KHANI YOFUNJEDA 23
NYIMBO 28 Tikhale pa Ubwenzi ndi Yehova
Yehova Unaanitana Ira Nikale Alendwae
“Tentanga inoza ikale vaari viwa. Miyo ndinoza ndikale Mulungwiwa.” — EZEK. 37:27.
VYEVYO NINAFUNJEDE IYO
Khanila inonitandiza ira nimuyamikelenga Yehova chifukwa yoniitana ira nikale Alendo mutentae yopipilisa koma teto chifukwa ya mwemo unanisamalelela liye.
1-2. Kodi Yehova unaona avi atumikae ororomeleya?
KODI Yehova uli ngati mbaani wanyo? Mwina munokoza someda ira, ‘Yehova ngu Babanga, Mulungwanga koma teto fwanga.’ Vikala teto mazina amo-iwa audindo anayo munaa-indi-ede nyo chito voonga vya Yehova. Komave, kodi moowambeela ganizelavo ira munokoza kala teto Mulendwae?
2 Mwene Davide ooyelekezela usamwali unoyo unakalavo vaari va Yehova na atumikae ororomeleya na usamwali unoyo unakalavo vaari va muthu na mulendo unoyo uitaniwile. Liye oofuka ira: “Nyo Yehova ngu mbaani unoyo unakale mulendo mutentinyu? Ngu mbaani unoyo unakale m’mwangwinyu opatuleya?” (Sal. 15:1) Mawu owandeliwa anala kanotonyi-eda ira ninokoza kala alendo a Yehova kapena ira afwae. Ngumwai watengo wavadimu kala alendo a Yehova.
YEHOVA UNAFUNA IRA NIKALE ALENDWAE
3. Kodi mulendo owambeela wa Yehova ali mbaani nanga, Yehova na mulendwae kavwa avi?
3 Yehova aanaambeele lenga vyongo vyetene ali ekave. Koma vathawi imo-iwa, liye oowachela Mwanae owambeela baliwa mutentae yopipilisa. Yehova oosangalala vinjinji muwachela Mulendwaela. Baibulo linaonga ira Yehova “oosangalala vinjinji” na Mwanae. Naliyene mulendwae owambeelola, ‘ookala osangalala vamaso vae thawi detene.’— Miya. 8:30.
4. Kodi ngu mbaani unoyo unaze akale mulendo mutenti ya Yehova?
4 Vanduli viwa Yehova oolenga Angelo anayo kakalile teto alendwae. Aliwa kanoromoliwa ‘a-ima a Mulungu’ ndipo Baibulo linofotokoza ira kanosangalala kala na Yehova. (Yob 38:7; Dan. 7:10) Wa chaka dinjinji, afwae a Yehova kali udimu oka wewo liye unakala liye. Vanduli viwa oolenga athu vailambwela anayo kakalile teto alendo mu tentae. Amo-i mwa alendwaela ali Inoki, Nowa, Abulahamu koma teto Yobu. Atumiki ororomeleya anala kanofotokoziwa ira kali afwae a Mulungu kapena ira athu anayo kaendile “na Mulungu owona.” — Gen. 5:24; 6:9; Yob. 29:4; Yes. 41:8.
5. Kodi ninafunjeda n’ni va ulosi wava Ezekiyeli 37:26, 27?
5 Wa chaka dinjinji Yehova ukala aitananga afwae ira kakale alendwae. (Welengani Ezekiyeli 37:26, 27.) Ulosi wa Ezekiyeli unotonyi-eda ira Mulungu unofunechecha ira atumikae ororomeleya kakale nae va usamwali wapama. Liye unolonjeza ira unoza apangena “pangano lamurendele.” Ulosi unola unoonga vya thawi ineyo athu anayo kan’na chiyembekezo yodowa udimu na athu anayo kan’na chiyembekezo yokala vailambwela, kanazeathu kagwilizane no kala “gulu limo-i” la nkhosa mutentae yopipilisa. (Yoh. 10:16) Thawi ineyo chinela.
MULUNGU UNONISAMALELA ULIWETENE WEWO NINAKALE IYO
6. Kodi muthu unapange avi ira akale mulendo mutenti ya Yehova, nanga kodi tentila inafwanyeya waani?
6 Wale, tenti yakala malo anayo muthu akalamo liye ira avume koma teto atetezeye uvyongo ngati liphevo, zuwa koma teto muzongwe. Navipeleka kala va usamwali na Yehova, ninokala alendo mutentae yopipilisa, ninofwanya yodja yauzimu yokwakwanela koma teto ninokala va usamwali wapama na amo-iwa anayo kali teto alendo a Yehova. (Sal. 61:4) Tenti ya Yehova kili udela limo-i loka. Munokoza dowa uilambo iliyetene mwina teto umisonkano dilukuludilukulu ndipo munodowa mwafwanye athu anayo kanasangalala kala mutenti ya Mulungu. Tenti ya Yehova inofwanyeya uliwetene wewo uli atumikae ororomeleya. — Chiv. 21:3.
7. Chifukwa n’ni ninaonge ira athu ororomeleya anayo kakwile kanokalave alendo mutenti ya Yehova? (Onani teto ithuzithuzi.)
7 Nanga bwanji vya athu ororomeleya anayo kakhwile? Kodi pivyovweya onga ira aliwa mbaalendo mutenti ya Yehova? Inde. Chifukwa n’ni ninaonga eno? Chifukwa Yehova unowaumbuwelave ndipo wa liye mba moyo. Yesu oofotokoza ira: “Vyoi okwa kanovenyi-iwa ngakale teto Mose oofotokoza mukhani ya takuru la minga, vevo aongile liye ira ‘Yehova ngu Mulungu wa Abulahamu, Mulungu wa Isaki na Mulungu wa Yakobo.’ Liye ngu Mulungu wa athu amoyo, ookala okwa, chifukwa wa liye etene mba moyo.” — Luka 20:37, 38.
Ngakale athu ororomeleya anayo kakwile kanokoza kalave alendo mutenti ya Mulungu (Onani ndima 7)
UPAMA OKALA ALENDO AYEHOVA KOMA TETO VYEVYO NINAFUNEYA IYO PANGA
8. Kodi alendo a Yehova kanapindula avi chifukwa yokala mutentae?
8 Mofwanafwana na tenti ineyo muthu unakalamo liye ira avume koma teto vitaalamo, navolowa mutenti ya Yehova ninotetezeya wu vyongo vyevyo vinaononge usamwali-u na liye koma teto ninokala na chiyembekezo. Napitiliza kala va usamwali na Yehova, Satana kanapange iliyetene ineyo inaniporoche mpakana walewale. (Sal. 31:23; 1 Yoh. 3:8) Yehova unoza apitilize teteza afwae ororomeleya wu vyongo vyevyo vinaaporoche mwauzimu ngakale teto uvyongo vyevyo vinapangi-e ira kakwe. — Chiv. 21:4.
9. Kodi Yehova unafuna ira alendwae kapengenga n’ni?
9 Onga vyoona, ngu mwayi ulukulu kala mulendo mutenti ya Yehova ndipo ninosangalala kala nae va usamwali mpakana walewale. Ndiye kodi ninafuneya panga n’ni ira nipitilize kala mulendwae? Ngati munaitaniwe unyumba wa fwinyu, munokoza funa iziwa vyevyo liye unafune liye ira mupange. Mwaisazo, unokoza funa ira mukurule sapato mwaanavolowe m’mba ndipo kamunakoonde. Mofwanafwana na vyevi, na iyene ninokoza funa iziwa vyevyo Yehova unakonde liye ira athu anayo kanafuna kala alendo mutentae kapangenga. Konda Yehova unonilimbikisa ira nipangenga vyetene vyevyo ninawande iyo ira ‘nimusangalasenga va iliyetene.’ (Akol. 1:10) Koma teto ngakale ira Yehova ngu fwi-u, ninozindikila ira liye ngu Mulungu koma teto Babi-u ndipo ngofwanelela ira nimulemekezenga. (Sal. 25:14) Kanidiwalenga vyevi ndipo thawi detene nimuva-enga ulemu ulukulu. Vyevi vinokoza nitandiza ira nipewenga panga vyongo vyevyo vinamukumudwi-e. Eno ninofunechecha ira ‘niendenga movievi-a na Mulungwi-u.’— Mik. 6:8.
YEHOVA OOPANGA VYONGO MO-OKAANA SAKULO MUCHIPULULU
10-11. Kodi Yehova unatonyi-eda avi ira kan’na sakulo vopanga vyongo na Aizaraeli mu chipululu ya Sinai?
10 Yehova unopanga vyongo mookana sakulo na alendwae. (Arom. 2:11) Ninoona umboni wa vyevi naganizela mwemo apangela liye vyongo na Aizaraeli muchipululu ya Sinai.
11 Angavulumuchile athwae wu ukapolo mu Iguputo, Yehova oosakula asembe ira katumikelenga va ihema. Alevi koova-iwa chito do-iyana iyana va ihema yopatuleya. Kodi anayo katumikela va ihema koma teto athu anayo kakala vakwiikwi na ihemeyo koosamaleliwa pama na Yehova posa athu amo-iwa? Naari. Ninaonga eno chifukwa Yehova kan’na sakulo.
12. Kodi Yehova atonyi-edile avi ira kan’na sakulo vopanga vyongo na Aizaraeli anayo kaali Alendwae? (Ekisodo 40:38) (Onani teto ithuzithuzi.)
12 Mwiizaraeli uliwetene ookaana mwayi wokala va usamwali wapama na Yehova mo-olandela ira apanga utumiki umo-iwa wavadela kapena teto akala vakwiikwi na ihema. Mwaisazo, Yehova oowonechecha ira Aizaraeli etene kawandenga wona vyongo vyodabwi-a monga murambo koma teto ipilala ya mulo vyevyo vyakala vadimu va ihema. (Welengani Ekisodo 40:38.) Murambo wambeela enda, ngakale athu anayo kaali undendayi vinjinji na ihema koowanda uwona, nowambeela longeza katundu koma teto pasula matenti nomaruwela limo-i na afwiwa. (Num. 9:15-23) Athu etene koowanda vwa wula wa malipenga ambiili asiliva otonyi-eda ira uliwetene amaruwe. (Num. 10:2) Veva pivyooneya ira kala vakwikwi na ihema kawali umboni wotonyi-eda ira muthu uli va usamwali wapama na Yehova. M’malo mwiwa, Mwiizaraeli uliwetene ookoza kala mulendo mutenti ya Yehova ndipo liye erenga musogolela ndipo teto muteteza. Malambwano teto, kaya ninakala waani Yehova unonikonda, nisamalela koma teto niteteza.
Vyevyo vyaireya va ihema vinotonyi-eda ira Mulungu kan’na sakulo (Onani ndima 12)
MWEMO YEHOVA UNATONYI-EDELA LIYE IRA KAN’NA SAKULO MALAMBWANO
13. Kodi Yehova unatonyi-eda avi ira kan’na sakulo malambwano?
13 Athu amo-iwa a Mulungu malambwano kanakala va kwikwi na likulu li-u kapena ofesi ya tambi. Ndipo amo-iwa kanatumikela wewo. Eno aliwa kanopangana vinjinji vyevyo vinaireya m’malo anala koma teto kanogumana na abali anayo kanasogolela. Vikala teto amo-iwa anayo kanatumikela ngati oing’anela madela kapena kanapanga utumiki umo-iwene wathawi detene. Koma ngati muli mugulu la athu anjinji anayo katin’na mwayi unola, iziwani ira Yehova unouwonanive ira muli Mulendwae ndipo unoukondani etene. Liye unosamalela n’tumikae uliwetene. (1 Pe. 5:7) Athu etene a Mulungu kanoachela yodja yauzimu, malangizo koma teto itetezo ineyo kanafuneathu.
14. Kodi chiisazo imo-i iivi yotonyi-eda ira Yehova kan’na sakulo malambwano?
14 Isazo imo-iwa yotonyi-eda ira Yehova kan’na sakulo malambwano choi unotandiza athu vailambo yetene ira kafwanye Baibulo. Malemba Opatuleya koolembiwa muviongelo viralu: Chiheberi, Chiaramu na Chigiriki. Kodi athu anayo kanaonga pama viongelo vyowambeelavi mbanayo kanakala va usamwali wapama na Yehova posa amo-iwa? Naari kai eno. — Mat. 11:25.
15. Kodi ngu umboni umo-i uuvi wotonyi-eda ira Yehova kan’na sakulo? (Onani teto ithuzithuzi.)
15 Yehova kananiitana ira nikale alendwae chifukwa yoi noofunjeda vyongo vinjinji kapena ninoiziwa viongelo vyowambeela vya m ‘Baibulo. Eno liye unolola ira athu vailambo yetene kaiziwe zelu dae, kaya mbaathu ofunjeda kapena naari. Baibulo lelo ti mawae limasuleliwa muviongelo vinjinji ndipo athu vailambo yetene kanokoza pindula na vyevyo linafunji-aathu koma teto kanokoza iziwa vyevyo kanapangeathu ira kakale afwae.— 2 Tim. 3:16, 17.
Kodi fwanyeya wa Baibulo muviongelo vinjinji unatonyi-eda avi ira Mulungu kan’na sakulo? (Onani ndima 15)
PITILIZANI KALA ALENDO A YEHOVA
16. Mogwilizana na Vyoira 10:34, 35, kodi ninapange avi ira nipitilize kala alendo a Yehova?
16 Ngu mwayi ulukulu kala alendo a Yehova mutentae yopipilisa. Liye unowachela Alendwae mooma murima, mwachikondi koma teto unowasamalela pama vinjinji. Onjedela vevo liye ngo-okaana sakulo ndipo unowachela uliwetene vo-olandela wewo unakala liye, ikalelo, maphuzilwae, m’tundu usinku kaya teto ngu mulombwana kapena mu-iyana. Komave mba athu oka anayo kana-arela makundwae anayo unaawachela liye monga alendwae. — Welengani Vyoira 10:34, 35.
17. Kodi ninafwanye waani makundo oonjedela anayo kananitandize kalave alendo mutenti ya Yehova?
17 Monga vyevyo vilembiwile va Salimo 15:1, Davide oofuka ira: “Nyo Yehova, ngumbaani unoyo unakale mulendo mutentinyu? Ngu mbaani unoyo unakale m’mwangwinyu wopatuleya?” Wolemba masalimola oowandeliwa teto lemba mayanko a mafuso anala. Khani yo-arela inofotokoza vimo-i vyevyo ninafuneya iyo panga ira nipitilize sangalasa Yehova koma teto kala afwae.
NYIMBO 32 Khalani Okhulupirika kwa Yehova
