ANG ỌJẸ́JẸ 23
EJE 28 Igu Oriri Bala iJihova
IJihova Wụrụụhị Nyọka Jwọọ Ụga
“[Ọdụ ọlẹ] kam ka kụ ka juwa balaa, m ka ri Ohe Oluhye nyaa.”—ISI. 37:27.
ẸHỊ NYA ẸLA
Ọ ka dahị ụbwọ kahị ka wo etu nyọka ju ụga ka ọdụ nya iJihova bala abwọlẹ kọ ka kpahị juhi lala Ayịdẹpwa nyahị ọlụwa.
1-2. Ịyẹ iJihova à tị́ wẹẹ wụrụ angị gbịgba họọ kpẹẹkpẹẹ kaka họ?
KORI ká ọngịnyị á tọng wo nyori iJihova tị́ ri owo ẹ-ẹga nyang? Ányị a tị́ ka ya? À ka wẹ myị́ nyori, ‘iJihova ri Adam, Ohe nyam, bala Oligu nyam.’ Ọhẹka à ka kụ irya nya omyi ẹla ịkịla ịlẹ ká ka jẹ́-ẹ kpa chabwọ nya iJihova ịnyịnyị myị́. Ma, à kaa kụ irya nyori iJihova ri Ayịdẹpwa nyang?
2 Adịrahụ iDevidi chụ igu oriri nya iJihova bala angịlẹ kịị gbịgba họọ kaka pwoku ịnya ayịdẹpwa bala angga nyamwụ. Ọ tọ wo yẹkẹẹ: “[IJihova] ee, oowo à tị́ ka jụ ka ube ịgọgọ nyang myị-ị̀? Oowo à tị́ ka nọ ẹpwa ị-ịSayọn ọgbọdọ ọlịgọgọ nyang myị-ị̀?” (Eje. 15:1) Bwu ẹpwụ nya omyi ẹla ịwẹ, ahị yẹ nyori ahị ka jẹ́-ẹ ju iJihova ụga lala aligu nyamwụ myị́. Ihi ọtụka à wẹ ká iJihova ya baahị lẹ!
IJIHOVA TỊTỌ KAHỊ KA RI ANGGA NYAMWỤ
3. Owo iJihova à tị́ wụrụ họhẹ ka ọdụ nyamwụ? Ányị ẹla nyaa ịwa angị imimiiye à tị́ la awụlẹ?
3 IJihova ji ụbwọọmwụ ene kọọ dọmwụ nyọka họ ang. Ọ họ Ọnyị nya ọgbanyẹ nyamwụ họhẹ-họhẹ. IJihova lala Ayịdẹpwa ọlẹ kọ wụrụ ọngga nyamwụ ọhọhẹ wẹ ẹpwa nyamwụ, ọ tị chị ọkẹkẹnị yẹẹyẹẹ nyọlẹ kọ họ ịnyị. ỊBayịbụụ ya nyori iJihova nyị chị “ọkẹkẹnị” ọọlajị nya Ọnyị nyamwụ. IJisọsị tị kaa chị “chị ọkẹkẹnị i-ijata [nya iJihova] ụka wuu ịnyịnyị.”—Etu 8:30.
4. Ángịkịla iyina iJihova à tị́ dọmwụ nyọka wụrụ wẹ ọdụ nyamwụ?
4 Ọọwa iJihova à ho alegu-ẹrụ ịkịla lẹlẹ. Ọ wụraa wẹ ka hụ tọọ ẹ-ẹpwụ nya ọdụ nyamwụ ịnyịnyị. ỊBayịbụụ chabwọ nya alegu-ẹrụ nyamwụ ịịwa lala anyị nya Ohe bala ọ-chabwọ nyaa nyori nyị kaa chị ọkẹkẹnị i-ijata nya iJihova. (Job. 38:7; Dan. 7:10) Lụka ọhẹ, angịlẹ kị juwa e-epwoohe ta Ohe kem à ri aligu nyamwụ lẹ. Nyọlẹ kọ nọ chẹẹ, ọ pyị ọdụ nyamwụ maa wu angịnyị ehe ọyị pwụ odehe. Angịhyẹ ịlẹ kị ri angga ịlịnyị ri Ịnọkụ, iNuwa, Ebiraham, bala iJobu. ỊBayịbụụ ya nyori angịwẹ nyị kaa “jẹdịyẹ ẹ-ẹpwụ nya ihi ojuju nya Ohe Oluhye” lee o-ri aligu nyamwụ.—Ọmwụ. 5:24; 6:9; Job. 29:4; Ayị. 41:8.
5. Ẹlịyẹ ahị tị́ ka jẹ́ bwu ọmwụ ọyẹyẹ ọla ụpwụ nya Isikẹlụ 37:26, 27?
5 Ẹ-ẹpwụ nya ẹka ohu ịmanyị tị́ kẹkpẹ, iJihova kịnyaa la ọ-wụrụ aligu nyamwụ ụga wẹ ẹga nyamwụ wẹẹ. (Wa Isikẹlụ 37:26, 27.) Ọ-chụ pwokwita, bwu ẹpwụ nya ọmwụ ọyẹyẹ nya Isikẹlụ ahị wẹ ka yẹ nyori Ohe tịtọ ká angịlẹ kị kaa gbịgba họọ yẹẹyẹẹ ka ri igu o-chii balọọ. Ọ myọnụ nyọka “nwa iro nya okpunyi taa.” Ọmwụ ọyẹyẹ ọọwa wẹẹ ya ẹla rụ ụka ọlẹ ká angịlẹ kị la ẹhị ọrịrịị-rịrị nyọka ka epwoohe bala angịlẹ kị la ẹhị ọrịrịị-rịrị nyọka hịhị odehe ka “yẹjula awụlẹ” ri ogu nya ịkpịlọ ookpokpo e-ekpeleji nya ọdụ nyamwụ. (Jọn. 10:16) Ụka ọọwa à tị lẹẹ ẹẹ!
OHE KAA KPAHỊ JUHỊ Ẹ-ẸGA MYỊ́ ẸGA KAHỊ JI
6. Ányị ọngịnyị à tị́ kaa bwu wẹ ka ri ọngga ọ-ọdụ nya iJihova? Ale ọdụ Nyanwụ ọọwa à tị́ ji?
6 Ẹ-ẹpwụ nya ịBayịbụụ, ọdụ ri ẹga ọlẹ ká ọngịnyị kaa mwịịnyọ bala o-ye ewu ọ-chịke hyi ang lala ẹnụ bala enyi ododo. Ọngga ọlẹ kọ jụ ka ọdụ nya ọngịnyị kaa ya ahị guru nyori ayịdẹpwa ka kpẹhị rịrọọ ụ-ụwa. Ụka kahị hu ịlọhị chịgọ ha iJihova, ahị kaa wẹ ka ri angga ẹ-ẹpwụ nya ọdụ nyamwụ. (Eje. 61:4) Ahị kaa ye ang oriri nya olegu ri yẹẹyẹẹ bala ọ-kaa yé aligu ịlẹ kị ri angga nya iJihova ịnyịnyị. Ma ọdụ ọlẹ kọ wẹẹ wụrụụhị ụga ka á juwa ụpa nya odehe ọhẹ datị ka. Ọhẹka à ka anyị ka ẹpwụma ọkịla, lee ọhẹka à ka ọjịra-jịra ọdatị ọhẹ kpụ a tọ aanahị ịkịla ịlẹ kị kaa chị ọkẹkẹnị nyọlẹ kị juwa ẹ-ẹpwụ nya ọdụ nya Ohe ịnyịnyị lẹ. Ẹga myị́ ẹga ọlẹ ká anchẹ nya iJihova ịlẹ kị kaa jwoo ihi á ji lẹ aalẹ, ọdụ nyamwụ juwa lẹ.—Ọwụ. 21:3.
7. Ịyẹ tị́ du kahị ka jẹ́-ẹ ya nyori angị la ọmyịmyị ịlẹ kị gbu lẹ ka jẹ́-ẹ ri angga ọ-ọdụ nya iJihova? (Yẹ ifoto ịnyịnyị.)
7 Angị họ kpakpa ịlẹ kị tị gbu lẹ bẹẹ? Ahị ka jẹ́-ẹ ya nyori ị ri angga ọ-ọdụ nya iJihova wẹẹ? Ee! Ịyẹ tị́ du kahị ka jẹ́-ẹ ya ịnyị? Chajị iJihova kpịtịya nya angịlịnyị yẹẹyẹẹ lala o-ri nyị juwa la ahị wẹẹ. IJisọsị wụlẹ yẹkẹẹ: “Owuleji bwula igu ji ịnyịlẹhị. Chajị iMosisi dọmwụ ya jehi ịnyị ẹ-ẹpwụ nya ụpwụ ọlẹ kọ da rụ́ ụka ọlẹ ká ila juwa wuru u-uhye nya okoji ochiche-ochiche chahị jwọọ. Ụ-ụwa, iMosisi wụrụ Ọngọlahị Ohe Oluhye yẹkẹẹ, ‘Ohe Oluhye nya Ebiraham bala Ohe Oluhye nya Ayịsiki bala Ohe Oluhye nya iJekọbụ.’ . . . Ohe Oluhye ayịdang á ri Ohe Oluhye nya egu ịlịpyị ka! Ma, Ohe Oluhye nya angịlẹ kị la ọhịhị ọpyịyọọ nya Ohe Oluhye ịnyị.”—Luk. 20:37, 38.
Ahị ka jẹ́-ẹ yẹ angị la ọmyịmyị ịlẹ kị dọmwụ gbu lẹ lala angị ri angga ọ-ọdụ nya Ohe (Yẹ ọgba 7)
APYOBWUNA ỊLẸ KAHỊ KA LA BALA ỤKỤRWỌ ỌLỤWA
8. Ányị angga nya iJihova à tị́ kaa yé apyobwuna bwula ọ-juwa ọ-ọdụ nyamwụ?
8 Jaabwọ ká ọdụ ọlam-ọlam kaa chewu ke ọngịnyị bwu ang lala ẹnụ bala enyi ododo, ịnyịnyị ọdụ nya iJihova à kaa chewu ke angga nyamwụ hi ịngịngịhyẹ ọlẹ kọ ka bịrị igu oriri nyaa bala iJihova, bala ọ-ya ahị ọdahile nya ijuju haa lẹ. Kori kahị rụ lụrụ hi iJihova ka aalẹ, Olegu Onyobyi á ka jẹ́-ẹ họ ịngịngịhyẹ ọlẹ kọ ka họhị ang gboyi myị́ oyi kaka. (Eje. 31:23; 1 Jọn. 3:8) Ẹ-ẹpwụ nya odehe onyeewe, iJihova ka kịnyaa la ọ-chewu ke aligu nyamwụ ịlẹ kị họ kpẹẹkpẹẹ bwu ang myị́ ang ọlẹ kọ ka bịrị igu oriri nyaa balọọ, ọ tị ka chewu kaa hi igu ịnyịnyị.—Ọwụ. 21:4.
9. Ányị iJihova à tị́ ya ahị guru ká angga nyamwụ ka kpa ịlaa?
9 Ọ ri ihi ọtụka hahị nyọka ri ọngga ọ-ọdụ nya iJihova—kahị ka ri igu o-chii balọọ pyịyọọ gboyi myị́ oyi. Ányị ahị tị́ ka kpa ịlọhị kori kahị tịtọ nyọka kịnyaa la o-ri ọngga ọ-ọdụ nyamwụ? Kori ká ọngịnyị á wụrụng wẹ ẹpwa nyamwụ, à ka tịtọ nyọka họ ẹla ọlẹ kọ ka kpọọ ịpyọ. Ọ-chụ pwokwita, ọhẹka ọ ka tịtọ ká ka pwọ egbatẹ nyang ene ká ka ju ka ẹpwụ nya ube, à tị ka họ ịnyị. Ụ-ụgbẹyị ọlịnyịnyị, ọ ka háahị nyọka jẹ́ ang ọlẹ ká iJihova tịtọ bwu ẹga nya angịlẹ kị tịtọ nyọka kịnyaa la o-ri angga ẹ-ẹpwụ nya ọdụ nyamwụ. Ọháha ọlẹ kahị la ẹ-ẹga nya iJihova dudu kahị kaa họ jaabwọ kahị ka họ myị́ nyọka “kpụ Ọngọlahị Ohe Oluhye ayịdang ịpyọ yẹẹyẹẹ.” (Kol. 1:10) Jaabwọ kahị tị wẹẹ yẹ iJihova lala Oligu nyahị, ahị ka kpịtịya ịnyịnyị nyori ọ ri Ohe nyahị bala Adahị, ọlẹ kọ chịla kahị ka ju ihi. (Eje. 25:14) Áhị ka deeri nya ẹlẹwẹ ẹnẹnẹhẹ ka, lẹ ahị ka jwoo ihi hiigu-hiigu. Ihi okpori-kpori ọọwa ka dahị ụbwọ nyọka cheji ba hi abwẹla ọlẹ kọ ka wọọ ẹjẹ. Ọ ka háahị nyọka ‘kpa ịlọhị keji dụmwọ ha Ohe Oluhye nyahị’ ụka wuu.—May. 6:8.
IJIHOVA Á YA OYE-OYE Ẹ-ẸGA NYA ALA ISIRẸLỤ KA
10-11. Ányị abwọlẹ ká iJihova kpa ala Isirẹlụ u-ugbileji nya iSayịnayị à tị́ mẹjẹ nyori ọ́ kaa yẹ oye-oye ka?
10 IJihova á kaa họ ẹla oye-oye ẹ-ẹga nya angga nyamwụ ka. (Rom. 2:11) Ahị ka jẹ́ ẹlẹwẹ bwu ụgbẹyị ọlẹ kọ kpa ala Isirẹlụ ụka kị juwa u-ugbileji nya ịSayịnayị.
11 Nyọlẹ ká iJihova gba angịnyị nyamwụ kpehe hi ọnyọhị o-riri ọla Ijipiti kpá, ọ chụ angịkiliya ịlẹ kị ka họ ụkụrwọ u-ube nya ọdụ. Ọ chụ ala iLivayị ịhyẹ nyọka la ụbwọ ẹ-ẹpwụ nya ụkụrwọ ịla ọdụ ọla ịgọgọ ọọwa ịnyịnyị. IJihova kaa kpahị ju angịlẹ kị kaa họ ụkụrwọ u-ube nya odu ọọwa bala angịlẹ kị nọ ẹpwa bọọba gụ́ angịkịla? Ehe! IJihova á kaa yẹ oye-oye ka.
12. Ányị iJihova à tị́ mẹjẹ nyori o ri Ayịdẹpwa ọlẹ kọ kaa yẹ oye-oye ka ẹ-ẹga nya ala Isirẹlụ ụka kọ yaa ri ẹpwụma onyeewe (Ehe Ọkpụkpụ 40:38) (Yẹ ifoto ịnyịnyị.)
12 Ọng myị́ ọng lẹpwụ nyaa la iwe memeeme nyọka ri igu bala iJihova kori kị kaa họ ụkụrwọ ẹ-ẹga nya ọdụ lee ị́ kaa họ ka, tụ angịlẹ ká ẹpwa nyaa ji bọọ ba lee o-ji lụrụ. Ọ-chụ pwokwita, iJihova họ kpụ ẹpwụma lẹpwụ-lẹpwụ jẹ́-ẹ yẹ egbamwụ bala ila ọla ẹbyẹbyị ọlẹ kọ kaa hu rịrị u-uhye nya ọdụ. (Wa Ehe Ọkpụkpụ 40:38.) Ụka ká egbamwụ ọọwa á dọmwụ nya ẹdịyẹ nya ẹga onyeewe, angịlẹ kị dọmwụ ji lụrụ hi ọdụ gụ́ wuu jẹ́-ẹ yọọ kpụ ị kaa ju olo nyaa, wụ adaa nyaa, bala ọ-bajẹ bala angịkịla ịla ẹpwụma rụ. (Ọwa. 9:15-23) Ịwa wuu jẹ́-ẹ wo anụ nya ẹkụrẹ ọdatị ọlẹ kị kaa chị gboo nyọka mẹjẹ ọng myị́ ọng nyori ị baba nyọka wuleji ẹdịyẹ lẹ. (Ọwa. 10:2) Ọ la gede-gede nyori ọngịnyị ọ-kụ ẹpwa ba ọdụ ba á mẹjẹ nyori ọngọọwa ri igu o-chii ta iJihova gụ́ angịkịla ka. Ọkọkọ nya ọọwa, ọng myị́ ọng ọlẹ kọ juwa ẹ-ẹpwụma ọlẹ ká iJihova ya yeji onyeewe wẹ ka jẹ́-ẹ ri ọngga nyamwụ bala ọ-jẹ́ myị̀myị̀ nyori Ohe wẹẹ kpaa ụgbẹyị bala ọ-kpẹhị rịraa. Ịnyịnyị alẹ, ẹga myị́ ẹga kahị kụ, iJihova kaa la ọháha ẹ-ẹga nyahị, kpẹhị rịrịịhị bala ọ-chewu keehi.
Nyọlẹ ká iJihova ya ọdụ rịrị a-arịrị nya ala Isirẹlụ mẹjẹ nyori ọ́ kaa yẹ oye-oye ka (Yẹ ọgba 12)
IJIHOVA Á KAA YẸ OYE-OYE KA DAALẸ
13. Ịyẹ tị́ du kahị ka jẹ́-ẹ ya nyori iJihova á kaa yẹ oye-oye ka daalẹ wẹẹ?
13 Anchẹ nya Ohe ịhyẹ alẹ kụ ba egbeju ẹpwa nyahị ọla odehe wuu ba lee egbeju ẹpwa nya Alibeenu nya iJihova ịkịla ịlẹ kị ji ẹpwụma ịdatị-datị. Angịkịla dọmwụ kaa họ ụkụrwọ ụ-ụwa kpangga. Ọọwa du ká angịlịnyị kaa la ụbwọ ẹ-ẹpwụ nya akụrwọ ịlẹ kị kaa họ ụ-ụwa bala ọ-jẹ́-ẹ yẹjula angịlẹ kị kaa kpa ịlahị. Angịkịla kaa họ ụkụrwọ nya ọjịra-jịra ọ-wụla yẹ lee ọ-kpa ụka nyaa họ ụkụrwọ nya iJihova a-agbẹyị ịkịla. Kori ká ri ọngọhẹ ẹ-epwụ nya iru nya angịlẹ kị la iwe ọlịịwẹ lẹẹlẹẹ ka aalẹ, jẹ́ myị̀myị̀ nyori Ayịdẹpwa nyahị, ko ri iJihova, la ọháha ẹ-ẹga nya angịlẹ wuu kị ri angga ẹ-ẹpwa nyamwụ. Ọ kaa kpẹhị rịrị ọngọngọọng nyahị wuu. (1 Pit. 5:7) Anchẹ nya Ohe ọnyị myị́ ọnyị kaa ye ang ọrịrị nya olegu, ọ tị kaa kpahị jwaa bala ọ-chewụ kaa ịnyịnyị.
14. Ụgbẹyị ọkịla oyina iJihova à tị́ mẹjẹ nyori ọ ri Ayịdẹpwa ọlẹ kọ kaa yẹ oye-oye ka?
14 Ang ọkịla ọlẹ kọ mẹjẹ nyori iJihova Ayịdẹpwa nyahị á kaa yẹ oye-oye ka ri ọlẹ kọ họ ká ịBayịbụụ ji ha angịnyị chị odehe ọnụ wuu alẹ. Ìja ịta kem ị kpa da ụpwụ ịgọgọ ene-ene lẹ. Ìja ịịwa ri: Hebrew, Aramaic, bala Greek. Angịlẹ kị jẹ́-ẹ wa ụpwụ la ìja ịlẹ kị kpa da ịBayịbụụ nya ọgbanyẹ ri igu o-chii ta iJihova gụ́ angịlẹ kị jẹ́-ẹ wa ka? Ehe, ọ́ lịnyị ka.—Mat. 11:25.
15. Ang-ẹjẹẹ oyina à tị́ mẹjẹ nyori iJihova á kaa yẹ oye-oye ka? (Yẹ ifoto ịnyịnyị.)
15 IJihova ọ-ka yehi myị á kpụnịrọ ụpwụ ọjẹ́jẹ nyahị lee ìja ịlẹ kahị wo ka. Ọkọkọ ká iJihova ka ya ẹla ọjẹ́jẹ nyamwụ ha angịlẹ kị jẹ́ ụpwụ lụmẹ kem lẹ, ọ họ kọ ka ji ha angịnyị odehe wuu, kori kị jẹ́ ụpwụ lee ị́ jé ka. Ị yẹ ịBayịbụụ, kọ ri Omyi Ẹla nyamwụ, da ka ìja ụnọ ịmanyị tị́; ọọwa tị du ká angịnyị ịla odehe wuu ka jẹ́-ẹ yé apyobwuna bwu ẹla ọmẹjẹ ọlụwa bala ọ-jẹ́ jaabwọ kị ka bwu ri aligu nyamwụ.—2 Tim. 3:16, 17.
Ányị ọlẹ kị yẹ ịBayịbụụ da ka ìja lụmẹ-lụmẹ à tị́ mẹjẹ nyori Ohe á kaa yẹ oye-oye ka? (Yẹ ọgba 15)
HỌ KÁ IJIHOVA KA ‘YENG MYỊ’ KỊNYAA
16. Jaabwọ ká ụpwụ nya Ụkụrwọ nya Alẹrụ 10:34, 35 ya, ịyẹ ahị tị́ ka họ ká iJihova ka yehị myị kịnyaa?
16 O ri ihi ọtụka hahị nya iJihova ọ-ka dahị ọwụraba lala angga wẹ ọdụ nyamwụ. Ọwa à ri Ayịdẹpwa ọlọnahị ọlẹ kọ la ọháha, bala ọ-kaa họ ụga gụ́ wuu ẹẹ. Da ọọwa u-uhye, ọ́ kaa yẹ oye-oye ka. Ọ wụrụ ọng myị́ ọng nyahị wuu nanana nyori ẹga ọlẹ kahị kụ, ẹga ọlẹ kahị bwu, ụpwụ ọjẹ́jẹ nyahị, ẹka nyahị datị-datị bala o-ri angịhyẹ nyahị ri alẹng angịkịla ri anyang. Ma, angịlẹ kị ju ihi nyamwụ kem ọ kaa ye myị lala angga nyamwụ lẹ.—Wa Ụkụrwọ nya Alẹrụ 10:34, 35.
17. Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?
17 Jaabwọ kị da ju ụ-ụpwụ nya Eje Ọnyịịla 15:1, iDevidi tọ ịtọ ẹla yẹkẹẹ: “Oowo à tị́ ka jụ ka ube ịgọgọ nyang myị-ị̀? Oowo à tị́ ka nọ ẹpwa ị-ịSayọn ọgbọdọ ọlịgọgọ nyang myị-ị́?” IJihova tị kpa iDevidi wẹ ịtọ ẹla ịwẹ ịnyịnyị. Ang ọjẹ́jẹ ọkịla ka ya ẹla u-uhye nya ang ịlẹ kahị ka họ kpangga ká iJihova ka jẹ́-ẹ yehi myị kịnyaa.
EJE 32 Take Sides With Jehovah!
