ARTIK POU ÉTIDYÉ 23
KANTIK 28 Jéova, a kimoun to zanmi ?
Jéova ka envité nou !
« Mo tant ké anmitan yé ; mo ké sa yé Bondjé » (ÉZÉCH. 37:27).
SA NOU KÉ ANPRANN
Sa artik-a ké idé nou gen plis rékonésans pou Jéova ki ka envité nou annan so tant é ki ka pran swen di nou.
1-2. Ki bèl lònò Jéova ka bay so sèrvitèr-ya ?
SI YÉ té ka doumandé to : « Pou to, Jéova, a kimoun ? », kisa to té ké di ? Pitèt to té ké di : « I sa mo Papa, mo Bondjé ké mo Zanmi. » Pitèt to té ké sonjé ròt tit yé ka bay li osi. Mé ès to té ké di osi ki i ka envité to ?
2 David di ki Jéova kou roun moun ki ka envité moun annan so kaz, é ki sa-ya ki ka adoré l’ kou so envité. I ékri : « O Jéova, kimoun to ké envité rété annan to tant ? Kimoun ki ké pouvé rété annan to montangn ki sen ? » (Ps. 15:1). Annan sa vèrsé-a, nou ka anprann ki Jéova pouvé envité nou vini annan so tant, sa lé di ki i ka envité nou divini so zanmi. Men roun bèl lònò !
JÉOVA LÉ NOU SA SO ENVITÉ
3. Prémyé moun Jéova envité-a, a té kimoun ? É kisa Jéova ké so envité té ka rousanti roun pou ròt ?
3 I gen roun tan, anvan i koumansé kréyé tout bagaj, Jéova té tousèl. Mé roun jou, i kréyé so prémyé Pitit. A kousidiré a té prémyé fwa Jéova té ka envité roun moun annan so tant, é sa fè l’ plézi toubonnman. Labib ka di ki so Pitit té « sa-la ki té ka bay li plis tchò kontan ». É so Pitit ‘té toujou kontan lò i té douvan li’ (Prov. 8:30).
4. Kimoun ankò Jéova envité ?
4 Apré sa, Jéova kréyé ròt zanj, é i envité yé osi. Labib ka aplé yé « pitit Bondjé-ya », é i ka di ki lò yé ansanm ké Jéova, yé kontan (Job 38:7 ; Dan. 7:10) Pannan roun tan, tout zanmi Bondjé té laro syèl-a, koté i ka rété-a. Mé pita, i kréyé moun-yan é i envité yé osi annan so tant. Annan yé i té gen Énòk, Noé, Abraam ké Jòb. Labib ka di ki yé té ka « maché ké vré Bondjé-a » ouben ki yé té sa so zanmi (Gen. 5:24 ; 6:9 ; Job 29:4 ; Is. 41:8).
5. Kisa profési nou ka jwenn annan Ézéchiel 37:26, 27 ka anprann nou ?
5 Pannan plizyèr syèk, Jéova kontinyé envité moun vini annan so tant, sa lé di divini so zanmi (li Ézéchiel 37:26, 27). Profési Ézékyèl ka di nou ki Jéova vréman lé sa-ya ki ka adoré l’ ké fidélité gen roun lanmityé ki fò ké li. Sa profési-a ka di osi ki Jéova ka promèt « fè roun alyans ké yé pou yé viv annan lapè ». Sa profési-a té ké fèt lò sa-ya ki té ké gen èspwar viv annan syèl-a ké sa-ya ki té ké gen èspwar viv pou tout-tan asou latè-a, yé tout ansanm, té ké annan so tant é té ké fè « rounsèl troupo » (Jean 10:16). Donk, sa profési-a ka fèt annan nou lépòk !
JÉOVA KA PRAN SWEN DI NOU NENPÒRT KI KOTÉ NOU FIKA
6. Kouman roun moun ka divini envité Jéova, é ki koté tant Jéova-a fika ?
6 Annan Labib, roun tant té ka pèrmèt roun moun pozé so kò é té ka protéjé l’ di solèy ké lapli. Lò roun moun té envité annan roun tant, i té pouvé antann ki moun ki té envité l’-a byen rousouvwè l’. Lò nou ka bay Jéova nou lavi, nou ka antré annan so tant, é nou ka divini so envité (Ps. 61:4) Annan so tant, i ka propozé nou bokou manjé èspirityèl, é nou pouvé pasé tan ké tout sa ki envité osi. Mé tant Jéova-a pa ka rété annan rounsèl koté. Si to déja vwayajé annan rounòt péyi, pitèt pou alé annan roun asanblé èspésyal, to dèt kontré ké moun ki ka adoré Bondjé é ki kontan osi pas yé annan tant Jéova-a. Si nou ka sèrvi Jéova ké fidélité, nou pouvé antré annan so tant kèlkéswa koté nou fika (Rév. 21:3).
7. Poukisa nou pouvé di ki sèrvitèr Jéova-ya ki té fidèl é ki mouri sa so envité annan so tant toujou ? (gadé zimaj-a osi).
7 É sèrvitèr Jéova-ya ki té fidèl é ki mouri ? Ès nou pouvé di ki yé toujou annan so tant, ki yé sa so envité toujou ? Wi ! Poukisa ? Pas yé toujou vivan annan so mémwè. Jézi èspliké : « Annan istwè asou ti-pyé pikan-an, Moyiz li menm di ki moun mouri-ya ké résisité, lò i ka aplé Jéova “Bondjé Abraam, Bondjé Izaak ké Bondjé Jakòb”. A pa Bondjé moun mouri-ya, a Bondjé sa-ya ki vivan, paské pou li, yé tout vivan » (Luc 20:37, 38).
Nou pouvé di ki sèrvitèr Jéova-ya ki té fidèl é ki mouri sa so envité annan so tant toujou (gadé paragraf 7).
BÉNÉDIKSYON KÉ RÈSPONSABILITÉ
8. Ki bénédiksyon sa-ya ki annan tant Jéova-a ka jwenn ?
8 Menm fason roun tant pouvé pèrmèt roun moun pozé é ka protéjé l’ kont solèy ké lapli, tant Jéova-a pouvé protéjé so envité kont tousa ki pouvé gaté yé lanmityé ké li, é sa ka pèrmèt yé gen roun èspwar pou dimen. Si nou ka rété pròch di Jéova, Satan pa ké pouvé fè nou pyès bagaj Jéova pa pouvé ranjé (Ps. 31:23 ; 1 Jean 3:8). É annan monn nouvo-a, Jéova ké kontinyé protéjé so zanmi ki fidèl kont tousa ki pouvé gaté yé lanmityé ké li é kont lanmò-a osi (Rév. 21:4).
9. Kisa Jéova lé so envité fè ?
9 Jéova ka envité nou, é a roun gran lònò. Nou pouvé gen roun lanmityé ki fò ké li pou tout-an ! Mé kisa nou divèt fè si nou lé rété annan so tant ? Lò to envité koté roun moun, to lé savé sa sa moun-an lé ouben sa i pa lé to fè annan so kaz. Parèkzanp, si i lé to tiré to soulyé anvan to antré annan so kaz, to ké fè l’. Menm fason-an, nou lé savé sa Jéova lé ké sa i pa lé so envité fè si yé lé rété annan so tant. Nou lanmou pou li ka pousé nou fè tousa nou pouvé pou nou « fè li plézi » (Col. 1:10). É menmsi nou ka wè Jéova kou nou Zanmi, nou savé ki i sa nou Bondjé ké nou Papa osi, é ki i mérité nou rèspèkté l’ (Ps. 25:14). Donk, annou pa janmen bliyé kimoun i sa, é annou toujou gen bokou rèspè pou li. Sa ké anpéché nou fè bagaj ki pa ka fè l’ plézi. Wi, annou ‘maché ké nou Bondjé toupannan nou ka rékonnèt nou limit’ ! (Mich. 6:8).
JÉOVA PA FÈ PRÉFÉRANS KÉ ISRAYÉLIT-YA
10-11. Kouman fason Jéova fè ké Israyélit-ya annan dézèr Sinayi-a ka montré ki i pa ka fè préférans ?
10 Jéova pa ka fè préférans, i pa ka rousouvwè roun envité pi byen pasé rounòt (Rom. 2:11). Nou pouvé anprann bokou bagaj asou sa lò nou ka gadé kouman i fè ké Israyélit-ya annan dézèr Sinayi-a.
11 Lò Jéova fè so pèp soti an Éjip, i chwazi sèrten Israyélit pou yé divini prèt épi pou yé sèrvi annan tabèrnak-a. Anplis di sa, i bay Lévit-ya ròt travay pou fè annan tabèrnak-a. Ès Jéova té ka pran plis swen di sa-ya ki té ka travay annan tabèrnak-a ouben di sa-ya ki pa té lwen di tabèrnak-a pasé ròt Israyélit-ya ? Awa ! Nou Bondjé pa ka fè préférans.
12. Kouman fason Jéova fè ké so pèp annan dézèr-a ka montré ki i pa ka fè préférans ? (Exode 40:38 ; gadé zimaj-a osi).
12 Ki yé té ka travay ki yé pa té ka travay annan tabèrnak-a, ki yé té ka rété ki yé pa té ka rété bò d’ tabèrnak-a, chak Israyélit té pouvé gen roun lanmityé ki fò ké Jéova. Parèkzanp, Jéova té ka fè sa ki fo pou tout nasyon-an té pouvé wè kolonn niyaj-a ké kolonn difé-a ki té asou tabèrnak-a (li Exode 40:38). Lò kolonn niyaj-a té ka koumansé déplasé, menm sa-ya ki té ka rété lwen di tabèrnak-a té pouvé wè l’. Yé té ka ranjé yé zafè, yé té ka démonté yé tant é yé té ka pati an menm tan ké tout pèp-a (Nomb. 9:15-23). Anplis di sa, yé tout té pouvé tandé dé tronpèt an arjan-yan ki té ka avèrti yé ki yé té divèt pati (Nomb. 10:2.) A pa paské sèrten té ka viv bò d’ tabèrnak-a ki sa té lé di ki yé lanmityé ké Jéova té pi fò pasé ròt Israyélit-ya. Chak Israyélit té pouvé sa envité Jéova, é yé té pouvé sir ki i té ké protéjé ké gidé yé. A menm bagaj-a jòdla. Kèlkéswa koté nou fika-a, Jéova ka protéjé nou é ka pran swen di nou ké lanmou.
Tabèrnak-a té anmitan pèp-a. Sa ka montré ki Jéova pa ka fè préférans (gadé paragraf 12).
JIK JÒDLA, JÉOVA PA KA FÈ PRÉFÉRANS
13. Kisa ka montré ki Jéova pa ka fè préférans jòdla ?
13 Jòdla, i gen sa ka rété bò d’ syèj mondyal Témwen Jéova-ya ouben bò d’ roun Bétèl. Ròt ka travay annan roun Bétèl. Yé pouvé bay roun lanmen annan tousa ka fèt annan Bétèl-a é pasé tan ké frè-ya ki gen gro rèsponsabilité annan òrganizasyon-an. Ròt ankò rèsponsab sirkonskripsyon ouben yé annan sèrvis èspésyal a plen tan-an. Menmsi to pa sa roun di sa frè-ya, to pouvé sir ki Jéova, sa-la ki ka envité nou-a, kontan tout so envité, é ki i ka pran swen di yé chak (1 Pierre 5:7). I ka bay tout so sèrvitèr-ya manjé èspirityèl. I ka gidé yé é ka protéjé yé.
14. Ki ròt bagaj ka montré ki Jéova pa ka fè préférans ?
14 Men rounòt bagaj ka montré ki Jéova pa ka fè préférans : i ka fè sa ki fo pou tout moun asou tout latè-a pouvé li Labib. O koumansman, yé ékri sa liv-a ki sakré an trwa lang : ébré, araméyen ké grèk. Ès sa-ya ki konnèt li sa lang-ya gen roun lanmityé ki pi fò ké Jéova pasé ròt-ya ? Awa, pyès toubonnman ! (Mat. 11:25).
15. Ki ròt bagaj ankò ka montré ki Jéova pa ka fè préférans ? (gadé zimaj-a osi).
15 Pou envité nou divini so zanmi, Jéova pa ka gadé si nou fè gran lékòl ouben si nou konnèt li Labib annan lang ébré, araméyen ouben grèk. Nou Bondjé ka bay tout moun so sajès, pa sèlman sa-ya ki fè gran lékòl. I tradwi so Paròl annan roun patché lang. Konsa, tout moun, kèlkéswa koté i fika, pouvé profité di so ansèyman-yan é anprann kisa yé divèt fè pou divini so zanmi (2 Tim. 3:16, 17).
Jéova ka fè sa ki fo pou tout moun pouvé li Labib. Sa ka montré ki i pa ka fè préférans (gadé paragraf 15).
RÉTÉ ANNAN TANT JÉOVA-A
16. Dapré Actes 10:34, 35, kisa nou pouvé fè pou nou rété annan tant Jéova-a ?
16 Nou gen roun gran lònò : Jéova ka rousouvwè nou annan so tant é nou sa so envité. I pa gen pyès moun ki kontan nou é ki ka rousouvwè nou pi byen pasé li. Anplis di sa, i pa ka fè préférans : i ka rousouvwè nou tout kèlkéswa koté nou ka rété, kèlkéswa koté nou soti, koulèr nou lapo, nou nasyon, nou laj, ki nou sa roun fanm, ki nou sa roun wonm ouben ki nou fè ki nou pa fè gran lékòl. Mé a sa-ya ki ka rèspèkté so lalwa rounso i ka asèpté annan so tant é ki pouvé rété annan so tant (li Actes 10:34, 35).
17. Ki koté nou pouvé trapé plis enfòrmasyon asou ki kalité envité Jéova ka rousouvwè annan so tant ?
17 Annan Psaume 15:1, David ka doumandé : « O Jéova, kimoun to ké envité rété annan to tant ? Kimoun ki ké pouvé rété annan to montangn ki sen ? » Jéova sèrvi David pou réponn sa késyon-yan annan Psaume 15. Annan ròt artik-a, nou ké wè sa nou divèt fè pou nou rété annan tant Jéova-a.
KANTIK 32 Soutni Jéova !
