1-2. Bem yɔ’ɔ kãtɛ ti Yehowa dekɛ bo a yelemɛŋɛrɛ yamesi?

 NƐRA san soke ho yeti ‘Yehowa dela hon bem,’ hon wan yeti bem? Ho ta’an yeti, ‘Yehowa dela mam Sɔ, mam Naayinɛ, la mam Zɔ.’ Ho me wan ta’an pa’alɛ Yehowa n de mina sarɔtɔ ase’a poan. Ge hon tabelɛ ti’isɛ ti ho wan ta’an dɛna Yehowa Saana?

² Naba David yuun dekɛ Yehowa makɛ la nɛra n to’oseri saama ge dekɛ Yehowa yamesi makɛ la saama la. Naba David yuun soke yeti: ‘O Yehowa, ani n wan ta’an dɛna saana ho tɛnti deo la poan? Ani n wan ta’an bɔna ho zilam zoore la zuo?’ (Ym. 15:1) Kaalegɔ zɛ’an wa basɛ ti to baŋɛ ti to wan ta’an dɛna Yehowa saama bii a zɔdoma. Bisɛ bala n de yɔ’ɔ kãtɛ se’em bɔ’ɔra tɔ!

YEHOWA BOTI LA TO DƐNA A SAAMA

3. Ani n de Yehowa saana seko n deŋɛ nɛŋa ge Yehowa la a saana la bɔŋa yuun ani la wani?

³ Yehowa ma’a n yuun boi ge nyaa ta naam sɛla woo. Yehowa n yuun naam a Dayɔdeeŋa la, la yuun ani wuu Yezu n de Saana seko n deŋɛ nɛŋa ti Yehowa to’e kɛ̃’ɛsi a tɛnti deo la poan. Bala yuun basɛ ti Yehowa puurɛ n pee. Baabule la yeti Yehowa yuun ‘nɔŋɛ’ a Dayɔa la mɛ. A Dayɔa la me ‘puurɛ yuun pee mɛ la Yehowa saŋa woo.’—Mag. 8:30.

4. Bani n yuun nyaa pa’asɛ Yehowa saama la poan?

 ⁴ Pooren, Yehowa yuun naam la malesi ti ba me dɛna a saama. Baabule la yeti malesi dela ‘Naayinɛ dayɔɔsi’ ge kelum pa’alɛ ti ba puurɛ pee mɛ la bamam n boi Yehowa zɛ’an la. (Yob 38:7; Da. 7:10) Yuuma zo’e zo’e poan, Yehowa zɔdoma yuun dela sɛba ma’a n yuun naɛ la en bɔna saazuo la. Pooren, ti a yuun naam nɛreba tingɔŋɔ wa zuo ti ba me dɛna a saama. A saama wa basɛba dela Enok, Noah, Abraham la Yob. Baabule la yeti sɛla n sɔi ti ba dɛna Yehowa zɔdoma dela ban yuun ‘nani’ en la zuo.—Pin. 5:24; 6:9; Yob 29:4; Isa. 41:8.

5. Yetɔɣebiŋere la n boi Ezekiel 37:​26, 27 la pa’alɛ to la bem?

⁵ Yuuma zo’e zo’e n wana ti Yehowa kɔ’ɔn bɛɛna nɛreba ti ba dɛna a saama. (Kaalɛ Ezekiel 37:​26, 27.) Makerɛ, Ezekiel yetɔɣebiŋere la basɛ ti to baŋɛ ti Naayinɛ sirum boti la a yelemɛŋɛrɛ yamesi tara bɔnsoŋa la en. A yeti a wan biŋe ‘suma’asum nɔbiŋere la ba.’ Yetɔɣebiŋere wa pa’alɛ la sansɛka ti sɛba n tari puti’irɛ ti ba wan ta bɔna saazuo, la sɛba n tari puti’irɛ ti ba wan bɔna tingɔŋɔ wa zuo la wan naɛ taaba dɛna ‘pigile yinɛ’ bɔna Yehowa tɛnti deo la poan. (Yon 10:16) Bala n kɔ’ɔn ita nananawa!

TON YEEN BƆNA ZƐSƐKA WOO, NAAYINƐ TƐ̃RI TO YELE

6. Nɛra wan eŋɛ la wani ta’an dɛna Yehowa saana a tɛnti deo la poan ge Yehowa tɛnti deo la boi la bɛ?

⁶ Baabule saŋa la, tɛnti deo yuun dela zɛ’an ti nɛra wan ta’an kɛ̃ bim ta vo’ose bii a ta’an kɛ̃ bim ti saa la wuntɛɛŋa kan paɛ en. Saana yuun san keŋɛ nɛra yire, a mi ti nɛra la wan to’e en soŋa. To san kã tomea bo Yehowa, la nyaa ni ana wuu to dela a saama bɔna a tɛnti deo la poan. (Ym. 61:4) To tari la vo’osum poan dia zo’e zo’e n wan ta’an soŋɛ tɔ ti to tara bɔnsoŋa la Yehowa. To me kelum nyɔɣera la zɔtɔ la sɛba n de Yehowa saama la. Nɛreba n boi tingɔŋɔ wa zɛ’an woo ta’an kɛ̃ Yehowa tɛnti deo la poan na dɛna a saama. Daanse’ere ho tabelɛ keŋɛ la laɣesegɔ n boi tiŋa kayima poan ta seke mabiisi n tari pupeelum bɔna Naayinɛ tɛnti deo la poan. Yehowa tɛnti deo la boi la zɛsɛka woo ti a yelemɛŋɛrɛ yamesi bɔna.—Lil. 21:3.

7. To eŋɛ la wani baŋɛ ti Yehowa yamesi sɛba n ki la kelum dɛna la a saama? (Bisɛ foote la.)

 ⁷ Yehowa yamesi sɛba n ki la boi la bɛ? To wan ta’an yeti ba kelum dɛna la Yehowa saama? Ɛ̃ɛ! Beni n sɔi ti to wan ta’an yele bala? Yehowa n tɛ̃ri ba yele la zuo, la ani wuu ba vɔi mɛ a zɛ’an. Yezu yuun yeti: ‘Moses daa basɛ ti la niɛ peelumi ti sɛba n ki la wan isige se’ere n sɔi la tuntuo yele la poan la, a daa yi Yehowa ti Abraham Naayinɛ la Isaak Naayinɛ la Yakob Naayinɛ. A daɣɛ ki’indoma Naayinɛ ge a dela vɔpa Naayinɛ, se’ere n sɔi la ba za’a vɔi mɛ a nɛŋan.’—Lu. 20:​37, 38.

TO NYƐTI LA NYUURƆ GE ME TARA ZUGBERE TUUNƐ

8. To nyɛti la bem nyuurɔ la tomam n boi Yehowa tɛnti deo la poan la?

⁸ Nɛra ni kɛ̃ tɛnti deo poan ta vo’ose mɛ bii a kɛ̃ bim ti saa bii wuntɛɛŋa da paɛ en. Bala mea nɔɔ ti Yehowa tɛnti deo la tɛ’ɛla a yamesi ti ba tara bɔnsoŋa la en ge me basɛ ti ba tara beere sa’am puti’irɛ. To san ana du’a du’a la Yehowa, Sitaana kan ta’an eŋɛ to sɛla n wan pɔɣelum tɔ wuusa. (Ym. 31:23; 1 Yo. 3:8) Tinpaalega la poan, Yehowa wan kelum tɛ’ɛla a nɛreba ti daaŋɔ kan paara ba vo’osum poan, ba me kan ki.—Lil. 21:4.

9. Yehowa boti a saama ita la bem?

⁹ La dela yɔ’ɔ kãtɛ bɔ’ɔra tɔ ti to dɛna saama bɔna Yehowa tɛnti deo la poan. To wan ta’an tara bɔnsoŋa la Yehowa wuusa. To san bɔta ti to kɔ’ɔn dɛna Yehowa saama, la nari ti to eŋɛ la bem? Nɛra san beem ho ti ho wa’an a yire na, ho wan bɔta ti ho eŋɛ sɛla n wan pee nɛra la puurɛ. Makerɛ, a ta’an bɔta ti ho pirege ho taɣera ge nyaa kɛ̃ na. Ho me wan pee puurɛ doose eŋa n boti sɛla la. Bala mea nɔɔ ti to bɔta ti to baŋɛ Yehowa n boti a saama ana se’em, la wan eŋɛ se’em ti to ta’an bɔna a tɛnti deo la poan wuusa. Tomam n nɔŋɛ Yehowa la zuo, to ni kɔ’ɔn tiregera la to paŋa za’a ti to ita yɛla ti a ‘puurɛ pee soŋa soŋa.’ (Kol. 1:10) La boi bim ti Yehowa dela to Zɔ ge la nari ti to tɛ̃ra ti a me dela to Naayinɛ la to Sɔ. Bala zuo la, la nari ti to bɔ’ɔra en gilema. (Ym. 25:14) La ka nari ti to makɛ tamɛ yele wa. La dela to kɔ’ɔn bɔ’ɔra en gilema. To san ita bala, la wan soŋɛ tɔ ti to kan eŋɛ sɛla n wan daam Yehowa. To boti la to ‘sirege tomea dɔla’ to Naayinɛ la.—Mik. 6:8.

YEHOWA YUUN NƆŊƐ ISRAELDOMA LA ZA’A MƐ

10-11. Israeldoma la n yuun boi Sinai pɔɣetia la poan la, Yehowa yuun iti ba la wani ge bala pa’alɛ Yehowa n ka gaseri nɛreba se’em la wani?

¹⁰ Yehowa yuun nɔŋɛ a saama la za’a mɛ. (Arom 2:11) Yehowa n yuun iti Israeldoma la se’em Sinai pɔɣetia la poan la, pa’alɛ ti a ka gaseri nɛreba.

¹¹ Se’em ma’a ti Yehowa yuun faaɛ Israeldoma la ti ba ka le dɛna yamesi bɔna Egypt tiŋa la, a yuun loe la malemadoma ti ba tuna suɣerɛ la poan. A yuun basɛ ti Levidoma n tuna zilam suɣerɛ la poan. Yehowa yuun biseri sɛba n tuni suɣerɛ la poan, la sɛba n yuun kɛ̃’ɛri lɛm suɣerɛ la gana sɛba n gee la mɛ? Aayi! Yehowa ka gaseri nɛreba.

12. Yehowa yuun eŋɛ la bem pa’alɛ ti a nɔŋɛ Israeldoma la za’a mɛ? (Yɛhega 40:38) (Bisɛ foote la.)

¹² Sɛba woo n yuun boi tiiseŋɔ la poan  la yuun laɣum tara la yɔ’ɔ ti ba dɛna Yehowa zɔdoma, la ka pakɛ la ban kɛ̃’ɛri zɛ’an suɣerɛ la bɔba. Makerɛ, Yehowa yuun basɛ ti Israel nɛreba la za’a ta’an nyɛta sangbanɛ la, la bugum la n yuun ni yula suɣerɛ la zuin la. (Kaalɛ Yɛhega 40:38.) Sangbanɛ la yuun san pɔsɛ kena, hali sɛba n yuun ka kɛ̃’ɛri lɛm suɣerɛ la yuun ni nyɛ mɛ nyaa pɔsɛ vaara ba lɔɣɔrɔ. Ba yuun ni fukɛ la ba tɛntidoma ge ti ba za’a naɛ taaba dɔla sangbanɛ la. (Kan. 9:​15-23) Ba yuun san peebe sanlenpɛɛlesi tintana ayi ti nɛreba pɔsɛ kena, nɛra woo yuun ni wum mɛ. (Kan. 10:2) La niɛ peelumi ti, la daɣɛ ti nɛra san kɛ̃’ɛra lɛm suɣerɛ la, a ani la du’a du’a la Yehowa gana sɛba n ka kɛ̃’ɛri lɛm suɣerɛ la. Ge Israel nɛra woo yuun ta’an dɛna Yehowa zɔ ge mina soŋa soŋa ti Yehowa wan pa’ala ge tɛ’ɛla en. Bala mea, la ka pakɛ la ton boi zɛsɛka tingɔŋɔ wa zuo, Yehowa nɔŋɛ to mɛ ge wan bisa tɔ ge me tɛ’ɛla tɔ.

ZINA BEERE WA, YEHOWA KA GASERI NƐREBA

13. Zina beere wa, Yehowa eŋɛ la bem pa’alɛ ti a ka gaseri nɛreba?

¹³ Naayinɛ nɛreba basɛba kɛ̃’ɛri lɛm la Yehowa Sɛɛradoma tigere zuo bii tigere yile la n boi zɛ’an. Basɛba tuni la zɛ-ana wa poan. Bala zuo la, mabiisi wa tuni la tuuma zo’e zo’e zɛ-ana wa poan ge me ni sɔsera la sɛba n boi nɛŋa bisera tuuma la. Basɛba me dela gingilega kaarɛ bisegadoma bii tuna tɛm woo na’am tuuma n boi de to’ore. Ho san ka nyɛ yɔ’ɔ tuna tuun ana wa, mina soŋa soŋa ti ho kelum pa’asɛ Yehowa Saama la poan mɛ ge ti a me nɔŋɛ hɔ. Yehowa me mi ho mɛ soŋa soŋa. (1 Pe. 5:7) Yehowa bo’ori a yamesi za’a la vo’osum poan dia. A me pa’ali ba mɛ ge tɛ’ɛla ba.

14. Yehowa le eŋɛ la bem pa’alɛ ti a ka gaseri nɛreba?

 ¹⁴ Yehowa n le eŋɛ sɛla pa’alɛ ti a ka gaseri nɛreba dela, a basɛ ti nɛreba n boi tingɔŋɔ wa zɛ’an woo ta’an nyɛta Baabule la kaala. Ba yuun pɔsɛ gulesɛ Baabule la Hebru la Aramaik la Greek yetɔɣum poan. Sɛba n tã kaala yetɔɣesebo ti ba yuun pɔsɛ dekɛ gulesɛ Baabule la tari bɔnsoŋa la Yehowa gana sɛba n ka tã kaala yetɔɣum ana wa? Aayi, la daɣɛ bala.—Mt. 11:25.

15. Bem n pa’alɛ ti Yehowa ka gaseri nɛreba? (Bisɛ foote la.)

¹⁵ La daɣɛ tomam n keŋɛ sukuu zo’e bii ton mi yetɔɣesebo ti ba dekɛ gulesɛ Baabule la n wan basɛ ti to tara bɔnsoŋa la Yehowa. Yehowa pa’alɛ nɛra woo ban nari ti ba vɔi ba vom se’em. A ka pa’ali la sɛba n keŋɛ sukuu zo’e ma’a. A basɛ ti ba lerege a Yelesum la n de Baabule la yetɔɣum n paɛ tusa poan. Bala basɛ ti nɛreba zo’e zo’e nyɛta la nyuurɔ Baabule la poan ge kelum zamesɛ baŋɛ ban wan eŋɛ se’em ta’an dɛna Yehowa zɔdoma.—2 Tim. 3:​16, 17.

KELUM DƐNA YEHOWA SAANA

16. Wuu Tooma 10:​34, 35 n pa’alɛ se’em la, to wan eŋɛ la wani kelum dɛna Yehowa saama?

¹⁶ La dela yɔ’ɔ kãtɛ ti Yehowa to’e to ti to dɛna a saama. Yehowa dela mina n iti som ge nɔŋɛ nɛreba. A me biseri to mɛ soŋa soŋa. Leyɛ’ɛsa, a ka gaseri nɛreba. A ni kɔ’ɔn to’e to mɛ la ka pakɛ la ton ze’ele zɛ’an, ban uge to se’em, ton keŋɛ sukuu paɛ se’em, to buuri n ani se’em, to yuuma n zuni se’em bii to dela pɔka bii buraa. Ge Yehowa ni to’e la sɛba ma’a n nani en ti ba dɛna a saama.—Kaalɛ Tooma 10:​34, 35.

17. To wan le nyɛ pa’alegɔ la bɛ ti la soŋɛ tɔ ti to ta’an dɛna Yehowa saama a tɛnti deo la poan?

¹⁷ Yooma 15:1 poan, David yuun soke yeti: ‘O Yehowa, ani n wan ta’an dɛna saana ho tɛnti deo la poan? Ani n wan ta’an bɔna ho zilam zoore la zuo?’ Yehowa yuun dekɛ la a vo’osum la basɛ ti David bo soke ana wa lebesego. Zaseŋɔ seko n taɣelɛ la wan pa’alɛ tɔ yɛla ase’a wana mɔpi ti to wan eŋɛ ta’an basɛ ti Yehowa puurɛ pee ge ti to kelum dɛna a zɔdoma.