1-2. Kuɛɛ Chɛhowa veelu yɛ buɛiyaa nduaa le ma wa mialaa nduaa?

 TE WAŊNDO nyuna num pɛ aa, wana suu maavɛɛ Chɛhowa cho yɛ le num? Naapum ma muli aa, ‘Finya nuu, Mɛlɛka nuu a Chaaŋ nuu o cho ni.’ Diola cheleŋ la cho vɛlɛ la ŋ veelu Chɛhowa lepum ndaŋ. Kɛ baa ma che pa Chɛhowa maa wana veelu num le waa o naa nduaa chalaa wo?

² Mi Masaa Deeve tuu chaŋyɛi wa miallo tɛɛŋ a wana veelu ndu wo, a chaŋyɛi cho Chɛhowa tɛɛŋ a buɛiyaa nduaa ve. Mbo nyuna Chɛhowa aa: ‘Oo Mɛlɛka Yaawɛɛ, o nɛɛ niaa ŋ chɛllɛ le ma luɛi o fondaŋ num chalaa niŋ? Pembii Saayɔŋ num ii diandɛi, o nɛɛ niaa ŋ chɛllɛ le wa lechoo?’ (Sam 15:1) Diomndaŋ ndaŋ la chɔm naa maa, ŋ tiuba miŋ simnuŋ mialaa Chɛhowaa o naa nduaa chalaa niŋ. Nuawɔ se dikeŋnaŋ bɛndu le veelu waa nuaa sɔlaa Chɛhowa o ba!

CHƐHOWA YEEMA NAA MIŊ WA MIALAA NDUAA

3. Nɛɛ wa yɛ mial tasoo le Chɛhowa, nduyɛ vɛɛ nda ŋiɔɔŋ kpou wa yɛ sinaŋndo?

³ Tuupa mi Chɛhowa kandu nyɔɔŋ toosiaa, ndupilɛ kpe wa ni. Kɛ a teleŋ pilɛ, mbo toosiaa Po ndɔ tasoo, okoŋ mbo chɛl ndu le mbo wa mial ndɔɔ o naa nduaa chalaa niŋ. Nduyɛ o wa a kɔl kɛndɛ le mial ndɔ tase koŋ sɔlaa. Baabuiyo dimi maa, mi Chɛhowa ‘naŋ kɔl’ a Po ndɔɔ. Po ndɔɔ bɛɛ, o “wa a kɔl kɛndɔɔ le teleŋ o teleŋ ndu lachi.”—Pulɔ. 8:30.

4. Nɛɛ yaa Chɛhowa ndoo veelu yɛ vɛlɛ le ma wa mialla o naa nduaa chalaa?

 ⁴ Mi Chɛhowa toosiaa vɛlɛ nyaa yoomaa cheleŋ o choo choo niŋ. Nduyɛ nda bɛɛ, mbo veelu nda le ma wa mialaa nduaa o naa nduaa chalaa niŋ. Baabuiyo veelu maalikɛiya aa, ‘chuauwaa Mɛlɛkaa.’ Nduyɛ o tɛɛsiaa maa a wa a kɔl kɛndɛ le waa a Chɛhowa latulu. (Choobu 38:7; Daan. 7:10) Le wɔsiŋ bɔɔbɔɔ, wanaa wa o choo choo niŋ a Mɛlɛkaa latulu wa kinɛi wa mialaa nduaa ni. Okoŋ kɔɔli, mbo toosiaa vɛlɛ waŋnda chieeya, mbo veelu nda le ma simnuŋ mialaa nduaa. Mi wanaa bɔɔbɔɔ chɛl veelu ndɔɔ, mɛɛ Inɔki, Nuuwa, Ebilaham, a Choobu cho nuaa yɛ. Baabuiyo tɛɛsiaa a waŋnda haa okɔɔ maa, chaaŋaa Mɛlɛkaa nda wa ni ɔɔ ‘wanaa kuɛ a Mɛlɛka latulu wa.’—Chɛ. 5:24; 6:9; Choobu 29:4; Aisaya 41:8.

5. Yɛɛ huului cho o Isikiaa 37:​26, 27 niŋnde pɛɛku yɛ naa?

⁵ Chɔŋ o sindɔɔ niŋ, Chɛhowa bii niŋ chaaŋaa nduaa veeloo le ma wa mialaa nduaa. (Nuawɔ Isikiaa 37:​26, 27.) Le tamaseliiyo, huului Isikiaa poonyiaa ve pɛɛku naa maa, Mɛlɛka yeema mi wanaa cho ndu piɛiyo o laalaŋndo choo wa nɔ chaŋyɛi kpɛɛluŋnde a ndu. O mɛi lediom maa, o “cho kpema kɔl nyuloo yii a nda.” Huului Isikiaa dimi hei ve, i wa suɛi a teleŋ Chɛhowa wa Kilisiɔŋaa nɔ tiindaŋndo le kɔlaŋ choo choo wa, a wanaa nɔ tiindaŋndo le waa o lɛŋndeŋ choo wa dɔwɔɔ diompilɛ, okoŋ ma wa mialla o naa nduaa chalaa, nduyɛ ma simnuŋ “kundaa opilɛ” wo. (Chɔŋ 10:16) Huuluei hei cho hau peelɔŋndo.

MI CHƐHOWA KE NAA NYƐM NAŊ HAUBA WOŊ BA O BA NAŊ WA

6. Vɛɛ waŋndo simnuŋ yɛ miallo o naa chalaa Mɛlɛkaa niŋ, nduyɛ kuɛɛ naŋ saaluŋ yɛ naa nduaa chalaa?

⁶ O sindɔɔ niŋ, mi waŋndo ndoo taŋgul naa chalaa le pɛŋgioo a le halikpeŋ paaleŋ a piɔɔ loo ndu le. Nduyɛ te miallo ndoo luɛi pɛ o naa chalaa kaŋ, mi ndoo ke ndu nyɛm o hauba woŋ. Naa bɛɛ, te ŋ yɔŋgu pɛ yoomula naalaŋ o Chɛhowa lo, miŋ luɛi o chaŋyɛi teŋgeŋnde niŋ a ndu, ŋ cho simnɔŋ mialla o naa nduaa chalaa niŋ. (Sam 61:4) Miŋ sɔla nyɛm mala naa le pɛɛkoo a ndu okɔɔ woŋ tau, nduyɛ miŋ wa o chaŋyɛi kpɛɛluŋnde niŋ a wanaa cheleŋ simnuŋ mialaa nduaa wa. Naa chalaa Mɛlɛkaa cho ko o fondaŋndo pilɛ le. Naapum a kuɛ niŋ o lɛŋnde cheleŋ niŋ le bɔŋaŋ bɛndu teŋgeŋndo, nduyɛ mi la chiikaŋ a wanaa cheleŋaa cho o naa chalaa Mɛlɛkaa niŋnda. A tonya, naa chalaa Mɛlɛkaa cho ba o ba fee buɛiyaa nduaa cho.—Sɔɔŋ. 21:3.

7. Le yɛɛ naŋ dimi yɛ maa, wanaa vi o laalaŋndo choo wa, cho wɔ mialaa Chɛhowaa o naa nduaa chalaa niŋ? (Tofa vɛlɛ fotueiyo.)

 ⁷ Kɛ, ɔɔ niŋ wanaa vi o laalaŋndo choo wa? Baa ŋ tiuba pa miŋ dimi maa, a cho wɔ mialla o naa chalaa Mɛlɛkaa niŋ? Ei. Le yɛɛ naŋ dimi yɛ lende? Kanifuule le Chɛhowa, waŋnda haa cho wɔ yoomu. Mi Chiisu dimi aa: “O nyɛ cho o poonyiaa a bɔɔ leyiŋndo okɔɔ wo niŋ, mi Muuse chɔm maa wanaa vi wa nɔ le miiŋgoo yoomu. Mbo veelu Chɛhowa maa ndu cho ‘Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo ni.’ O cho Mɛlɛka ŋwaŋ vilɛi le, kɛ Mɛlɛka wanaa cho yoomu wa, kanifuule nda kpou cho yoomu ndu o hɔl.”—Luku 20:​37, 38.

TƆNƆLA NAŊ SƆLA LAŊ A KALAŊNDA NAŊ NƆ LE WAA O NAA CHALAA MƐLƐKAA NIŊNDAŊ

8. Tɔnɔ yɛɛ mialaa Chɛhowaa sɔla yɛ, le mɛɛ nda cho o naa nduaa chalaa niŋ yɛ?

⁸ Mi waŋndo taŋgul naa chalaa le pɛŋgioo a le halikpeŋ paaleŋ a piɔɔ loo ndu le. O nɛi pilɛ koŋ choo, mi naa chalaa Mɛlɛkaa manda mialaa nduaa o ndu piɛiyo niŋ, nduyɛ mbo tosa ma nɔ tiindaŋ kpeekpeiyo le chilaŋ. Te ŋ lo pɛ o chaŋyɛi kpɛɛluŋnde niŋ a ndu, Setana tiuba mbo yɔŋul naa lefafɛɛŋ te. (Sam 31:23; 1 Chɔŋ 3:8) O chieeŋ sɛnɛiyo niŋ, Chɛhowa cho hiouwɔɔ lachi a chaaŋaa nduaa laalaŋnda mandaa o ndu piɛiyo niŋ, nduyɛ piɔmndo bɛɛ nɔ lɛ niŋ nda kpaaya choo le.—Sɔɔŋ. 21:4.

9. Yɛɛ Chɛhowa cho yɛ mialaa nduaa kɔl le ma tosa?

⁹ Dikeŋnaŋ bɛndoo pila i cho ni, le waa mial Chɛhowaa o naa nduaa chalaa niŋ kanifuule, keŋ tosa miŋ nɔ chaŋyɛi kpɛɛluŋnde a ndu lefafɛɛŋ. Yɛɛ naŋ nɔ yɛ miŋ tosa le miŋ hiou lachi a waa mialaa Chɛhowaa? Le tamaseliiyo, te waŋndo veelu num pɛ o ndu lo bɛɛ, naapum ma yeema le sinaa nyɛ o cho num kɔl le tosaa wo. Naapum, o cho num kɔl le ma soli kɔvɛilaŋ te a wa pɛ luɛiyɔɔ. Nduyɛ ma chɛl a kɔllo kpou. O nɛi pilɛ koŋ choo, naa bɛɛ nɔ miŋ sina nyɛ Chɛhowa cho naa kɔl le miŋ tosa wo, le halikpeŋ miŋ hiou lachi a waa mialaa nduaa o naa nduaa chalaa niŋ. Kaala naŋ nɔ le Chɛhowa wo nyindu naa ni, le “sɔɔŋ nɛŋi ndu kɔllo woŋ” tosaa a kɔllo kpou. (Kolo. 1:10) Nduyɛ mi che bɛɛ chaaŋ naa Chɛhowa cho ni, kɛ ŋ nɔ miŋ sina vɛlɛ maa, Mɛlɛka naa a Finya naa o cho ni. Lelaŋ, ŋ nɔ miŋ ke ndu bɛɛleŋ. (Sam 25:14) Fɛɛŋ bɛɛ ŋ nɔ miŋ puɛɛnuŋ a hei okɔɔ le. Nduyɛ ŋ nɔ miŋ ke ndu bɛɛle yiŋgoloŋndeŋ teleŋ o teleŋ. Hei mala naa miŋ fafaŋ kaala tɛɛmbuu ndu kɔllo laŋ, nduyɛ miŋ wa lɔɔlɔɔ “o yoomu tusiaŋndo niŋ” a ndu.—Makal 6:8.

MI CHƐHOWA CHƆM O LƐŊNDE POLTEŊ NIŊ MAA O HƐLI ŊWAŊNDA CHIEE LE

10-11. Vɛɛ Chɛhowa bii yɛ Isɔluɛiya o lɛŋnde polteŋ niŋ Sanai, nduyɛ vɛɛ keŋ chɔm yɛ maa o hɛli ŋwaŋnda chiee le?

¹⁰ Chɛhowa chɔm yɛ yiɔɔ mialaa nduaa tɛɛŋ te. (Luomaŋ. 2:11) Miŋ che hei kpendekele te ŋ tofa pɛ mɛɛ o bii Isɔluɛiya o lɛŋnde polteŋ niŋ Sanai yɛ.

¹¹ Mɛɛ Chɛhowa soli wanaa nduaa o chɛleŋ niŋ Ichipi, mbo yulu wanaa soliaa lasalaa iso le ma wa wallo o tɛndii ndɔɔ niŋ. Mbo yulu vɛlɛ Livaiya iso, le walta cheleŋ tosaa o tɛndii koŋ niŋ. Baa mi Chɛhowa ke pa wanaa wa wallo o tɛndii koŋ niŋnda ɔɔ Isɔluɛiyaa wa ndu ikɛiya nyɛm ndaa hauba woŋ mbo hiau acheleŋnda? Sako. Chɛhowa hɛli ŋwaŋnda chiee le.

12. Yɛɛ Chɛhowa ndoo tosa yɛ le kaaleŋ Isɔluɛi kpou, le chɔmndo maa o hɛli ŋwaŋnda chiee le? (Ɛsɔdɔɔ 40:38) (Tofa vɛlɛ fotueiyo.)

¹² Wana o wana o lɛŋnde polteŋ niŋ, ndoo tiuba mbo nɔ chaŋyɛi kpɛɛluŋnde a Chɛhowa, o yɔŋ bɛɛ mi ndoo nɔ dikeŋnaŋ teŋgeŋndo le  wallo o tɛndii ndɔɔ niŋ, mbo wa ndu ikɛi ɔɔ mbo wa landaŋ a ndu. Le tamaseliiyo, mi Chɛhowa tosa a sabu le mi kaaleŋ Isɔluɛi kpou che yumbu yumbu ikpuŋgbaa o tɛndiiyo choo ipalaa, nduyɛ mi ndaa che paŋgele leyiŋndo lechoo ichɔl. (Nuawɔ Ɛsɔdɔɔ 40:38.) Te yumbu yumboo ndoo faŋaŋ pɛ o tɛndiiyo choo, mi wanaa wa landaŋ nda bɛɛ ndaa che, okoŋ ma dovi wolɔɔla ndalaŋ, ma puusiaa tɛndiila ndalaŋ, nduyɛ ma kuɛ o fondaŋ cheleŋ a Isɔluɛiya a tuaa latulu. (Nɔm. 9:​15-23) Mi nda kpou ndaa tuei vɛlɛ bulula tiɔɔŋnda ndaa hɔŋ choo choo kpeleŋndaŋ, le nda dimullo maa a nɔ ma kandu kɔlaŋ. (Nɔm. 10:2) A tonya, o yɔŋ bɛɛ mi waŋndo ndoo wa kpɛɛluŋ a tɛndii Mɛlɛkaa, keŋ ndii sim nuaa maa o nɔ chaŋyɛi kpɛɛluŋnde a Chɛhowa le. Kɛ, wana o wana o kaale leŋ niŋ wa miallo le Chɛhowa, nduyɛ nda kpou ndaa nɔ ma nɔ tiindaŋndo o nɛi ndɔ chɔmaa niŋ, a manda sɔvɛ o wa nda wo. O nɛi pilɛ koŋ choo, ba o ba naŋ wa o lɛŋndeŋ choo, naa kpou nɔ miŋ nɔ tiindaŋndo maa Chɛhowa kaala naa, nduyɛ maa o cho naa nyɛm naŋ hauba woŋ ke, mbo manda naa.

HAU BƐƐ, CHƐHOWA HƐLI ŊWAŊNDA CHIEE LE

13. Ɔɔ nɛiyo opilɛ o Chɛhowa chɔm hau maa o hɛli ŋwaŋnda chiee le wo?

¹³ Wanaa Mɛlɛkaa apum, cho o fondaŋnda leboltaŋ ɔɔ o lɛuvii Seiyaa Chɛhowaa ikɛi. Nduyɛ pɛŋ, apum cho wallo o fondaŋndaŋ ndaŋ. Le hei, mi waŋnda haa tosa walta bɔɔbɔɔ o fondaŋndaŋ ndaŋ, nduyɛ ma nɔ chaŋyɛi kpɛɛluŋnde a wanaa cho chilaŋ chuaa wa. O faŋaŋ okoŋ kɔɔli, apum cho buɛile ibuŋgaleŋ, ɔɔ walta cheleŋ tosaa o wali lɔɔlɔɔ teŋgeŋ Mɛlɛkaa niŋ. Kɛ Seiyaa Chɛhowaa a bɔɔbɔɔ sɔla wɔ dikeŋnaŋ le waltaŋ ndaŋ tosa le. Te lende i cho a num ni, mɛɛ nɔ tiindaŋndo maa Chɛhowa kaala mialaa nduaa kpou, nduyɛ o hini kɔl a nda. O sina nda a pilɛŋ pilɛŋnda vɛlɛ a bahawɛila ndalaŋ kanifuule, o buulaŋ le nda. (1 Pitɛ 5:7) Mi wanaa Mɛlɛkaa kpou sɔla nyɛm  mala nda le pɛɛkoo a ndu okɔɔ woŋ, nɛi chɔmaa a manda nda yeema wo.

14. Ɔɔ nyɛ cheleŋ chɔm maa Chɛhowa hɛli ŋwaŋnda chiee le wo?

¹⁴ Nɛi cheleŋ Chɛhowa chɔm maa o hɛli ŋwaŋnda chiee le wo cho ni maa, mbo tosa a sabu le mi waŋnda kpou o chieeŋndo choo sɔla Baabuiyo. O Hibuluiye, Aluamaikiiye a o Kilikiiye niŋ nda poonyiaa Diom Mɛlɛkaa o tasela ndɔ ni. Baa mi wanaa veelu diomndaŋ o Baabuiyo niŋ o sɔɔŋ maŋgalaŋ muŋ niŋnda nɔ pa chaŋyɛi kpɛɛluŋnde a Chɛhowa mbo hiou wanaa chiee sɔɔŋ muŋ te wa? Sako.—Maa. 11:25.

15. Yɛɛ Chɛhowa tosa yɛ vɛlɛ le chɔmndo maa o hɛli ŋwaŋnda chiee le? (Tofa vɛlɛ fotueiyo.)

¹⁵ O cho naa maa mɛɛ miŋ sina dɛnɛ tau ɔɔ miŋ chaa sɔɔŋ maŋgalaŋ bɔɔbɔɔ, malaŋ Chɛhowa hini kɔl a naa le. Mbo tosa a sabu le mi wana o wana o chieeŋndo choo sɔla taasi ndɔɔ, o cho ko wanaa sina dɛnɛ tau wa le. A hivi niŋ Diom ndɔɔ Baabuiyo o sɔɔŋ maŋgalaŋ o waalaŋ niŋ. Lelaŋ, wana o wana o chieeŋndo choo tiuba mbo sɔla tɔnɔɔ o pɛɛkula ndɔlaŋ niŋ, nduyɛ mbo pɛɛku mɛɛ o simnuŋ chaaŋ ndɔ yɛ.—2 Timo. 3:​16, 17.

HIOU LACHI A WAA MIAL CHƐHOWAA

16. A mɛɛ Walta Kiilaa 10:​34, 35 dimi yɛ, yɛɛ naŋ nɔ yɛ miŋ tosa le miŋ hiou lachi a waa mialaa Chɛhowaa?

¹⁶ Dikeŋnaŋ bɛndoo pila i cho ni, le mi Chɛhowa veelu naa o naa nduaa chalaa niŋ. O nɔ kɛndɛi a kaalaa mbo hiau wana o wana yiya mialla. Nduyɛ o chaa mialaa nduaa biyɔɔ. Le handɔɔ lechoo, o hɛli ŋwaŋnda chiee le. Mbo bii wana o wana kpeŋkpeŋ ba o ba ŋ wa. O hɛli mialaa nduaa le, o yɔŋ bɛɛ mi kɔɔlima ndaŋ, dɛnɛ sinaa ndaa, kɔɔle ndaleŋ, suɛi ndɛi maŋgalɛi, ɔɔ mi wɔsila ndalaŋ la ve nyɛ pilɛ le, hali a wa waŋpiaanduaa ɔɔ waŋlaanduaa. Kɛ wanaa diikuŋ sawala ndɔlaŋ nda kinɛi o chɛl ni le ma wa mialaa nduaa.—Nuawɔ Walta Kiilaa 10:​34, 35.

17. Yɛɛ naŋ cho yɛ pɛɛku o buŋgɛi cho lachi ve niŋ?

¹⁷ A mɛɛ Sam 15:1 dimi yɛ, mi Deeve nyuna Chɛhowa aa: ‘Oo Mɛlɛka Yaawɛɛ, o nɛɛ niaa ŋ chɛllɛ le ma luɛi o fondaŋ num chalaa niŋ? Pembii Saayɔŋ num ii diandɛi, o nɛɛ niaa ŋ chɛllɛ le wa lechoo?’ Mi Chɛhowa ke ndu nyina diandaa le mbo poonyiaa mulilaŋ le nyunalaŋ ndaŋ. O buŋgɛi cho lachi ve niŋ, ŋ cho pɛɛku a sɔɔŋ kpeekpei naŋ nɔ miŋ tosa woŋ ŋpum okɔɔ, ŋ mala naa le miŋ hiou lachi a waa mialaa Chɛhowaa wa.