KĨLUNGU KYA KWĨMANYĨSYA KYA 23
WATHI 28 Kwĩthwa Anyanya ma Yeova
Yeova Nũtũthoketye Twĩthĩwe Aeni Make
“Wĩkalo wakwa ũkeethĩwa vamwe nao; na ngeethĩwa Ngai woo.”—ESEK. 37:27.
KĨLA KĨNEENEWE
Nĩtũũtetheewʼa kũelewa kĩla kyonanawʼa nĩ kwĩthĩwa twĩ aeni ĩeemanĩ ya Yeova ya ngelekanyʼo na ũndũ ũtũsũvĩaa nũndũ nĩwe ũtũthoketye.
1-2. Yeova athoketye athaithi make aĩkĩĩku va?
MŨNDŨ akaũkũlya-ĩ, ‘Ũmwonaa ata Yeova?’ We ũtonya kũmũsũngĩa ata? No wasye, ‘Yeova nĩ Ĩthe wakwa, Ngai wakwa, na Mũnyanyawa.’ O na ve masyĩtwa angĩ ma ũnene ũtonya kũmwĩta. Ĩndĩ o na ũu wĩ o vo, we nĩwonaa ta we ũkũthoketye ĩeemanĩ yake?
2 Mũsumbĩ Ndaviti aelekanilye ũnyanya ũla wĩthĩawa vo katĩ wa Yeova na athaithi make aĩkĩĩku na ũnyanya ũla wĩthĩawa katĩ wa aeni na ũla ũmathoketye. Akũlilye: “Yeova, nũũ ũla wĩĩkalaa wĩkalonĩ [kana, “ĩeemanĩ,” NWT] waku? Nũũ ũla wĩtũaa kĩĩmanĩ kyaku kĩla kĩtheu?” (Sav. 15:1) Mũsoa ũsu wĩtũmanyĩsya kana no twĩthĩwe twĩ aeni ĩeemanĩ ya Yeova, na ũu nĩ kwasya, no tũtwʼĩke anyanyae. Mwa kĩu nĩ kĩanda kya mwanya ta kĩ!
YEOVA NĨWENDAA TWĨTHĨWE TWĨ AENI MAKE
3. Mũeni wa mbee wa Yeova aĩ ũũ, na e na mũeni wake meewie ata?
3 Yeova atanambĩĩa wĩa wa wũmbi, aĩ weka. Ĩndĩ nĩwesie kũmba Mwana wake wa mbee na amũthokya ĩeemanĩ yake ya ngelekanyʼo. Yeova nĩwatanĩie mũno kũthokya mũeni ũsu wake wa mbee. Mbivilia yaĩtye kana Yeova ‘nĩwatanaa’ nũndũ wa Mwana wake, kana kwa ndeto ingĩ, nĩwamwendete. O nake Mwana wake ‘nĩwatanaa mavinda onthe mbee [wa Yeova].ʼ—Nth. 8:30.
4. Naaũ angĩ Yeova wathokisye ĩeemanĩ yake?
4 Yeova nĩwasyokie oomba alaĩka na amathokya o namo methĩwe aeni make. Mbivilia yĩtĩte alaĩka ‘ana ma Ngai’ na ĩkasya kana nĩmatanĩaa kwĩthĩwa vamwe nake. (Yovu 38:7; Nda. 7:10) Kwa myaka mingĩ, aeni ma Yeova maĩ o ala mekalaa nake ĩtunĩ. Ĩtina, nĩwesie kũmba andũ, na o namo amanenga mwanya matwʼĩke aeni make. Amwe mesie kũtwʼĩka aeni make maĩ Enoko, Noa, Avalaamu, na Yovu. Mbivilia yĩtĩte athaithi asu aĩkĩĩku anyanya ma Ngai, kana ala ‘maendanasya na Ngai.’—Mwa. 5:24; 6:9; Yovu 29:4; Isa. 41:8.
5. Wathani ũla wĩ Esekieli 37:26, 27 ũtonya kũtũmanyĩsya kyaũ?
5 Kwa myaka mingĩ, Yeova nĩwĩthĩĩtwe aithokya anyanyae matwʼĩke aeni make. (Soma Esekieli 37:26, 27.) Kwa ngelekanyʼo, wathaninĩ wa Esekieli, nĩtwĩmanyĩasya kana kwa wʼo Ngai nĩwendaa athaithi make aĩkĩĩku methĩwe na ngwatanĩo nzeo nake. Nĩwathanĩte kũtianĩa “ũtianĩo wa mũuo nao.” Wathani ũsu ũneeneete ĩvinda yĩla ala me na wĩkwatyo wa kũthi ĩtunĩ na ala me na wĩkwatyo wa kwĩkala ĩũlũ wa nthĩ makethĩwa me ngwatanĩo ungu wa ĩeema yake ya ngelekanyʼo me “ĩĩthya yĩmwe.” (Yoa. 10:16) Na yu tũũneena, ũndũ ũsu nũendeee kwĩkĩka!
NGAI NŨTŨSŨVĨAA, O NA TWĨTHĨWE TWĨKALAA VA
6. Mũndũ atwʼĩkaa mũeni ĩeemanĩ ya Yeova ata, na ĩeema yĩu yĩthĩawa va?
6 Ĩvindanĩ ya tene, mũndũ aĩ atonya kũthyũmũa ĩeemanĩ na aisianĩwa na syĩndũ ta mbua na syũa. Ũla wathokya mũeni ĩeemanĩ yake nĩwe waaĩle kũmũsũvĩa. Yĩla tweeyumya tũmũthũkũme Yeova, tũtwʼĩkaa aeni ĩeemanĩ yake ya ngelekanyʼo. (Sav. 61:4) Twĩthĩawa na lĩu mwingĩ wa kĩ-veva na nĩtũtanĩaa kwĩthĩwa twĩ anyanya ma ala matwʼĩkĩte aeni ĩeemanĩ yake. Ĩeema yĩu yĩyĩthĩawa vandũ vana. Nĩvatonyeka ũkethĩwa ũendete nthĩ ĩngĩ kwondũ wa ũmbano mũnene wa mwanya, na ũkakomana na angĩ matanĩaa kwĩthĩwa ĩeemanĩ ya Ngai. Ĩeema yĩu no yĩkwatĩkane vandũ o na va vala athũkũmi ma Yeova matonya kwĩthĩwa maĩ.—Ũvu. 21:3.
7. Twĩsĩ ata kana athũkũmi ma Yeova ala makwie me aĩkĩĩku methĩawa me o aeni ĩeemanĩ yake? (O na ĩngĩ, sisya visa.)
7 Nao nata athũkũmi aĩkĩĩku ma Yeova ala makwie? No twasye tũte na nzika kana methĩawa me o aeni ĩeemanĩ yake? Ĩĩ! Nĩkĩ tũkwasya ũu? Nũndũ methĩawa kĩlilikanonĩ kya Yeova. Yesũ aisye: “Ĩũlũ wa ũthayũũkyo wa akwʼũ, o na Mose nĩwawetie ũndũ ũsu nthĩnĩ wa ũvoo ĩũlũ wa kala kakuthu ke mĩwʼa, yĩla wamwĩtie Yeova ‘Ngai wa Avalaamu, na Ngai wa Isaka, na Ngai wa Yakovo.’ We ti Ngai wa ala akwʼũ, ĩndĩ wa ala me thayũ, nũndũ onthe kwake me thayũ.”—Luka 20:37, 38.
O na athaithi ma Yeova ala makwie me aĩkĩĩku no matalwe ta methĩawa aeni ĩeemanĩ yake (Sisya kalungu ka 7)
MOATHIMO ALA TŨKWATAA NA KĨLA TWAĨLE KWĨKA
8. Tũkwataa moathimo meva nũndũ wa kwĩthĩwa twĩ aeni ĩeemanĩ ya Yeova?
8 O tondũ mũndũ wĩthĩawa atonya kũthyũmũa ĩeemanĩ na aisianĩwa na syĩndũ ta mbua na syũa, ũu nowʼo ĩeema ya Yeova yĩsũvĩaa aeni make maikanange ngwatanĩo yoo nake na yĩimanenga wĩkwatyo wa ĩvinda yũkĩte. Yĩla twamũthengeea Yeova, vai kĩndũ Satani wĩsa kũtwĩka akatũũmĩsya tene na tene. (Sav. 31:23; 1 Yoa. 3:8) O na ĩvinda yũkĩte, akaendeea kũsũvĩa anyanyae maikanange ngwatanĩo yoo nake, na eka ũu, maikakwatwa nĩ kĩkwʼũ.—Ũvu. 21:4.
9. Yeova endaa aeni make meke ata?
9 Kwa wʼo, nĩ kĩanda kya mwanya kwĩthĩwa twĩ aeni ĩeemanĩ ya Yeova nũndũ kĩu kĩtumaa tũtanĩa ngwatanĩo nzeo nake tene na tene. Ĩndĩ twaĩlĩte kwĩka ata ethĩwa nĩtũkwenda kũendeea kwĩthĩwa twĩ aeni make? Yĩla mũndũ waũthokya kwake, no wende kũmanya kĩla ũkwenda wĩke nĩ kana ũmũtanĩthye. Kwa ngelekanyʼo, no ende umye iatũ ũtambĩte kũlika nyũmba, na no wĩke ũu ũteũlasimĩthwʼa. O naitũ no twende kũmanya kĩla Yeova wendaa twĩke nĩ kana tũendeee kwĩthĩwa twĩ aeni ĩeemanĩ yake. Kũmwenda Yeova nĩkwʼo kũtumaa twĩka kyonthe kĩla tũtonya nĩ kana ‘tũmwendeesye vyũ.’ (Ako. 1:10) Nĩ wʼo kana Yeova nĩ Mũnyanya witũ, ĩndĩ nĩtwaĩle kũmanya kana we nĩ Ngai witũ na Ĩthe witũ, na kwoou nĩtwaĩle kũmũnenga ndaĩa. (Sav. 25:14) Tũyaĩlĩte kũlwa nĩ kĩu na kĩla ĩvinda nĩtwaĩlĩte kũmũnengae ndaĩa nene mũno. Kwĩka ũu no kũtũtetheesye twĩvathane na mwĩkalĩle ũla ũtonya kũmũthatya. Mavinda onthe twĩenda “kũendanasya” na Ngai witũ.—Mika 6:8.
ŨNDŨ YEOVA WOONANISYE NDE KYENDE YĨLA AISILAELI MAĨ WEŨNĨ
10-11. Yĩla Aisilaeli maĩ weũnĩ wa Sinai, Yeova oonanisye ata kana nde kyende?
10 Yeova akuaa aeni make onthe ũndũ ũmwe ate na kyende. (Alo. 2:11) No tũelewe ũndũ ũsu nesa twasũanĩa ũndũ wakuie Aisilaeli yĩla maĩ weũnĩ wa Sinai.
11 Ĩtina wa Yeova kwovosya andũ make kuma ũkombonĩ Misili, nĩwanyuvie athembi mathũkũmae ĩeemanĩ ya kũmbanĩa. O na nĩwanengie Alivai mawĩa angĩ ma kũtethya ĩeemanĩ yĩu. Ĩndĩ we nĩwasũvĩaa mũnango ala mathũkũmaa ĩeemanĩ ya kũmbanĩa kana ala mekalaa vakuvĩ nayo kwĩ Aisilaeli ala angĩ? Aiee! Yeova nde kyende.
12. Nĩ maũndũ meva meũtũtetheesya kũmanya kana Yeova nde kyende twasũanĩa ũndũ wakuie Aisilaeli me weũnĩ? (Kuma 40:38) (O na ĩngĩ, sisya visa.)
12 Mũisilaeli o na wĩva aĩ atonya kũtwʼĩka mũnyanya wa Yeova, o na ethĩwa ndathũkũmaa ĩeemanĩ ya kũmbanĩa kana ndekalaa vakuvĩ nayo. Kwa ngelekanyʼo, nĩwaĩkĩĩthisye kana mbaĩ yonthe yaĩ ĩtonya kwona kĩla kĩtuĩ kya mũumbĩ na kya mwaki, kĩla kyeethĩawa ĩũlũ wa ĩeema ya kũmbanĩa. (Soma Kuma 40:38.) Yĩla kĩtuĩ kya mũumbĩ kyambĩĩa kũthi ngalĩko ĩngĩ, o na ala mekalaa vaasa vyũ na ĩeema yĩu maĩ matonya kũkyona, na mayambĩĩa kwova mĩio yoo, kwomboanga maema, na ĩndĩ mayumalũkanyʼa na andũ ala angĩ. (Mot. 9:15-23) Eka ũu, kĩla mũndũ aĩ atonya kwĩwʼa wasya mũnene wa masoo elĩ ma vetha ala moonanasya kana andũ onthe yu maĩlĩte kwambĩĩa kyalo. (Mot. 10:2) Kwa wʼo, kwĩthĩwa mũndũ ekalaa vakuvĩ na ĩeema ya kũmbanĩa kũyoonanasya kana e na ngwatanĩo nzeango na Yeova kwĩ ala mekalaa vaasa. Kĩvathũkanyʼo na ũu, kĩla Mũisilaeli aĩ atonya kũtwʼĩka mũnyanya wa Yeova na ayĩthĩwa ate na nzika kana nũkũmũtongoesya na nũkũmũsũvĩa. O ta ũu, Yeova nũtwendete, nũtũthĩnĩkĩaa, na nũtũsũvĩaa o na twĩthĩwe twĩkalaa va.
Ĩeema ya kũmbanĩa yĩla yeethĩawa katĩkatĩ wa kambi yaĩ ũĩkĩĩthyo wa kana Yeova nde kyende (Sisya kalungu ka 12)
O NA ŨMŨNTHĨ, YEOVA NDE KYENDE
13. Nĩ ũndũ wĩva Yeova wĩkaa akonanyʼa kana o na ũmũnthĩ nde kyende?
13 Athaithi amwe ma Ngai ũmũnthĩ mekalaa vakuvĩ na ovisi ũla mũnene wa Ngũsĩ sya Yeova kana ovisi wa ũvonge. O na angĩ mathũkũmaa kũu. Nũndũ wa ũu, methĩawa matonya kũtethya mawĩa maingĩ kũu na maivulana na ala methĩawa matongoesye. Angĩ namo methĩawa me asyaĩĩsya ma mũthyũlũlũko kana me na ianda ingĩ ũthũkũminĩ wa mwanya wa ĩvinda yonthe. O na ethĩwa kwa oyu ndwĩ na ianda ta isu, ndũkethĩwe na nzika kana wĩ mũeni wa Yeova, nake nĩwendete aeni make onthe. Na nũthĩnĩkĩaa kĩla ũmwe nesa vyũ. (1 Vet. 5:7) Ngai nũnengae athũkũmi make onthe lĩu wa kĩ-veva, akamatongoesya, na akamasũvĩa.
14. Nĩ ũndũ ũngĩ wĩva Yeova wĩkĩte akonanyʼa kana nde kyende?
14 Ngelekanyʼo ĩngĩ ĩkwonanyʼa kana Yeova nde kyende nĩ kana nũĩkĩĩthĩtye andũ onthe ĩũlũ wa nthĩ no makwate Mbivilia. Mbeenĩ, Maandĩko Matheu maandĩkĩtwe na ithyomo ii itatũ; Kĩevelania, Kĩalamu, na Kĩkiliki. Ĩndĩ yo no ala matonya kũsoma ithyomo ila Mbivilia yaandĩkiwe nasyo me na ngwatanĩo nzeango na Yeova kwĩ ala matatonya kũisoma? Aiee.—Mt. 11:25.
15. Nĩ kyaũ kĩtũĩkĩĩthasya kana Yeova nde kyende? (O na ĩngĩ, sisya visa.)
15 Yeova ndathokasya ala asomu kana ala mesĩ ithyomo ila Mbivilia yaandĩkiwe nasyo me oka matwʼĩke anyanyae. Kĩla mũndũ ĩũlũ wa nthĩ no akwate ũĩ wa Yeova o na ethĩwa ti mũsomu. Ndeto yake, Mbivilia, nĩalyũlĩtwe kwa ithyomo ngili mbingĩ, na kwoou andũ onthe ĩũlũ wa nthĩ no matetheke nĩ momanyĩsyo mayo na mayĩmanyĩsya ũndũ matonya kũtwʼĩka anyanyae.—2 Tim. 3:16, 17.
Kwona Mbivilia ĩalyũlĩtwe kwa ithyomo mbingĩ ũmũnthĩ kwonanasya ata kana Yeova nde kyende? (Sisya kalungu ka 15)
ENDEEA ‘KWĨTĨKĨLWAʼ NĨ YEOVA
16. Kwosana na Meko ma Atũmwa 10:34, 35, tũtonya kwĩka ata tũendeee kwĩtĩkĩlwa nĩ Yeova?
16 Nĩ kĩanda kya mwanya kwĩthĩwa tũthoketwʼe nĩ Yeova twĩthĩwe twĩ aeni ĩeemanĩ yake ya ngelekanyʼo. We nĩ mũseo vyũ, e wendo mwingĩ, na nĩwe Mũthokanyʼa ũla mũlau vyũ. O na ĩngĩ, nde kyende nũndũ atũthoketye ithyonthe o na twĩthĩwe twĩ aũme kana twĩ aka, twĩkalaa va, tumĩte va, tũsomete mũno wĩana ata, twĩ ma ũko, mbaĩ, kana ĩika yĩva. Ĩndĩ ala mamwĩwʼaa me oka nomo ũmathokasya methĩwe aeni make.—Soma Meko ma Atũmwa 10:34, 35.
17. Twĩneenea kyaũ ĩsomonĩ yĩla yĩatĩĩe?
17 O tondũ ĩandĩko ya Savuli 15:1 yonanĩtye, Ndaviti akũlilye: “Yeova, nũũ ũla wĩĩkalaa wĩkalonĩ waku? Nũũ ũla wĩtũaa kĩĩmanĩ kyaku kĩla kĩtheu?” Mũandĩki wa Savuli ĩsu nĩwaveveeiwe kũsũngĩa makũlyo asu. Ĩsomo yĩla yĩatĩĩe nĩyĩũneenea maũndũ amwe tũtonya kwĩka nĩ kana tũmwendeesye Yeova na tũiendeea kwĩthĩwa twĩ anyanyae.
WATHI 32 Ĩthĩwa Ngalĩ ya Yeova!
