MBANDU YAKUDILONGA 23
MWIMBU 28 Nanyi u Tena Kukala Kamba Dya Jihova
Jihova Utwixana Phala Kutunga mu Balaka Yé
“O balaka yami ya kà kala ni ene, eme’eme ngi kala ngi Nzambi yâ.”—IZE. 37:27
ITWANDADILONGA
Mu milongi yiyi twanda dilonga se ihi ilombolola kukala mu balaka ya Jihova ni kyebhi kyene mu tuzalela.
1-2. Kixanu kyebhi kibhana Jihova ku jiselevende jê?
SE KUMONEKA muthu ukwibhwidisa: ‘Phala eye Jihova nanyi?’ Kyebhi ki weji tambwijila? Eye utena ku mutambwijila: ‘Jihova Tat’etu, Nzambi yami ni kamba dyami.’ Nange eye wala we ni maukexilu a kujimbulula se Jihova nanyi. O kwila eye umumona kala wakuzalela ku dibhata dyê?
2 Sobha Davidi wasokesa o ukamba wa Jihova ni jiselevende jê kala o ukamba wa mukwa kuzalela. Mwene webhwidisa: “Jihova, nanyi u nanga mu balaka yé? nanyi u tunga ku mulundu wé wangene?” (Jisá. 15:1) O izwelu yiyi ilondekesa kwila etu tutena kutunga mu balaka ya Jihova, kiki kilombolola kukala tu makamba mê. Ujitu wa dikota kukala tu makamba a Jihova!
JIHOVA WANDALA KWILA TUTUNGA MU BALAKA YÊ
3. Jihova watwamene kwixana nanyi phala kutunga mu balaka yê, ni kyebhi kya divwile Jihova ni muthu yo wadyangele o kumwixana?
3 Ande dya kubhanga o ima yoso, Jihova wexile ubheka. Maji mwene wabhange mon’ê umoxelele. Jihova wexile kala o mukwa kuzalela, wexana mon’ê umoxelele phala kutunga mu balaka yê, mwene wa sangulukile kyavulu mu kubhanga kiki. O Bibidya yamba: Jihova wa zolele kyavulu mon’ê. O mon’ê wasanguluka “ni kukemba bhu pholo yê ithangana yoso.”—Jisa. 8:30.
4. Ananyi dingi Jihova wa exana phala kutunga mu balaka yê?
4 Mu kusuluka Jihova wabhange o ji anju, wa exana phala kutunga mu balaka yê. Mu Bibidya o ji anju a exana “an’a Nzambi” ni kwila asanguluka mu kukala ku mbandu yê. (Jobe 38:7; Dan. 7:10) Ku mazunda ni mazunda a mivu, o makamba a Jihova, exile ngó yó atungile ku dyulu. Mu kusuluka mwene wabhange o athu, yu wa exana phala kutunga mu balaka yê. Amoxi mudyâ, exile Enoko, Nowé, Mbalahamu ni Jobe. O Bibidya yamba kwila ene exile makamba a Jihova mukonda ende “ni Nzambi.”—Dim. 5:24; 6:9; Jobe 29:4; Iza. 41:8.
5. Ihi itutena kudilonga mu kikanenu kitusanga mu divulu dya Izekiyele 37:26, 27?
5 Mivu yoso Jihova wene mu kwixana o athu phala kukala makamba mê ni kutunga mu balaka yê. (Tanga Izekiyele 37:26, 27.) Mu kifika, o kikanenu mu divulu dya Izekiyele kilondekesa kwila Nzambi wamesena kukala ni ukamba wambote ni jiselevende jê jafiyele. Mwene wakanena kubhanga paze ni ene. O kikanenu kiki kilondekesa kwila o yo andaya ku dyulu ni yo ala ni kidyelelu kya kukala mu ixi, eji tunga kumoxi mu balaka ya Jihova kala “kilunga kimoxi.” (Nzw. 10:16) O ima yiyi yamubhita kindala!
KIDIDI KYOSO-KYOSO BHU TUKALA JIHOVA UTULANGA
6. Kyebhi o muthu kyatena kukala musonyi mu balaka ya Jihova, ni kwebhi kutusanga o balaka yiyi?
6 Mu Bibidya o balaka yexile kididi phala o muthu kukala-mu ni kudilanga ku ilwezu. O musonyi mu balaka weji kingila ku mulanga kyambote ku muthu wamuzalela. Kyoso ki tubhakula o mwenyu wetu kwa Jihova twedi kala tu asonyi mu balaka yê. (Jisá. 61:4) Etu twala ni ima yoso itwabhindamena phala kukolesa o ukamba wetu ni Jihova ni kwila twala we ni makamba akituka we asonyi a Jihova. O kixanu kya Jihova ki phala kididi kimoxi ngo, Mwene wixana o athu mu ngongo yoso phala kwiza mu tunga mu balaka yê. Nange eye wayi mu tala kyonge kyakatunda mu ixi yengi anga usanga jiphange asanguluka kyavulu mukonda a abesowala mu kukala mu balaka ya Jihova. O balaka ya Jihova yala mwaxaxi ka jiselevende jê jafiyele.—Dij. 21:3.
7. Kyebhi kitwejiya kwila o yo afu kya ala hanji kala asonyi mu balaka ya Jihova? (Tala we ofoto.)
7 Ihi itwamba yalungu ni yo afu mu ufiyele wâ kwa Jihova? O kwila tutena kuzwela kwila ene ala hanji kala asonyi ku balaka ya Jihova? Kyene mwene! Mukonda dyahi twamba kiki? Mukonda ene ala mu kilunji kya Jihova. Jezú wambe: “O madifundu anda fukunuka, katé mwene Mozé wejidisa o kidi kiki kyoso kyazwela yalungu ni kisasa, kyambe kwila Jihova mwéne ‘o Nzambi ya Mbalahamu, Nzambi ya Izake ni Nzambi ya Jakobo.’ Mukonda mwene ki Nzambi ya madifundu, maji ya athu ala ku mwenyu, mukonda phala mwene, ene oso ala ku mwenyu.”—Luk. 20:37, 38.
O athu afu mu ufiyele wâ, ala hanji kala asonyi mu balaka ya Jihova (Tala we ofoto 7)
MABESA EBHI UTWALA NAWU NI IHI I TWATOKALA O KUBHANGA?
8. Mbote yahi itukatula mu kukala mu balaka ya Jihova?
8 O balaka kididi kya kunyoha ni kulanga o athu ala-mu, o balaka ya Jihova kibhana ku asonyi we o kilangidilu mu nzumbi ni kidyelelu kyalungu ni hádya. Satanaji katena ku tubhekela kibhidi kinangenena. (Jisá. 31:23; 1Nz. 3:8) Ku mundu wa ubhe Jihova wanda suluka mu kulangidila o makamba mê afiyele ki mu nzumbi ngo kana, maji we wanda bhwisa o nguma yetu o kalunga.—Dij. 21:4.
9. Ihi ikingila Jihova ku athu yo atungu mu balaka yê?
9 Ujitu wa dikota kutunga mu balaka ya Jihova, tutena kukala ni ukamba ni mwene wanda nangenena kate ku hadya ni hadya. Idifwa yebhi itwatokala kukala nayu phala tusuluke mu kutunga mu balaka yê? Se akwixana phala kuya ku dibhata dya muthu, eye watokala kwijiya se ihi i kingila o muthu kokwe. Mu kifika, se atubhinga phala kuxisa o idyatelu yetu bhu mwelu, ni kuxila kwoso twatokala kubelesela. Kyene we kimoxi ni Jihova, mwene ukingila kwila oso ala mu balaka yê amubelesela. O henda yetu kwa Jihova itubhangesa kubhanga yoso phala ‘tutene ku mu sangulukisa.’ (Kol. 1:10) Kyoso ki tuya ni kumona Jihova kala kamba dyetu tutendela kwila mwene Nzambi yetu ni Tat’etu ni kwila twatokala kumuxila. (Jisá. 25:14) Ni kibanzelu kiki mu kilunji, kitwatokala kudijimba kwila twatokala ku muxila jinga. O kuxila kuku kwanda kutukwatekesa kuzemba o ima ya zembe mwene. Etu twamesena “kwenda bhu pholo ya Nzambi [yetu] ni ku di tululula.”—Mik. 6:8.
JIHOVA WATALATALA AKWA IZALAYELE SÉ KATOMBO MU KIKANGALAKATA
10-11. Kyebhi Jihova kya talatala o akwa Izalayele mu kikangalakata kya Sinayi ni kyebhi mwene kyalondekesa kwila ki mukwa katombo?
10 Jihova utalatala kyambote o makamba mê. (Lom. 2:11) Tutena kumona o kidi kiki mu ukexilu watalatala o akwa Izalayele mu kikangalakata kya Sinayi.
11 Kyoso Jihova kya bhulula o mundu wê ku ubhika, mwene wasolo akunji phala kusidivila ku balaka ya kutakanena. O Jilevita a asolele phala kubhanga kikalakalu kyengi mu balaka ya Jihova. O kwila Jihova wa azolele dingi o athu atungile mu balaka ya kutakanena ni yó azukamene-mu, o athu amukwa ndenge? Kana! Jihova ki mukwa katombo.
12. Kyebhi Jihova kya londekesa kwila kexile ni katombo ku mundu we wa ubhe? (Makatukilu 40:38) (Tala we ofoto.)
12 Kala muthu mu Izalayele weji tena kukala ni ukamba wambote ni Jihova kikale se watungile mu balaka, kikale se inzo yê yazukamene-ku mba kana. Mu kifika Jihova wabhangesa kwila o mundu woso wa Izalayele atene kumona o dituta ni túbhya ku thandu dya balaka. (Tanga Makatukilu 40:38.) Ne mwene kyoso o dituta dyexile muya mu kididi kyengi, kate o athu atungile dikanga dyavulu dya balaka atenene kudimona, kulongela o imbamba yâ, kubudika o jibalaka ni kutunga kumoxi ni athu amukwa mu kifuxi kya Izalayele. (Dya. 9:15-23) Athu oso eji tena kwivwa o jibuya ja koloneta jiyadi ja phalata. Kyokyo kyexile kijimbwete phala o mundu kumateka kwenda. (Dya. 10:2) O yo azukamene ku balaka ki kilombolola kwila o ukamba wâ ni Jihova wabetele dingi kota, o wa yo exile dikanga dya balaka ndenge. Muveji dya kiki, o mundu woso wa Izalayele eji tena kukala asonyi a Jihova ni kudyelela kwila eji kwa endesa ni kwalangidila. Kyene we kimoxi lelo, kididi kyoso-kyoso bhu tukala tutena kukatula mbote mu henda ya Jihova ni mu kilangidilu kyê.
O ima yasokejeka Jihova mu balaka, yalondekesa kwila mwene ki mukwa katombo (Tala we ofoto 12)
LELO JIHOVA KENE MULONDEKESA KATOMBO
13. Mu ukexilu webhi Jihova ulondekesa kwila ki mukwa katombo?
13 Lelo sayi jiselevende ja Nzambi jinzo jâ jazukama ku mbonge ya Jimbangi ja Jihova mba ku filiyale yâ. Amukwa amusidivila mu ididi yiyi. O athu enya ene mubhanga ikalakalu yavulu ni kudibunda kumoxi ni jiphange atukala ku pholo. Amukwa hanji asidivila kala tufunga twa ilunga, mba ala mu sidivisu ya thembu yoso. Se kiwamubhanga o kikalakalu kiki, ejiyakyu kwila eye watungu we mu balaka ya Jihova ni kwila mwene wakuzolo kyavulu. Mwene wakwijiya kyambote ni kwila mwene wanda kubhana yoso iwabhindamena. (1 Ph. 5:7) O mundu woso wa Jihova ene mutambula o kudya mu nzumbi ni kilangidilu kya bhindamena.
14. Ukexilu webhi dingi walondekesa Jihova kwila ki mukwa katombo?
14 Ukexilu umoxi walondekesa Jihova kwila ki mukwa katombo mu kubhana o Bibidya ku athu oso phala ku itanga. O Bibidya a isonekene mu madimi atatu: Hebalayiku, Alamayiku ni Ngeleku. O kwila o athu atanga o Bibidya mu madimi yá, o ukamba wâ ni Jihova wa betakota, o yo atanga o Bibidya mu madimi engi, ndenge? Kana!—Mat. 11:25.
15. Kima kyahi kilondekesa kwila Jihova ki mukwa katombo? (Tala we ofoto.)
15 Jihova ka xikina o muthu mukonda wadilongo kyavulu mba wala ni uhete wa kuzwela madimi avulu. Jihova wamesena kwila o kwijiya kwê kudimwange mu ngongo yoso kate mwene kwa yo kadilongo kyavulu. O maka me o Bibidya ene lungulula mu mazunda a madimi, phala o athu mu ngongo yoso akatule mbote mu kudilonga kyebhi ene kyatena kukala makamba mê.—2 Ti. 3:16, 17.
Jihova ulondekesa kwila ki mukwa katombo mu kwehela o Bibidya ku ilungulula mu madimi avulu (Tala we ofoto 15)
KOLOKOTA MU KUTUNGA MU BALAKA YA JIHOVA
16. Kala kyamba Ikalakalu 10:34, 35, ihi itwatokala kubhanga phala Jihova ku tuxikina?
16 Ujitu wonene kukala asonyi a Jihova mu balaka yê. Mwene wabeta dingi kota mu kukala mukwa kuzalela. Mwene ki mukwa katombo, mwene uzalela athu oso kabasa kididi bhutwala, se a tuvwalela kwebhi, o kwijiya kwetu, o kifuxi, o dyembu, mba o kitala kyetu. Jihova uxikina ngo yo ubelesela o itumu yê.—Tanga Ikalakalu 10:34, 35.
17. Kwebhi ku tutena kusanga milongi itena kutukwatekesa kutunga mu balaka ya Jihova?
17 Kala kyamba o divulu dya Jisálamu 15:1, Davidi webhwidisa: “Jihova, nanyi u nanga mu balaka yé? nanyi u tunga ku mulundu wé wangene?” Jihova wehela Davidi kutambwijila o ibhwidisu yiyi mu Jisálamu 15. Mu milongi yakayela twanda dilonga se ima yebhi itwatokala o kubhanga phala Jihova kutuxikina.
MWIMBU 32 Tu Kale ku Mbandu ya Jihova!
