23-زەرتتەۋ ماقالاسى
28-ٵن ەحوبانىڭ دوسى بولايىق
ەحوبا ٴبىزدى قوناق ەتكىسى كەلەدى
«مەنىڭ كيەلى شاتىرىم سولاردىڭ ۇستىندە بولىپ، ٶزىم ولاردىڭ قۇدايى... بولامىن» (ەزەك. 37:27).
نەگىزگى وي
ەحوبانىڭ بەينەلى شاتىرىندا قوناق بولۋدىڭ نە ەكەنىن تۇسىنەمىز جانە ەحوبا ٶز قوناقتارىن قالاي قامقورلايتىنىن كورەمىز.
1، 2. ەحوبا ٶزىنىڭ ادال قىزمەتشىلەرىن قانداي مارتەبەگە بولەگەن؟
«ەحوبا سەن ٷشىن كىم؟» دەسە، نە دەپ جاۋاپ بەرەر ەدىڭىز؟ بالكىم، «ەحوبا مەنىڭ — اكەم، قۇدايىم، دوسىم» دەرسىز. يا بولماسا قۇدايدىڭ باسقا دا لاۋازىمدارى ويىڭىزعا كەلەر. ال ەحوبانى قوناقجاي قۇداي دەپ اتاعان كەزىڭىز بولعان با؟
2 ٴداۋىت پاتشا ەحوبامەن دوس بولۋدى ونىڭ شاتىرىنا قوناققا بارۋمەن سالىستىرعان. ول: «ۋا، ەحوبا، سەنىڭ شاتىرىڭدا كىم قوناق بولا الادى؟ كيەلى تاۋىڭدا كىمنىڭ تۇرۋىنا بولادى؟»— دەگەن (ٴزاب. 15:1). بۇل تارماقتان ٴبىز ەحوبانىڭ قوناعى، ياعني دوسى بولا الاتىنىمىزدى بىلەمىز. ەحوبانىڭ قوناعى بولۋ زور مارتەبە ەمەس پە؟!
ەحوبا ٴبىزدى ٶز شاتىرىندا قوناق ەتكىسى كەلەدى
3. ەحوبانىڭ العاشقى قوناعى كىم جانە ەكەۋى دە قانداي سەزىمدە بولعان؟
3 ەشتەڭە جاراتپاس بۇرىن، ەحوبا جالعىز بولعان. ٴبىراق كۇندەردىڭ كۇنىندە تۇڭعىش ۇلىن جاراتىپ، ونى بەينەلى شاتىرىنا قوناققا شاقىردى. وسىلاي ەحوبا العاش رەت قوناقجايلىلىق تانىتتى. كيەلى كىتاپتا ەحوبا ٶزىنىڭ العاشقى قوناعىنا «كۇن سايىن... قۋانعانى» ايتىلعان، ۇلى دا ونىڭ الدىندا «ٵردايىم شاتتانىپ جۇرگەن» (ناق. س. 8:30).
4. ەحوبا ٶزىنىڭ شاتىرىنا تاعى كىمدەردى قوناققا شاقىردى؟
4 كەيىن ەحوبا باسقا دا رۋحاني جاراتىلىستاردى جاراتىپ، ولاردى دا ٶز شاتىرىنا قوناققا شاقىردى. كيەلى كىتاپتا ايتىلعانداي، سول پەرىشتەلەر «قۇداي ۇلدارى» دەپ اتالعان جانە ولار قۇدايدىڭ قاسىندا شاتتانىپ جۇرگەن (ٵيۇپ 38:7؛ دان. 7:10). باستاپقىدا ەحوبا كوكتەگى جاراتىلىستارىمەن عانا شەكتەلدى. كەيىن ول جەردەگى ادامداردى دا ٶزىنىڭ شاتىرىنا قوناققا شاقىرا باستادى. مىسالى، ولاردىڭ كەيبىرى — ەنوح، نۇح، ىبىرايىم جانە ٵيۇپ. بۇل ادال كىسىلەر قۇدايدىڭ دوستارى دەپ اتالعان، ٵرى ولار «قۇداي جولىمەن جۇرگەن» (مۇس. 1-ج. 5:24؛ 6:9؛ ٵيۇپ 29:4؛ يشايا 41:8).
5. ەزەكيەل 37:26، 27 دە جازىلعان پايعامبارلىقتان نە بىلەمىز؟
5 عاسىرلار بويى ەحوبا دوستارىن ٶز شاتىرىنا قوناققا شاقىرىپ كەلەدى (ەزەكيەل 37:26، 27 وقىڭىز). مىسالى، ەزەكيەل پايعامباردىڭ سوزىنە قاراساق، ەحوبا ادال قىزمەتشىلەرىمەن تىعىز قارىم-قاتىناستا بولعىسى كەلەتىنىن كورەمىز. ەحوبا «ولارمەن تاتۋلىق كەلىسىمىن جاساسامىن» دەپ ۋادە ەتكەن. بۇل پايعامبارلىق كوكتە جانە جەردە ٶمىر سۇرۋگە ۇمىتتەنەتىندەر ٴبىر شاتىردىڭ استىنا بىرىگىپ، «ٴبىر وتارداي» بولاتىنىنا نۇسقايدى (جوح. 10:16). بۇل پايعامبارلىق ٴدال قازىر ورىندالىپ جاتىر!
قۇداي ٴبىزدى، قايدا بولساق تا، قامقورلايدى
6. ادام قاي كەزدە ەحوبانىڭ قوناعى بولادى جانە ەحوبانىڭ شاتىرى قاي جەردە ورنالاسقان؟
6 كيەلى كىتاپ زامانىندا شاتىر ادامدار دەمالاتىن جەر جانە قولايسىز اۋا رايىنان قورعايتىن پانا بولعان. شاتىرعا كەلگەن قوناقتىڭ بار جاعدايى جاسالاتىن. ٴبىز ەحوباعا باعىشتالعان كەزدە، ونىڭ بەينەلى شاتىرىندا قوناق بولامىز (ٴزاب. 61:4). ٴبىز ول جەردە رۋحاني مول داستارقاننان تاماقتانىپ، ەحوبانىڭ وزگە دە قوناقتارىمەن ارقا-جارقا بولىپ ارالاسامىز. ەحوبانىڭ شاتىرى ناقتى ٴبىر جەرگە بايلانباعان. ٴتىپتى باسقا ەلگە، مىسالى ارنايى كونگرەسكە بارساق تا، ەحوبانىڭ وزگە قىزمەتشىلەرىمەن بىرگە ونىڭ شاتىرىنىڭ استىندا بولامىز. ويتكەنى ەحوبانىڭ مويىنسۇنعىش قىزمەتشىلەرى بار جەردىڭ بارىندە ونىڭ شاتىرى دا بار (ايان 21:3).
7. قايتىس بولعان جاندار نەگە ەحوبانىڭ شاتىرىندا قوناق بولىپ قالا بەرەدى دەي الامىز؟ (سۋرەتتى دە قاراڭىز.)
7 ال ەحوبانىڭ قايتىس بولعان ادال قىزمەتشىلەرى جايلى نە دەۋگە بولادى؟ ولار ەحوبانىڭ شاتىرىندا قوناق بولىپ قالا بەرەدى دەي الامىز با؟ ارينە! ويتكەنى ولار ەحوبانىڭ جادىندا بولعاندىقتان، ول ٷشىن ٴتىرى. بۇل جايلى يسا بىلاي دەگەن: «مۇسا پايعامبار تىكەندى بۇتا تۋرالى اڭگىمەدە ەحوبانى «ىبىرايىم، ىسقاق جانە جاقىپتىڭ قۇدايى» دەپ اتاۋىمەن ولگەندەردىڭ قايتا تىرىلەتىنىن ايتقان. ول — ولگەندەردىڭ ەمەس، تىرىلەردىڭ قۇدايى. ويتكەنى ول ٷشىن ٴبارى ٴتىرى» (لۇقا 20:37، 38).
ٴتىپتى قايتىس بولعان ادال جانداردى دا ەحوبا شاتىرىنداعى قوناقتارى دەپ ەسەپتەيدى (7-ابزاستى قاراڭىز)
ەحوبانىڭ قوناعى بولۋدىڭ يگىلىكتەرى مەن تالاپتارى
8. ەحوبانىڭ شاتىرى ٴبىزدى نەدەن قورعايدى؟
8 كادىمگى شاتىر تىنىعاتىن ورىن، قولايسىز اۋا-رايىنان قورعايتىن پانا بولاتىنىنداي، ەحوبانىڭ شاتىرى دا ٴبىزدى رۋحاني زالالدان قورعاپ، ٷمىتسىز، شاراسىز ومىردەن ساقتايدى. ەگەر ەحوبادان اجىراماساق، شايتان بىزگە وڭالماستاي زيان كەلتىرە المايدى (ٴزاب. 31:23؛ جوح. 1-ح. 3:8). ال جاڭا دۇنيەدە ەحوبا ٶزىنىڭ ادال دوستارىن رۋحاني زالالدان دا، ولىمنەن دە قورعايتىن بولادى (ايان 21:4).
9. ەحوبا ٶزىنىڭ قوناقتارىنان نە كۇتەدى؟
9 راسىمەن دە، ەحوبانىڭ شاتىرىندا قوناق بولۋ، ياعني ونىمەن ماڭگى جاقىن دوس بولۋ — باعا جەتپەس مارتەبە! ەحوبانىڭ شاتىرىندا قوناق بولىپ قالا بەرۋ ٷشىن نە ىستەۋىمىز قاجەت؟ ەگەر ٴسىز بىرەۋگە قوناققا بارساڭىز، ٷي يەسىنىڭ قالاۋىن ەسكەرەسىز. مىسالى، ٷي يەسى سىزدەن ۇيگە اياقكيىمىڭىزدى شەشىپ كىرۋدى وتىنسە، بۇنى ەش قينالماي ورىندايسىز عوي. ٴبىز دە ەحوبانىڭ ٶز قوناقتارىنا قوياتىن تالاپتارىن ٴبىلىپ العىمىز كەلەدى. ەحوباعا دەگەن سۇيىسپەنشىلىك ٴبىزدى «وعان بارلىق جاعىنان ۇنامدى» بولۋ ٷشىن قولىمىزدان كەلگەننىڭ ٴبارىن ىستەۋگە تالپىندىرادى (قول. 1:10). ەحوبا ٴبىزدىڭ دوسىمىز بولعانىمەن، ول ٴبىزدىڭ قۇدايىمىز ٵرى اكەمىز، سوندىقتان ول زور قۇرمەتكە لايىق (ٴزاب. 25:14). ٴبىز ەحوبانىڭ كىم ەكەنىن ۇمىتپاي، وعان دەگەن قاستەرلى سەزىمىمىزدى جوعالتپاۋىمىز كەرەك. ەحوباعا دەگـەن زور قۇرمەت ٴبىزدى ونى رەنجىتەتىن ٸس-ارەكەتتەردەن سـاقتـايدى. ٴبىز «قۇدايىمىزدىڭ جولىندا قاراپايىم بولىپ جۇرگىمىز» كەلەدى (ميحا 6:8).
ەحوبا ٴشول دالادا ەشكىمدى ٴبولىپ-جارمادى
10، 11. ەحوبانىڭ ەشكىمدى ٴبولىپ-جارمايتىنى سيناي شولىندە جۇرگەن يسرايلدىكتەردىڭ جاعدايىنان قالاي كورىنەدى؟
10 ەحوبا قوناقتارىنىڭ ەشقايسىسىن الالامايدى (ريم. 2:11). ونىڭ ەشكىمدى ٴبولىپ-جارمايتىنىن سيناي شولىندە جۇرگەن يسرايلدىكتەردىڭ جاعدايىنان كورۋگە بولادى.
11 ەحوبا ٶز حالقىن مىسىردان الىپ شىققان سوڭ، ول كيەلى شاتىردا قىزمەت ەتۋگە ٴدىني قىزمەتكەرلەردى تاعايىندادى. ال لەۋىلىكتەر كيەلى شـاتىـرمەن بايلانىـسـتى وزگە دە ىستەردى اتقاردى. كيەلى شاتىردا قىزمەت ەتكەندەر نە وعان جاقىنىراق قوس تىككەندەر ەحوبانىڭ قامقورلىعىن كوبىرەك سەزىنگەن بە؟ جوق، ويتكەنى ەحوبا — ەشكىمدى الالامايتىن قۇداي.
12. قالاي ەحوبا ٴشول دالاداعى يسرايلدىكتەردى ەش ٴبولىپ-جارماي، بارىنە بىردەي قوناقجايلىلىق تانىتقان؟ (مۇسانىڭ 2-جازباسى 40:38) (سۋرەتتى دە قاراڭىز.)
12 قوستاعىلاردىڭ بارلىعى بىردەي ەحوبامەن دوس بولا الاتىن. بۇل ولاردىڭ كيەلى شاتىردا قىزمەت ەتكەنىنە نە قوسقا جاقىن تۇرعانىنا بايلانىستى ەمەس ەدى. مىسالى، ەحوبا كيەلى شاتىردىڭ ۇستىندەگى بۇلت نە وت باعاناسىن بۇكىل حالىق كورە الاتىنداي ەتكەن (مۇسانىڭ 2-جازباسى 40:38 وقىڭىز). بۇلت باعاناسى جىلجي باستاعاندا، ٴتىپتى كيەلى شاتىردان ەڭ الىس تۇراتىندار دا ونى كورىپ، زاتتارى مەن شاتىرلارىن جيناپ، حالىقتان قالماي ىلەسىپ جۇرە الاتىن (مۇس. 4-ج. 9:15—23). قوسقا جول جۇرۋگە بەلگى بەرەتىن ەكى كۇمىس كەرنەيدىڭ داۋسىن دا بارلىعى بىردەي ەستي العان (مۇس. 4-ج. 10:2). وسىدان كورەتىنىمىزدەي، ادامنىڭ كيەلى شاتىرعا جاقىنىراق قوس تىككەنى ونىڭ ەحوبامەن قارىم-قاتىناسى باسقالاردىكىنەن جاقسىراق بولعانىن بىلدىرمەگەن. جاڭادان قۇرىلعان بۇل حالىقتىڭ ىشىندە ٵربىر ادام ەحوبانىڭ قوناعى بولىپ، ونىڭ باعىت-باعدارى مەن قورعانىشىنا سەنىم ارتا العان. تاپ سولاي، بۇگىندە ٴبىز دە جەردىڭ قاي تۇكپىرىندە تۇرمايىق، ەحوبانىڭ سۇيىسپەنشىلىگىن، قامقورلىعى مەن قورعانىشىن سەزىنە الامىز.
كيەلى شاتىردىڭ قاق ورتادا تۇرعانى قۇدايدىڭ ەشكىمدى ٴبولىپ-جارمايتىنىن كورسەتەدى (12-ابزاستى قاراڭىز)
ەحوبا قازىر دە ەشكىمدى ٴبولىپ-جارمايدى
13. بۇگىندە ەحوبا ەشكىمدى ٴبولىپ-جارمايتىنىن قالاي كورسەتىپ جاتىر؟
13 بۇگىندە كەيبىر باۋىرلاستار ەحوبا كۋاگەرلەرىنىڭ دۇنيەجۇزىلىك باس باسقارماسىنا نە فيليالىنا جاقىن جەردە تۇرادى. ال وزگەلەرى سول عيماراتتاردا قىزمەت ەتەدى. بۇنداي باۋىرلاستار سول جەرلەردەگى ٸس-شارالارعا قاتىسا الادى جانە جەتەكشىلىكتى قولعا العان باۋىرلاستارمەن جەكە ارالاسا الادى. بۇدان بولەك، ارالاۋشى باقىلاۋشىلار جانە باسقا دا ارنايى تولىق ۋاقىتتى قىزمەت اتقاراتىن باۋىرلاستار بار. ٴبىراق باۋىرلاستاردىڭ باسىم بولىگىندە بۇنداي مۇمكىندىكتەر جوق. ەگەر ٴسىز سولاردىڭ ٴبىرى بولساڭىز، ەحوبا شاتىرىنداعى بارلىق قوناقتاردى بىردەي جاقسى كورەتىنىن، ٴارقايسىسىنىڭ قامىن جاسايتىنىن ۇمىتپاڭىز (پەت. 1-ح. 5:7). قۇداي حالقى رەتىندە ٴبارىمىز بىردەي ەحوبانىڭ رۋحاني اس-سۋىن، باعىت-باعدارىن الىپ، قورعانىشىن كورىپ ٴجۇرمىز.
14. ەحوبا ەشكىمدى الالامايتىنىن تاعى نەدەن كورۋگە بولادى؟
14 قوناقجاي قۇدايىمىز ەحوبانىڭ ەشكىمدى الالامايتىنىن كورسەتەتىن تاعى ٴبىر جايت — ول كيەلى كىتاپتى دۇنيەجۇزىندەگى ادامداردىڭ بارىنە قولجەتىمدى ەتكەن. نەگىزى، كيەلى جازبالاردىڭ ٴتۇپنۇسقاسى ەۆرەي، ارامەي جانە گرەك تىلدەرىندە جازىلعان. كيەلى كىتاپتى ٴتۇپنۇسقا تىلدە وقي الاتىنداردىڭ ەحوبامەن قارىم-قاتىناسى باسقالاردىكىنەن جاقسىراق پا؟ جوق، مۇلدەم ولاي ەمەس (مات. 11:25).
15. ەحوبا ەشكىمدى الالامايتىنىنا تاعى قانداي دالەل بار؟ (سۋرەتتى دە قاراڭىز.)
15 ەحوبانىڭ ىقىلاسىنا يە بولۋ ٷشىن جوعارى ٴبىلىم الۋ نە قانداي دا ٴبىر ٴتىلدى ٴبىلۋ شارت ەمەس. ەحوبا ٶزىنىڭ دانالىعىن تەك جوعارى ٴبىلىمدى ادامدارعا عانا اشسا بولار ەدى. ٴبىراق ول ٶز دانالىعىن جەرجۇزىندەگى بارلىق ادامعا، جوعارى ٴبىلىمى بار-جوعىنا قاراماي، قولجەتىمدى ەتكەن. ول ٶزىنىڭ ٴسوزى كيەلى كىتاپتىڭ مىڭداعان تىلگە اۋدارىلۋىنا قام جاساعان. سونىڭ ارقاسىندا تورتكىل دۇنيەدەگى ادامدار ونىڭ ٴتالىمىنىڭ يگىلىگىن كورىپ، ەحوبامەن دوس بولۋ ٷشىن نە ىستەۋ كەرەكتىگىن بىلە الادى (ٴتىم. 2-ح. 3:16، 17).
كيەلى كىتاپتىڭ بارلىق ادامعا قولجەتىمدى بولعانى ەحوبانىڭ ەشكىمدى ٴبولىپ-جارمايتىنىن قالاي دالەلدەيدى؟ (15-ابزاستى قاراڭىز)
ەحوبانىڭ قوناعى بولىپ قالا بەرىڭىز
16. ەلشىلەردىڭ ىستەرى 10:34، 35 كە ساي، ەحوبا ٴبىزدى قابىل الۋ ٷشىن نە ىستەۋىمىز كەرەك؟
16 ەحوبانىڭ بەينەلى شاتىرىندا قوناق بولۋ — ٴبىز ٷشىن زور قۇرمەت. ول — ەڭ مەيىرىمدى، سۇيىسپەنشىلىگى مول جانە اسقان قوناقجاي قۇداي. ونىڭ ۇستىنە، ەحوبا ەشكىمدى ٴبولىپ-جارمايدى. ول ادامنىڭ تۇراتىن جەرىنە، شىققان ورتاسىنا، بىلىمىنە، ۇلتىنا، رۋىنا، جاسىنا، جىنىسىنا قاراماي، بارىنە قۇشاعىن كەڭ جايادى. ٴبىراق ەحوبا ٴبىزدى قوناق رەتىندە قابىل الۋ ٷشىن ونىڭ تالاپتارىنا ساي كەلۋىمىز كەرەك (ەلشىلەردىڭ ىستەرى 10:34، 35 وقىڭىز).
17. ەحوبانىڭ شاتىرىندا كىم قوناق بولا الاتىنىن قايدان بىلۋگە بولادى؟
17 ٴزابۇر 15:1 دە ٴداۋىت كەلەسىدەي سۇراق قويعان: «ۋا، ەحوبا، سەنىڭ شاتىرىڭدا كىم قوناق بولا الادى؟ كيەلى تاۋىڭدا كىمنىڭ تۇرۋىنا بولادى؟» كەيىنگى تارماقتاردا ٴزابۇر جىرشىسى كيەلى رۋحتىڭ جەتەلەۋىمەن وسى سۇراقتارعا جاۋاپ بەرگەن. كەلەسى ماقالادا ەحوبانىڭ قوناعى بولىپ قالا بەرۋ ٷشىن قانداي تالاپتاردى ورىنداۋىمىز كەرەكتىگىن قاراستىرامىز.
32-ٵن ەحوبانىڭ جاعىنا شىق