1, 2. ¿Jehová tä ni niara mikaka täte ye nübaire dre nuainne?

 JEHOVÁ ye abokän nire mä kräke ngwandretari mäi ngwane mäkwe kukwe ne niedre raba ruin nunye: “Niara ye ja ketamuko tikwe, Ngöbö tikwe, ti Rün”. O mä rabadre kädeke kukwe madabiti. Akwa ¿Niara ye ni ju bökänkä gwi mäkwe niedre?

² Ni ju bökänkä tä ni iti nübaire aune tä kain ngäbiti ño, ye erere Jehová tä ja kete ni niara mikaka täte yebe niebare Davidkwe. David kukwe ne ngwanintari: “Oh, Jehová, ¿nire raba nemen ju mäkwe yete? ¿Nire raba nemen nüne ngutuä deme mäkwe yekänti?” (Sal. 15:1). Kukwe ne tä mike gare ni raba nemen nüne ju Jehovakwe yete, ye abokän nemen ja ketamuko kwe. ¡Kukwe ye kwin krubäte! ¿ñan ererea?

JEHOVATA NI NÜBAIRE JA GWIRETE

3. ¿Jehovakwe nire nübaibare kena ja gwirete aune ja namani ruin ño ietre?

³ Jehovakwe jondron jökrä sribedre ye känenkri niara nämäne kaibe. Aisete, ni nübaibare nüne kena kwe jabe ye abokän Jesús, Monso kena kwe. ¡Niara namani ni ju bökänkä ni ka ngäbitikä kwin, ye käi namani juto krubätebätä! Jehovakwe monso kwe Jesús nübaibare nüne jabe yebätä “ja namani ruin kwin” Jehovai aune Jesús ie ja nämäne ruin kwin ye nämäne kä mike juto Jehovabätä (Prov. 8:30).

4. ¿Jehovakwe nire mada nübaibare ja gwirete?

⁴ Ja käne mada, niarakwe nitre üaire angeletre sribebare aune nübaibare kwe nüne jabe ju kwe yete. Biblia tä mike gare  niaratre ye abokän “Ngöbö monsoi” aune kä nämäne juto bätätre nämäne Jehová ken yebätä (Job 38:7; Dan. 7:10). Siklo kwati te, Jehová nämäne ja ketamukore nitre kä kwinbiti üaire ye aibe ben. Akwa bitikäre ni kä tibienbätä sribebare kwe aune ruäre nübaibare kwe nüne ja gwirete. Nitre ye ngätäite Enoc, Noé, Abrahán, Job ye nämäne. Niaratre ititre itire käkwe ja ketabare kwin Ngöböbe “nünabare kwe Ngöbökrä” nieta bätätre (Gén. 5:24; 6:9; Job 29:4; Is. 41:8).

5. ¿Profecía tä Ezequiel 37:​26, 27 ye tä dre driere nie?

⁵ Käta niken ta yete, Jehová tä ja ketamuko kwe ye nübaire nüne ja gwirete. Ñodre profecía mikata gare Ezequiel 37:​26, 27 (ñäkädrebätä) a ye ani mike gare jai. Profecía ne tä mike gare ni Jehová mikaka täte yekwe ja ketadre kwin ben ie tö. Jehovakwe “nünain kwin jäme ben” ye käbämikani kwe ietre. Nitre näin kä kwinbiti aune nitre rabai nüne Kä tibienbätä ye täi “nüne keteitibe” ju kwe te ye ngwane kukwe ye rabai bare (ju ye bämikata jerekäbe) (Juan 10:16). Profecía ye ara tä nemen bare kä nengwane.

MEDENTE ERERE NI TÄI AKWA JEHOVAKWE NI NGIBIAI

6. ¿Ñongwane nita nemen ju Jehovakwe yete aune ju ye tä medente?

⁶ Biblia tikani ye näire, ju mika nämäne cuerokwatabiti o jondron nire druen yebiti ye nämäne nitre kriemike, ñü räkändre jobe tibien o ñänä ngire yebätä mikata gare. Aune, yete ja düka nämäne kwin. Ni iti nämäne nüke gwi ye ngwane kai ngäbiti kwin ye nämänena gare ie. Nita ja denkä mento Jehová kräke ye ngwane nita nemen “ju” kwe yete (Sal. 61:4). Yete mrö ja üaire tä ere krubäte nikwe aune nitre mada nübaita Jehovakwe ja gwirete yebe ni raba ja kete kwin. Jubätä blitata ¿ye tä medente? Ye ñan tä kä keteitibe känti, ñakare aune nitre Jehová mikaka täte metre tä medente yekänti tä. Ye namanina gare nitre janamanena juta madate, gätä kri especial yebätä ye ie, ñobätä ñan aune yete nitre mada tä ju Ngöbökwe te ye namani gare ietre (Apoc. 21:3).

7. ¿Nitre Jehová mikaka täte metre krütani ye täbe nüne ju Jehovakwe te ye ñobätä ni raba niere? (Üai mikadre ñärärä).

⁷ ¿Nitre ja ngwanka metre krütani ye täbe ju Ngöbökwe yete? Jän nie raba. ¿Ñobätä töbikata kore? Ñobätä ñan aune Biblia tä mike gare niaratre ye abokän tä nire Ngöbö töite.  Jesukwe mikani gare: “Kri chi namani jutra ngitiekä, ye känti ni rükadreta nire era metre abko Moisékwe bä mikani, käkwe niebare: Ni Dänkien Ngöbö abko Ngöbö Abrahamkwe, Isaakwe amne Jacobokwe”. “Ngöbö abko ñan ni ngwäkäre Ngöböi akwa Ngöbö abko ni nire Ngöböi gare nie” (Luc. 20:​37, 38).

KUKWE KWIN TÄ NEMEN NIKWE AUNE KUKWE RUÄRE NUAINDRE

8. ¿Nita ju Jehovakwe te yebätä kukwe kwin meden tä nikwe?

⁸ Ju ye tä ni kriemike kä käme yebätä, ñodre ñü o kä ngire yebätä aune yete nita ja düke kwin, ye erere arato ju Ngöbökwe bämikata ye abokän raba ni kriemike kukwe raba nita ja kete Jehovabe juen ngwarbe nikän yebätä aune tödekara bianta kwe nie. Nita käre Jehová ken, ngwane Satana raba kukwe tare nuainne nibätä akwa kukwe tare ye ñaka nuadi kärekäre (Sal. 31:23; 1 Juan 3:8). Kä mrä yete Jehovakwe nitre ja ketamuko kwin kwe ye kriemikai jankunu ne kwe nita ja kete ben ye ñaka juandre ngwarbe jire chi. Gata ye diainkä kwe arato (Apoc. 21:4).

9. ¿Nitre nünanka ju Jehovakwe te ye rabadre ja ngwen ño?

⁹ ¡Jehovakwe ni nübaibare nüne jabe ja gwirete aune ja kete kwin ben ye kukwe kwin krubäte tä nikwe! ¿Ñaña? Akwa, ¿ni tuadremetre nüne jankunu kwe yebe yekäre ja ngwandre ño? Ni iti ni nübaidre jakänti ye ngwane nikwe dre nuaindre ie tö rabadre ye erere nikwe ja di ngwandre nuainne. Ñodre, kukwe ruäre ribedre kwe nie dimikakäre ngwane nikwe nuaindre töi kwinbiti ja rabadre ruin kwin ie yekäre ¿ñan ererea? Ye erere arato, Jehovata dre ribere nibätä ye erere ni tä nuainne nünankäre jankunu niara juete. Nita tarere krubäte yebätä nita ja di ngwen tä dre dre ribere nie ye jökrä nuainne (Col. 1:10). Jehová ye abokän ja ketamuko nikwe, Ngöbö nikwe aune ni Rün ye ara bätä mikadre ütiäte krubäte jai (Sal. 25:14). Jehová ye abokän nire ye nikwe ñaka käi kwitadrekä jire jabiti. Nikwe Jehová jürä ngwen jabätä ye köböire dre tuin käme Jehovai ye nikwe ña nuaindi jire aune niara töita ño ye erere nikwe nuaindi (Miq. 6:8).

KÄ NÖTARE YETE NITRE JÖKRÄ MIKANI TUIN KWE JA EREBE JAI

10, 11. ¿Jehovata ni niara mikaka täte ye mike tuin ja erebe jökrä jai ye kukwe medenbiti tä nemen gare nie?

¹⁰ Jehová ñaka ni kitete jire nübaikäre ja gwirete (Rom. 2:11). Nitre israelita nämäne kä nötare Sinaí yete ye ngwane, niarakwe ja ngwani ño ben yebiti tä nemen gare metre nie.

¹¹ Jehovakwe juta kwe mikani kwäre Egipto, ye bitikäre niarakwe sacerdote dianinkä sribikäre tabernáculo yete. Arato nitre levita ruäre dianinkä kwe sribi ruäre mikakäre kisete tabernáculo yete. ¿Nitre nämene nüne tabernáculo ken o sribire tabernáculo yete yebätä Jehová nämäne ngibiare bäri kwin nitre mada ye ngwä nie raba? Ñakare jire, Jehová nämäne nitre jökrä ye ngübare kwin.

12. ¿Jehová ñaka nitre israelita kitaninte ye bämikani ño kwe kä nötare yekänti? (Éxodo 40:38; üai mikadre ñärärä).

¹² Nitre israelita nämäne nüne yekänti ni jökrä ye raba nemen ja ketamuko Jehovakwe. Nitre ruäre nämäne sribire tabernáculo yete o nämäne nüne tabernáculo kenta ye Jehová nämäne mike tuin ja erebe jai. Ñodre, Jehovakwe ñukwä trä aune muta mikani tabernáculo yebiti ye nitre israelita jökrä käkwe tuani (ñäkädre Éxodo 40:38 yebätä). b Aisete, Jehová nämäne kukwe ñan tuabare  nuainne, muta yebiti niaratre jie kwräkwrä ye tuani nitre jökrä yekwe, yebätä nämänentre tribe jakwe ükete aune ja mike juto nänkäre kä mada känti gwairebe jökrä (Núm. 9:​15-23). Trompeta sribebare krobu ngwianbiti ye ngö mikani nämäne kri aune mrebe, ye nämene kwe ruin nitre jökrä ie yebiti rabadre ja mike juto nänkäre kä mada kokwäre nämänena gare ietre (Núm. 10:2). Nitre nämäne nüne tabernáculo ken ye ñan aibätä nämäne ja kete bäri kwin Jehovabe. Ñakare aune, nitre jökrä Israel ye raba nemen nüne Jehová gwirete aune ja tuenmetre jie ngwandre aune kriemikadre ie. Ye erere tä nemen bare kä nengwane: nita nüne medente erere akwa Jehovata ni tarere, ni ngibiare aune ni kriemike.

JEHOVÁ ÑAN NI KITETE JIRE YE TÄ BÄMIKE KÄ NENGWANE

13. ¿Jehová ñan ni kitete ye tä bämike ño kä nengwane?

¹³ Nitre kristiano ruäre tä nüne sede mundial nitre Testiko Jehovakwe ye ken o sukursal ken. Mada abokän tätre sribire yete. Ye köböire kukwe keta kabre nuainta yete ye niaratre raba dimike. Aune raba blite aune ja ükekrö ja mräkätre tä kukwe drie jie ngwen yebe. Ja mräkätre ruäre abokän tä sribire ni circuito tuabitikä erere o precursor especial. Akwa ja mräkätre kwati mada yekwe kukwe kwin ne kwrere ñan nemen, ye erere nemen bare mäbätä ngwane, Jehová tä mä tarere, tä mä ngibiare mä kain ngäbiti ja gwirete ye mä ngwan törö jai (1 Ped. 5:7). Jehová tä ni jökrä niara mikaka täte ye ngübare ye erere mrö ja üaire ye biain kwe mäi, mä jie ngwandi kwe aune mä kriemikadi kwe.

14. ¿Jehová ju bökänkä ñan ni kitete ye tä bämike kukwe meden madabiti?

¹⁴ Kukwe madabiti Jehová ñaka ni kitete tä bämike ye abokän Biblia rabadre ni jökräkwe käbiti tibien ye ie niara tö. Biblia ye tikani kukwe ketamäbiti: hebreo, arameo aune griego. ¿Kukwebiti Biblia tikani yebiti nire tä ñäkebätä ye aibe tä ja kete kwin Ngöböbe nie raba? Ñakare jire (Mat. 11:25).

15. Jehová ñaka ni kitete ye tä bämike ño kukwe nekänti mä raba mike gare (üai mikadre ñärärä).

 ¹⁵ Kukwebiti Biblia tikani yebiti nikwe blitadre o nikwe ja tötikani nuäi kwelate ye ña aibätä Jehovata ni kai ngäbiti. Nitre ja tötikani krikri ye ñan aibe ie Jehová tä ja kukwei mike gare; ñakare aune nitre kä jökräbiti tibien ja tötikani o ñaka ja tötikani ye ie niara tä ja kukwei mike gare. Niara kukwei Biblia ye kwitanina kukwe keta kabrebiti. Ye medenbätä nitre kä jökräbiti tibien ye raba ja kite niara kukweibätä aune nemen ja ketamuko kwin kwe (2 Tim. 3:​16, 17).

NI TÄDRE NÜNE JANKUNU JEHOVÁ JUE TE

16. ¿Jehovata nire nire kain ngäbiti ja gwirete? (Hechos 10:​34, 35).

¹⁶ Nita ju Jehovakwe te ye ütiäte krubäte ni kräke. Jehová ni ju bökänkä tä ni kain ngäbiti kwin aune töi mantiame krubäte ye erere ni mada ñakare jire mada, Jehová tä ni jökrä kai ngäbiti ja erebe ja gwirete aune ñaka ni kite medenkri, ni jatani medente, ni nüne ño, ni ja tötikani o ñakare, ni kwata bä ño, kä nuäi nibiti, ni brare o ni merire ye ñaka mike ñärärä. Ñakare aune rabakäre niara gwirete kukwe ruäre ribeta kwe ye mikadre tuin ütiäte krubäte jai ye aibe ribeta kwe (ñäkädre Hechos 10:​34, 35 yebätä).

17. ¿Dre rabai gare nie kukwe ja tötikara ja känenkäre yebätä?

¹⁷ Salmo 15:1 yete, Davidkwe kukwe ne ngwanintari: “Oh, Jehová, ¿nire raba nemen ju mäkwe yete? ¿Nire raba nemen nüne ngutuä deme mäkwe yekänti?”. Ye bitikäre David ara kukwe ye mikani gare üai deme Jehovakwe köböire. Dre dre nuaindre ne kwe ni tädre jankunu nüne Jehová gwirete ye rabai gare nie kukwe ja tötikara ja känenkäre yebätä.