1-2. Ino ncoolwe nshi Yehova ncaapa basebenshi bakwe bashomeka?

 INO inga mwakumbula buyani na muntu umwi wamwiipusha ayi, ‘Ino Yehova ngani kuli ndimwe?’ Mpashi inga mwakumbula ayi, ‘Yehova mbata, ngu Lesa wangu alimwi ngu Shicibusa wangu.’ Mpashi kuli maswi aamwi ngeenga mwasebensesha kwiita Yehova. Nacibi boobo, sa mulabona Yehova anga ngu Shikumutambula mbuli beensu bakwe?

² Mwaami Defedi wakakoshanisha bushicibusa Yehova mbwaacite abeshicibusa bakwe bashomeka, kubushicibusa buba pakati ka shikutambula beensu abeensu bakwe. Wakeepusha ayi: ‘No Yehova, anu ngani weenga wekala mu tente yanu? Anu ngani weenga wakonsha kwikala pakalundu kanu kasalalite?’ (Kulu. 15:1) Mulilembo ili tuleeya kwaamba ayi inga twaba beensu bakwe Yehova mu tente yakwe—nkokwaamba ayi kuba beshicibusa bakwe. Ici ncoolwe cinene abuumbi!

YEHOVA ALISUNI KWAAMBA AYI TUBE BEENSU BAKWE

3. Ino ngani wakalinga mweensu wakutaanguna wakwe Yehova, alimwi ino Yehova amweensu wakwe bakalinga kulinyumfwa buyani?

³ Yehova wakalingabo eenka kaatana kutalika kulenga shintu. Sombi paciindi cimwi, wakalenga Mwanaakwe mutaanshi kushalwa. Yehova wakalinga anga ngu Shikutambula beensu uyo wakeeta mweensu wakwe wakutaanguna kusa mu tente yakwe, alimwi wakasangalala kucita boobo. Baibo ilaamba ayi Yehova wakalinga ‘kumusuni abuumbi’ Mwanaakwe. Mweensu wakwe  wakutaanguna alakwe wakalinga ‘kusangalala pameenso akwe [Yehova] lyoonse.’—Tus. 8:30.

4. Ino mbaani bamwi bakaba beensu bakwe Yehova?

⁴ Ndipakeenda ciindi, Yehova wakalenga baanjelo akubeeta ayi babe beensu bakwe. Baibo ilatondesha ayi baanjelo balasangalala kuba pomwi a Yehova. (Jobo 38:7; Danye. 7:10) Kwamyaaka iinji abuumbi, beensu bakwe Lesa bakalingabo baabo mbwaakalaabo kwiculu. Mukuya kwaciindi, wakalenga bantu alimwi abalo bakaba acoolwe cakuba beensu bakwe. Bamwi pabaabo bakalinga beensu bakwe ngu Inoki, Nowa, Abulaamu a Jobo. Baibo ilatondesha ayi bakalinga beshicibusa bakwe Yehova mukwiinga bakalinga kumunyumfwila.—Mata. 5:24; 6:9; Jobo 29:4; Isa. 41:8.

5. Ino nshiinshi nsheenga tweeya kubushinshimi mbotucana pa Esekelo 37:​26, 27?

⁵ Kwamyaaka iinji, Yehova wakatolelela kwiita beshicibusa bakwe kwaamba ayi babe beensu bakwe. (Amubelenge Esekelo 37:​26, 27.) Kucakubonenaako, bushinshimi Esekelo mbwaakalemba bulatwiisha ayi Lesa alisunishishi ayi basebenshi bakwe bashomeka babe abushicibusa buyumu anguwe. Wakashomesha kupangana “cipangano ca luumuno ambabo.” Bushinshimi ubu bulaamba paciindi abo batolangila kuya kwiculu alimwi abaabo batolangila kukala pacishi capanshi ndyeshi bakabe “litanga lyomwi” mu tente yakwe yacikoshanyo. (Joni 10:16) Ici citocitika pacecino ciindi!

LESA ALATUBIKILAKO MAANO TACICITE MULANDU ANKOTUKALA

6. Ino nciinshi muntu ncaayandika kucita kwaamba ayi abe mweensu mu tente yakwe Yehova, alimwi ino ilacanika kuli?

⁶ Muciindi camu Baibo, tente ngomusena bantu mobakalinga kookeshela akushitilishikwa ku muuwo amfuula. Mweensu na watambulwa mu tente ya muntu umwi, wakalinga kulangila ayi uyo wamutambula atomulama kabotu. Na twaaba buumi bwesu kuli Yehova, tulaba beensu mu tente yakwe yacikoshanyo. (Kulu. 61:4) Tulatambula shakulya shakumushimu shiinji alimwi tulaba bushicibusa abamwi bakaba kale beensu bakwe Yehova. Bantu mushishi shoonse inga baba beensu mu tente yakwe. Mpashi mwakayawo kale kucishi cimwi mukucanika kukubungana kunene uko nkomwakacana bamwi basangalete kuba mu tente yakwe Lesa. Tente iyi ili kuli koonse kucanika basebenshi bakwe bashomeka.—Ciyu. 21:3.

7. Ino nceebonshi nceenga twaambila ayi basebenshi bakwe Yehova bashomeka abo bakafwa bacili beensu mu tente yakwe? (Amubone acikope.)

⁷ Ino mbuyani kubasebenshi bakwe Yehova bashomeka abo bakafwa? Sa bacili beensu mu tente yakwe? Ee! Ino nceebonshi nceenga  twaambila boobo? Mukwiinga Yehova acibeebaluka. Yesu wakaamba ayi: “Pacikani ca cikupu cakalinga kunyaka, alakwe Mose wakatondesha ayi bafu balaakubushikwa mukwiinga wakabanda Lesa ayi, ‘Ngu Lesa wakwe Abulaamu, wakwe Isaki alimwi awakwe Jakobo.’ Nkokwaamba ayi teshi Lesa wa bafu, sombi nguLesa wa boomi, kuli nguwe boonse mboomi.”—Luka 20:​37, 38.

SHOOLWE NSHOTUCITE ALIMWI ANSHOTWEELETE KUCITA

8. Ino nshoolwe nshi nshotucana ceebo cakuba mu tente yakwe Yehova?

⁸ Bweenka tente iine mbweenga yaba musena wakookeshelaamo akushitilisha baliimo ku muuwo amfuula, tente yakwe Yehova ilashitilisha beensu bakwe kucintu cili coonse ceenga canyonyoola bushicibusa bwabo anguwe akubacafwa kuba akulangila kwancinencine. Na twatolelela kuba abushicibusa buyumu a Yehova, taakuwo Satana nceenga wacita ceenga catunyonyoola kwamuyayaya. (Kulu. 31:23; 1 Joni 3:8) Mucishi cipya, Yehova alaakutolelela kushitilisha basebenshi bakwe bashomeka kuteshibo kushintu sheenga shanyonyoola bushicibusa bwabo anguwe, sombi akulufu.—Ciyu. 21:4.

9. Ino nshiinshi Yehova nshaalangila beensu bakwe kucita?

⁹ Ncoolwe cinene abuumbi kuba mweensu mu tente yakwe Yehova. Inga twaba abushicibusa buyumu anguwe ubo bweenga bwatolelela kwamuyayaya. Ino nshiinshi nshotweelete kucita kwaamba ayi tutolelele kuba beensu bakwe? Na muntu umwi wamwiita kuŋanda yakwe, inga mwasuna kucita shimusangalasha. Kucakubonenaako, mpashi inga wamulwiita ayi mufuule nsapato kamutana kunjila muŋanda, alimwi inga mwasumina kucita boobo. Aswebo tulisunishishi kushiba Yehova nshalangila baabo basuni kutolelela kuba beensu mu tente yakwe. Lusuno ndotucite pali Yehova lulatuyuminisha kucita shoonse nsheenga twacikonsha kwaamba ayi ‘tunomusangalasha lyoonse.’ (Kolo. 1:10) Ncakwiila kwaamba ayi Yehova ngu Shicibusa wesu, sombi ngu Lesa wesu alimwi Ishiwesu, uyo weelela kupekwa bulemu. (Kulu. 25:14) Lyoonse tulyeelete kunokwiibaluka cancine ici alimwi akutolelela kunoomulemeka abuumbi. Kumulemeka abuumbi kulaakutucafwa kuleya kucita shintu sheenga shamukalasha akutolelela “kweenda cakulibombya” a Lesa wesu.—Mika 6:8.

YEHOVA TAAKWE KUTONDESHA KASALULUSHI KU BENE ISILAELI

10-11. Ino Yehova wakatondesha buyani ayi taacitewo kasalulushi kwiinda mushintu nshaakalinga kucita kubene Isilaeli ndyebakalinga muluyanga lwa Sinayi?

¹⁰ Yehova tatondeshi kasalulushi ku beensu bakwe. (Loma. 2:11) Inga twabona mbwaatacite kasalulushi na twaboona shintu nshaakalinga kucita ku bene Isilaeli ndyebakalinga muluyanga lwa Sinayi.

¹¹ Pesule lya kulubula bantu bakwe kuswa mubusha mu Ijipiti, wakasala bapailishi kwaamba ayi banoosebensela pa tente yakulambililaako. Bene Lefi bakapekwako ncito shimwi pa tente iyi isalalite. Sa Yehova wakalinga kubalama kabotu abuumbi abo bakalinga kusebensela pa tente yakulambililaako na abo bakalinga kukala pafwiifwi anjiyo, kwiinda mbwaakalinga kucita kubamwi? Sobwe! Yehova taacitewo kasalulushi.

12. Ino Yehova wakatondesha buyani ayi taacitewo kasalulushi kwiinda mushintu nshaakalinga kucita kubene Isilaeli? (Kulonga 40:38) (Amubone acikope.)

¹² Mwine Isilaeli uli woonse wakalinga kucite coolwe cakuba abushicibusa buyumu a Yehova, inga caba ayi wakalinga kusebensela pa tente yakulambililaako nabi sobwe, alimwi inga caba ayi tente yakwe ili pafwiifwi nabi sobwe. Kucakubonenaako, Yehova wakashinisha  ayi bene Isilaeli boonse banoocikonsha kubona licincilo lya likumbi alya mulilo ilyo lyakalinga peculu lya tente yakulambililaako. (Amubelenge Kulonga 40:38.) Na likumbi lyatalika kusena kuya kulubasu lumwi, nabi abo bakalinga kuyakite matente abo kulaale a tente yakulambililaako bakalinga kulibona. Lyalo bakalinga kulongela shintu shabo, kwaangulula ma tente abo, akutalikaako pomwi abene Isilaeli bamwi boonse. (Shakube. 9:​15-23) Bantu boonse bakalinga kunyumfwa kulila kwa mapenga asilifa kushibisha bantu ayi balyeelete kulonga. (Shakube. 10:2) Ncakutatoonsha kwaamba ayi kukala pafwiifwi a tente yakulambililaako tacakalinga citondesho cakwaamba ayi muntu alicite bushicibusa buyumu a Yehova, kwiinda baabo bakalinga kukala kulaale anjiyo. Sombi mwine Isilaeli uli woonse wakalinga mweensu wakwe Yehova akushoma ayi Yehova ananomutanjilila akumushitilisha. Amunshiku shino, tacicite mulandu ankotukala, Yehova alitusuni, alatulama alimwi alatushitilisha.

YEHOVA MBWATONDESHA AYI TAACITE KASALULUSHI MUNSHIKU SHINO

13. Ino ninshila nshi yomwi Yehova mbwaatondesha ayi taacite kasalulushi munshiku shino?

¹³ Munshiku shino, bantu bakwe Lesa bamwi balekala pafwiifwi amaofesi esu anene na pafwiifwi a ofesi ya musampi wa Bakamboni Bakwe Yehova. Bamwi balasebensela pamisena iyi. Aboobo abo basebensela pamisena iyi inga baabanamo lubasu muncito shiinji shicitwa pamisena iyi alimwi akuba pomwi abaabo batanjilila. Bamwi balasebensa ncito yakufwakashila mabungano na muncito imwi yaciindi coonse ilibetele. Nabi kwaamba ayi tamusebensiko ncito ishi, inga mwashooma ayi muli beensu bakwe Yehova alimwi alimusuni. Alimwishi kabotu alimwi alamupa nshomuyandika. (1 Pit. 5:7) Yehova alapa shakulya shakumushimu kubasebenshi bakwe boonse, kubatanjilila akubashitilisha.

14. Ino ninshila nshi aimwi Yehova mbwaatondesha ayi taacite kasalulushi?

¹⁴ Nshila aimwi Yehova mbwaatondesha ayi taacite kasalulushi nkwiinda mukupa kwaamba  ayi bantu nsengwe yoonse babe a Baibo. Baibo pakutaanguna yakalembwa mumishobo yotatwe: Nkokwaamba ayi mu ciEbulu, ciAlamaiki, amu ciGiliki. Sa abo bacikonsha kubelenga Baibo mumishobo moyakataanguna kulembwa balicite bushicibusa buyumu a Yehova kwiinda baabo batacishiwo kubelenga mishobo iyi? Sobwe teshi mbocibete.—Mate. 11:25.

15. Ino nciinshi citondesha ayi Yehova taacite kasalulushi? (Amubone acikope.)

¹⁵ Yehova taatwiiti kuba beshicibusa bakwe ceebo cakwaamba ayi tuliyiite abuumbi na ceebo cakwaamba ayi tulicishi kubelenga mishobo Baibo moyakalembwa pakutaanguna. Yehova alapa busongo bwakwe kubantu nsengwe yoonse kuteshibo kubaabo beeite. Baibo yakasansululwa mumishobo iinji abuumbi, aboobo bantu nsengwe yoonse balafubilaamo alimwi baleeya mbweenga baba abushicibusa anguwe.—2 Timo. 3:​16, 17.

AMUTOLELELE KUSANGALASHA YEHOVA

16. Kweelana a Milimo 10:​34, 35, ino inga twacita buyani kwaamba ayi tutolelele kusangalasha Yehova?

¹⁶ Ncoolwe cinene abuumbi kutambulwa a Yehova mbuli beensu bakwe mu tente yakwe yacikoshanyo. Ngu Shikutambula beensu uli kabotu abuumbi alimwi utondesha lusuno abuumbi. Alimwi taacite kasalulushi. Alatambula bantu boonse tacicite mulandu ankobakala, nkobakakomenena, lwiiyo ndobacite, cikanda, mushobo ngobaamba, ciimo, na mbasankwa nabi na mbanakashi. Sombi Yehova alatambulabo baabo bamunyumfwila kwaamba ayi babe beensu bakwe.—Amubelenge Milimo 10:​34, 35.

17. Ino nkuli nkweshi tukacane makani aamwi aamba pakuba beensu mu tente yakwe Yehova?

¹⁷ Pa Kulumbaisha 15:​1, Defedi wakeepusha ayi: ‘No Yehova, anu ngani weenga wekala mu tente yanu? Anu ngani weenga wakonsha kwikala pakalundu kanu kasalalite?’ Lyalo Yehova wakatanjilila Defedi kukumbula miipusho iyi mu Kulumbaisha 15. Mumutwi utokonkelaawo tulaakwiiya shintu shimwi nshotweelete kucita kwaamba ayi tutolelele kusangalasha Yehova.