AWTIK POU ÉTIDYÉ 23
KANTIK 28 O Jéova, kimoun ké zanmi a-w ?
Jéova ka envité-nou anba tant a-y !
« Tant an mwen ké èvè yo, é an ké vin Bondyé a yo » (ÉZÉK. 37:27).
ON TI LIDÉ ASI SA NOU KAY VWÈ
Awtik-lasa ké édé-nou konprann ka sa vé di lè Jéova ka envité-nou anba tant a-y é kijan i ka pran swen an nou byen konm i fo.
1-2. Ki envitasyon Jéova ka fè sèwvitè a-y ki fidèl ?
SIWVWÈ yo té ka mandé-w : « Ka Jéova yé a-w ? » Ka ou té’é réponn ? Sèten ou té’é di : « Sé Pap’an mwen, Bondyé an mwen é Zanmi an mwen. » Pétèt osi ou té’é sonjé onlo dòt tit yo ka sèvi èvè yo pou kriyé Jéova. Men, ès ou té’é di kè Jéova sé Sila ki ka envité-w anba tant a-y la ?
2 Wa David konparé lanmityé-la ki ni la antrè Jéova é adoratè a-y ki fidèl èvè on moun ki ka rèsèvwa envité a-y anba tant a-y. Mi sa i maké : « O Jéova, kimoun ki ké envité adan tant a-w ? Kimoun ki ké pé rété adan montangn a-w ki sakré ? » (Sòm 15:1). Bondyé sèvi èvè lèspri sen pou fè-yo maké sé pawòl-lasa. Sé pawòl-lasa ka montré-nou kè Jéova pé envité-nou vin anba tant a-y, kivédi a vin zanmi a-y. Mi on bèl lonnè mi !
JÉOVA VLÉ NOU VIN ANBA TANT A-Y
3. Kimoun Jéova envité an prèmyé, é ka li é moun-la i envité la rèsanti yonn pou lòt ?
3 Avan i koumansé kréyé tout biten, Jéova té tousèl. Men lè i kréyé Gason a-y, prèmyé timoun a-y, Jéova té kon on moun ki ka rèsèvwa prèmyé envité a-y anba tant a-y, é a pa ti kontan i té kontan fè sa. Labib ka di kè Jézi té Gason-la Bondyé « té pli enmé la » é kè Gason-lasa ‘té toujou kontan lè i té douvan-y’ (Pwov. 8:30).
4. Piti-a-piti, ki dòt moun Jéova envité anba tant a-y ?
4 Aprésa Jéova kréyé dòt zanj é i envité-yo, pou yo osi rété anba tant a-y. Labib ka kriyé-yo « gason a Bondyé » é i ka èspliké kè yo té kontan toubònman davwa yo té èvè Bondyé (Jòb 38:7 ; Dan. 7:10). Pannan on sèwten tan, tout zanmi a Bondyé té ka touvé-yo an syèl-la, koté-la Bondyé ka rété la. Men plita, i kréyé lézimen, é adan on sans, i laji tant a-y pou i té envité-yo osi. Pawmi yo, té ni Énòk, Noé, Abraam, é Jòb. Labib ka di kè sé sèwvitè-lasa, ki té fidèl a Jéova, « té ka maché èvè vré Dyé-la », kivédi kè yo té zanmi a-y (Jén. 5:24 ; 6:9 ; Jòb 29:4 ; Iz. 41:8).
5. Ka pwofési-la ki maké an Ézékyèl 37:26, 27 ka aprann-nou ?
5 Pannan plizyè syèk, Jéova kontinyé envité zanmi a-y vin anba tant a-y (li Ézékyèl 37:26, 27). Pa ègzanp, adan pwofési-la Ézékyèl maké la, nou ka aprann kè Bondyé vlé vin bon zanmi èvè sèwvitè a-y ki fidèl. Pwofési-lasa ka di osi kè Jéova pwomèt i té’é ‘fè on alyans pou lapé èvè yo’. Pwofési-lasa té’é réyalizé lèwvwè sèwvitè a Jéova ki ka èspéré viv an syèl-la é séla ki ka èspéré viv asi latè té’é fè yonn anba tant a-y é lèwvwè yo té’é fè « onsèl twoupo » (Jan 10:16). Nou pé di sé konnyéla pwofési-lasa ka réyalizé !
BONDYÉ KA PRAN SWEN AN NOU KÈLKÈSWA KOTÉ-LA NOU YÉ LA
6. A ki moman Jéova ka envité on moun anba tant a-y, é kikoté nou ka touvé tant a Jéova ?
6 An tan a Labib, sé moun-la té ka pozé kò a yo anba tant, é tant-la té ka sèvi osi pou pwotéjé-yo kont solèy-la, lapli-la, é van-la. Lèwvwè on moun té ka envité ondòt moun anba tant a-y, an jénéral, moun-lasa té sèten kè moun-la ki té envité-y la té’é pran swen a-y byen konm i fo. Lè nou ka ba Jéova vi an nou, nou ka antré anba tant a-y é nou ka vin envité a-y (Sòm 61:4). Koté-lasa, nou ni tousa ki fo pou nou rété bon bon zanmi èvè Jéova, é nou pé vin zanmi èvè sélézòt envité-la. Men a pa onsèl koté ou ka touvé tant-lasa. Si ou ja vwayajé adan dòt péyi, pétèt pou ay adan on lasanblé èspésyal, sèten ou aprann konnèt dòt sèwvitè a Bondyé ki ni tchè-kontan pas yo osi yo anba tant a Bondyé. Ou ka touvé tant a Jéova toupatou ni sèwvitè a Jéova ki fidèl (Rév. 21:3).
7. Poukwa nou pé di kè sèwvitè fidèl a Jéova ki mò ka fè pawti a moun ki envité anba tant a-y toujou ? (gadé imaj-la osi).
7 É sèwvitè fidèl a Jéova ki mò alò ? Ès nou pé di kè yo envité anba tant a-y toujou ? Wi ! Ka ki ka fè-nou di sa ? Ében sé pas sé mò-la vivan an mémwa a Jéova. Mi sa Jézi èspliké : « Anrapò èvè lèfètkè Bondyé ka résisité sé mò-la, Moyiz limenm montré sa adan istwa a ti pyébwa plen pikan la, lè i kriyé Jéova “Bondyé a Abraam, Bondyé a Izaak é Bondyé a Jakòb”. I pa Bondyé a sé mò-la, men i sé Bondyé a sé vivan-la, pas pou-y, yotout vivan » (Lik 20:37, 38).
Nou pé di kè sèwvitè fidèl a Jéova ki mò ka touvé-yo anba tant a-y toujou, pawmi moun kè i envité (gadé paragraf 7 la).
NOU NI BYENFÉ, MEN NOU NI BITEN A FÈ OSI
8. Lèwvwè Jéova ka envité on moun anba tant a-y, kont ki biten sa ka pwotéjé-y ?
8 Menmjan tant-la sé té on koté moun té pé pozé kò a yo é ki té ka pwotéjé-yo kont solèy, lapli, é van, sé menmjan-la, tant a Jéova ka pwotéjé moun i envité anba a-y. Konsa ayen pé pa anpéché-yo kontinyé vin bon bon zanmi a-y é yo ni on èspwa ki sèten pou dèmen. Lè nou ka rété bon zanmi èvè Jéova, menmsi Satan ka fè dé biten ki ka fè-nou dimal, sa pé’é diré pou touttan (Sòm 31:23 ; 1 Jan 3:8). Adan nouvo mond-la, Jéova ké kontinyé pwotéjé zanmi a-y pou ayen pa anpéché-yo rété bon bon zanmi èvè-y, men osi pou yo pa mò (Rév. 21:4).
9. Lèwvwè Jéova ka envité on moun anba tant a-y, ka i ka atann dè moun-lasa ?
9 Jéova fè-nou on bèl lonnè toubònman lèwvwè i envité-nou anba tant a-y. Nou pé vin bon bon zanmi èvè-y é sa pé diré pou touttan. Men kijan pou nou konpòwté-nou si nou vlé rété pawmi moun i envité anba tant a-y ? Lèwvwè on moun envité-w akaz a-y, sèten ou anvi fè dé biten ki ka fè-y plézi. Pa ègzanp, si i ka di-w kè avan ou rantré akaz a-y, fò ou woté soulyé a-w, sèten ou ké fè sa volontyé. Menmjan-la, nou anvi sav sa Jéova ka atann dè moun ki anvi rété anba tant a-y, kivédi rété pawmi envité a-y. Konm nou enmé Jéova, sa ka pousé-nou fè tousa nou pé pou ‘fè-y plézi a san pou san’ (Kol. 1:10). Menmsi pou nou Jéova sé Zanmi an nou, nou sav osi kè i sé Bondyé an nou é Pap’an nou, kifè i mérité nou rèspèkté-y (Sòm 25:14). Fò pa nou jen oubliyé kimoun i yé é fò nou toujou ni onlo rèspé ba-y. Konsa, nou pé’é konpòwté-nou on mannyè ki pa ka fè-y plézi. Asirésèten, sa nou anvi sé ‘rèkonnèt limit an nou lè nou ka maché èvè Bondyé an nou’ ! (Mich. 6:8).
JÉOVA PA TÉ KA FÈ PRÉFÉRANS ÈVÈ SÉ IZRAÉLIT-LA
10-11. Kijan Jéova aji èvè sé Izraélit-la ki té adan dézè a Sinayi la é kijan sa ka montré kè i pa’a fè préférans ?
10 Jéova ka aji menmjan-la èvè tout sé moun-la i ka envité anba tant a-y la (Wom. 2:11). Si nou ka gadé jan Jéova aji èvè sé Izraélit-la ki té adan dézè a Sinayi la, sa pé aprann-nou onlo biten asi sa.
11 Lèwvwè Jéova woté pèp a-y anba men a sé Éjipsyen-la ki té ka fè-yo sèvi èsklav, Jéova chwazi sèwten adan sé Izraélit-la pou yo vin prèt é pou yo travay ba-y adan tabèwnak-la. Anplisdisa, i ba sé Lévit-la dòt biten a fè anrapò èvè tabèwnak-la. Ès Jéova té ka okipé pibyen dè séla ki té ka travay ba-y adan tabèwnak-la oben dè séla ki té ka rété toupré a tabèwnak-la ? Awa ! Bondyé an nou pa ka fè préférans.
12. Lè nou ka gadé kijan Jéova aji èvè sé Izraélit-la adan dézè-la, ka ki ka montré kè i pa té ka fè préférans ? (Ègzòd 40:38 ; gadé imaj-la osi).
12 Chak Izraélit té pé vin bon bon zanmi èvè Jéova ki i té ka sèvi adan tabèwnak-la, ki i pa té ka travay la, oben ki i té ka rété toupré a tabèwnak-la, ki i té ka rété lwen a-y. Pa ègzanp, Jéova té ka fè ansòt pou toutmoun adan pèp-la té pé sa vwè kolòn niyaj la é kolòn difé la ki té anho a tabèwnak-la (li Ègzòd 40:38). Lèwvwè kolòn niyaj la té ka koumansé déplasé pou ay ondòt koté, menm sé moun-la ki té ka kanpé lwen lwen lwen a tabèwnak-la té pé vwè sa. A moman-lasa, yo té ka sanblé tout zéfé a yo, yo té ka démonté tant-la fanmi a yo té ka rété anba a-y la é yo té ka pati an menm tan ki tout rèstan a nasyon-la (Nonb 9:15-23). Tout sé Izraélit-la té pé tann sé 2 twonpèt annawjan la yo té ka fè sonné la chakfwa lè-la té rivé pou pati (Nonb 10:2). Nou ka tou konprann kè a pa pas on Izraélit té ka rété toupré a tabèwnak-la kè i té pibon zanmi èvè Jéova ki sélézòt Izraélit-la. Okontrè, kèlkèswa moun-la ki té ka fè pawti a nasyon-la, Jéova té pé envité-y anba tant a-y, i té pé gidonné-y é pwotéjé-y. Sé menm biten jòdijou. Kèlkanswa koté-la nou ka viv la, Jéova ka pwotéjé-nou é i ka pran swen an nou èvè onlo lanmou.
Davwa tabèwnak-la té anmitan a kan-la, sa té ka montré kè Jéova pa té ka fè préférans (gadé paragraf 12 la).
JÉOVA PA’A FÈ PRÉFÉRANS JÒDIJOU NONPLIS
13. Poukwa nou pé di kè Jéova pa’a fè préférans jòdijou nonplis ?
13 Jòdijou, sèwten frè é sè ka rété toupré biwo mondyal a Témwen a Jéova oben toupré on Bétèl. Ni dòt ki ka sèvi adan on Bétèl, kifè, yo ka pé pawtisipé adan onlo pwojé é yo ka pé travay dirèktèman èvè dé frè ki ni gwo rèsponsabilité. Ni dòt ankò ki rèsponsab a siwkonskripsyon oben ki adan on sèwvis èspésyal aplentan. Menmsi ou pa adan sé ka-lasa, ou pé sèten kè Jéova enmé tout sèwvitè a-y kè i envité anba tant a-y é kè i ka pran swen a yochak pèwsonèlman (1 Pyè 5:7). Jéova ka ba tout sèwvitè a-y tousa yo bizwen pou yo rété bon bon zanmi èvè-y, i ka gidé-yo é i ka pwotéjé-yo.
14. Ki dòt biten ankò ki ka montré kè Jéova pa ka fè préférans ?
14 Ni ondòt biten ankò ki ka montré kè Jéova pa ka fè préférans : i ka fè ansòt pou Labib a dispozisyon a moun ki toupatou si latè. Odépa, yo maké Pawòl a Bondyé adan 3 lang : an ébré, an araméyen, é an grèk. Ès sé moun-la ki kapab li sé lang-lasa pi bon zanmi èvè Jéova ki sélézòt-la ? Awa, anponjan (Mat. 11:25).
15. Bay ondòt prèv ki ka montré kè Jéova pa ka fè préférans ? (gadé imaj-la).
15 Lè Jéova ka envité on moun anba tant a-y, i pa ka rété gadé jis ola moun-lasa rivé lékòl oben si moun-lasa sav palé sé lang-la yo sèvi èvè yo la pou ékri Bib-la odépa. Jéova ka ba tout kalté moun sajès a-y, ki yo fè gran lékòl ki yo pa fè gran lékòl. Yo tradui Pawòl a-y adan plizyè milyé lang. Konsa, chakmoun pé pwofité dè sa i ka anségné é sav ka pou fè pou vin zanmi a-y kèlkèswa koté-la i ka viv la (2 Tim. 3:16, 17).
Lèfètkè yo tradui Labib adan onpakèt lang, sa ka montré kè Jéova pa ka fè préférans (gadé paragraf 15 la).
KONTINYÉ FÈ JÉOVA PLÉZI
16. Sèlon Akt 10:34, 35, kijan nou pé kontinyé fè Jéova plézi ?
16 Lèwvwè Jéova ka envité-nou anba tant a-y, sé on bèl lonnè toubònman i ka fè-nou. Pa ni ponmoun ki sav rèsèvwa moun myé ki-y, é pa ni ponmoun ki enmé lézòt plis ki-y. Anplisdisa, i pa ka fè préférans, i ka akéyi toutmoun, kèlkanswa koté-la i sòti la, koulè a po a-y, tribi-la i sòti la, laj a-y, ki i sé on misyé ki i sé on madanm, é kèlkanswa kantité lékòl i fè. Men, sé enki moun ki ka suiv prensip a-y ki ka fè-y plézi é sé yo tousèl i pé envité anba tant a-y (li Akt 10:34, 35).
17. Ki koté nou pé jwenn plis enfòwmasyon pou sav ki jan dè moun Jéova ka akéyi anba tant a-y ?
17 An Sòm 15:1, nou ka touvé déotwa kèsyon David pozé Jéova. Mi sa i mandé : « O Jéova, kimoun ki ké envité adan tant a-w ? Kimoun ki ké pé rété adan montangn a-w ki sakré ? » Jéova sèvi èvè David pou réponn a sé kèsyon-lasa adan Sòm 15 la. Adan awtik-la ki ka vin apré la, nou ké palé dè sèwten biten pou nou fè si nou vlé fè Jéova plézi é pou nou rété zanmi èvè-y.
KANTIK 32 Pran pozisyon pou Jéova !
