1-2. Jehovap kiffani aalajaatsut sumut qaaqquai?

 JEHOVA ilinnut qanoq ittuua? Immaqa akissaatit: ‘Jehova Ataatatut, Guutitut ikinngutitullu isigaara.’ Jehova aamma allatut taaneqarsinnaavoq. Aammali ilinnik qaaqqusisutut isigaajuk?

² Kunngip Daavip Jehova qaaqqusisumut taassumalu kiffai aalajaatsut qaaqqusaasunut assersuuppai. Ima allappoq: “Naalagaq, kinaava tupinni tikeraajusinnaasoq, qaqqanni illernartumi inissarsisinnaasoq?” (Tuss 15:1) Allassimaffimmit tamatumannga paasivarput Jehovap tupianut qaaqqusaasin­naasugut – tassa Jehovamut qanimut ikinngutaasin­naasugut. Qaaqqusaanerup tamatuma ataqqinaataasup nuannissusia!

JEHOVAP KISSAATIGAA TUPERMINIIS­SASUGUT

3. Jehovap tuperminut qaaqqusaa siulleq kinaava, qanorlu misigis­suseqarfigeqatigiippat?

³ Jehova pinngor­titsinngin­nermini kisimiippoq. Ernituanili pinngor­tikkamiuk tuperminut assersuutaasumut qaaqquaa. Taamatut qaaqqusisin­naalernini nuannaarutigaa. Biibilimi allassimavoq Ernituaq Jehovamut ‘nuannaarutaasoq’ taannalu Jehovap saavani ‘nuannaar­tuartoq’. – Uss 8:30, NW.

4. Kingusin­nerusukkut Jehovap aamma kikkut tuperminut qaaqquai?

 ⁴ Jehovap inngilit pinngor­tikkamigit tuperminut qaaqquai. Biibilimi inngilit taakku ‘Guutip ernerinik’ taaneqarput, Jehovamillu peqateqarnertik nuannaarutigaat. (Job 38:7; Dan 7:10) Ukiorpassuarni Guutip ikinngutimisut qaaqqusai tamarmik anersaajupput. Kingusin­nerusukkut inuit pinngor­tikkamigit taakku aamma tuperminut assersuutaasumut qaaqquai. Qaaqqusaasut taakkua ilagaat Eenokki, Nooa, Aaperaat Juubilu. Upperluartut taakkua ‘Guuti inooqatigaat’ taassumalu ikinngutaanik taaneqarlutik. – Mos 1. 5:24; 6:9; Job 29:4; Es 41:8.

5. Ezekieli 37:26, 27 naapertorlugit siulittuutigineqartoq sumik ilinniarfigaarput?

⁵ Taamanimiilli Jehova allanik tuperminut qaaqqusiuarsimavoq. (Ezekieli 37:26, 27 atuakkit). Assersuutigalugu Ezekielip siulittuutaanit paasivarput Guutip kiffami aalajaatsut qanimut attaveqatiginissaat kissaatigigaa. Isumaqatigiissummik ‘eqqississummik angerfigeqatigis­sallugit’ neriorsuivoq. Qilaliar­nissamik neriugisallit nunarsuarmilu inuunissamik neriugisallit ‘savaatitut katersatut ataatsitut’ ataasius­suseqatigiilerpata siulittuut tamanna eqquutissaaq. (Joh 10:16) Piffissarlu tamanna maanna nalliuppoq!

SUMIIKKALUARAANGAT­TALUUNNIIT GUUTIP ISUMASSOR­TARPAATIGUT

6. Jehovap tupianut qanoq isertoqarsinnaava, tupialu sumiippa?

⁶ Biibilip nalaani inuup tupia qasuersaarfiullunilu silamut illersuutaavoq. Tupermiittoq qaaqqusisumit isumagineqarluartarpoq. Jehovamut tunniul­luinnaratta tupianut assersuutaasumut iserpugut. (Tuss 61:5) Naammat­torsuarmik anersaakkut inuussutis­saqarnerput Jehovallu qaaqqusaanik allanik peqateqar­tarnerput nuannaarutigaagut. Jehovap tupia assersuutaasoq sumiiffimmi aalajangersimasumiinngilaq. Immaqa nunamut allamut ataatsimeersuariar­nikuuvutit qatanngutillu allat naapillugit. Taakku aamma Guutip tupianiipput. Tassa sumiikkaluarut­taluunniit Jehova aalajaalluta kiffartorfigigutsigu taassuma tupianiissaagut. – Saqq 21:3.

7. Sooq oqarsin­naavugut aalajaallutik toqusimasut suli Jehovap tupianiittut? (Aamma asseq takuuk).

⁷ Aalajaallutik toqusimasut suli Jehovap  tupianiippat? Aap! Sooq taama oqarsin­naavugut? Jehovap taakku eqqaamal­luaramigit suli inuusutut isigai. Tamanna Jiisusip ima nassuiarpaa: “[Moorsisip] orpigaq kapinartulik pillugu oqaluttuamini Jehova ‘Aaperaap Guutianik, Iisaap Guutianik Jaakullu Guutianik’ taagamiuk toqusut makititaajumaartut paasinarsisippaa. Taanna toqusut Guutigin­ngilaat, inuusulli Guutigaat. Taassumami tamaasa inuusutut isigai.” – Luk 20:37, 38.

ILUAQUTISSAGUT AKISUSSAAF­FIGULLU

8. Jehovap tupianiinnerput qanoq iluaqutigaarput?

⁸ Jehovap tupianiinnerput taassumunnga attaveqar­nitsinnik ajoqusiisunut illersuutigaarput piviusumillu neriuuteqalis­sutigalugu. Jehovamut qanimut attaveqar­tuarutta Saatanip ataavartumik ajoqusersin­naassan­ngilaatigut. (Tuss 31:24; Joh 1. 3:8) Paratiisimilu Jehovap kiffani aalajaatsut anersaakkut ajoqutaasunut allaallu toqumut illersor­tuarumaarpai. – Saqq 21:4.

9. Jehovap tuperminut qaaqqusani sumik piumaffigai?

⁹ Jehovap tupianiinneq immikkut pisinnaatitaaf­ferujusuuvoq – tassami naassaan­ngitsumik Jehova ikinngutigisin­naagatsigu! Jehovap tupianiitilluta qanoq pissuseqassaagut? Inoqatinnut qaaqqutikkuit qaaqqusisup iluarisaatut iliorusussaatit. Assersuutigalugu iseruit skuutit piissagitit kissaatigippagu soorunami taamaaliorusussaatit. Taamatuttaaq Jehovap tuperminiit­tuarusuttunut piumasaqaatai soorunami paaserusuppagut. Jehova asagatsigu sapinngisatsinnik taassuma ‘iluaril­luinnagaatut’ iliorusuppugut. (Kol 1:10) Jehova ikinngutitut isigaarput, aammali Guutigalugulu Ataatarigatsigu ataqqillugulu mianeraarput. (Tuss 25:14) Tamanna puigunngisaan­nassavarput. Taamatullu mianerin­nittuarutta iluarin­ngisaanik iliuuseqar­naveersaar­nissatsinnut iluaqutigis­savarput. ‘Maniguulluta Guutitta kiffartorfigiuarnissaa’ kissaatigaarput. – Mika 6:8, NW.

INOQAJUITSUMI JEHOVAP KINAASSUSERSIUN­NGINNERA

10-11. Jehovap kinaassusersior­tuunnginnera erseqqis­sarniarlugu suna sammissavarput?

¹⁰ Jehova kinaassusersior­tuunnginnami tuperminiittunik tamanik isumagin­nilluarpoq. (Rom 2:11) Tamanna paasisin­naavarput Jehovap Sinajip inoqajuitsuani Israalikkunnik pinninnera misissorutsigu.

¹¹ Jehovap innuttani Egyptenimit inussiaataajun­naarsereerlugit taakkua ilaat Tupermi Naapeqatigiit­tarfimmi palasitut kiffartor­tunngortippai. Aamma Levikkut illernar­tuummut tunngatillugu suliassin­neqarput. Tassani kiffartortut imaluunniit Toqqup Naapeqatigiit­tarfiup eqqaani tammaartut Jehovamit isumagineqarluar­neruppat? Naamik! Jehova kinaassusersior­tuunngilaq.

12. Israelikkut tamarmik Jehovap kinaassusersior­tuunnginnera qanoq maluginiarsin­naavaat? (Mosesimik 2. 40:38) (Aamma asseq takuuk).

¹² Israalikkut ilaannaat Tupermi Naapeqatigiit­tarfimmi kiffartor­tuugaluartut tamatumaluunniit eqqaani tammaaraluartut innuttai tamarmik Jehovamik qanimut ikinnguteqar­nissamut assigiimmik periarfis­saqarput. Assersuutigalugu tamarmik Toqqup Naapeqatigiit­tarfiup qulaani tupinnar­tuliornikkut nuiaqar­neranik takunnis­sinnaanerat Jehovap isumagaa. (Mosesimik 2. 40:38 atuaruk). Nuiaq allamut saakkaangat allaat ungasissumi tammaartut tamanna takusin­naavaat. Taava pigisatik  tupertillu poortoriarlugit inuiaqatigiit sinneri ingerlaqatigisin­naavaat. (Mos 4. 9:15-23) Qarlortaatit marluk aallarnissamut kalerrisaarillutik qarlorpalunneri tamarmik tusarsin­naavaat. (Mos 4. 10:2) Tassa Israalikkuusup Tupermut Naapeqatigiit­tarfimmut qaninnerunera Jehovamut qaninnerusumik attaveqar­neranut ersiutaanngilaq. Israalikkulli tamarmik Jehovap tupianiis­sinnaapput, taassumanngalu ilitsersor­neqarsin­naallutillu illersor­neqarsin­naapput. Aamma nalitsinni sumiluunniit najugaqaraluarluta tamatta Jehovap asanninnera, isumassuinera illersuineralu iluaqutigisin­naavagut.

NALITSINNI JEHOVAP KINAASSUSERSIOR­TUUNNGINNERA

13. Nalitsinni Jehovap kinaassusersior­tuunnginnini ilaatigut qanoq ersersippaa?

¹³ Nalitsinni Guutip kiffaasa ilaat Jehovap Nalunaajaasuisa qullersaqarfiata immikkoor­tortaqarfiisaluunniit eqqaanni najugaqarput. Ilaat allat allaffinni taakkunani kiffartorput. Taakku taakkunani sammineqartartut iluaqutigisarpaat suliatsinnillu siuttuusunik peqateqar­tarlutik. Allat nakkutil­liisutut angalasartutut kiffartorput allatul­luunniit piffissaq tamaat immikkut kiffartorlutik. Illit taakkunatut kiffartor­tuunngik­kaluarlutit qularutigis­sanngilat suli Jehovap asagaatit tupianiit­tutillu. Ilisarisimal­luarpaatit pisariaqar­titannillu isumagisarlutit. (Pet 1. 5:7) Jehovap kiffani immikkut tamaasa anersaakkut nerisittarpai, siulersorpai illersorlugillu.

14. Jehovap qaaqqusisutut kinaassusersior­tuunnginnera aamma allatut qanoq erserpa?

¹⁴ Inuit nunarsuaq tamakkerlugu Biibilimik atuarnissamut periarfis­sinnerisigut Jehovap aamma kinaassusersior­tuunnginnini ersersippaa. Allakkat Illernartut oqaatsini pingasuni – hebræerisut, aramæerisut grækerisullu – allanneqaq­qaarput. Biibilimik oqaatsini  taakkunani atuarsinnaasut Jehovamut allanit qaninnerusumik attaveqarpat? Naamik. – Mat 11:25.

15. Jehovap kinaassusersior­tuunngin­neranut suna uppernarsaataava? (Aamma asseq takuuk).

¹⁵ Jehovamit iluarisaas­sagutta ilinniagaqarnerput sumiutul­luunniit oqaaseqarnerput apeqqutaan­ngillat. Imaanngilaq Jehovap qaffasissumik ilinniagaqartut kisiisa ilisimas­susermik tunisarai. Jehovap inuit tamaasa qanorluunniit ilinniagaqarsimasut ilisimas­suseqar­nissamik periarfis­sittarpai. Oqaasiami, Biibili, oqaatsinut tuusintilik­kuutaanut nutserneqarsimavoq. Taamaalilluni inuit nunarsuaq tamakkerlugu Biibili iluaqutigisin­naavaat Jehovamullu qanoq ikinngutaalersin­naallutik paasisin­naallugu. – Tim 2. 3:16, 17.

JEHOVAMIT ILUARISAAJUARIT

16. Apustilit Suliaat 10:34, 35 naapertorlugit Jehovamit qanoq iluarisaajuarsin­naavugut?

¹⁶ Jehovap tupiani assersuutaasumi tikeraajuneq immikkut pisinnaatitaaffiuvoq. Jehova qaaqqusisuuvoq inussiar­nernerpaaq, asannin­nerpaaq tukkornerpaarlu. Aamma kinaassusersior­tuunnginnami sumiinneq, peroriartorneq, ilinniagaqarneq, sumiuuneq, qassinik ukioqarneq suiaassuserlu apeqqutaatinnagit tamatta tikilluaq­qusarpaatigut. Iluarisaas­saguttali najoqqutassiai maleruar­tariaqarpagut. – Apustilit Suliaat 10:34, 35 atuakkit.

17. Jehovap tupianiis­sinnaanitsinnut piumasaqaatit sumi atuarsin­naavagut?

¹⁷ Tussiaat 15:1-imi allassimasutut Daavi ima aperivoq: “Naalagaq, kinaava tupinni tikeraajusinnaasoq, qaqqanni illernartumi inissarsisinnaasoq?” Tamatuma akissutaa Daavip tussiaammi tamatumani isumassarsisitaalluni allappaa. Allaaserisami tulliuttumi Jehovamit iluarisaanissamut piumasaqaatit taakku sammissavagut.