MAGIGIAMMU NGA ARTIKULO 23
KANSION 28 Pakikkofun Kani Jehova
Imbitan Ittam ni Jehova nga Mabbalin tu Bisita Na
“Egga noka nira i toldà, anna sakan noka i Dios da.”—EZE. 37:27.
I MAGIGIAMMU TAM
Tapenu mas malippawa tam i kebalinan na pabbalin tu bisita ni Jehova ta tolda na anna nu kunnasi i panangngal na nittam bilang Mamisita nittam.
1-2. Anni i imbitasion ni Jehova ta matalo ira nga aripan na?
SINNI si Jehova ta pattolem? Awayya na nga kagiammu, ‘Si Jehova i Yamà, i Dios ku, anna i Kofukku.’ Baka egga paga i tanakuan nga agal mu nisa. Ngem nakagim ngana kari tu ‘Si Jehova i Mamisita nio?’
2 Nikumpara ni Patul David si Jehova ta Mamisita anna i matalo ira nga aripan na ta bisita na. Niyavu na: “O Jehova, sinni i puede nga mabbalin tu bisita ta toldam? Sinni i puede nga maddian ta masanto nga vukig mu?” (Sal. 15:1, NW) Taw nga versikulo, magigiammu tam nga awayya tam mabbalin tu bisita ni Jehova, onu kofun na. Kakkasta nga pribilehio yatun!
IKAYA NI JEHOVA NGA MABBALIN ITTAM TU BISITA NA
3. Sinni i ollollu nga bisita ni Jehova, anna anni i matageno ni Jehova anna na bisita na ta kataggi-tadday?
3 Nige na pamaratu, magitetadday laman si Jehova. Ngem ari nabbayag, pinaratu na i Ana na nga nabbalin tu ollollu nga bisita ta tolda na. Si Jehova ay kagitta na Mamisita nga nagimbita tu bisita ta tolda na. Kagian na Biblia nga si Jehova ay “kakayà na” i Ana na. Yatun gapa nga ollu nga bisita na ay ‘magaya-ayayya ta arubang na ta ngamin nga tiempo.’—Prov. 8:30.
4. Sinni ira i tumunug nga inimbita ni Jehova bilang bisita ta tolda na?
4 Tumunug nga pinaratu ni Jehova i anghel ira. Inimbita na gapa ira bilang bisita na. Ta Biblia, nagalan i anghel na ira bilang “ána na Dios” anna nakagi gapa nga magayayya ira kavulu si Jehova. (Job 38:7; Dan. 7:10) Ta nabaya-bayag nga tiempo, danuri laman maddian ta langi i bisita na Dios. Ngem turi kua, pinaratu na i totolay anna puede gapa ira mabbalin tu bisita na. I karuan tatun ira nga bisita ay da Enoc, Noe, Abraham, anna Job. Danatun nga kurug nga aripan ay nideskriba na Biblia nga kokkofun na Dios megafu ta nattuppal ira nisa.—Gen. 5:24; 6:9; Job 29:4; Isa. 41:8.
5. Anni i magigiammu tam ta profesiya ta Ezekiel 37:26, 27?
5 Ta aru nga siglo, nitulu-tuloy ni Jehova nga imbitan i kokkofun na nga mabbalin tu bisita na. (Bibbigan i Ezekiel 37:26, 27.) Angngarigan na ta profesiya ni Ezekiel, nagigiammu tam nga kakayà na Dios nga mabbalin tu madukko i relasion na ta matalo nga aripan na ira. Nipromesa na nga ‘makipakkasinabban yayya nira para ta imammo.’ Tukuyan natun nga profesiya i tiempo nga mattaradday noka ta tolda na danuri para langi anna danuri para davvun bilang “tattadday nga kural.” (Juan 10:16) Sangawe ngana yatun nga tiempo!
TANGNGALLAN ITTAM NA DIOS MASKI SITAW I DIATTAM
6. Kunnasi nga mabbalin tu bisita i tadday ta tolda ni Jehova, anna sitaw nga malegan i tolda Na?
6 Ta Biblia, i tolda na tadday nga tolay ay lugar tapenu pagibannagan anna pattaguan nu marake i tiempo. Ekspektan na tadday nga bisita tatun nga tolda nga asikasuan yayya na namisita nisa. Turi ta naddedika ittam kani Jehova, nabbalin ittam tu bisita ta tolda na. (Sal. 61:4) Abundansia ittam ta espiritual nga makan anna egga ira i kokkofuttam nga nabbalin gapa tu bisita ni Jehova. Ngem i tolda na ay ari laman tu egga ta tadday nga lugar. Baka napuruebammu ngana i nappasiar ta tanakuan nga nasion tapenu maki-special convention anna nakakilala ka tu wawwaragi nga magayayya megafu ta egga gapa ira ta tolda na Dios. Nu matalo ittam nga masserbi kani Jehova, mabbalin ittam tu bisita ta tolda na maski sitaw i diattam.—Nep. 21:3.
7. Ngatta makagi tam nga bisita lagapa ta tolda ni Jehova danuri matalo nga natay ngana? (Innan gapa i letratu.)
7 Kunnasi gapa danuri matalo nga natay ngana? Makagi tam kari nga bisita lagapa ira ta tolda ni Jehova? Wan! Ngatta makagi tam yatun? Megafu ta sigga-matolay lagapa ira ta panaddamman ni Jehova. Niyesplika ni Jesus: “Maski si Moises ay pakurugan na tu maginnolay i natay ira. Ta tadday nga parte na Masanto nga Tura nga meyannung ta gumanga-ganga nga mula, kagian na tu i Yafu ay ‘i Dios ni Abraham, i Dios ni Isaac anna i Dios ni Jacob.’ I Dios ay Dios na matolay, ari tu Dios na natay, ta ngamin ay matolay ta pagimamma na Dios.”—Luc. 20:37, 38.
Bisita lagapa ta tolda na Dios maski danuri matalo nga natay ngana (Innan i parapo 7)
I BENEFISIO ANNA I RESPONSIBILIDAD TAM BILANG BISITA NI JEHOVA
8. Kunnasi nga mabbenefisio i bisita ira ni Jehova ta kegga da ta unag na tolda na?
8 I literal nga tolda ay lugar nga pagibannagan anna pattaguan nu marake i tiempo. Kunnatun gapa i tolda ni Jehova. Protektan natun i bisita na ira tapenu ari ira nga mappeligro ta espiritual anna tapenu ari mapawan i iddanama da. Nu kanayun ittam nga madukko kani Jehova, awan tu makua ni Satanas nga mannanayun nga makaperwisiu nittam. (Sal. 31:23; 1 Juan 3:8) Sonu Paraiso, tulu-tuloy nga protektan ni Jehova i matalo ira nga kokkofun na, ari laman tu ta peligro ta espiritual, nu ari, maski gapa ta patay.—Nep. 21:4.
9. Anni i ekspektan ni Jehova nga kuan na bisita na ira?
9 Talaga dakal nga pribilehio nga mabbalin tu bisita ta tolda ni Jehova. Awayya tam i mabbalin tu madukko nga kofun na nga magadde ta mannanayun. Anni nakuan gafu i kuattam nu kayà tam nga kanayun nga mabbalin tu bisita na? Nu nembitakka ta balay na tadday nga tolay, magga kayà mu nga ammuan i ekspektan na ta niko. Angngarigan na, baka ekspektan na tu alsammu i sapatu mu nige mu tullung. Magga kuammu yatun. Kayà tam gapa nga ammuan nu anni i ipakua ni Jehova tari ira ta maya nga tulu-tuloy nga mabbalin tu bisita ta tolda na. Megafu ta ayatattam si Jehova, kuattam i ngamin nga mawayya tam tapenu ‘kanayun nga makapagayayya ta Yafu.’ (Col. 1:10) Kurug gapa tu si Jehova ay kofuttam. Ngem yayya gapa i Dios anna Yama tam nga mepangngo ta pangirespeto tam. (Sal. 25:14) Ari tam nakuan vuluvuga kattaman yatun anna kanayun nakuan nga monag nga irespeto tam yayya. Makaduffun ta nittam i kunnatun nga monag nga pangirespeto tapenu malillitattam i annangngua nga ikalussona. Kanayun nga kayà tam nga “lumakag tu mepangngo” kavulu i Dios tam.—Mik. 6:8.
AWAN TU PANGIRERUMA NI JEHOVA TA ISRAELITA IRA
10-11. Kunnasi nga ipasingan na pattratu ni Jehova ta Israelita ira ta katanapan na Sinai nga awan tu pangireruma na?
10 Awan tu pangireruma ni Jehova ta pattratu na ta bisita na ira. (Roma 2:11) Masingattam yatun ta pinattratu na ta Israelita ira ta katanapan na Sinai.
11 Kabalin nga pinaliag ni Jehova i totolena ta pakka-aripan ta Ehipto, nanunno yayya tu papari nga masserbi ta tabernakulo. Neyawa ta Levita ira i annungan ira nga konektadu tatun nga masanto nga tolda. Mas nga sinangngallan kari ni Jehova danuri nasserbi ta tabernakulo onu danuri nakkampu aranni tatun anne ta tanakuan? Ari. Awan tu pangireruma ni Jehova.
12. Kunnasi nipasingan ni Jehova nga awan tu pangireruma na bilang Mamisita ta bagu nabuu nga nasion? (Exodo 40:38) (Innan gapa i letratu.)
12 Awayya na nga mabbalin tu madukko nga kofun ni Jehova i ngamin nga Israelita, masserbi man ira ta tabernakulo onu ari, anna aranni man ira ta tolda onu ari. Angngarigan na, siniguradu ni Jehova nga masingan na interu nasion i arigi nga kunam anna i arigi nga afi ta utun na tabernakulo. (Bibbigan i Exodo 40:38.) Oras tu magali i kunam, masingan yatun danuri na makkampu ta pinaka-arayyu ta tabernakulo. Tapus awayya da ngana i mangiprepara tu gamit da ira, diskalaban i tolda na familia da, anna manaw tapenu mevulu ta karuan paga nga Israelita. (Num. 9:15-23) Maginna gapa na ngamin i masiki-sikan nga pagguni na dua nga plata nga trumpeta nga mangipasingan tu mawag ngana nga magali i ngamin. (Num. 10:2) Manawag nga ipasingan natun nga ari tu megafu ta aranni ta tabernakulo i tadday nga Israelita ay mas madukko ngana i pakikkofun na kani Jehova. Awayya na nga mabbalin tu bisita ni Jehova i ngamin nga Israelita tatun nga bagu nga nabuu nga nasion anna malawa da ngamin i pangigiya anna proteksion na. Kunnatun gapa ta tiempo tam. Maski sitaw i paddianattam ta davvun, iddeddu ittam ni Jehova, tattangngallan na ittam, anna protektan na ittam.
Nipasingan na unnug na Dios para ta tabernakulo nga awan tu pangireruma na (Innan i parapo 12)
AWAN TU PANGIRERUMA NI JEHOVA TA TIEMPO TAM
13. Kunnasi ipasingan ni Jehova nga awan tu pangireruma na ta tiempo tam?
13 Maddian i karuan nga totolay na Dios sangawe aranni ta world headquarters onu ta branch office na Saksi ira ni Jehova. Tatun mismu paga lagu nga masserbi i karuan nira. Gafu tatun, makaduffun ira ta aru nga aktibidad nga mesimmu tatun nga lugar anna makavulu da mismu danuri mangirollu. Masserbi gapa i karuan bilang traveling overseer onu tanakuan paga nga klase na passerbi ta special full-time. Nu ari tu kunnatun i paddia-paddiammu sangawe, mepasiguradu ta niko nga iddeddukan na Mamisita ta nittam nga si Jehova i ngamin nga nembitan na nga bisita. Tattangngallan na i kada tadday ta nira. (1 Ped. 5:7) Pakanan ni Jehova ta espiritual i kada aripan na. Igigiya anna protektan na ira.
14. Kunnasi paga nipasingan ni Jehova nga awan tu pangireruma na bilang Mamisita?
14 Kunnasi paga nipasingan ni Jehova nga awan tu pangireruma na bilang Mamisita? Siniguradu na nga mabibbig na ngamin nga klase na totolay ta interu mundo i Biblia. I Masanto nga Katurakan ay orihinal nga netura taw nga tallu nga lengguahe: Hebreo, Aramaiko, anna Griego. Mas madukko kari kani Jehova danuri makabibbig tatun ira nga lengguahe anne turi ira ta ari nga makabibbig tatun? Ari.—Mat. 11:25.
15. Anni i mamakurug nga ari tu mangireruma si Jehova? (Innan gapa i letratu.)
15 Imbitan ittam ni Jehova nga mabbalin tu kokkofun na ari tu megafu ta atannang i binalittam onu nu mabibbig tam i orihinal ira nga lengguahe na Biblia. Iyawa ni Jehova i ka-uto na ta ngamin nga klase na totolay ta mundo, ari laman tu turi ira ta edukadu. Ne-translate ngana i Biblia ta rinivu nga lengguahe yayya nga mabenefisiowan i totolay ta interu mundo ta tuddu natun. Makannammuadda gapa nu kunnasi ira mabbalin tu kokkofun na.—2 Tim. 3:16, 17.
Ngatta pakurugan na ke-translate na Biblia ta rinivu nga lengguahe nga awan tu pangireruma ni Jehova? (Innan i parapo 15)
MATTALUPADDIAN NGA BISITA NI JEHOVA
16. Segun ta Kingngua 10:34, 35, anni i kuattam tapenu mattalupaddian ittam nga bisita ni Jehova?
16 Dakal nga pribilehio nga alawatan ittam ni Jehova bilang bisita ta tolda na. Yayya i pinakamasippo, pinakaminaggiddu, anna pinakaminammadulo nga Mamisita ta nittam. Fuera tatun, ari yayya nga mangireruma anna alawatan na ittam ngamin maski paga sitaw i diattam, naggafuattam, edukasion, lahi, tribu, edad, anna nu lalaki ittam man onu babay. Ngem danuri laman mattuppal ta nisa i alawatan na bilang bisita na.—Bibbigan i Kingngua 10:34, 35.
17. Anni i mepakanawag ta tumunug nga artikulo?
17 Niyavu yaw ira ni David: “O Jehova, sinni i puede nga mabbalin tu bisita ta toldam? Sinni i puede nga maddian ta masanto nga vukig mu?” (Salmo 15:1, NW) Tapus inusa ni Jehova si David tapenu tabbagan danatun nga pakkiavu ta tumunug ira nga versikulo na Salmo 15. Mepakanawag ta tumunug nga artikulo i karuan tatun nga ikikkiddaw ni Jehova tapenu mattalupaddian ittam nga bisita na.
KANSION 32 Si Jehova i Dayawan!
