1-2. Ntia ndombolo Yehova kasiri kwe bisari biandi bia kwikama?

 TALA ti muntu kuyuriri, Yehova ni nani? Bwe lendi tâ? Lendi tâ: ‘Yehova ni Tata’ani, Nzambi’ani, na Ndiku’ani.’ Lendi bâ mpe na mpila zakaka za zonzela Yehova. Ngano lumbu lendi tâ ti Yehova ni Yandi ku rtumisi?

² Mutinu Davide wafwanakasa tindiku tie ha kati dia Yehova na bisari biandi bia kwikama, na tindiku tie ha kati dia muntu wu tumisi na bantu bakatumisi. Yandi wayula: “Ô Yehova, nani tumisa [tikisa] mu nzo’aku [tivula tiaku]? Nani lendi bâ mu mongo’aku wa santu?” (Mik. 15:​1, NWT) Verse yitulongese ti, tulendi bâ bantu Yehova bakatumisi—mpila mosi ndiku zandi. Ngano ka yena ndombolo ya yinene ko yitûkiri kwe Yehova?

YEHOVA ZOLOLO TI TABÂ BANTU BAKATUMISI

3. Ngano muntu wa ntete Yehova wu katumisa ni nani, mpe bwe Yehova na muntu wu katumisa beri monaka?

³ Ntete Yehova kabatika mu yirika bima biabiansoni, Yandi kaka wabâ. Kâ ha manima, wayirika Mwana’andi wa ntete. Yehova wabâ ntiana muntu wu tumisi Mwana’andi mu nzo’andi mpe nsayi yatomo mu baka bu kasila bo. Bibila ditêle ti Yehova “watomo zolo” Mwana’andi, mpe Mwana’andi “ha matu ma [Yehova] keri yangalalaka ntangu zazansoni.”—Bin. 8:​30, NWT.

4. Ha manima, banani Yehova katumisa mu bâ mu nzo’andi?

 ⁴ Ha manima, Yehova wayirika mbazi zakaka, bawu mpe wabalomba mu bâ bantu bakatumisi. Mbazi zo “bala ba Nzambi” batâka zo. Bibila disongele ti ha lweka lwa Yehova bayangalalaka. (Yobe 38:7; Dan. 7:10) Tûka ntangu yayingi, bô kwa beri bâka na Nzambi ku zulu beri ndiku zandi. Ha manima, wayirika bantu, bawu mpe balendi bâ bantu bakatumisi mu nzo’andi. Ha kati dia bantu bakatumisa mwa bâ Enoke, Noa, Abrahame, na Yobe. Bibila disongele ti ndiku za Yehova zeri mu bungu ti Yandi beri tumamanaka.—Mba. 5:24; 6:9; Yobe 29:4; Iza. 41:8.

5. Nti tuta longoka mu mbikululu ye mu Ezekiele 37:​26, 27?

⁵ Mivu bu mieri kwe yôke, Yehova watatamana mu lomba kwe ndiku zandi mu bâ bantu bakatumisi. (Tanga Ezekiele 37:​26, 27.) Mu tifwani, mbikuri Ezekiele tusongele ti Nzambi zololo ti bisari biandi bia kwikama biabâ na tindiku tia ngolo na Yandi. Yehova kanisini mu sa “luwawanu lwa tidzunu na bawu.” Mbikululu yo, ntangu yita zonzela bantu bê na tivuvu tia kwe bâ ku zulu, na bô bê na tivuvu tiabâ ha mutoto yi bakwizi bâ mu bumosi mu nzo ya Yehova mu kwizi bâ ‘twila dimosi.’ (Za 10:16) Ntangu yo yafweni!

KWAKWANSONI KU TUBÂ NZAMBI BETO KAKIPAKA

6. Bwe bantu bakaka bakwizi bêlaka bantu babatumisi mu nzo ya Yehova, mpe nzo yo ntia kûma yena?

⁶ Mu ntangu ya ntama, tivula peleko nzo, mbuka yabâ ya humina peleko yeri kengerelaka muntu mu mvula peleko mu mwini wa ngolo. Muntu wubatumisaka mu nzo yo lendi kekolo ti muntu wo wumutumisi katomo mu kipa. Bu tuhanaka luzingu lweto kwe Yehova, tweka bantu bakatumisi mu nzo’andi. (Mik. 61:4) Bidia bia timpeve biabingi tubakaka mpe tintwari tubâka na bantu bakaka babatumisi kwe Yehova. Bantu ba nsi zazansoni balendi bâ bantu Yehova bakatumisi mu nzo’andi. Kampe nzietolo wasiri mu nsi yakaka mu bungu dia tukutakanu twa tunene, mpe wabwabane na bantu bakaka bê na nsayi ya bâ mu nzo ya Yehova. Tala ti Yehova tusarilaka na kwikama kwakwansoni, tulendi bâ bantu bakatumisi mu nzo’andi mu mbuka ni mbuka yi tubêlaka.—Nza. 21:3.

7. Bwe tuzabiri ti bisari bia kwikama bia fwa bantu kwa batiri babatumisi mu nzo ya Yehova? (Tala mpe tifwani.)

⁷ Bwe tulendi tâ mu bisari bia kwikama bia  fwa? Ngano tulendi tâ ti bantu babatumisi mu nzo ya Yehova kwa batiri? Yee! Mu bungu dia nti tuta têla bo? Mu bungu ti bantu bo ba moyo batiri mu nsimu ya Yehova. Yezu watâ: “Mu musamu wutariri mvumbukulu ya bantu bafwa, Mose yandi beni wasongela wo mu tinsamu tia muti wa nsende bu katâ Yehova ‘Nzambi ya Abrahame, Nzambi ya Izake na Nzambi ya Yakobe.’ Yandi kena Nzambi ya bantu bafwa ko, kâ ya bantu ba moyo, mu bungu ti kwe Yandi bawu ba moyo bena babansoni.”—Like 20:37, 38, NWT.

NTIA NDANDU TUBAKAKA, KÂ MPE NTI TUFWETI SA

8. Ntia ndandu tubaka bu tubâ mu nzo ya Yehova?

⁸ Ntiana kwa nkatika nzo yilendi bâ mbuka ya humina peleko ya swamina, nzo ya Yehova mpe nkengololo yihanaka mu mpeve za mbi na mu maniongo kwe bantu bakatumisi. Tala ti tutatamane mu bâ penepene na Yehova, Satana ka lendi’â katumwisa mpasi ko mankululu. (Mik. 31:23; 1 Za 3:8) Mu nza ya môna, Yehova mbo katatamana mu kengerela ndiku zandi za kwikama mu mpeve za mbi kâ mpe mu lufwa.—Nza. 21:4.

9. Ntia ndiatulu Yehova kakekoloko kwe bantu bakatumisi?

⁹ Diangana bweso bwa bunene bwena bwabâ bantu Yehova bakatumisi mu nzo’andi. Tulendi bâ na tindiku tia ngolo na Yandi tilendi zingila mankululu. Nti tufweti sa tala ti tuzololo tatatamana mu bâ bantu Yehova bakatumisi? Tala ti muntu ku tumisi kwe yandi, mbo dinga ti wazaba misamu mi kata kekolo mu nge. Mu tifwani, lendi dinga ti wakatula mapapa maku ntete wakota mu nzo, mpe mbo yirika wo na nsayi yayansoni. Mpila mosi mpe, tuzololo tazaba misamu mita kekolo Yehova mu beto ngatu tatatamana mu bâ bantu bakatumisi mu nzo’andi. Luzolo lweto mu Yehova beto lutumaka mu sa miamiansoni mi tulenda mu tomo mu yangirika. (Kol. 1:10) Mpe, tala ti Yehova ntiana ndiku’eto tumubongelaka, tuzebi mpe ti Nzambi’eto yena na Tata’eto di tufweti zitisa. (Mik. 25:14) Kani kabwe ka tufweti’â tazimbakana musamu wo ko, mpe ntangu zazansoni tufweti bâ na buzitu bwa ngolo kwe Yehova. Buzitu bo mbo butubakisa mu lembo bâ na ndiatulu yimufwemesa. Tuzololo ti ntangu zazansoni “tadiatila na Nzambi’eto bu tukwe zabi ndilu zeto.”—Mika 6:​8, NWT.

YEHOVA WABONGELA BALA BA ISRAELE NA KONDO KWA TIHAMBULA

10-11. Bwe Yehova kabongela bala ba Israele ku sese dia Sinayi, mpe bwe musamu wo wuta songela ti kena na tihambula ko?

¹⁰ Yehova kena na tihambula ko mu mpila yi kabongelaka bantu bakatumisi. (Rom. 2:11) Tulendi tomo bakula kondo kwa tihambula kwa Yehova bu tutala mpila yi kabongela bala ba Israele ku sese dia Sinayi.

¹¹ Bu kamana kûla kanda diandi ku bungamba ku Ezipte, Yehova watumba Banganga-Nzambi mu sala ku tabernakle. Yehova wahana dema kwe Balevite dia kipa bisalu biakaka ku tabernakle. Ngano bô beri salaka ku tabernakle, peleko bô beri bâka penepene na tabernakle ndandu zakaka beri bakaka kwe Yehova yôka bantu bakaka? Kâni! Yehova kena na tihambula ko.

12. Bwe mpila Yehova yi kabongela bala ba Israele ku sese yita songela ti kena na tihambula ko? (Ndukulu 40:38) (Tala mpe tifwani.)

¹² Muna Israelite lenda diabâ nandi dia bâ na tindiku tia ngolo na Yehova ni bu sa ti ku tabernakle keri salaka peleko kâni, mpe ni bu sa ti nzo’andi penepene yabâ na tabernakle  peleko kâni. Mu tifwani, Yehova wasa ti kanda diadiansoni dia Israele diamona tuti na kunzi dia tiya dieri ha zulu tabernakle. (Tanga Ndukulu 40:38.) Tuti dio bu dieri sobaka mbuka, bô babâ mala na tabernakle lenda diabâ nawu dia mona dio mpe. Ha manima lenda diabâ nawu dia kutika bima biawu, dia vula bivula biawu na dia telama mu kwenda tintwari na kanda diadiansoni. (Lut. 9:​15-23) Bantu babansoni lenda diabâ nawu dia wâ lwaza lwa mpungi za arza zi beri sikaka zeri ba zabikisaka ti bafweti kwenda. (Lut. 10:2) Diangana, ka wena ko ti mu bungu ti muntu penepene keri bâka tabernakle, ni wo weri saka ti kabâ na tindiku tia ngolo na Yehova. Kâ muna Israelite lenda diabâ nandi dia bâ muntu Yehova wukatumisi na dia bâ na lukwikulu ti zololo kamutwarisa mpe kamukengerela. Mpila mosi mpe lumbu ti, mbuka ni mbuka yi tubêlaka ha mutoto, Yehova beto kazololo, beto kakipaka mpe beto kakengerelaka.

MU NTANGU YA BETO MPE YEHOVA KENA NA TIHAMBULA KO

13. Bwe Yehova kata songela ti kena na tihambula ko lumbu ti?

¹³ Bisari biakaka bia Nzambi bibâka penepene na biro ya yinene ya Mbangi za Yehova peleko na filiale yakaka. Bakaka ni kô basarilaka. Buna, bantu balendi sala bisalu biabingi bi salamaka kûna, tintwari na mpangi zo zitwarisaka. Bakaka mpe minkengi mia bizunga miena, peleko mu bisalu biakaka bia ntangu zazansoni bena. Tala ti mu mulonga wa bisari biabîngi wena bilembolo mu tisalu tia ntangu zazansoni, bambuka ti Yehova bantu babansoni bakatumisi katambulaka. Mpe babansoni kakipaka. (1 Pi. 5:7) Kanda diadiansoni dia Nzambi bidia bia timpeve dibakaka, lutwalusu na nkengololo ye nawu nsatu.

14. Ntia tifwani tiakaka tita songela ti Yehova kena na tihambula ko?

¹⁴ Mpila yakaka yita songela ti Yehova kena na tihambula ko, ni mu bungu ti wasa ti  bantu babansoni ba mu nza babâ na lenda dia tanga Bibila. Ku mbatukulu, Matsonoko ma santu mu mazu matatu batsonekena mo: Hebre, Arameye, na Greke. Ngano bantu bô bazebi tanga mazu mo ma ntama tindiku tia ngolo tie nawu na Yehova yôka bô bazebi lembo tanga mazu mo? Kâni, ka wena bo ko.—Mat. 11:25.

15. Nti bita songela ti Yehova kena na tihambula ko? (Tala mpe tifwani.)

¹⁵ Ka lukolo’â ko lu tasa peleko mazu ma tuzebi bisaka ti Yehova katutambula ntiana ndiku zandi. Kani kahana kwa ndwenga zandi kwe bô basa lukolo lwa lula, Yehova za kahanaka kwe bantu babansoni ha mutoto ni bu sa ti lukolo lwa lula basa peleko kâni. Zu dia Nzambi, Bibila, mu mazu mamingi babangula dio; buna, bantu ba mu nza yayansoni lenda die nawu dia baka ndandu mu ndongosolo ze mu kati na mu longoka bwe balendi bêla ndiku za Nzambi.—2 Tim. 3:​16, 17.

TATAMANA MU BÂ MUNTU YEHOVA WU KATUMISI

16. Tintwari na Bisalu 10:​34, 35, bwe tulendi tatamana mu bâ bantu Yehova bakatumisi?

¹⁶ Bweso bwa bunene bwena ti Yehova katutambula ntiana bantu bakatumisi mu nzo’andi peleko tivula tiandi. Yehova, yandi tu tumisi yôkele mu nsayi, mu luzolo, na mu ndiambu mu mpila ya nzitukulu. Kena na tihambula ko mpe beto bansoni katambulaka ntono mbuka ni mbuka yi tubêlaka, tikulu tieto, lukolo lu tasa, mukanda nitu’eto, kanda dieto, ntûkulu zeto, mvula zeto, peleko babakala twena peleko babakento. Kâ, bô kwa batumamanaka mu mitieno miandi katambulaka ntiana bantu bakatumisi.—Tanga Bisalu 10:​34, 35.

17. Kwe tulendi bakila nsangu zakaka mu mpila yi tulendi bêla bantu Yehova bakatumisi mu nzo’andi?

¹⁷ Mu Mikunga 15:​1, Davide wayula biyuvu ebi: “Ô Yehova, nani tumisa [tikisa] mu nzo’aku [tivula tiaku]? Nani lendi bâ mu mongo’aku wa santu?” Ha manima, Yehova wasarila Davide mu hana mvutu mu biyuvu bie mu Mikunga 15. Mu timoko tita landa, mbo tutaluzula misamu mi tulendi yirika mu tâ Yehova nsayi na mu tatamana mu bâ bantu bakatumisi.