XÓTA NǓKPLƆ́NKPLƆ́N TƆN 23
HAN 28 A sixú húzú xɔ́ntɔn Jexóva tɔn
Jexóva ba ɖɔ mǐ ní wá nyí jǒnɔ émítɔn lɛ́
“Un ná nɔ mi mɛ. Un ná nyí Mawu mitɔn.”—EZEK. 37:27.
XÓNUSƆ́ÐÓTE
Xóta élɔ́ ná d’alɔ mǐ bɔ ylɔ̌ e Jexóva ylɔ́ mǐ bɔ mǐ ná nyí jǒnɔ ɖo goxɔ tɔn nǔjlɛ́dónǔwú tɔn ɔ mɛ é, kpó lěe éyɛ́ mɛ e ɖo jǒnɔ mǐtɔn yí wɛ é nɔ kpé nukún dó mǐ wú gbɔn é kpó ná su nukún mǐtɔn mɛ d’é jí.
1-2. Gbehwan tɛ́ Jexóva ka nyi sɛ́dó mɛsɛntɔ́ tɔn gbejínɔtɔ́ lɛ́?
TƐN tɛ́ mɛ Jexóva ka ɖe ɖo gbɛzán towe mɛ? A sixú ɖɔ: ‘Jexóva wɛ nyí Tɔ́ ce, Mawu ce kpó Xɔ́ntɔn ce kpó.’ Tɛnmɛ nyíkɔ ɖěvo lɛ́ lɛ́vɔ́ ɖe bɔ a sixú zán dó ylɔ́ Jexóva. É ɖo mɔ̌ có, a ka nɔ lɛ́ mɔ ɛ dó mɔ Mɛyítɔ́ towe a?
2 Axɔ́sú Davídi jlɛ́ xɔ́ntɔn e Jexóva zun xá mɛsɛntɔ́ tɔn gbejínɔtɔ́ lɛ́ é dó kancícá e ɖo mɛɖé kpó jǒnɔ tɔn lɛ́ kpó tɛ́ntin é wú. É kanbyɔ́ ɖɔ: ‘Jexóva, mɛ̌ wɛ ná nɔ xwé towe gbe? Mɛ̌ wɛ ná nɔ só mímɛ́ towe jí?’ (Ðɛh. 15:1) Xó énɛ́ lɛ́ e Jexóva sɔ́ d’ayi mɛ nú mɛ bɔ è wlán é kplɔ́n mǐ ɖɔ, mǐ hɛn ɔ, mǐ ná húzú jǒnɔ, énɛ́ wɛ nyí xɔ́ntɔn Jexóva tɔn lɛ́. Gbehwan ɖaxó wɛ nyí énɛ́ bɔ Jexóva nyi sɛ́dó mɛ a cé?
JEXÓVA BA ÐƆ MǏ NÍ NYÍ JǑNƆ ÉMÍTƆN LƐ́
3. Mɛ̌ ka nyí jǒnɔ Jexóva tɔn nukɔntɔn ɔ? Nɛ̌ nǔ ka nɔ cí nú Jexóva kpó jǒnɔ tɔn kpó dó yěɖée lɛ́ wú?
3 Cóbónú Jexóva ná jɛ nǔ lɛ́ dá jí ɔ, éɖokpónɔ wɛ tíin. Amɔ̌, é wá su hweɖénu bɔ é dó doo nú Vǐɖokpónɔ tɔn wá goxɔ tɔn nǔjlɛ́dónǔwú tɔn ɔ mɛ. Azɔ̌ yɔ̌yɔ́ énɛ́ e Jexóva ɖó bá nyí Mɛyítɔ́ é dó xomɛhunhun n’i tawun. Biblu ɖe xlɛ́ ɖɔ Vǐ súnnu Jexóva tɔn “nɔ dó xomɛhunhun n’i” tawun. Jǒnɔ nukɔntɔn ɔ lɔ nɔ ɖo “awǎ jɛ wɛ ɖo [Jexóva] nukɔn hwebǐnu.”—Nǔx. 8:30, nwt.
4. Nɛ̌ Jexóva ka gbló ada nú goxɔ tɔn sín dogbó lɛ́ kpɛɖé kpɛɖé gbɔn?
4 Énɛ́ gúdo ɔ, Jexóva dá nǔɖíɖó gbigbɔ tɔn ɖěvo lɛ́, bo ylɔ́ yě lɔmɔ̌ ɖɔ yě ní wá nyí jǒnɔ émítɔn lɛ́. È ylɔ́ wɛnsagun lɛ́ ɖɔ “vǐ Mawu tɔn lɛ́,” bo ɖɔ dó yě wú ɖɔ Jexóva kpá e yě ɖe é nɔ dó xomɛhunhun nú yě. (Jɔb. 38:7; Dan. 7:10) Nú hwenu ɖé ɔ, nǔɖíɖó gbigbɔ tɔn énɛ́ lɛ́ e nɔ nɔ fí e Mawu nɔ nɔ é kɛ́ɖɛ́ jɛ́n sixú zun xɔ́ntɔn xá ɛ. Nukɔnmɛ ɔ, é wá gbló ada nú goxɔ tɔn bónú gbɛtɔ́ e ɖo ayǐkúngban jí lɛ́ é ná byɔ́ mɛ. Ð’ayǐ ɔ, Enɔ́ci, Nɔwée, Ablaxámu kpó Jɔbu kpó ɖo mɛ énɛ́ lɛ́ e è jɔ wǔ lɛ́ é mɛ. È ylɔ́ mawusɛntɔ́ gbejínɔtɔ́ énɛ́ lɛ́ ɖɔ xɔ́ntɔn Mawu tɔn lɛ́, alǒ mɛ e “yi xá Mawu” nǔgbó ɔ lɛ́ é.—Bǐb. 5:24; 6:9; Jɔb. 29:4; Eza. 41:8.
5. Étɛ́ nǔɖɔɖayǐ e ɖo Ezekiyɛ́li 37:26, 27 mɛ é ka sixú kplɔ́n mǐ?
5 Ðo xwe kanweko mɔ̌kpán lɛ́ gblamɛ ɔ, Jexóva kpo ɖo xɔ́ntɔn tɔn lɛ́ ylɔ́ wɛ ɖɔ yě ní wá nyí jǒnɔ émítɔn lɛ́. (Xa Ezekiyɛ́li 37:26, 27.) Ði kpɔ́ndéwú ɔ, nǔɖɔɖayǐ Ezekiyɛ́li tɔn kplɔ́n mǐ ɖɔ Mawu ba vɛ́návɛ́ná ɖɔ mɛsɛntɔ́ émítɔn gbejínɔtɔ́ lɛ́ ní zun xɔ́ntɔn vívɛ́ xá émí. É d’akpá bo “ná jɛ akɔ e ná ná fífá” yě é xá yě. Nǔɖɔɖayǐ énɛ́ nɔ dó gesí hwenu e mɛ ɖěɖěe ɖó nukúnɖíɖó jǐxwé tɔn lɛ́ é kpó mɛ ɖěɖěe ɖó nukúnɖíɖó ayǐkúngban jí tɔn lɛ́ é kpó ná nɔ bǔ bo ná nyí “lɛ̌ngbɔ́hwan ɖokpó” ɖo goxɔ nǔjlɛ́dónǔwú tɔn Jexóva tɔn glɔ́ é. (Jaan 10:16) Hwe ɔ nu wɛ mǐ ɖe din!
NÚ MǏ NÁ BO TLƐ ÐO FÍ ÐĚBǓ Ɔ, NǓ MǏTƆN NƆ ÐU AYI MƐ NÚ MAWU
6. Nɛ̌ mɛɖé ka nɔ húzú jǒnɔ ɖo goxɔ Jexóva tɔn mɛ gbɔn? Fítɛ́ è ka sixú mɔ goxɔ Tɔn ɖe?
6 Ðo Biblu sín táan mɛ ɔ, goxɔ mɛɖé tɔn wɛ nyí fí e mɛ ɔ nɔ gbɔjɛ ɖe é kpó fí e nɔ nya xɛ ɖo jǐ tɔn ɖo ninɔmɛ ayǐ mɛ tɔn nukɔn é kpó. Jǒnɔ e ɖo goxɔ énɛ́ mɛ é sixú ɖó nukún ɖɔ è ná kpé nukún émí wú ganjí. Ényí mǐ zé mǐɖée jó nú Jexóva bo zun xɔ́ntɔn xá ɛ ɔ, mǐ nɔ húzú jǒnɔ ɖo goxɔ tɔn nǔjlɛ́dónǔwú tɔn ɔ mɛ. (Ðɛh. 61:5) Mǐ nɔ ɖu vǐví nǔɖuɖu gbigbɔ tɔn e túnflá é tɔn, bo nɔ lɛ́ ɖu vǐví kpɔ́ ninɔ xá mɛ ɖěvo e wá húzú jǒnɔ Jexóva tɔn lɛ́ é tɔn. Goxɔ tɔn nǔjlɛ́dónǔwú tɔn ɔ ɖo fí ɖé lě tawun ǎ. É sixú byɔ́ ɖɔ a ní yi gbě ɖěvo jí, bóyá bá dó yi kpléɖókpɔ́ akɔjɔkplé ɖé, fí e a ná xo go mɛ ɖěɖěe ɖó awǎjijɛ ɖó yě ɖo goxɔ Mawu tɔn mɛ wútu lɛ́ é ɖe é. Goxɔ Jexóva tɔn ɖo fí ɖěbǔ e mɛsɛntɔ́ tɔn gbejínɔtɔ́ lɛ́ ɖe é.—Nǔɖe. 21:3.
7. Étɛ́wú mǐ ka sixú ɖɔ ɖɔ gbejínɔtɔ́ ɖěɖěe ko kú lɛ́ é kpo ɖo jǒnɔ nyí wɛ ɖo goxɔ Jexóva tɔn mɛ? (Kpɔ́n fɔtóo ɔ lɔmɔ̌.)
7 Gbejínɔtɔ́ ɖěɖěe ko kú lɛ́ é ka lo? É ka sɔgbe ɖɔ mǐ ní wá gbeta ɔ kɔn ɖɔ yě kpo ɖo jǒnɔ nyí wɛ ɖo goxɔ Jexóva tɔn mɛ a? Ganjí! Étɛ́wú mǐ ka sixú ɖɔ mɔ̌? Ðó Jexóva kpo ɖo mɛ énɛ́ lɛ́ flín wɛ. Jezu tínmɛ ɖɔ: “Ðo tan e kunkplá wunkan ɔ é mɛ ɔ, Mɔyízi tlɛ ɖe fínfɔ́n sín kú mɛkúkú lɛ́ tɔn xó ɔ xlɛ́, hwenu e é ylɔ́ Jexóva ɖɔ Mawu Ablaxámu tɔn, Mawu Izáki tɔn, Mawu Jakɔ́bu tɔn é. É nyí Mawu mɛkúkú lɛ́ tɔn ǎ, loɔ, mɛ e ɖo gbɛ lɛ́ é tɔn wɛ, ɖó yě bǐ wɛ ɖo gbɛ ɖo nukún tɔn mɛ.”—Luk. 20:37, 38.
È tlɛ sixú kpo ɖo gbejínɔtɔ́ ɖěɖěe ko kú lɛ́ é kpɔ́n dó mɔ jǒnɔ lɛ́ wɛ ɖo goxɔ Mawu tɔn mɛ (Kpɔ́n akpáxwé 7)
LE ÐĚÐĚE MǏ NÁ MƆ LƐ́ É KPÓ NǓ ÐĚÐĚE MǏ ÐÓ NÁ WA LƐ́ É KPÓ
8. Nɛ̌ goxɔ Jexóva tɔn mɛ ninɔ ka nɔ hɛn le wá nú jǒnɔ tɔn lɛ́ gbɔn?
8 Lěe goxɔ ɖé sixú nyí fí e è ná gbɔjɛ ɖe é kpó fí e nɔ nya xɛ ɖo mɛ jí ɖo ninɔmɛ ayǐ mɛ tɔn nukɔn é kpó gbɔn é ɔ, goxɔ Jexóva tɔn nɔ nya xɛ ɖo jǒnɔ tɔn lɛ́ jí bo nɔ lɛ́ ná nukúnɖíɖó jɔ nukúnɖíɖó yě. Ényí mǐ kpo ɖo vǐvɛ́ kpó Jexóva kpó wɛ ɔ, Satáan sixú wa nǔɖé nú mǐ b’ɛ ná wa nǔ dó mǐ wú káká sɔ́yi ǎ. (Ðɛh. 31:24; 1 Jaan 3:8) Ðo gbɛ yɔ̌yɔ́ ɔ mɛ ɔ, Jexóva ná kpo ɖo xɛ nya ɖo xɔ́ntɔn tɔn gbejínɔtɔ́ lɛ́ jí wɛ; é ka ná nyí ɖo nǔ e sixú wa nǔ dó yě wú ɖo gbigbɔ lixo lɛ́ é kɛ́ɖɛ́ sí ǎ, loɔ, é ná lɛ́ nya xɛ ɖo yě jí sín kú sí.—Nǔɖe. 21:4.
9. Étɛ́ Jexóva ka nɔ ɖó nukún ɖɔ jǒnɔ tɔn lɛ́ ní wa?
9 Wǔjɔmɛ ɖaxó wɛ é nyí nǔgbó ɖɔ è ní nyí jǒnɔ ɖo goxɔ Jexóva tɔn mɛ, énɛ́ wɛ nyí ɖɔ è ní ɖu vǐví xɔ́ntɔn zunzun tɔn e ná nɔ ayǐ káká sɔ́yi é xá Jexóva. Ényí mǐ ba ná kpo ɖo jǒnɔ Jexóva tɔn lɛ́ nyí wɛ ɔ, afɔ tɛ́ lɛ́ mǐ ka ɖó ná ɖe? Ényí mɛɖé ylɔ́ we wá xwé tɔn gbe ɔ, a ná ba ná wa nǔ e ná nyɔ́ nukún tɔn mɛ é. Ði kpɔ́ndéwú ɔ, é sixú ɖó nukún ɖɔ hwi ní ɖe afɔkpa towe lɛ́ cóbó byɔ́ xɔ mɛ, bɔ a ka ná wa mɔ̌ kpó jlǒ kpó. Mɔ̌ ɖokpó ɔ, é ɖo wɛn ɖɔ a ba ná tuun nǔ ɖěɖěe Jexóva ɖo nukún ɖó wɛ ɖo mɛ ɖěɖěe ba ná kpo ɖo jǒnɔ nyí wɛ ɖo goxɔ tɔn mɛ lɛ́ é sí é. Wǎn e mǐ yí nú Jexóva é nɔ sísɛ́ mǐ bɔ mǐ nɔ wa nǔ e wú mǐ kpé é bǐ bá “dó nyɔ́ nukún tɔn mɛ bǐ mlɛ́mlɛ́.” (Kolo. 1:10) Nǔgbó wɛ ɖɔ Jexóva nyí xɔ́ntɔn mǐtɔn, amɔ̌, é lɛ́ nyí Mawu mǐtɔn kpó Tɔ́ mǐtɔn kpó bo jɛxá sísí mǐtɔn. (Ðɛh. 25:14) Mǐ ɖó ná wɔn énɛ́ gbeɖé ǎ, bo ná nɔ ɖó sísí e gɔ́ngɔ́n é n’i hwebǐnu. Sísí ɖaxó mɔ̌hun ɖíɖó n’i ná d’alɔ mǐ bɔ mǐ ná nyi alɔ nú nǔwalɔ e ná dó xomɛsin nú Mawu mǐtɔn lɛ́ é, bo ná “zán gbɛ ɖo mɛɖéesɔ́hwe mɛ” ɖo nukɔn.—Micée 6:8.
JEXÓVA ÐE MƐÐÉ ÐÓ VO ÐO MƐÐÉ MƐ, ÐO LĚE É WA NǓ XÁ IZLAYƐ́LI VÍ LƐ́ ÐO GBĚTÓTLÓ MƐ GBƆN É KPÁXWÉ Ǎ
10-11. Nɛ̌ lěe Jexóva wa nǔ gbɔn xá Izlayɛ́li ví lɛ́ ɖo gbětótló Sinayíi tɔn mɛ é ka xlɛ́ ɖɔ é kún nɔ ɖe mɛɖé ɖó vo ɖo mɛɖé mɛ ó gbɔn?
10 Nú Jexóva ɖo nǔ wa xá jǒnɔ tɔn lɛ́ wɛ ɔ, é nɔ ɖe mɛɖé ɖó vo ɖo mɛɖé mɛ ǎ. (Hlɔ̌. 2:11) Ali e nu Jexóva wa nǔ xá Izlayɛ́li ví lɛ́ ɖe ɖo gbětótló Sinayíi tɔn mɛ é sixú d’alɔ mǐ bɔ mǐ ná mɔ nǔ jɛ lěe Jexóva ma nɔ ɖe mɛɖé ɖó vo ɖo mɛɖé mɛ gbɔn ǎ é wú ganjí.
11 Ée Jexóva ɖe togun tɔn sín kannumɔgbénu ɖo Ejípu gúdo é ɔ, é sɔ́ vɔ̌sánúxwlémawutɔ́ lɛ́ bónú yě ná nɔ wa sinsɛnzɔ́ ɖo goxɔ ɔ mɛ. È sɔ́ Levíi ví lɛ́ bónú yě ná ɖ’alɔ ɖo azɔ̌ ɖěvo e kunkplá goxɔ mímɛ́ énɛ́ ɔ lɛ́ é mɛ. Jexóva nɔ kpé nukún dó mɛ ɖěɖěe nɔ wa sinsɛnzɔ́ ɖo goxɔ ɔ mɛ lɛ́ é, alǒ mɛ ɖěɖěe nɔ nɔ malínmálín dó goxɔ ɔ lɛ́ é wú hú mɛ ɖěvo lɛ́ wɛ a? Éǒ! Jexóva nɔ ɖe mɛɖé ɖó vo ɖo mɛɖé mɛ ǎ.
12. Nɛ̌ Jexóva e nyí Mɛyítɔ́ ɔ é ka ɖe xlɛ́ ɖɔ émí kún nɔ ɖe mɛɖé ɖó vo ɖo mɛɖé mɛ ó gbɔn hwenu e é ɖó akɔta yɔ̌yɔ́ Izlayɛ́li tɔn ayǐ é? (Tíntɔ́n 40:38) (Kpɔ́n ɖiɖe ɔ lɔmɔ̌.)
12 Mɛ e ɖo fí e Izlayɛ́li ví lɛ́ ɖó gɔnu ɖó lɛ́ é bǐ wɛ ali hun ná ɖó bǎ ɖokpó ɔ mɛ bónú yě ná ɖu vǐví xɔ́ntɔn zunzun xá Jexóva tɔn, yě ná bo tlɛ nɔ wa sinsɛnzɔ́ bǔnɔ ɖěbǔ alǒ nɔ nɔ fí ɖěbǔ dó goxɔ ɔ nɛ́. Ði kpɔ́ndéwú ɔ, Jexóva nɔ tɛ́n kpɔ́n bo nɔ bló bɔ akɔta ɔ blěbú nɔ kpé wú bo nɔ mɔ akpɔ́kpɔ́ nǔjíwǔ tɔn ɔ sín dotín kpó dotín myɔ tɔn ɔ kpó ɖo goxɔ ɔ tanu. (Xa Tíntɔ́n 40:38.) Ényí akpɔ́kpɔ́ ɔ ɖidó akpá ɖěvo xwé ɔ, mɛ e tlɛ ɖo zɔ tawun dó goxɔ ɔ lɛ́ é nɔ kpé wú bo nɔ mɔ, nɔ dó agban yětɔn lɛ́, tún goxɔ yětɔn lɛ́ bo nɔ xwedó mɛ e kpo ɖo akɔta ɔ mɛ lɛ́ é ɖidó. (Kɛ́n. 9:15-23) Togun ɔ bǐ sixú se xósúsú kpatágan sín kpɛn we lɛ́ tɔn e nɔ xlɛ́ ɖɔ togun ɔ ɖó ná jɛ ali é. (Kɛ́n. 10:2) É ɖo wɛn ɖɔ, goxɔ ɔ kpá ninɔ tútútú kún xlɛ́ ɖɔ è zun xɔ́ntɔn vívɛ́ xá Jexóva ó. É nyɔ́ wa ɔ, Izlayɛ́li ví lɛ́ bǐ sixú nyí jǒnɔ Jexóva tɔn bo kú d’é jí ɖɔ é ná xlɛ́ ali émí bo lɛ́ cyɔ́n alɔ émí jí. Mɔ̌ ɖokpó ɔ, ɖo égbé ɔ, mǐ ná bo tlɛ nɔ nɔ fí ɖěbǔ ɖo ayǐkúngban ɔ jí ɔ, mǐ sixú ɖu wǎnyíyí Jexóva tɔn, nukúnkpémɛwú tɔn kpó xɛnyaɖomɛjí tɔn kpó sín le.
Tuto e Mawu sɔ́ ɖ’ayǐ ɖo goxɔ ɔ mɛ é xlɛ́ ɖɔ é kún nɔ ɖe mɛɖé ɖó vo ɖo mɛɖé mɛ ó (Kpɔ́n akpáxwé 12)
KPƆ́NDÉWÚ ÐĚÐĚE XLƐ́ ÐƆ JEXÓVA KÚN NƆ ÐE MƐÐÉ ÐÓ VO ÐO MƐÐÉ MƐ ÉGBÉ Ó É ÐÉ LƐ́
13. Ðɔ ali e nu Jexóva nɔ ɖe xlɛ́ ɖɔ émí kún nɔ ɖe mɛɖé ɖó vo ɖo mɛɖé mɛ ó ɖo égbé ɖe é ɖokpó.
13 Mɛ e ɖo togun Mawu tɔn mɛ ɖo égbé é ɖé lɛ́ nɔ nɔ malínmálín dó hɔ̌nkan gbɛ ɔ tɔn alǒ alaxɔ Kúnnuɖetɔ́ Jexóva tɔn lɛ́ tɔn ɖé. Mɛ ɖěvo lɛ́ ka nɔ wa sinsɛnzɔ́ ɖo fí énɛ́ lɛ́. Wǎgbɔ tɔn ɔ, mɛ mɔ̌hun lɛ́ sixú ɖ’alɔ ɖo azɔ̌ e è nɔ wa ɖo fínɛ́ lɛ́ é gěgé mɛ, bo lɛ́ zun xɔ́ntɔn vívɛ́ xá mɛ ɖěɖěe ɖo nukɔn nú mǐ lɛ́ é. Mɛɖé lɛ́ lɛ́ nyí nukúnkpénǔwútɔ́ lɛ́ alǒ ɖo sinsɛnzɔ́ hwebǐnu tɔn bǔnɔ alɔkpa ɖěvo lɛ́ mɛ. Ényí a ɖo mɛ tootóbú e ma ɖo sinsɛnzɔ́ mɔ̌hun lɛ́ sín vǐví ɖu wɛ din ǎ lɛ́ é mɛ hǔn, kú d’é jí ɖɔ a kpo ɖo jǒnɔ Jexóva tɔn nyí wɛ, b’ɛ yí wǎn nú we. Gɔ́ ná ɔ, é tuun we ganjí bo nɔ ná nǔ e sín hudó a ɖo é we. (1 Pi. 5:7) Mɛ ɖěɖěe ɖo togun Mawu tɔn mɛ lɛ́ é bǐ nɔ mɔ nǔɖuɖu gbigbɔ tɔn, wěɖexámɛ kpó xɛnyaɖomɛjí kpó e sín hudó yě ɖó é.
14. Kpɔ́ndéwú ɖěvo tɛ́ ka xlɛ́ ɖɔ Jexóva e nyí Mɛyítɔ́ mǐtɔn é kún nɔ ɖe mɛɖé ɖó vo ɖo mɛɖé mɛ ó?
14 Kpɔ́ndéwú ɖěvo e xlɛ́ ɖɔ Jexóva e nyí Mɛyítɔ́ mǐtɔn é, kún nɔ ɖe mɛɖé ɖó vo ɖo mɛɖé mɛ ó é wɛ nyí ɖɔ é bló bɔ Biblu ɔ tíin nú gbɛtɔ́ e ɖo ayǐkúngban ɔ jí ɖo égbé lɛ́ é bǐ. Gbe dodó atɔn mɛ wɛ è wlán Nǔwlánwlán mímɛ́ lɛ́ dó; yě wɛ nyí: Ebléegbe, Alámugbe kpó Glɛ̌kigbe kpó. Mɛ ɖěɖěe sixú xa Biblu dó gbe dodó lɛ́ mɛ lɛ́ é zun xɔ́ntɔn vívɛ́ xá Jexóva hú mɛ ɖěɖěe ma sixú wa mɔ̌ ǎ lɛ́ é wɛ a? Éǒ, é nyí mɔ̌ ǎ.—Mat. 11:25.
15. Étɛ́ ka xlɛ́ nyi wɛn ɖɔ Jexóva kún nɔ ɖe mɛɖé ɖó vo ɖo mɛɖé mɛ ó? (Kpɔ́n fɔtóo ɔ lɔmɔ̌.)
15 Jexóva nɔ byɔ́ mǐ ɖɔ mǐ ní wá nyí xɔ́ntɔn émítɔn ɖó lě do mǐ se wěma sɔ é, alǒ nǔwúkpíkpé e mǐ ɖó bo nɔ dó gbe ɖěvo lɛ́ é kpowun wú ǎ. Jexóva nɔ ná nǔnywɛ́ tɔn mɛ ɖěɖěe se wěma tawun lɛ́ é kɛ́ɖɛ́ ǎ, é nyɔ́ wa ɔ, é bló bɔ é tíin nú mɛ e ɖo ayǐkúngban ɔ jí lɛ́ é bǐ, ényí yě ná bo tlɛ se wěma tawun kpó yě gbɔ kpó ɔ nɛ́. È ko tínmɛ Xó Jexóva tɔn Biblu ɔ dó gbe afatɔ́n mɔ̌kpán mɛ, mɔ̌ mɛ ɔ, gbɛtɔ́ e gbɔn gbɛ ɔ bǐ mɛ lɛ́ é sixú ɖu nǔkplɔ́nmɛ Biblu tɔn lɛ́ sín le, bo kplɔ́n lěe yě sixú húzú xɔ́ntɔn Jexóva tɔn lɛ́ gbɔn é.—2 Tim. 3:16, 17.
Nɛ̌ tíin e Biblu ɔ tíin ɖo égbé é ka nyí kúnnuɖenú e xlɛ́ ɖɔ Mawu kún nɔ ɖe mɛɖé ɖó vo ɖo mɛɖé mɛ ó é gbɔn? (Kpɔ́n akpáxwé 15)
NǓ NǓ TOWE NÍ KPO ÐO JEXÓVA NUKÚN MƐ NYƆ́ WƐ
16. Sɔgbe xá Mɛsɛ́dó 10:34, 35 ɔ, nɛ̌ nǔ mǐtɔn ka sixú kpo ɖo Jexóva nukún mɛ nyɔ́ wɛ gbɔn?
16 Wǔjɔmɛ ɖaxó wɛ é nyí ɖɔ Jexóva ní yí mɛ dó goxɔ tɔn nǔjlɛ́dónǔwú tɔn ɔ mɛ. É wɛ nyí xomɛnyɔ́tɔ́, wǎnyíyínɔ kpó Mɛyítɔ́ kpó ɖaxó hú gǎn e nǔ bǐ vɔ ɖ’é wú é. Gɔ́ ná ɔ, é nɔ ɖe mɛɖé ɖó vo ɖo mɛɖé mɛ ǎ, é nɔ yí mǐ bǐ, ényí mǐ ná bo tlɛ nɔ nɔ fí ɖěbǔ, gosín xá ɖěbǔ mɛ, se wěma ɖó bǎ ɖěbǔ mɛ, ɖó sinmɛ agbaza tɔn ɖěbǔ, gosín akɔta ɖěbǔ mɛ, ɖó xwe ɖěbǔ alǒ mɛ̌ ɖěbǔ ɔ nɛ́. É ɖo mɔ̌ có, mɛ ɖěɖěe nɔ xwedó nǔgbódodó tɔn lɛ́ é kɛ́ɖɛ́ sín nǔ wɛ nɔ nyɔ́ nukún tɔn mɛ bo nɔ nyí jǒnɔ tɔn lɛ́.—Xa Mɛsɛ́dó 10:34, 35.
17. Fítɛ́ mǐ ka ná mɔ mɔjɛmɛ ɖěvo dó jǒnɔ nyínyí ɖo goxɔ Jexóva tɔn mɛ wú ɖe?
17 Ðo Ðɛhan 15:1 mɛ ɔ, Davídi kan nǔ élɔ́ lɛ́ byɔ́: ‘Jexóva, mɛ̌ wɛ ná nɔ xwé towe gbe? Mɛ̌ wɛ ná nɔ só mímɛ́ towe jí?’ Énɛ́ gúdo ɔ, Jexóva zán Davídi dó ná xósin nú nǔkanbyɔ́ énɛ́ lɛ́ ɖo Ðɛhan 15gɔ́ ɔ mɛ. Xóta e bɔ d’é wú é ná ɖɔ xó dó nǔ tawun tawun e mǐ ɖó ná wa bɔ nǔ mǐtɔn ná kpo ɖo Jexóva nukúnmɛ nyɔ́ wɛ é ɖé lɛ́ jí.
HAN 32 Nɔ Jexóva hwan mɛ!
