1-2. Yova ká ngbá lo nzi chi ndima tøni ro njínji ndi dho ná ndrŭ tso?

 NJATI ddikpa ke dhuri ni tso, ‘Ni dho ká Yova kʉ ie,’ ró ká ni ka ni pori ngbǎ? Njaro ni ka ni pori, ‘Yova kʉ madzá Baba, madzá Mungu ndirigoti madzá Kau.’ Ni ka ni nzi Yova nja heshima dhi dho na maddi. Nde, ni ká adi Yova nja lʉ adi kó ná ke bbai maddi?

² Pi Daudi ddingʉe ngbá ngatsi ma Yova ma kana nga e chøchø ndidzá chi tøni ná njí dhi ndrŭ na nari, lʉ kó ná ke ma kana nga e ndi ró lʉ na nari na. Ke dhungʉeri: Ee Yova, ie ká ka ndi é lʉ nidzá hema nǎ? Nidzá takatifu kʉ ná ngø tsɨ djó ká ie ka ndi di? (Zb. 15:1) Roho dda chutso dho ná følo ridho nari kʉ, ri ka ndi kaka ko é Yova ró lʉ, føri na mana kʉ ko é kedzá kau. Føri kʉ bbo pli kʉ ná pendeleo.

YOVA ADI RIJI KO É NDI RÓ LɄ

3. Yova ró ya kwanza lʉ ká ngʉe ie ndirigoti Yova ma, ndi ró lʉ ma na ka adi ndima mbu ndima kana ngbaribbai?

³ Krʉ kʉ ná ritsi ndi no nari njí Yova ngʉe ddiro. Ro, luti ke kongʉe ndidzá ya kwanza gøngʉeni ná ngba ndidhó loroji dhi hema na ndirigoti Yova bangʉe hwè bbo fø ndi njingʉeri nari dho. Biblia ripo, Yova “jingʉe ndidhi Dduna bbo.” Ndirigoti kedhi Dduna ngʉ adi “hwè nji [Yova] njí krʉ ddo ró.”​—Mez. 8:30.

4. Luti ká Yova nzingʉe ie ma ndima é ndi ró lʉ ndidzá hema nǎ d’e?

⁴ Luti Yova nongʉe malaiká ndirigoti ke nzingʉe kpa  ndima é ndi ró lʉ. Biblia nzi malaiká “Mungu dzá nzø” ndirigoti ri pori nari kʉ, kpa e hwè na Mungu na ndima kʉ ddinga nari dho. (Yob. 38:7; Da. 7:10) Cho bí kana Mungu ró lʉ ngʉe nari ngʉe ra nǎ ke ma ngʉ di na ná kpa dhé. Luti ke nongʉe ndrŭ dz’ djo ndirigoti kpa ngʉngʉe ke ró lʉ. Fø lʉ kana nja kpa ro ngʉe Enoko ma, Noa ma, Abrahamu ma, Yobu ma na. Biblia dhori nari kʉ kpa ngʉe Mungu dhó bbakau dhonalo kpa ngʉ adi ngarr ke dho.​—Mwa. 5:24; 6:9; Yob. 29:4; Isa. 41:8.

5. Ezekieli 37:26, 27 nǎ kʉ ná unabi nǎ ro ká ko ka ko ba ngbá somo?

⁵ Cho bí kana Yova rangʉe anzi dhé ndidzá bbakau ndi nzi ndima é ndi ró lʉ nari na. (Azø Ezekieli 37:26, 27.) Loroji na, Ezekieli dzá unabi nǎ ko churi nari kʉ Mungu jiri chi tøni ndi dho ná ndrŭ ma kana nga é chøchø ndi na. Ke tsoni ndi nji “ngoi dhi koddo kpa na.” Fø unabi tilo ra nǎ ngab’odha na kʉ ná ndrŭ ma, dz’ djó ngab’odha na kʉ ná ndrŭ ma na tso si gbani ddi loroji dhi hema na ndima é “ddikpa tso gbani ná chembø kpari” nari djo. (Yoh. 10:16) Fø lo njini nji njʉ!

MUNGU ADI KO RONGA B’OB’O NJATI KO É NGBAGA MA RÓ

6. Yova ró lʉ ká le adi ngʉ ngbaribbai kedhó hema na ndirigoti kedhó hema ká le ka le ba ngbaga?

⁶ Drrdrr hema nǎ ndrŭ ngʉ adi ndima ronga chʉ ndirigoti ri ngʉ adi ndrŭ ronga b’o dji ró inga bbo ká ná dyi ró. Hema na si ná lʉ ka ndi jieri ndi ronga b’oni b’o. Njati ko bbʉ ko Yova dho ró, ko adi ngʉ ke ró lʉ kedhó loroji dhi hema na. (Zb. 61:4) Ko adi kodhó lo u ndiro ko kana kau é kpakpa Yova na d’e ná kiroho nǎ nyo ba bbo ndirigoti ko e kau b’lo ngʉ Yova ró lʉ ná nja ndrŭ na. Krʉ ngø nǎ ndrŭ ka ndima ngʉ ngbà dhé Yova ró lʉ kedhó hema na. Ni ro ká rarie bbi d’i ngø na b’lo, njaro ni rangʉe asamble na, ro ni njungʉe hwè na kʉ Mungu dhó hema nǎ ndima kʉ nari dho ná nja ndrŭ na. Njati rie nì ko njínji Yova dho chi ko tøni ro ró, ko ka ko é ke ró lʉ kedhó hema nǎ rie ngbaga ma ko di ri ró.​—Ufu. 21:3.

7. Addudho ká ko ka ko pori nari kʉ, chi tøni Yova dho ná ndrŭ kʉ ke ró lʉ godhé rie che ma kpa cheni ri ro? (Anja ji maddi.)

⁷ Ko ká ka ko po addu che cheni ná chi tøngʉeni Yova dho ná ndrŭ djo? Ko ká ka ko pori kpa kʉ godhé Yova ró lʉ  kedhó hema nǎ? Go o! Ká addudho ko ripo fø? Dhonalo Yova adi kpa ngano go kʉ shi nari bbai. Yesu pongʉeri: “Che cheni ná ndrŭ si gaga, Musa ndi ndiro dho fø lo pʉlʉpʉlʉ kpele dhi kuku djo tilo ná lo nǎ, ke nzingʉe Yova, ‘Abrahamu dzá Mungu, Isaka dzá Mungu ndirigoti Yakobo dzá Mungu ná saa na.’ Ke nga kʉ, che cheni ná ndrŭ dhi Mungu ri, ro shi di ná ndrŭ dhi Mungu, dhonalo ke nyǒ djó kpa krʉ kʉ shi.”​—Lu. 20:37, 38.

KO ADI BA NÁ FAIDA NDIRIGOTI RINGANI KO NJÍ NÁ LO

8. Ko ká adi ngbá faida ba Yova dhó hema nǎ ko kʉ nari nǎ ro?

⁸ Hema nǎ le adi le ronga chʉ ndirigoti ri adi le ronga b’o nari bbai, Yova dzá hema nǎ kʉ ná ndrŭ ronga ke adi b’o krʉ ka ndi sa kpa kana kau ndi na ná lo ró ndirigoti ke bbʉ bbʉbbʉ kʉ ná ngab’odha kpa dho gosi ná saa djo. Njati rie nì ko kana kau kʉ chøchø Yova na ri ró, Shetani nzá ka ndi njí theinga dho ka ndi vó ko ronga ná lo ro ri. (Zb. 31:23; 1 Yo. 3:8) Ø dz’ djó Yova si ra anzi dhe ndidzá chi tøni ná bbakau ronga ndi b’o nari na nga kiroho nǎ dhe ri, ro dhe ró maddi.​—Ufu. 21:4.

9. Yova ká adi riji ndi ró lʉ kʉ ná ndrŭ é ngbǎ di ná nyi na?

⁹ Bbʉbbʉ dhé, Yova ró lʉ le kʉ kedhó hema nǎ ná føri kʉ bbo pli kʉ ná pendeleo. Ko kana nga ka ndi é chøchø ke na theinga dho. Kodhó nyi dho ká ringani ndi é ngbaribbai ndiro ko má Yova ró lʉ d’e? Njati ddikpa ke nzi ni ndi bba ró, ni adi riji ni chu ke ji ni njí ná lo. Loroji na, ke ka ndi jiri ni tu ni ko ró ss tu ndi bba ni tsu ná saa djo, ndirigoti ni ka ni njí fø lo ji ni nanga ji ni ro. Føri bbai, ko adi riji ko chu Yova ká jiri ko njí addu ma nari ndiro ko é ndi ró lʉ ndidzá hema nǎ d’e. Ko ji Yova nari adi ko ronga cho ko njí ko dho ka ná lo krʉ ndiro ko “bbʉ hwè ke dho kaka ná ngatsi” d’e. (Kol. 1:10) Ndirigoti Yova dzá kau ko kʉ nari kana ko churieri chu nari kʉ, ke kʉ kodhi Baba, kodhi Mungu ndirigoti ri kaka ko bbʉ heshima ke dho. (Zb. 25:14) Fø longa nzá ringani ko vi ri ndirigoti krʉ ddo ró ringani ko di heshima bbʉ bbo ke dho. Fø lo adi ko tsotso kó nzɨ ko nji njedha ka ndi bbʉ ke dho ná nyi. Bbʉbbʉ dhé, ko adi riji “ko bbi kiasi na” kodhi Mungu na.​—Mik. 6:8.

YOVA NZÁ KRØNGɄE WAISRAELI NANGA RO RI

10-11. Sinai dhi ngødja nǎ ká Yova krøngʉe Waisraeli nanga nzá ngbaribbai?

¹⁰ Yova nzɨ adi ndi ró lʉ kʉ ná ndrŭ nanga ro krø ri. (Ro. 2:11) Ko ka ko chu fø lo Sinai dhi ngødja nǎ Yova njingʉe Waisraeli dho ná lo ró ro.

¹¹ Misri nǎ no tse nǎ ro Yova klongʉe ndidzá ndrŭ nari goti, ke lingʉe bbakuhani ndima di njínji tabenakulo nǎ. Ndirigoti ke lingʉe Walawi ndima di tabenakulo nǎ nja njínji. Nde, tabenakulo nǎ njínji ndirigoti chøchø di ri kuso lu ná ndrŭ ronga ká Yova ngʉ adi b’o nja ndrŭ djolu pli? Nzɨ! Yova nzɨ adi ndrŭ nanga ro krø ri.

12. Waisraeli dho Yova njingʉe Sinai dhi ngødja nǎ ná lo ká Yova adi ndrŭ nanga krø nzɨ nari dhǒ ngbaribbai? (Kutoka 40:38) (Anja ji maddi.)

¹² Waisraeli kana ngʉe ná ndrŭ krʉ ka ndima ngʉe Yova dzá kau ngbà dhé, rie tabenakulo nǎ ndima njínji inga  nzɨ ma ndirigoti rie chøchø ma ndima kʉ ri kuso inga nga ma ró. Loroji na, Yova lingʉe ddù chulu tabenakulo djo ná ndundu ma, kazz dhi tødha ma na Waisraeli krʉ ngʉ adi njanja. (Azø Kutoka 40:38.) Njati ndundu ngá bbi tso tabenakulo djó ro ró, da kʉ ri kuso ro ná ndrŭ ma ngʉ adi ri njanja dhé. Føro kpa ngʉ adi ndima dhó ritsi tso gbá, ndima dhó hema nanga ko ndirigoti kpa ngʉ adi bbi tso nga nja ndrŭ na. (Hes. 9:15-23) Ndirigoti ndrŭ krʉ ngʉ adi feza dhi aro kʉ ná ngøga le mi ngbengbe nari rrrr ndiro ndima ngá bbi tso d’e. (Hes. 10:2) Bbʉbbʉ dhé, ri nga ngʉe le kʉ chøchø tabenakulo kuso nari dho i le kana nga ka ndi ée chøchø Yova na ri. Føri rɨngana, Israeli nǎ ndrŭ krʉ ngʉe Yova ro lʉ ndirigoti ndrŭ ngʉ adi ndima thí lili kedhó chutsoddadha ma, le ro ngab’odha ma na djo. Føri bbai, njati rie ngbaga ma ko di ri ró, Yova jirie ko ji, ke adi ndi dyu lili ko ro ndirigoti ke adi ko ronga b’ob’o.

YOVA NZƗ ADI NDRŬ NANGA RO KRØ NJɄ RI

13. Ká addudho ko ka ko pori nari kʉ Yova nzɨ adi ndrŭ nanga ro krø njʉ ri?

¹³ Mungu dzá ndrŭ kana nja ndrŭ kʉ njʉ chøchø Yova dzá Dimu dhó lo dhi bbò bbagʉ ro inga kpa kʉ tawi kuso. Ndirigoti nja ndrŭ adi njí nganga nji̇́ fø ngana. Føri adi rili, føga di ná ndrŭ nji bí kʉ ná njí ndirigoti kpa ro e kau ma nì dhé chutso ddá ná kpa na. Nja kpa kʉ waangalizi wa muzunguko ndirigoti nja ndrŭ krʉ saa ró le adi nji ná njí nji. Njati ni é nga ma bí kʉ ná fø ndrŭ kana ró, auri u nari kʉ Yova ji ni ji ndirigoti ni kʉ ke ró lʉ. Ke chu ni bblo pli ndirigoti ke adi nidhó lo u ná ritsi bbʉbbʉ ni dho. (1 Pe. 5:7) Yova adi kiroho nǎ nyo ma, chutsoddadha ma na bbʉ ndidzá  ndrŭ krʉ dho ndirigoti ke adi kpa ronga b’ob’o.

14. Yova nzɨ adi ndrŭ nanga ro krø ri nari ká ke dho nja ngbá chu nǎ?

¹⁴ Yova adi ndrŭ nanga krø nzɨ lu ná ddikpa chu kʉ ke liri dz’ djó ndrŭ krʉ zø Biblia. Takatifu kʉ ná maandiko le ndingʉe anziro gbo kʉ ná luga nǎ: Kiebrania, Kiaramu ndirigoti Kigriki nǎ. Fø luga nǎ ngʉ Biblia zø ná ndrŭ ma kana nga ká ngʉe chøchø Yova na nzá ka ndima zø fø luga ná ndrŭ djolu? Ri nga kʉ fø ri.​—Mt. 11:25.

15. Yova nzɨ adi ndrŭ nanga krø ri nari ká ngbá lo dhǒ? (Anja ji maddi.)

¹⁵ Yova nzɨ adi ko nzi ndidzá kau ko zønga bbo inga ko chu Biblia le ndingʉe anziro nǎ ná luga nari dho dhé ri. Føri rɨngana ke adi ndidhó nyodyu bbʉ dz’ djó krʉ kʉ ná ndrŭ dho, rie bbo ma kpa zønga, inga nzá ma ró. Kedhó roho ddangʉe chutso dho ná lo Biblia, le tafsiri maelfu kʉ ná luga nǎ; dz’ djolu gble kʉ ná ndrŭ adi faida ba ri ddi ná lo nǎ ro ndirigoti kpa ka ndima chu ngbaribbai ma ndima ka ndima ngʉ kedzá bbakau nari.​—2 Ti. 3:16, 17.

AMA YOVA RÓ LɄ

16. Matendo 10:34, 35 ripo nari bbai, ko ká ka ko má Yova ró lʉ ngbaribbai?

¹⁶ Yova ró lʉ le kʉ loroji dhi hema nǎ nari kʉ bbò pendeleo. Ke tsɨ d’arieni bbo, ke jirie ndrŭ bbo, ndirigoti ke adi lʉ kó bbo nzá djo ko ka ko ddinga ná ngatsi. Føri kina, ke nzɨ adi ndrŭ nanga ro krø ri, ke adi ndrŭ krʉ kó, rie ngbaga ma le kʉ, ngbaga ma le dhi, ngbabø ma le zønga, ngbá rangi na ma le kʉ, ngbá bbu ma le kʉ, ngbabø ma le dhó cho kʉ, isɨle inga kpetsi ma le kʉ ró. Ro, ke ró lʉ e nari kʉ nì ngarr ke dho ná ndrŭ dhé.​—Azø Matendo 10:34, 35.

17. Yova ró lʉ le kʉ kedhó hema nǎ nari djo ká ko ka ko ba lo ki ngbaga ro?

¹⁷ Zaburi 15:1 nǎ Daudi dhungʉeri ɨ: “Ee Yehova, ie ká ka ndi é lʉ nidzá hema nǎ? Nidzá takatifu ngø tsɨ djó ká ie ka ndi di?” Yova ddangʉe chutso Zaburi ndi ná ke dho ke ngʉ fø logoti d’e. Gosi ná lo nǎ ko si loti ko ka ko njí ná lo ro djo ndiro ko bbʉ hwè Yova dho ndirigoti ko má kedzá kau d’e.