EKIRAJAAYA 23
JAYEECHI 28 Aleewaa waya nümaa Jeʼwaa
Anataʼaleesüjaʼa wakuwaʼipa süka nuunejaain waya Jehová nipialuʼumüin
«Pasanainjeerü tepia nanain. Namalewaseechi taya» (EZEQ. 37:27).
TÜ WATÜJEETKAT
Kojuteerü maʼin wamüin süka nuunejaain waya Jehová nipialuʼumüin jee wayaawateerü saaʼu tü naaʼinrakat süpüla naaʼinmajüin waya.
1, 2. ¿Kasa nuunejaaka apüla waya Jehová?
«NIA JEHOVÁ chi taʼaleewainkai», «nia Jehová chi Tashikai», «nia Jehová chi Tamaleiwasekai», maʼwaishii waya. «Nia ounejaakai taya Jehová nipialuʼumüin», nnojoliipejeʼe müin waya.
2 Nüküjain David chi aluwataashikai müin nukuwaʼipa Jehová namaa na naʼaleewainyuukana maʼaka saaʼin nukuwaʼipa wanee wayuu namaa na niʼiyoukana. Anuu nünüiki David: «Jehovákalee, ¿jarai chi kepieechikai suluʼu pipia? ¿Jarai chi kepieechikai saaʼu puʼuuchise?» (Sal. 15:1). Tü watüjakat sünainjee tia pütchikat shia eein süpüla waʼaleewajaain nümaa Jehová, jama müin nuunejaakai aaʼin waya nipialuʼumüin. Anataʼaleesüjaʼa maʼin wakuwaʼipa.
KEEʼIREESÜ NAAʼIN JEHOVÁ SULUʼUIN WAYA NIPIA
3. (1) ¿Jarai chi palajachikai wayuu nuunejaaka Jehová nipialuʼumüin? (2) ¿Jamüsü naaʼin piamaleʼeya?
3 Nümüiwaʼapuʼushi Jehová nnojoluiwaʼaya nukumajüin kasa süpüshuaʼa. Müshi nuunejaakai aaʼin Jehová nipialuʼumüin chi palajachikai Nüchon nukumajapa nia. Talatüshi maʼin Jehová nümaa otta talatüshi maʼin chi Nüchonkai nümaa (Prov. 8:30).
4. ¿Jaralii na nuunejaakana Jehová mapa nipialuʼumüin?
4 Kakalia mapa nukumajüin Jehová na aapiee chakana iipünaa, müshii nuunejaakai aaʼin naya nipialuʼumüin. «Talatüshii maʼin na nüchonniikana Maleiwa», müsü tü Bibliakat nachiki (Job 38:7; Dan. 7:10). Soʼu wainma juya naya neʼe naʼaleewainkana Jehová na kepiakana nümaa chaa iipünaa. Shiasaʼa mapa müshii nuunejaakai aaʼin Jehová nipialuʼumüin waneinnua wayuu kepiakana yaa saaʼu tü mmakat, na waneepiakana nümaa maʼaka naaʼin Enoc, Noé, Abrahán otta Job. Süküjain tü Bibliakat namaain chi Maleiwa shiimainshikai jee naʼaleewain naya (Gén. 5:24; 6:9; Job 29:4; Is. 41:8).
5. ¿Kasa watüjaka sünainjee tü sümakat Ezequiel 37:26, 27?
5 Ayatayüliʼiya müin nuunejaakai aaʼin Jehová nipialuʼumüin na naʼaleewainyuukana. Jülüjataa waaʼin tü ashajünakat suluʼu Ezequiel 37:26, 27 (paashajeʼera). Sükajee tia pütchikat wayaawata aaʼu aleeweein maʼin Jehová namaa na wayuu oonookana waneepia sümaa nünüiki. Nüküjain Jehová naapeerüin «wanee anaa namüin süpüla kaʼikat süpüshuaʼa». Nikeraajüin Jehová tia pütchikat maaʼulu, kottiraashii sünain aʼwaajaa Nia suluʼu nipia na anoujashii chainjanakana iipünaa namaa na anoujashii kepiainjanakana yaa saaʼu tü mmakat (Juan 10:16).
NAAʼINMAJÜIN WAYA JEHOVÁ EEPÜNAALE WAYA
6. (1) ¿Kasa waaʼinrajatka süpüla müin wekerotokoi aaʼin nipialuʼumüin Jehová? (2) ¿Jaralii na ekerotokana suluʼumüin nipia Jehová?
6 Tü miichi aainjuushikat süka loona sümaiwa eemeraasü wayuu suluʼu, nnojoishii kaʼisirüin naya jee nnojoishii chüʼlüin naya shiʼitapa juya. Nuunejaanüle wanee wayuu nutuma chi kepiashikai nütüjaa aaʼu aneerüin nukuwaʼipa nipialuʼu. Waapapa waaʼin nümüin Jehová müshii wekerotokoi aaʼin nipialuʼumüin (Sal. 61:4). Anasü wakuwaʼipa yala süka naapüin wamüin Jehová tü katchinkalü atuma wanoula otta eeshii süpüla aleewain waya namaa na wayuu suluʼukana nipia. Eeshii süpüla nipialuʼuin Jehová na wayuu sainküinjeejanakana mmaka süpüshuaʼa, na waneepiakana nümaa. Jamüshijaʼa puʼunule sünain wanee outkajawaa miyoʼu anaka maʼin aainjünaka suluʼu wanee mma naata, piʼraajeena na wayuu suluʼukana nipia Jehová (Apoc. 21:3).
7. ¿Kasa wayaawataka akajee ayatayüliʼiya suluʼuin nipia Jehová na aʼyataapuʼukana nümüin, na outuinnapakana? (Piirakaa sümüin tü ayaakuaakat).
7 ¿Ayatayüliʼiche nipialuʼuin Jehová na aʼyataapuʼukana nümüin, na outuinnapakana? Jamüsaʼa shia. Anuu nünüiki Jesús: «Wanaa sümaa nüshajüin Moisés süchiki tü wunuʼu chuwatakat nüküjaleeinña süchiki nasoʼireʼennajanain aaʼin na outushiikana, wanaa sümaa nüküjain niain Jehová ‹chi Nümaleiwasekai Abrahán, chi Nümaleiwasekai Isaac otta chi Nümaleiwasekai Jacob›. Chi Maleiwakai, nnojoishi Sümaleiwasein wayuu outusü, Sümaleiwase eekai katüin soʼu, süka jamüin, katoʼuchii napüshuaʼa na wayuukana nümüin Maleiwa» (Luc. 20:37, 38).
Watüjaa aaʼulu ayatayülinña nipialuʼuin Jehová na aʼyataapuʼukana nümüin, na outuinnapakana. (Paashajeʼera tü pütchikat 7).
TÜ KASA ANASÜ WEʼRAKAT JEE TÜ WAAʼINRAJATKAT
8. ¿Kasa weʼraka sutuma müin suluʼukai waaʼin nipia Jehová?
8 Anasü wakuwaʼipa suluʼule waya wanee miichi eekai anain süka eein süpüla weemeraain suluʼu jee nnojoleena chüʼlüin waya shiʼitüle juya. Müsia neʼe wakuwaʼipa nutuma Jehová, süka müin suluʼukai waaʼin nipia naaʼinmajüin waya suulia tü eekat süpüla sümalajaain atuma wanoula otta anasü waaʼin süka waʼatapajüin tü kasa anasü naaʼinrajatkat. Aleewale waya nümaa Jehová nujuʼichijeʼereerü tü kasa naainjakat chi Yolujaakai wamüin (Sal. 31:23; 1 Juan 3:8). Suluʼu tü Paʼaraiisükat ayateenaʼaya naaʼinmajüin Jehová na naʼaleewainyuukana suulia seemiajaain nanoula jee suulia outuin naya (Apoc. 21:4).
9. ¿Kasa naaʼinrajatka na suluʼukana nipia Jehová?
9 Anataʼaleesüjaʼa maʼin wakuwaʼipa süka eein süpüla aleewain waya nümaa Jehová. ¿Kasa waaʼinrajatka süpüla ayatüin aleewain waya nümaa? Jamüshijaʼa nuunejaale waya wanee wayuu nipialuʼumüin watüjawee aaʼulu tü mojushiijeetkat nümüin suulia waaʼinrüin tia chapa waya nipialuʼu. Eesüjaʼa nüküjale wamüin anain waakatüle wasapatse süpülapünaa wekerotüin. ¿Aashin nnojoleerüin waaʼinrüin tia mojusheeka? Müsia wakuwaʼipa nümaa Jehová, watüjawee aaʼulu tü nuchuntakat wamüin süpüla ayatüin waya suluʼuin nipia. Wachajaain maʼin sukuwaʼipa süpüla talatüin nia wamaa süka alin nia wapüla (Col. 1:10). Jülüjainjatü waaʼin waneepia niain Jehová chi Wamaleiwasekai jee niain Washin, müshijeseʼe kojutuinjachin nia watuma waneepia (Sal. 25:14). Süpüla kojutuinjachin watuma Jehová anashii mmorüle waya saaʼu waaʼinrüin wanee kasa mojeetka atuma naaʼin. Loteesü wakuwaʼipa noʼuluʼu waneepia (Miq. 6:8).
NNOJOTSÜ KOʼUIN NUKUWAʼIPA JEHOVÁ NAMÜIN
10, 11. ¿Kasa wayaawataka akajee nnojoluin koʼuin nukuwaʼipa Jehová namüin na naʼaleewainyuukana?
10 Nnojotsü koʼuin nukuwaʼipa Jehová namüin naʼaleewainyuu (Roma 2:11). Jülüjataa waaʼin tü nukuwaʼipakat Jehová namaa na israelitakana wanaa sümaa chajanain naya suluʼu tü isashiipaʼa chajatkat Sinaí.
11 Nojuʼitapa na israelitakana Egiptojee nutuma Jehová nüneeküin waneinnua wayuu süpüla sacerdoteinjanain naya suluʼu tü aʼwaajülee aainjuushikat süka loona otta nuluwataain na levitakana süpüla naaʼinrüin waneirua kasa suluʼu tia miichikat. ¿Naaʼinmajüinche maʼin naya Jehová noulialeʼeya na waneinnua? Nnojo, naaʼinmajüin Jehová napüshuaʼa na israelitakana.
12. ¿Jamüsü wayaawatakaʼa saaʼu nnojoluin koʼuin nukuwaʼipa Jehová namüin na israelitakana soʼu chajanain naya isashiipaʼa? (Éxodo 40:38; piirakaa sümüin tü ayaakuaakat).
12 Eeshii süpüla aleewain nümaa Jehová napüshuaʼa na israelita chajanakana isashiipaʼa. Nnojoishii aleewain naya nümaa Jehová sünainjee tü aʼyatawaa aapünakat namüin jee sünainjee pejein nepia sünain tü aʼwaajülee aainjuushikat süka loona. Jamüshijaʼa Jehová niʼitaain wanee siruma wanaapünaa sümaa tü aʼwaajüleekat süpüla neʼrüinjatüin shia napüshuaʼa na israelitakana jee aipaʼawai niʼitaain wanee siki chuwataka (paashajeʼera Éxodo 40:38). Shiyaleraapa tü sirumakat iipünaamüin neʼrüin shia napüshuaʼa na israelitakana, jaʼitainna na wattakana epia suulia tü aʼwaajüleekat. Mayaa natüjaa aaʼu nakotchojüinjatüin nakorolo jee nasiwatüinjatüin tü nepiayaasükat süpüla noʼunuinjanain (Núm. 9:15-23). Otta natüjaa aaʼu noʼunuinjanain naapapa shiʼira tü konneeta aainjuushikat süka pülaata (Núm. 10:2). Nnojoishii nayain neʼe aʼaleewajaain nümaa Jehová na kepiakana pejepünaa sünain tü aʼwaajüleekat, aleewashiʼiya nümaa Jehová napüshuaʼa na israelitakana, nuʼunirüin nakuwaʼipa jee naaʼinmajüin naya napüshuaʼa. Müsia maaʼulu yaa, jaʼitainna jalain kepiain waya aishii waya nüpüla Jehová jee naaʼinmajüin waya.
Wayaawata aaʼu nnojoluin koʼuin nukuwaʼipa Jehová sümüin wayuu saaʼujee pasanain nanain na israelitakana tü aʼwaajülee aainjuushikat süka loona. (Paashajeʼera tü pütchikat 12).
AYATÜSIA NNOJOLUIN KOʼUIN NUKUWAʼIPA JEHOVÁ SÜMÜIN WAYUU
13. ¿Kasa wayaawataka akajee ayatüin nnojoluin koʼuin nukuwaʼipa Jehová sümüin wayuu?
13 Eeshii wawalayuu kepiakana pejepünaa sünain eejeere sukumajünüin tü waʼyataainkat, eeshii na kepiakana pejepünaa sünain Weteet otta eeshii na aʼyataakana suluʼu. Suluʼujee tia eeshiijaʼa naʼyanaajiraale namaa na wawalayuu oʼunirakana sukuwaʼipa waʼyataain. Eeshii na aʼyataakana waneepia nümüin Jehová maʼaka naaʼin na alapalaakana naaʼu na wawalayuukana jee na pürekutsootkana pesiaat, nnojotpejeʼe naaʼinrüin tia napüshuaʼa na wawalayuukana. Aishi pia nüpüla Jehová mayaainjeʼe nnojolin piʼyataain nümüin maʼaka naaʼin naya wawalayuukana. Ayateechia naaʼinmajüin pia jee naʼaleewain pia (1 Ped. 5:7). Ayateeria naapüin Jehová pümüin tü katchinjeetkalü atuma punoula, ayateeria nuʼunirüin pukuwaʼipa jee ayateechia naaʼinmajüin pia maʼaka naaʼinrüin shia napüleerua napüshuaʼa na aʼyataakana nümüin.
14. ¿Kasa amaa naaʼinraka Jehová wayaawataka atuma nnojoluin koʼuin nukuwaʼipa sümüin wayuu?
14 Wanee kasa naaʼinraka Jehová wayaawataka atuma nnojoluin koʼuin nukuwaʼipa namüin na aʼyataashiikana nümüin shia süka nüshajirüin tü Bibliakat suluʼu wainma anüikii. Süshajünapa tü Bibliakat sümaiwa ashajünüsü shia suluʼu apünüinsü anüikii: hebreo, arameo otta griego. ¿Nayache neʼe aleewaka nümaa Jehová na aashajeʼerakana tü Bibliakat suluʼu tia anüikiikat? Nnojorüleejaʼa (Mat. 11:25).
15. Püküja wanee kasa naaʼinraka Jehová süka nnojoluin koʼuin nukuwaʼipa sümüin wayuu (piirakaa sümüin tü ayaakuaakat).
15 Nnojoishi talatüin Jehová nümaa wanee wayuu sünainjee nütüjain süpüleerua karaloʼuta jee sünainjee nütüjain süpüleerua tü anüikii süshajünakalü aluʼu tü Bibliakat. Eeshi süpüla kekiin wanee wayuu nutuma Jehová jaʼitaichi nütüjain süpüleerua karaloʼuta jee matüjainre nia süpüleerua. Ashajünüsü tü Bibliakat suluʼu wainma anüikii süpüla anain nakuwaʼipa na aashajeʼerakana shia jee süpüla aleewain naya nümaa Maleiwa (2 Tim. 3:16, 17).
Wayaawata aaʼu nnojoluin koʼuin nukuwaʼipa Jehová sümüin wayuu sünainjee süshajünüin tü Bibliakat suluʼu wainma anüikii. (Paashajeʼera tü pütchikat 15).
AYATAʼAYA WAYA SULUʼUIN NIPIA JEHOVÁ
16. ¿Jaralii na nuunejaakana Jehová nipialuʼumüin? (Aluw. 10: 34, 35).
16 Nnojotsü eein wanee kasa anaʼleeka suulia suluʼuin waya nipia Jehová. Kamaneeshi maʼin nia wamüin jee aishii maʼin waya nüpüla. Nuunejaain waya wapüshuaʼa nipialuʼumüin, tooloyuu, jieyuu, tepichi, laülaayuu, jaʼitainna jalejeʼewaliin waya otta matüjainre waya süpüleerua karaloʼuta. Wanaawashii waya wapüshuaʼa nümüin, shiajaʼa neʼe kojutuinjatüin wamüin tü nuluwataakalü anain (paashajeʼera Aluwataaushikana 10:34, 35).
17. ¿Kasa wekirajaainjatka anain sünain tü wane ekirajaayakat?
17 Müsü nünüiki David nümüin Jehová: «Jehovákalee, ¿jarai chi kepieechikai suluʼu pipia? ¿Jarai chi kepieechikai saaʼu puʼuuchise?» (Sal. 15:1). Asoutushi Jehová shiʼipajee tia pütchikat nükajee David. Sünain tü wane ekirajaayakat wekirajaajeerü anain tü waaʼinrajatkat süpüla ayatüin suluʼuin waya nipia Jehová.
JAYEECHI 32 Eeinjana waya nümaa Jehová
