STADI ATIKOL 23
ANE 28 Iehova Tura Henia
Iehova ese Ena Palai Ruma Dekenai Ita ia Boiria
“Egu palai rumana be idia ida do ia noho, bona lau be edia Dirava.”—ESE. 37:27.
STADI ENA BADINA
Iehova ese ena palai rumana ai ita ia boiria ena anina, bona ita ia naria dalana do ita lalopararalaia.
1-2. Iehova ena abidadama hesiai taudia be dahaka hahenamo badana idia abia?
IEHOVA be edena bamona oi laloa? Reana do oi haere, ‘Iehova be egu Tamana, egu Dirava, bona egu Turana.’ To, inai oi diba, a? Iehova be taunimanima ta bamona oi ia boiria.
2 Iehova ese ena abidadama hesiai taudia ia boiria karana be King Davida ese ia gwauraia. Ia henanadai: “Iehova e, daika be emu palai ruma lalonai do ia noho? Daika be emu ororo helagana ai do ia noho?” (Sal. 15:1) Unai siri ese ita ia hadibaia, ita be Iehova ena palai rumana ai ita noho diba, anina be iena turana ai do ita lao. Unai be hahenamo badana!
IEHOVA IA URA ITA IA BOIRIA
3. Iehova ese ia boiria tauna ginigunana be daika, bona ta ta dekenai edia hemami be edena bamona?
3 Iehova be gau ibounai ia do havaraia lasi neganai, ia be sibona ia noho. Bena gabeai iena vara guna Natuna ia karaia. Bona unai be nega ginigunana Iehova be ta ia boiria ena ruma ai ia noho totona. Baibel ia gwau Iehova be iena Natuna dekenai ia “moale.” Danu, ia boiria tauna ginigunana, be ‘Iehova ena vairana ai nega ibounai ia moale.’—Aon. 8:30.
4. Iehova ese daidia ia boiria danu?
4 Bena Iehova ese aneru ia karadia, bona idia danu ia boiridia. Baibel ese unai aneru ia gwauraia, “Dirava ena natudia,” bona idia be ia ida idia noho dainai idia moale. (Iobu 38:7, ftn; Dan. 7:10) Lagani momo lalonai, guba dekenai Dirava ida idia noho taudia sibona be iena turadia ai idia lao. Gabeai, Dirava ese taunimanima ia karaia, bona idia danu ia boiria, iena turana ai idia lao totona. Hegeregere, Enoka, Noa, Aberahamo, bona Iobu. Baibel ese ia hahedinaraia, idia be Iehova idia badinaia dainai, iena turadia ai idia lao.—Gen. 5:24; 6:9; Iobu 29:4; Isa. 41:8.
5. Esekiela 37:26, 27 ena peroveta herevana amo dahaka ita dibaia?
5 Lagani momo lalodiai, Iehova ese ena turadia momo ia boiria ena palai ruma dekenai idia noho totona. (Esekiela 37:26, 27 duahia.) Hegeregere, Esekiela ena peroveta herevana amo ita diba, Dirava ia ura bada ia idia badinaia momokani taudia be iena turana ai ia halaoa. Ia gwauhamata, ‘maino gwaubou be idia ida do ia karaia.’ Unai peroveta herevana ese ia hahedinaraia, guba helarona idia abia taudia bona tanobada helarona idia abia taudia be “mamoe orea tamona” bamona do idia noho. (Ioa. 10:16) Bona unai be hari ia guguru noho!
DIRAVA BE ITA IA NARIA ENA BE EDESENIAI ITA NOHO
6. Edena dala ai, Iehova ese ta be iena palai ruma ai ia boiria diba, bona iena palai ruma be gabu tamona ai ia noho, a?
6 Baibel negadiai, palai ruma idia gaukaralaia, laga-ani totona bona medu eiava dina ena siahu amo sibona idia gimaia. Bona ta ese ma ta be ena palai ruma dekenai ia boiria neganai, ia diba ia boiria tauna ese do ia naria namonamo. Iehova dekenai iseda mauri ita gwauhamatalaia neganai, laulau dalanai ita ia boiria ena palai ruma dekenai ita noho totona. (Sal. 61:4) Bona Iehova ese iseda abidadama do ia hagoadaia gaudia momo ia henia. To, Iena palai ruma be gabu tamona dekenai ia noho lasi. Reana spesel hebouhebou totona tano ma ta dekenai oi lao neganai, Dirava ena palai ruma ai idia noho taudia ma haida oi hedavari henia. Bema mai abidadama ida Iehova ita tomadiho henia, iena palai ruma ai ita noho diba, ena be iseda noho gabudia be idauidau.—Apok. 21:3.
7. Dahaka dainai ita gwau diba idia mase vadaeni abidadama taudia be Iehova ena palai rumana ai idia do noho? (Laulau itaia danu.)
7 Idia mase vadaeni abidadama taudia be edena bamona? Ita gwau diba idia be Dirava ena palai rumana ai idia do noho, a? Oibe! Dahaka dainai unai bamona ita gwau diba? Badina Dirava ese idia ia laloatao noho. Iesu ia gwau: “Mose ese ia hahedinaraia bamona, mase taudia be do idia toreisi lou. Au ginigini ena sivarai lalonai, ia ese Iehova ia gwauraia ‘Aberahamo ena Dirava, Isako ena Dirava, bona Iakobo ena Dirava.’ Ia be mase taudia edia Dirava lasi, to mauri taudia edia Dirava, badina ia dekenai idia ibounai be idia mauri noho.”—Luka 20:37, 38.
Idia mase vadaeni abidadama taudia danu be Dirava ena palai rumana lalonai idia do noho (Paragraf 7 itaia)
HAHENAMO IDAUIDAU BONA MADUNA HAIDA
8. Iehova ena palai ruma ai ita noho dainai dahaka hahenamo ita abia?
8 Tau ta be palai ruma ai ia laga-ani bona medu eiava dina ena siahu amo sibona ia gimaia hegeregerena, Iehova ese ena palai ruma ai ia boiria taudia be ia ida edia hetura karana do ia hadikaia gaudia amo ia gimadia bona vaira nega ena helaro namona ia henidia. Iehova kahirakahira ita noho neganai, Satani ese ita do ia hadikaia lasi. (Sal. 31:23; 1 Ioa. 3:8) Tanobada matamatana ai, Iehova ese ena turadia edia abidadama do ia gimaia sibona lasi, to mase amo idia do ia gimaia.—Apok. 21:4.
9. Iehova ia ura ia boiria taudia be dahaka idia karaia?
9 Iehova ena palai ruma ai ita noho be hahenamo badana. Bona iseda hetura karana ia ida be ia noho hanaihanai diba. Iehova ena palai ruma ai ita noho hanaihanai totona dahaka ita karaia be namo? Bema ta ese ena ruma dekenai oi ia boiria, do oi ura oi karaia gaudia amo ia oi hamoalea. Hegeregere, ruma tauna do ia ura emu tamaka be murimuri ai oi rakatania, bena ruma dekenai oi vareai, bona mai ura ida unai do oi badinaia. Unai hegeregerena, ita ura diba Iehova ena palai ruma ai ita noho hanaihanai totona, dahaka ita karaia be namo? Iehova ita lalokau henia dainai, unai ese ita ia hagoadaia, ‘gau ibounai dekenai ia ita hamoalea’ totona. (Kol. 1:10) Ita diba Iehova be iseda Turana, to danu ia be iseda Dirava bona Tamana, unai dainai ia ita matauraia be gau badana. (Sal. 25:14) Namona be unai ita laloaboio lasi, bona hanaihanai ia ita matauraia. Unai ese ita do ia durua, ia idia habadua karadia ita dadaraia totona. Ita ura ‘mai manau danu iseda Dirava ida do ita raka.’—Mika 6:8.
IEHOVA ESE ISRAELA TAUDIA BE MAKA TAMONA AI IA KARA HENIA
10-11. Edena dala ai Iehova ese Israela taudia ia kara henia dalana amo, ia hahedinaraia taunimanima ibounai be maka tamona ai ia kara henia?
10 Iehova ese ena turadia be maka tamona ai ia kara henia. (Roma 2:11) Bona Sinai ena taunimanima lasi gabuna ai, Iehova ese Israela taudia ia kara henia dalana amo unai ita diba.
11 Iehova ese iena taunimanima be Aigupito ena igui hesiai amo ia hamauria murinai, hahelaga taudia ia abia hidi palai dubu ai idia gaukara totona. Bona Levi taudia ia abia hidi palai dubu ai hesiai gaukara ma haida idia karaia totona. Iehova ese palai dubu ai idia gaukara taudia eiava palai dubu badinai idia kamepa taudia sibona ia naria namonamo, a? Lasi! Iehova ese taunimanima ibounai be maka tamona ai ia kara henia.
12. Edena dala ai Iehova ese Israela taudia be maka tamona ai ia kara henia? (Esodo 40:38) (Laulau itaia danu.)
12 Herevana Israela taudia be palai dubu ai idia gaukara lasi eiava ena badinai idia kamepa lasi, to idia ta ta be Iehova ida edia hetura karana idia moalelaia diba. Hegeregere, Iehova ese palai dubu ena ataiai ori bona lahi ia atoa neganai, ia ura bese ibounai ese unai idia itaia. (Esodo 40:38 duahia.) Ori be gabu ma ta dekenai ia lao neganai, palai dubu amo daudau dekenai idia kamepa taudia be unai idia itaia diba, bena edia kohu idia haboua, kamepa idia kokia bona bese ibounai be nega tamona idia raka. (Num. 9:15-23) Taunimanima ibounai be siliva amo idia karaia kibi rua edia regena idia kamonai diba. Bona unai ese idia ia hadibaia, namona be gabu ma ta dekenai do idia lao. (Num. 10:2) Unai dainai, palai dubu badinai idia noho karana ese ia hahedinaraia lasi, idia sibona be Iehova idia tura henia diba. To, Israela taudia ibounai be Iehova ese ia boiria diba, bona idia abia dae Ia ese idia do ia hakaua bona gimaia. Unai hegeregerena hari danu, ena be tanobada ena kahana idauidau ai ita noho, to Iehova ese ita ia lalokau henia, ia naria, bona gimaia.
Iehova ese palai dubu totona ia hegaegaelaia gaudia amo ita diba, taunimanima ibounai be maka tamona ai ia kara henia (Paragraf 12 itaia)
HARI DANU IEHOVA ESE TAUNUIMANIMA BE MAKA TAMONA AI IA KARA HENIA
13. Dahaka dainai ita gwau diba Iehova ese taunimanima edia toana ia laloa lasi?
13 Hari, Dirava ena taunimanima haida danu be iseda hedikwota eiava brens ofesi badinai idia noho. Bona haida be unuseniai idia gaukara. Unai dainai, idia be unuseniai idia vara gaukara idauidau idia durua, bona hakaua taudia ida idia hebamo diba. Haida be sekit naria gaukara eiava ful-taim hesiai gaukara ma haida idia karaia. Bema oi be unai hahenamo oi abia lasi, namona be oi diba oi danu be Iehova ese ia boiria tauna bona oi ia lalokau henia. Danu, oi ia diba namonamo bona emu ura gaudia ia henia. (1 Pet. 5:7) Iehova ese iena hesiai taudia ta ta dekenai edia abidadama hagoadaia gaudia ia henia, idia ia hakaua bona gimaia.
14. Edena dala ma ta amo ita diba, Iehova ese taunimanima be maka tamona ai ia kara henia?
14 Iehova ese taunimanima be maka tamona ai ia kara henia dalana ta be, dala ia kehoa taunimanima ibounai be hari Baibel idia duahia diba. Toretore Helagadia idia torea ena gado ginigunadia toi be: Heberu, Aramia, bona Grik. Unai gado ai, Baibel idia duahia diba taudia sibona be Iehova idia tura henia, a? Lasi.—Mat. 11:25.
15. Dahaka ese ia hamomokania Iehova be taunimanima edia toana ia laloa lasi? (Laulau itaia danu.)
15 Iehova ia laloa lasi ita be sikuli bada taudia eiava gado ma haida ita dibaia dainai, ita ia boiria iena turana ai ita lao totona. To, Iehova ese taunimanima ibounai dekenai iena aonega ia henia, ena be sikuli badana idia lao eiava lasi. Iena Hereva, Baibel, be gado tausen momo ai idia hahanaia; unai dainai, taunimanima be Baibel ena hahediba herevadia amo namo do idia abia bona iena turana ai idia lao diba.—2 Tim. 3:16, 17.
Hari inai negai Baibel ia noho dainai, edena dala ai unai ese ia hamomokania Iehova be taunimanima edia toana ia laloa lasi? (Paragraf 15 itaia)
IEHOVA OI HAMOALEA NOHO
16. Kara 10:34, 35 hegeregerena, edena dala ai Iehova ese ita ia abia dae diba?
16 Iehova ese laulau dalanai, iena palai ruma dekenai ita ia boiria be hahenamo badana. Ia be taunimanima ia boiria Tauna hereadaena. Iena kara be namo herea bona ena lalokau be bada herea. Danu, ia be taunimanima edia toana ia laloa lasi. Ena be edeseni ita noho, iseda mauri dalana, edukeisen, bese, iduhu, mauri lagani, tau eiava hahine, to ita ibounai ia boiria. Iehova ese ia idia badinaia taudia sibona ia boiria, ena turana ai idia lao totona.—Kara 10:34, 35 duahia.
17. Iehova ena palai ruma ai ita ia boiria totona, edeseniai diba ma haida ita davaria diba?
17 Salamo 15:1 ai, Davida ia henanadai: “Iehova e, daika be emu palai ruma lalonai do ia noho? Daika be emu ororo helagana ai do ia noho?” Bena Iehova ese Davida ia gaukaralaia, unai henanadai ia haerelaia totona. Atikol 24 ai unai gaudia haida ita badinaia dalana do ita herevalaia, unai amo Iehova ita hamoalea bona ia do ita tura henia noho.
ANE 32 Iehova Kahanai Do Ita Gini!
