ULUTAGA NI VULI 23
SERE 28 Mo iTokani i Jiova
E Sureti Keda o Jiova Meda Nona Vulagi
“Ena tiko vei ira na noqu valelaca, au na nodra Kalou.”—ISIK. 37:27.
KA E VAKABIBITAKI
Meda vakalevutaka noda vakavinavinakataki Jiova ni sureti keda meda vulagi ena nona valelaca vakayalo kei na sala e karoni keda kina.
1-2. Na veisureti cava e cakava o Jiova vei ira na nona dausokalou yalodina?
KE DUA e taroga: ‘E nomu cava o Jiova?’ Cava o na kaya? De dua o na tukuna, ‘O Jiova e Tamaqu, e noqu Kalou, e noqu iTokani tale ga.’ O na rawa ni vakasamataka eso tale na icavuti me baleti Jiova. Vakacava o bau nanuma tu mo dua vei ira na nona vulagi dokai?
2 E vakatauvatana o Tui Tevita nona veitokani o Jiova kei ira na nona dausokalou yalodina me vaka na itaukeinisoqo kei ira na nona vulagi. E taroga: “Kemuni Jiova, o cei me vulagi ena nomuni valelaca? O cei me tiko ena nomuni ulunivanua tabu?” (Same 15:1) Eda vulica ena vosa uqeti vakalou qori ni rawa nida vulagi nei Jiova, oya meda nona itokani. Qo e dua na veisureti totoka i Jiova.
E VINAKATA O JIOVA MEDA NONA VULAGI
3. O cei na imatai ni vulagi nei Jiova? Na cava nona rai o Jiova kei na imatai ni nona vulagi?
3 Ni bera ni tekivu bulibuli o Jiova, a tiko duadua ga. Ia ni toso na gauna, e sureta na Luvena ulumatua ina nona valelaca vakayalo. E marautaka vakalevu o Jiova na nona itavi vou me Dauveisureti. E tukuna na iVolatabu ni o Jiova e ‘taleitaka vakalevu’ na Luvena. Vakacava e marau tale ga na imatai ni nona vulagi? Io, e ‘marau tiko e mata i Jiova ena gauna kece.’—Vkai. 8:30.
4. O cei tale e sureta o Jiova mera nona vulagi ni toso na gauna?
4 Oti sa qai bulia o Jiova eso tale na kabula vakayalo, e sureti ira tale ga mera nona vulagi. Era vakatokai na nona agilosi mera “luve ni Kalou,” e tukuna na iVolatabu nira marautaka nodra tiko kei Jiova. (Jope 38:7; Tani. 7:10) Dua na gauna balavu, era itokani ga i Jiova o ira na tiko vata kei koya mai lomalagi. Toso na gauna, sa qai bulia na tamata mera tiko e vuravura, e rawa tale ga nira nona vulagi. Eso gona qori e wili kina o Inoki, o Noa, o Eparama, kei Jope. E tukuna na iVolatabu ni o ira na dausokalou dina qori era itokani ni Kalou, se ra “dau lako vata kei na Kalou dina.”—Vkte. 5:24; 6:9; Jope 29:4; Aisea 41:8.
5. Na cava eda vulica ena parofisai ena Isikeli 37:26, 27?
5 Ena vica vata na senitiuri sa oti, o Jiova e sureti ira tiko ga na nona itokani mera nona vulagi. (Wilika Isikeli 37:26, 27.) Kena ivakaraitaki, eda vulica ena parofisai nei Isikeli ni vinakata dina na Kalou mera veivolekati kei koya nona dausokalou yalodina. E yalataka me “veiyalayalati vata kei ira ena veiyalayalati ni vakacegu.” Na parofisai qori e dusia na gauna era na duavata kina o ira na nuitaka na bula i lomalagi kei ira na nuitaka na bula e vuravura ena valelaca vakayalo i Jiova, mera “dua ga na qelenisipi.” (Joni 10:16) Qori na ka sa yaco tiko ena gauna qo!
E KARONI KEDA O JIOVA ENA VANUA KECE EDA TU KINA
6. Sala cava eda rawa ni vulagi kina ena valelaca i Jiova? E tiko e vei na nona valelaca?
6 Na nona valelaca e dua ena gauna vakaivolatabu e vanua ni vakacegu, e taqomaki koya tale ga mai na veimataqali draki. O koya e vulagi ena valelaca qori e rawa ni namaka me karoni vinaka. Na gauna eda yalataki keda kina vei Jiova, eda sa nona vulagi ena nona valelaca vakayalo. (Same 61:4) Eda marautaka na levu ni kakana vakayalo, eda veitokani tale ga kei ira na vulagi nei Jiova. Na valelaca vakayalo i Jiova e sega ni tiko ena dua ga na vanua. O sa na rairai gade oti e vanuatani de dua mo lai tiko ena dua na soqo lavotaki, o sotava tale ga eso era marautaka mera tiko ena valelaca ni Kalou. Na valelaca qori e tiko ena veivanua era tu kina na dauveiqaravi i Jiova era talairawarawa vua.—Vkta. 21:3.
7. Eda kila vakacava nira vulagi tiko ga ena valelaca i Jiova o ira na dausokalou yalodina era sa mate? (Raica tale ga na iyaloyalo.)
7 Vakacava o ira na dausokalou yalodina era sa mate? Eda rawa ni tukuna nira se vulagi tiko ga i Jiova ena nona valelaca? Io! Cava eda kaya kina qori? Ni nanumi ira vinaka tu o Jiova, ena nona rai era se bula tu ga. E kaya o Jisu: “Era na vakaturi na mate me vaka a vakaraitaka o Mosese ena itukutuku ni kau vakavotona, ni a vakatokai Jiova me ‘Kalou i Eparama, na Kalou i Aisake, kei na Kalou i Jekope.’ E sega ni nodra Kalou na mate o koya, e nodra Kalou ga na bula, baleta vei koya era se bula tu ga.”—Luke 20:37, 38.
E se rawa tiko ga nira vulagi ena valelaca ni Kalou o ira na sa mate (Raica na parakaravu 7)
KENA YAGA KEI NA NODA ITAVI
8. E yaga vakacava noda tiko ga ena valelaca i Jiova?
8 E vanua ni vakacegu na valelaca, e taqomaki keda tale ga mai na draki. Ia na valelaca i Jiova e taqomaki ira na nona vulagi mera kua ni vakaleqai vakayalo, e vakacegui ira tale ga na inuinui se bera mai. Nida veivolekati tiko ga kei Jiova, ena sega ni rawa ni cakava o Setani e dua na ka meda vakaleqai kina vakadua. (Same 31:23; 1 Joni 3:8) Ena vuravura vou, o Jiova ena taqomaki ira tiko ga na nona itokani yalodina mera kua ni vakaleqai vakayalo, se mera mate.—Vkta. 21:4.
9. Na cava e vinakata o Jiova mera cakava na nona vulagi?
9 E dua dina na ka dokai meda vulagi ena valelaca i Jiova, ya meda veivolekati tiko ga kei koya. Na cava meda cakava ke da vinakata meda nona vulagi tiko ga? Ke o sureti ena dua na vale, o na via kila na ka e vinakata o itaukeinivale. Kena ivakaraitaki, ena rairai vinakata mo luvata nomu ivava ni bera ni o curu i vale, o na cakava sara qori. Eda via kila tale ga na ka e vinakata o Jiova me rawa nida vulagi tiko ga ena nona valelaca. Noda lomani Jiova ena uqeti keda meda cakava na ka kece eda rawata meda “vakamarautaki koya vakalevu.” (Kolo. 1:10) Eda raici Jiova me noda iTokani, e noda Kalou, e Tamada tale ga, e dodonu gona meda rokovi koya. (Same 25:14) Meda kua sara ni guilecava qori, meda dokai koya tiko ga. Nida dokai koya vakalevu, eda na qarauna meda kua ni vakacudrui koya. Eda vinakata meda ‘yalomalumalumu tiko ga nida lako vata’ kei na noda Kalou.—Maika 6:8.
SEGA NI VEIVAKADUIDUITAKI O JIOVA ENA VANUA TALASIGA
10-11. E laurai vakacava nona sega ni veivakaduiduitaki o Jiova ena vanua talasiga o Saineai?
10 E sega ni veivakaduiduitaki o Jiova ena ka e cakava vei ira na nona vulagi. (Roma 2:11) Eda rawa ni vuli ena ka e cakava vei ira na Isireli ena vanua talasiga o Saineai.
11 Ni vakabulai ira oti na nona tamata o Jiova ena nodra bobula tu mai Ijipita, e lesi ira na bete mera veiqaravi ena valeniveitavaki. Era lesi tale ga na Livai mera qarava eso tale na itavi ena valelaca qori. Vakacava o Jiova, e karoni ira vinaka ga na veiqaravi tiko ena valeniveitavaki kei ira na keba volekata ni vakatauvatani kei na so tale? Sega! E sega ni veivakaduiduitaki o Jiova.
12. E vakaraitaka vakacava o Jiova ni sega ni vakaduiduitaki ira na lewe ni nona matanitu tauyavu vou? (Lako 40:38) (Raica tale ga na iyaloyalo.)
12 Ke ra lesi ena itavi ni veiqaravi na Isireli se volekata na valeniveitavaki na nodra valelaca se sega, e rawa sara ga nira veivolekati yadudua kei Jiova. Kena ivakaraitaki, e vakadeitaka o Jiova me raica na matanitu taucoko na duru o kei na duru bukawaqa e toka ena dela ni valeniveitavaki. (Wilika Lako Yani 40:38.) Ni tekivu toso na o ena dua na vanua vou, e rawa mada ga nira raica o ira na keba vakayawa mai na valeniveitavaki, era na kumuna sara nodra iyaya, uruca nodra valelaca vakavuvale, ra qai biubiu vata kei ira na kena vo. (Tiko 9:15-23) Era rogoca kece ni uvuci vakadomoilevu e rua na biukila siliva, e vakaraitaka ni vinakati mera toki. (Tiko 10:2) E macala, ke dua mada ga e tiko volekata na valeniveitavaki, e sega ni kena ibalebale ni veivolekati sara kei Jiova ni vakatauvatani kei na so tale. Ia e rawa nira vulagi i Jiova na Isireli yadua, era na nuitaka nona veidusimaki kei na veitaqomaki. Nikua tale ga, na vanua cava ga eda tiko kina e vuravura, e lomani keda o Jiova, e karoni keda, e taqomaki keda tale ga.
Na ituvatuva ni Kalou ena valeniveitavaki e vakaraitaka nona sega ni veivakaduiduitaki (Raica na parakaravu 12)
E SEGA NI VEIVAKADUIDUITAKI NIKUA O JIOVA
13. Na cava e dua na sala e sega kina ni veivakaduiduitaki nikua o Jiova?
13 Eso na dauveiqaravi ni Kalou era tiko volekata na itikotiko liu se valenivolavola ni tabana. Eso tale era veiqaravi sara ga e keri. Levu qori era qarava e levu na itavi ena vanua qori ra qai veimaliwai kei ira na liutaka na cakacaka. Eso tale era veiqaravi vakaivakatawa ni tabacakacaka, se so tale na taba ni veiqaravi vakatabakidua. Ke da sega ni tiko volekata na itikotiko liu, valenivolavola ni tabana se veiqaravi vakatabakidua, meda nuidei ni o Jiova e lomani keda kece, eda se nona vulagi tiko ga. E kilai keda yadua, e vakarautaka tale ga na ka eda gadreva. (1 Pita 5:7) Kena ikuri, e vakarautaka vei keda yadua o Jiova na kakana vakayalo, e dusimaki keda, e taqomaki keda tale ga.
14. Na sala cava tale e sega ni veivakaduiduitaki kina o Jiova?
14 E dua tale na ivakaraitaki ni nona sega ni veivakaduiduitaki o Jiova nikua, ya ni raica mera wilika na iVolatabu o ira kece e veiyasa i vuravura. E volai taumada na iVolatabu ena tolu na vosa: vakaIperiu, Arame, kei na vaKirisi. Vakacava era veivolekati sara kei Jiova o ira na wilika na iVolatabu ena vosa taumada ni vakatauvatani kei ira na sega ni kila na vosa qori? Sega.—Maciu 11:25.
15. Eda kila vakacava ni sega ni veivakaduiduitaki o Jiova? (Raica tale ga na iyaloyalo.)
15 Nona vakadonui keda o Jiova e sega ni vakatau ena noda vuli vinaka, se noda rawa ni wilika na vosa taumada e volai kina na iVolatabu. O Jiova e solia na nona vuku vei ira kece e veiyasa i vuravura, e sega ni solia ga vei ira na vuli vinaka. Sa vakadewataki na iVolatabu ena vica vata na udolu na vosa, e rawa gona ni yaga vei keda kece na kena ivakavuvuli, eda kila tale ga na ka meda cakava meda nona itokani.—2 Tim. 3:16, 17.
E laurai vakacava nona sega ni veivakaduiduitaki na Kalou ena kena vakarautaki na iVolatabu? (Raica na parakaravu 15)
ME “VAKADONUI” KEDA TIKO GA O JIOVA
16. Me vaka e tukuni ena Cakacaka 10:34, 35, na cava meda cakava me vakadonui keda tiko ga o Jiova?
16 E ka dokai dina me sureti keda o Jiova ina nona valelaca vakayalo. E Kalou yalovinaka duadua, dauloloma, e dauveikauaitaki vakalevu. Kena ikuri, e sega ni dau veivakaduiduitaki, e sureti keda kece se vanua cava ga eda tiko kina, noda isususu, vuli, matatamata, yavusa, yabaki, yalewa se tagane. Ia o Jiova ena vakadonui ira ga na muria nona ivakatagedegede mera nona vulagi.—Wilika Cakacaka 10:34, 35.
17. Eda na raica e vei eso tale na itukutuku me rawa nida vulagi tiko ga nei Jiova?
17 Me vaka e volai ena Same 15:1, e taroga o Tevita: “Kemuni Jiova, o cei me vulagi ena nomuni valelaca? O cei me tiko ena nomuni ulunivanua tabu?” E uqeti vakalou na daunisame me sauma na taro qori. Ena veivosakitaki ena ulutaga tarava eso tale na ka meda cakava, me rawa ni vakadonui keda tiko ga o Jiova.
SERE 32 To Vei Jiova!
