsʼʌctiyel ili ora.
JEHOVÁ MIʼ CɅNTAÑONLA BAQUI JACH AÑONLA
6. ¿Baqui ora mi la cochel tiʼ yotot Jehová, i baqui an?
6 Jiñi Biblia miʼ yʌl chaʼan wajali jiñi lac piʼʌlob miʼ cʼʌñob pisil bʌ otot tac baʼ miʼ cʼajob i yo i miʼ ñusañob jaʼal. I cheʼ bʌ an majqui miʼ cʼotel tiʼ yotot utsʼat miʼ yotsañob i miʼ yʌqʼueñob chuqui miʼ cʼux. Cheʼ bʌ joñonla mi la cʌcʼ lac bʌ ti Jehová lajal bajcheʼ woli (yʌquel) la cochel tiʼ «yotot» (Sal. 61:4). Yaʼi an cabʌl laj cʌntesʌntel muʼ bʌ i coltañonla chaʼan chʌn lʌcʼʌl mi la cajñel ti Jehová yicʼot mi lac mejlel ti sujtel tiʼ yamigo yambʌ i yamigojob Jehová. Pero ¿baqui an jiñi i yotot Jehová? Iliyi mucʼ jach i cʼʌjñel ti lajiya bʌ tʼan come mach junsujmic baqui an. Jiñi i yotot Jehová yaʼʌch an baqui añob jiñi xucʼuloʼ bʌ i wiñicob Jehová mach yʌlʌyic baqui chumulob. Cheʼʌch an i qʼueleyob jiñi ajñemoʼ bʌ ti jumpʼejl colem tempa bʌ ti yambʌ tejclum, an i cʌñʌyob yambʌ hermanojob ochemoʼ bʌ jaʼel tiʼ yotot Jehová (Apoc. 21:3).
7. ¿Chucoch mi la cʌl chaʼan jiñi xucʼuloʼ bʌ i wiñicob Jehová chʌmeñobix bʌ yaʼʌch bej añob tiʼ yotot? (Qʼuele jaʼel jiñi foto).
7 ¿Ixcu jiñi xucʼuloʼ bʌ i wiñicob Jehová tsaʼix bʌ chʌmiyob? ¿Bej añobto ba tiʼ yotot Jehová? Cheʼʌchi. ¿Chucoch mi la cʌl bajcheʼ iliyi? Come jiñi Biblia miʼ yʌl chaʼan tiʼ ñaʼtʌbal Jehová bej cuxulobto. Jesús tsiʼ yʌlʌ: «Jiñi chʌmeñoʼ bʌ mi caj i chaʼ chʼojyelob, jinto jiñi Moisés tsiʼ yʌlʌ yaʼ baqui tiʼ tsʼijbu chaʼan jiñi juntejc alʌ teʼ, cheʼ bʌ tsiʼ yʌlʌ chaʼan Jehová ‹i Diosʌch Abrahán, i Dios Isaac yicʼot i Dios Jacob›. Mach i Diosic chʌmeñoʼ bʌ, i Diosʌch cuxuloʼ bʌ come laj cuxulob tiʼ wut» (Luc. 20:37, 38).
Miʼ mejlel la cʌl chaʼan jiñi i wiñicob Jehová chʌmeñobix bʌ bej añobʌch tiʼ yotot. (Qʼuele jiñi párrafo 7).
CHUQUI TI WENLEL MI LAC TAJ I CHUQUI YOM MI LAC MEL
8. ¿Baqui bʌ i wenlel cheʼ añonla tiʼ yotot Jehová?
8 Cheʼ añonla tiʼ yotot Jehová miʼ cʌntañonla chaʼan maʼañic chuqui miʼ ñajtʼesañonla tiʼ tojlel yicʼot an lac chaʼan utsʼatax bʌ lac pijtaya. Mi chʌn lʌcʼʌl mi la cajñel tiʼ tojlel Jehová, pejtelel chuqui miʼ mel Satanás ti laj contra, mi caj i mejlel i tojʼesan (Sal. 31:23; 1 Juan 3:8). I yaʼ ti tsijiʼ bʌ pañimil Jehová mi caj i chʌn cʌntañonla mi caj i yʌqʼueñonla chuqui i cʼʌjñibal lac chaʼan chaʼan chʌn lʌcʼʌl mi la cajñel tiʼ tojlel yicʼot chaʼan bej cuxul mi la cajñel (Apoc. 21:4).
9. ¿Bajcheʼ yilal yomob jiñi añoʼ bʌ tiʼ yotot Jehová?
9 ¡Wen utsʼatax cheʼ i yamigojonla Jehová come lajal bajcheʼ woliʼ yotsañonla tiʼ yotot! Pero mi yaʼʌch la com bej ajñel, ¿bajcheʼ yilal yomonla? Laʼcu lac ñaʼtan chaʼan an majqui miʼ pʌyonla tiʼ yotot, ¿muʼ ba caj lac mel chuqui jach la com? Maʼañic, mi lac mulan lac ñaʼtan chuqui miʼ pijtan ti lac tojlel. Tajol mach yomic mi la cotsan lac warach ti mal i machʌch añic mi caj lac mel. Lʌcʼʌ lajal miʼ yujtel tiʼ tojlel Jehová, mi la com bej ajñel tiʼ yotot yomʌch mi lac ñaʼtan chuqui miʼ pijtan ti lac tojlel. I mucʼʌch caj lac chaʼlen wersa lac mel come mi laj cʼuxbin i la com lac tijicñesan (Col. 1:10). I sujm chaʼan la camigojʌch, pero yom mi lac wen qʼuel ti ñuc come jiñʌch jiñi lac Dios yicʼot lac Tat (Sal. 25:14). Jin chaʼan, mach yomic miʼ ñajʌyel lac chaʼan majqui Jehová. Jiñi lac bʌqʼuen tiʼ tojlel mi caj i coltañonla chaʼan maʼañic mi lac mel muʼ bʌ i yʌqʼuen i chʼijyemlel yicʼot chaʼan mi lac peqʼuesan lac bʌ tiʼ tojlel (Mi. 6:8).
JUNLAJAL TSIʼ QʼUELEYOB JIÑI ISRAELITAJOB
10, 11. ¿Chuqui miʼ pʌs chaʼan Jehová junlajal bajcheʼ yilal tiʼ tojlel jiñi i wiñicob?
10 Jehová junlajal an i qʼueleyob pejtelel jiñi am bʌ i pʌyʌyob ochel tiʼ yotot (Rom. 2:11). Cheʼʌch tsiʼ mele tiʼ tojlel jiñi israelitajob cheʼ bʌ yaʼañob ti desierto.
11 Cheʼ bʌ Jehová tsiʼ locʼsa jiñi israelitajob ti Egipto, tsiʼ waʼchoco sacerdotejob chaʼan miʼ chaʼleñob eʼtel (troñel) yaʼ ti tabernáculo. Cheʼ jaʼel tsiʼ yʌqʼue tiʼ wenta jiñi levitajob chaʼan miʼ melob jiñi yan tac bʌ eʼtel yom bʌ melol yaʼi. Pero ¿yom ba i yʌl iliyi chaʼan cojach wen tsaʼ cʌntʌntiyob jiñi yaʼ bʌ añob ti tabernáculo yicʼot jiñi lʌcʼʌl bʌ chumulob yaʼi? Maʼañic, Jehová junlajal tsiʼ cʌntayob.
12. ¿Bajcheʼ tsiʼ pʌsʌ Jehová chaʼan junlajal tsiʼ qʼueleyob jiñi israelitajob yaʼ ti desierto? (Éxodo 40:38; qʼuele jaʼel jiñi foto).
12 Pejtelel jiñi israelitajob miʼ mejlelob ti sujtel tiʼ yamigo Jehová. Mach yʌlʌyic mi añob i yeʼtel yaʼ ti tabernáculo o mi maʼañic, mi lʌcʼʌl chumulob yaʼi o ñajt añob. Jehová tsiʼ yʌcʼʌ chaʼan tiʼ pejtelelob miʼ tajob i qʼuel jiñi tocal ti qʼuiñil yicʼot jiñi cʼajc ti acʼʌlel muʼ bʌ i pʌs i bʌ yaʼ ti tabernáculo (pejcan Éxodo 40:38). I cheʼ bʌ jiñi tocal miʼ tech i ñijcan i bʌ, pejtelel jiñi israelitajob miʼ tempañob i cuch chaʼan miʼ chaʼ techob xʌmbal (Nm. 9:15-23). Cheʼ jaʼel, tiʼ pejtelelob miʼ tajob i yubin cheʼ bʌ miʼ wusob jiñi chaʼpʼejl trompeta muʼ bʌ i sub chaʼan yomix miʼ techob xʌmbal (Nm. 10:2). Tsiquil chaʼan pejtelel jiñi israelitajob miʼ mejlelob ti sujtel ti wem bʌ i yamigo Jehová. Mach jiñic jach jiñi lʌcʼʌl bʌ chumulob yaʼ ti tabernáculo. I cheʼʌch miʼ yujtel jaʼel ili ora, mach yʌlʌyic baqui chumulonla, Jehová miʼ cʼuxbiñonla yicʼot miʼ cʌntañonla.
Jiñi tabernáculo tsaʼ ajñi tiʼ yojlil jiñi israelitajob, jiñi tsiʼ pʌsʌ chaʼan Jehová junlajal miʼ qʼuelob. (Qʼuele jiñi párrafo 12).
JEHOVÁ JUNLAJAL MIʼ QʼUELONLA ILI ORA
13. ¿Bajcheʼ miʼ pʌs Jehová chaʼan junlajal miʼ qʼuelonla?
13 An hermanojob lʌcʼʌl bʌ chumulob ti jiñi central mundial o ti jumpʼejl sucursal. An yaʼ bʌ mucʼob ti eʼtel i lʌcʼʌl añob yicʼot jiñi hermanojob woli bʌ i qʼuelob pejtelel jiñi eʼtel muʼ bʌ i mejlel. Cheʼ jaʼel, an viajantejoʼ bʌ o añob i chaʼan yambʌ privilegio tac. Pero yonlelob maʼañobic i chaʼan cheʼ tac bʌ privilegio bajcheʼ iliyi. Mi jatet maʼañic a chaʼan, mach a wubin a chʼijyemlel, Jehová mucʼʌch i cʼuxbiñet, miʼ chʼʌmet tiʼ yamigo yicʼot miʼ cʌntañet (1 Ped. 5:7). Jehová miʼ yʌqʼuen pejtelel jiñi i wiñicob i cʼʌjñibal bʌ i chaʼañob chaʼan chʌn lʌcʼʌl miʼ yajñelob tiʼ tojlel, miʼ cʌntañob yicʼot miʼ tojʼesañob majlel.
14. ¿Bajcheʼ yambʌ miʼ pʌs Jehová chaʼan junlajal miʼ qʼuelonla?
14 Yambʌ muʼ bʌ i pʌs chaʼan Jehová junlajal miʼ qʼuelonla jin cheʼ tsiʼ yʌcʼʌ ti tsʼijbuntel jiñi Biblia chaʼan ti lac pejtelel mi lac mejlel lac pejcan, cheʼ bajcheʼ jiñi mi lac mejlel ti sujtel tiʼ yamigo. I sujmʌch chaʼan jiñi Biblia tsaʼ tsʼijbunti ti hebreo, arameo yicʼot griego. Pero ili mach yomic i yʌl chaʼan yom la cujil pejcʌntel ili tʼan tac chaʼan mi lac mejlel lac ñumen lʌcʼtesan lac bʌ ti Jehová (Mat. 11:25).
15. Alʌ yambʌ muʼ bʌ i pʌs chaʼan Jehová junlajal miʼ qʼuelonla (qʼuele jaʼel jiñi foto tac).
15 Jehová mach jiñic miʼ chʼʌm ti ñuc baqui jaxʌl tsaʼ lac chaʼle clase o mi la cujil pejcʌntel jiñi tʼan tac bajcheʼ tsaʼ ñaxan tsʼijbunti jiñi Biblia chaʼan utsʼat miʼ qʼuelonla. Mach jiñic jach miʼ yʌqʼuen i ñaʼtʌbal jiñi tsaʼ bʌ i wen chaʼleyob clase. Jiñi Biblia añix chaʼlenti ti traducir ti cabʌl tʼan tac chaʼan jiñi lac piʼʌlob miʼ mejlel i cʌñob jiñi i cʌntesa tac yicʼot chaʼan miʼ mejlelob ti sujtel tiʼ yamigo Jehová (2 Tim. 3:16, 17).
Jiñi Biblia añix ti cabʌl tʼan tac, jiñi miʼ pʌs chaʼan Jehová junlajal miʼ qʼuelonla. (Qʼuele jiñi párrafo 15).
LAʼ CHɅN AJÑICONLA TIʼ YOTOT JEHOVÁ
16. ¿Majqui miʼ yotsan Jehová tiʼ yotot? (Hechos 10:34, 35).
16 Mi lac wen qʼuel ti ñuc cheʼ añonla tiʼ yotot Jehová. Miʼ wen pʌsbeñonla i yutslel yicʼot i cʼuxbiya, i miʼ yʌqʼueñonla chuqui i cʼʌjñibal lac chaʼan. Junlajal miʼ chʼʌmonla, mach jiñic miʼ qʼuel baqui chʼoyolonla, jiñi laj cultura, lac jabilel, mi tsaʼ lac wen chaʼle clase o maʼañic, o mi wiñiconla o xʼixiconla. Cojach yom chaʼan mi lac jacʼben i tʼan (pejcan Hechos 10:34, 35).
17. ¿Chuqui mi caj laj qʼuel ti yambʌ estudio?
17 Ti Salmo 15:1, David tsiʼ cʼajti: «C Yum, ¿majqui miʼ caj ti ajñel ti a wotot? ¿Majqui miʼ caj ti chumtʌl ti chʼujul bʌ a bujtʌl?». Tiʼ coltaya jiñi chʼujul bʌ espíritu jiñʌch tsiʼ chaʼ aqʼue i jacʼbal ili cʼajtiya. I jiñʌch muʼ bʌ caj laj qʼuel yaʼ ti yambʌ estudio, chuqui miʼ pijtan Jehová tiʼ tojlel jiñi muʼ bʌ i yotsañob tiʼ yotot.
CʼAY 32 Yom xucʼulonla ti Jehová
