1-2. Omaṋangero yeṋe Jehova nge yandja kovakarere ve ovaṱakame?

 OMUNDU tje ku pura kutja, ‘Hapo Jehova ouṋe kove?’ Ove mo mu ziri vi? Ove mape ya o ziri kutja, ‘Jehova oTate, oMukuru wandje nEpanga randje.’ Ove mape ya o ripura ohunga nomana warwe wondjozikiro nge hungira ohunga na Jehova. Posi ya, hapo mape ya otja eye Omusekirise woye?

² Ombara David ya sasaneka oupanga Jehova mbwe na wo ku novakarere ve ovaṱakame, ku noupanga omusekirise mbwe kara na wo ku novayenda ve. Eye wa pura kutja: “Muhona, owaṋi ngu ma yenene okuvarura Ondjuwo yoye ondjapuke [poo ondanda yoye, NWT]? Owaṋi ngu ma yenene okurikotamena koSion, ondundu yoye ondjapuke?” (Eps. 15:1) Otja kezeva ndi, matu rihongo kutja matu yenene okurira ovayenda mondanda ya Jehova poo okurira omapanga we. Hapo ingo kamaṋangero omawa okuza ku Jehova?

JEHOVA U VANGA KUTJA TU RIRE OVAYENDA VE

3. Ouṋe ngwa ri omuyenda wa Jehova omutenga, nu Jehova nomuyenda we aave fula vi?

³ Ngunda Jehova e hi ya mema oviṋa avihe, eye wa ri erike. Posi ya, eye okuzambo wa mema Omuna we omukwatwa erike. Jehova wa ri tjimuna omusekirise ngwa ṋanga omuyenda we omutenga mondanda ye, nu wa ri nondjoroka tjinene okutjita nao. Ombeibela i tja Omuna we wa ri “enyando re,” nu eye ‘aruhe aa nyandere momurungu wa [Mukuru].’—Omiano 8:30.

4. Oouṋe varwe mba karira ovayenda va Mukuru?

⁴ Jehova okuzambo wa mema ovaengeli, nu wina we ve ṋanga okurira ovayenda ve. Ombeibela i tja ‘oviutwa avihe vyeyuru’ mbi ri ovaengeli ve nenyando okukara pu na Jehova. (Job 38:7; Dan. 7:10) Oure wozombura ozengi ovayenda va Mukuru va ri imba mbaave hupu pamwe na ye meyuru uriri. Kombunda, eye  wa mema ovandu, nu owo wina aave yenene okurira ovayenda ve. Ovayenda tjiva mbo va ri Henok, Noa, Abraham na Job. Ombeibela i raisa kutja owo va ri omapanga wa Jehova mena rokutja va ri nonḓuviro ku ye.—Gen. 5:24; 6:9; Job 29:4; Jes. 41:8.

5. Ovikwaye mbi matu yenene okurihongera komaprofetero nge ri mu Esekiel 37:​26, 27?

⁵ Oure wozombura ozengi, Jehova u kayenda komurungu okuṋanga omapanga we okurira ovayenda ve. (Lesa Esekiel 37:​26, 27.) Otjotjihorera, okuza komaprofetero wa Esekiel tu rihonga kutja Jehova tjiri u vanga kutja ovakarere ve ovaṱakame ve kare noupanga wopopezu ku na ye. Eye wa kwizika kutja ma tjiti “omerikutiropamwe na wo.” Omaprofetero ngo ye hungirira koruveze indu imba mbe nomaundjiro wokukahupa meyuru na imba mbe nomaundjiro wokukahupa kombanda yehi, tji mave kara pamwe mondanda ya Jehova ‘otjorupanda rumwe rwozonḓu.’ (Joh. 10:16) Eṱe tu ri moruveze ndwo nai.

MUKURU U RIKENDERA KWEṰE APEHE PU TU RI

6. Omomuano uṋe omundu mu ma yenene okurira omuyenda mondanda ya Jehova, nu ondanda ya Jehova matu i vaza pi?

⁶ MOmbeibela ondanda ya ri oruveze omundu maa yenene okusuva nokuritjevera komuinyo weyuru. Omuyenda mondanda aa undjire ko kutja omusekirise me mu sekirise nawa. Indu tji twe riyandja ku Jehova, eṱe tu rira ovayenda mondanda ye. (Eps. 61:4) Eṱe tu noviṋa avihe mbi tu hepa kokutja tu kare noupanga oupame ku na Jehova, nu tu rira omapanga ku na imba mbe ri ovayenda va Jehova. Ovandu okuza komahi ayehe mave yenene okurira ovayenda mondanda ya Jehova. Ove mape ya wa ya kehi rarwe nu okakara pomaworonganeno omanene pu wa ka hakaena ku novandu varwe mba ri nondjoroka okukara mondanda ya Mukuru. Indu tji twa karere Jehova nouṱakame matu yenene okurira ovayenda mondanda ye kainatja kutja tu ri pi.—Omavan. 21:3.

7. Matu tjiwa vi kutja imba ovaṱakame mba ṱa ngamba ovayenda mondanda ya Jehova? (Wina tara kotjiperendero.)

⁷ Hapo tjike na imba ovaṱakame mba ṱa? Hapo matu yenene okutja owo ngamba ovayenda mondanda ya Jehova? Ii. Ongwaye tji matu yenene okutja nao? Mena rokutja ve ri mourizemburuka we nu ku ye ngamba ve nomuinyo. Jesus wa kahurura kutja: “Moses ma raisa ongahukiro kutja ovakoke mave pendurwa komuinyo. Membo re mu mu na inga omambo wotjihwa tjiyatji yaka, eye muya hungire Muhona otja ngu ri ‘Ndjambi waAbraham, na  Ndjambi walsak, na Ndjambi waJakob.’ Eye kaNdjambi wovakoke, nungwari oNdjambi wovanamuinyo, orondu ovandu avehe ku Ye ve nomuinyo.”—Luk. 20:​37, 38.

OUWA MBU TU MUNA NOMERIZIRIRA NGU TU NA WO

8. Ouwa waye mbu tu muna mokurira ovayenda mondanda ya Jehova?

⁸ Ondanda i yenena okurira oruveze rwomasuviro noruveze rwondjeverero komuinyo weyuru. Momuano tjingewo, ondanda ya Jehova i yenena okutjevera ovayenda ve koviṋa avihe mbi mavi yenene okutjita kutja ave ha kara noupanga ouwa ku na ye, nokuvepa omaundjiro omawa woruyaveze. Indu tji twa kara popezu na Jehova, Satan kamaa yenene okutjita otjiṋa tji matji tu hihamisa nga aruhe. (Eps. 31:23; 1 Joh. 3:8) Mouye oupe, Jehova ma kayenda komurungu okutjevera ovakarere ve ovaṱakame ku Satan na wina konḓiro.—Omavan. 21:4.

9. Otjikwaye Jehova tje undjira ko kovayenda ve okutjita?

⁹ Tjiri ondjingonekero yapeke okurira ovayenda mondanda ya Jehova. Eṱe matu yenene okukara noupanga wopopezu ku na ye nga aruhe. Hapo eṱe matu sokutjita vi indu tji matu vanga okukayenda komurungu okurira ovayenda ve? Oukahu kutja, indu tji wa ṋangwa ponganda yomundu, ove u vanga okurira omuyenda omuwa. Otjotjihorera, eye mape ya e ku ningire okuhukura ozongaku zoye ngunda au hi ya hita mondjuwo, nu mai rire oupupu kove okutjita nao. Momuano tjingewo, eṱe matu vanga okutjiwa kutja ovikwaye Jehova mbye undjira ko ku imba mbe vanga okukayenda komurungu okurira ovayenda mondanda ye. Orusuvero rwetu ku Jehova ru tu hinga kutja tu tjite oviṋa avihe mbi matu yenene kutja tu ‘tjate ku Ye.’ (Kol. 1:10) Ouatjiri kutja Jehova Epanga retu, posi ya eye wina oMukuru wetu nu oTate wetu, okutja eye wa pwa okupewa ondengero i yeṱe. (Eps. 25:14) Ku nao, katu sokuzemba otjiṋa ho, nu aruhe matu sokumuraisira ondengero. Ondengero ndjo mai tu vatere kutja atu ha tjiti oviṋa mbi mavi mu hihamisa “nokuryanga momerisusuparisiro” ku na Mukuru wetu aruhe.—Mika 6:8.

JEHOVA AA TJINDI OVAISRAEL NOKUHINOMBANGU

10-11. Omomuano uṋe Jehova ma tjinda Ovaisrael mba ri mokuti onguza kwa Sinai, nu wa raisa vi kutja ke nondoorora?

¹⁰ Jehova u tjinda omapanga we nokuhinondoorora. (Rom. 2:11) Eṱe matu yenene okurihonga otjiṋa hi okuza komuano eye maa tjinda Ovaisrael nokuhinombangu mokuti onguza kwa Sinai.

¹¹ Indu tja za nokuyama ovakarere ve mouhuura moEgipte, Jehova wa zika ovapristeri okukarera pondanda yomaturiro. Eye wa zika Ovalevi okuungura oviungura vyarwe pondanda yomaturiro. Hapo Jehova aa yandja ombango yapeke ku imba mbaave karere pondanda yomaturiro poo ku imba mba turire popezu na yo? Kako. Jehova ke nondoorora.

12. Hapo omuano Jehova maa tjindi Ovaisrael mokuti onguza kwa raisa vi kutja ke nondoorora? (Eksodus 40:38) (Wina tara kotjiperendero.)

¹² Omuisrael auhe aa yenene okurira epanga ra Jehova ropopezu kainatja kutja aa karere pondanda yomaturiro, poo kutja wa turire popezu poo kokure na yo. Otjotjihorera, Jehova wa tjita kutja otjiwaṋa atjihe tji yenene okumuna otjikamba mutenya notjikamba tjomuriro ouṱuku, mbyaari kombanda yondanda yomaturiro. (Lesa Eksodus 40:38.) Indu otjikamba tji tja utu okuyeruruka, imba mba turire kokure nondanda yomaturiro aave yenene okutjimuna, nu aave paka oviṋa vyawo nokuhaṋa ozondanda zawo nokukayenda pamwe notjiwaṋa atjihe. (Num. 9:​15-23) Ovandu avehe aave yenene okuzuva ozombosiro ozonene zozohiva mbari zosilveri nḓa ze raisire  ovandu avehe kutja mave sokutjinda. (Num. 10:2) Ku nao, kaatji hee kutja omundu ngu kara popezu nondanda yomaturiro u noupanga wopopezu ku na Jehova okukapita imba mbaave kara kokure na yo. Nungwari, Omuisrael auhe aa yenene okurira omuyenda wa Jehova, nokutjiwa kutja Jehova me mu hongorere po nokumutjevera. Momuano tjingewo ndino, kainatja kutja twa tura pi, Jehova we tu suvera nu me tu tjevere nokutuyama.

OVIHORERA MBI RAISA KUTJA JEHOVA KE NOMBANGU NDINO

13. Ongwaye tji matu yenene okutja Jehova ke nombangu ndino?

¹³ Ovakarere va Mukuru ndino ve kara popezu nomberoo ohongora poo orutavi rwomberoo rwOvahongonone va Jehova. Nu varwe ve karera potuveze twi. Ku nao, ve yenena okuungura ovingi potuveze twi nokukara pamwe na imba mbe hongorera po motjira tja Jehova. Tjiva ve karera otjovatarere mbe varura ozombongo poo okukarera Jehova oruveze aruhe momuano wapeke. Nandarire kutja ove kokarere momuano mbwi, tjiwa kutja ngunda oove omuyenda wa Jehova nu eye we ku suvera. Eye u ku tjiwa nawa nu u ku pa imbi ove mbi mo hepa. (1 Petr. 5:7) Jehova u yandja oviṋa mbi tjita kutja ovakarere ve avehe ve kare noupanga ouwa ku na ye. Eye u ve hongorera po nokuvetjevera.

14. Omuano uṋe warwe Jehova me raisa kutja ke nombangu?

¹⁴ Omuano warwe Jehova me raisa kutja ke nombangu, omokutjita kutja ovandu avehe ongondoroka nouye ve lese Ombeibela. Pomautiro Ombeibela ya tjangerwe momaraka yetatu nga: Otjiheberi, Otjiaramei nOtjigrike. Hapo imba mbu mave yenene okulesa omaraka Ombeibela mu ya tjangerwe rukuru, ve noupanga wopopezu ku na Jehova pu imba mbe hi nokutjiwa okulesa omaraka ngo? Kako, katjiperi.—Mat. 11:25.

15. Oviraisiro viṋe mbi raisa kutja Jehova ke nombangu? (Wina tara kotjiperendero.)

¹⁵ Jehova ke tu ṋanga kutja tu rire omapanga  we mena rokutja twa hongwa tjinene, poo mena rokutja tu tjiwa omaraka inga Ombeibela mu ya tjangerwe rutenga. Jehova u yandja ounongo we kovandu avehe ongondoroka nouye, nu kaku imba mba hongwa tjinene uriri. Embo re Ombeibela ra torokwa momaraka omengi, ku nao ovandu ongondoroka nouye ve yenena okumuna ouwa komahongero waro nokurihonga kutja mave yenene vi okurira omapanga we.—2 Tim. 3:​16, 17.

KAYENDE KOMURUNGU OKURIRA OMUYENDA WA JEHOVA

16. Otja kOviungura 10:​34,35, omomuano uṋe mu matu yenene okukayenda komurungu okurira ovayenda va Jehova?

¹⁶ Tjiri ondjingonekero yapeke okuyakurwa i Jehova otjomuyenda mondanda ye. Eye Omusekirise omuwa okukapita ovasekirise avehe nu we ura orusuvero. Wina, eye ke nombangu, u yakura ovandu avehe kainatja kutja twa za pi, twe kurisiwa vi, tu nomahongero nge ṱeki pi, twa sana pi, oweṱe vombazu iṋe, tu nozombura ngapi, poo oweṱe ovarumendu poo ovakazendu. Posi ya, Jehova u yakura imba mbe nonḓuviro ku ye otjovayenda ve.—Lesa Oviungura 10:​34, 35.

17. Matu kahungirira ku ye morupa ndu maru kongorere ko?

¹⁷ Otja kEpsalme 15:​1, David wa pura omapuriro nga: “Muhona, owaṋi ngu ma yenene okuvarura Ondjuwo yoye ondjapuke? Owaṋi ngu ma yenene okurikotamena koSion, ondundu yoye ondjapuke?” Okuzambo Jehova wa ungurisa David okuzira omapuriro ngo mEpsalme 15. Orupa ndu maru kongorere ko maru hungirire koviṋa tjiva mbi matu sokutjita kutja tu tjate ku Jehova nokukayenda komurungu okurira epanga re.