MURU OFUNJEDHA 23
NYUMBO 28 Tikhale pa Ubwenzi ndi Yehova
Yohova unaaniitana ira nikale alendwee
“Tenda langa linodha kala vari viwa. Miyo ndinodha kala Nlungwiwa.”—ZAKI. 37:27.
VINOFUNA I-YO FUNJEDHA
Yofunjedha yei inonikami-a ira nim’simbenga Yohova namwasa oniitana ira nikale alendo tendanimwee lopipirisa thitho namwasa oi unonisamalela.
1-2. N’nga Yohova unowaona a-vi arumiwee ororomeleya?
N’NGA Yohova uli ninga aani wa nyo? Venango munooda wakhula ira, ‘Yohova ngu Babanga, Nlungwanga na fwanga.’ Vatokala madhina enango aizo ana-indi-edhe nyo basa voonga vya Yohova. N’nga mwatooroma thuulelavo ira munooda kala alendwee?
2 Mwene Davide atoofwanafwani-edhela uxamwali unokalavo vari va Yohova na arumiwee ororomeleya, na uxamwali unokalavo vari va mutu naalendwee. Davide atoofuka ira: “Nyo Yohova, n’nga mbaani unakale lendo tendani mwinyu? Mbaani unakale mwangoni mwinyu opambuleya?” (Sal. 15:1) Madhu ovudheleliwala, anothonyi-edha ira ninooda kala alendo a Yehova venango afwee. Ndi ngari yapereso yavadhulu kala alendo a Yohova.
YOHOVA UNOFUNA IRA NIKALE ALENDWEE
3. N’nga lendo oroma wa Yohova ali aani? N’nga Yohova na lenduo tavivwa a-vi?
3 Yohova a-anarome panducha yongo iliyothene, akalecha ekhene. Mbwenye vahora inango, Yohova atom’mwachela Mwanee obaliwa ekhene mutendalee lopipirisa. Yohova atoosangalala maningi wachela lendweula. Bibilya linoonga ira Yohova “atoosangalala maningi” na Mwanee. Na liyene thitho lenduo, “akalecha osangalala vamethonivee hora dhothene.”—San. 8:30.
4. N’nga vasogolovee, mbaani adhidhe dhakhala alendo tendani mwa Yohova?
4 Voi ee-no Yohova atoopanducha angelo, thitho tatookhala alendwee. Aliwa anoitaniwa “a-ima a Nlungu” thitho Bibilya linoonga ira anosangalala khala na Yohova. (Yob. 38:7; Dan. 7:10) Wa vyawa vinjinji, afwee a Yohova tali dhulu baa-i weo unokhala liye. Vasogolovee, atoopanducha atu vailambo yavathi enao tali mutendalee. Enango mwa alendwala ali Inoki, Nowa, Abrahamu na Yobo. Arumiwi ororomeleyala, anoongiwa ira tali afwee a Nlungu venango atu enao tawenda na “Nlungu waimbarimbari.”—Mar. 5:24; 6:9; Yob. 29:4; Esa. 41:8.
5. N’nga ninofunjedhavon’ni vaulosi unofwanyeya va lemba la Zakiyeli 37:26, 27?
5 Wa vyawa vinjinji, Yohova ukadhi aitananga afwee ira takhale alendwee. (Muleri Zakiyeli 37:26, 27.) Ulosi wa Zakieli unothonyi-edha ira Nlungu unofunechecha ira arumiwee ororomeleya, takhale vauxamwali wapama na liye. Yohova unolanyedha ira unodha ira “vwelano warendele.” Ulosula unoonga vya hora yeniyo atu ana idedi-edho yodhowa dhulu na yodhakala vailamboi, munofuna aliwa vwelananga nokhala “gurupu limbo-i” la mabila mutendalee lopipirisa. (Ju. 10:16) Hora yeniyo njen’na.
NLUNGU UNONISAMALELA WU LIMBURO NLILOTHENE UNOKHALA I-YO
6. N’nga mutu unaire a-vi ira akale lendo mutenda la Yohova? N’nga tendalo linofwanyeya mutatamo limbo-i baa-i?
6 Walelene, tenda lakhala limburo mwemo mwakala mutu ira avume thitho abareleye uvyongo ninga liphevo, dhuwa na dhongwe. Nadhivelela nokhala vauxamwali na Yohova, ninokhala alendo mutendanimwee lopipirisa, ninofwanya yodya yauzimu yokwakwanela thitho ninokhala vauxamwali wapama na atu enao ali alendo a Yohova. (Sal. 61:4) Tenda la Yohova kalinofwanyeya uikhundu imbo-i baa-i. Munooda dhowa ilambo iliyothene venango migumanoni milukhulu thitho munodha fwanya atu enao anosangalala namwasa okhala tendani mwa Nlungu. Tenda la Yohova linofwanyeya uliothene weo uli arumiwee ororomeleya.—Apk. 21:3.
7. Mwasiwa ngwan’ni ninooda onga ira atu ororomeleya enao akwide anokhalave alendo tendani mwa Yohova? (Muone thitho iruthiruthi.)
7 N’nga a-vi vyaatu ororomeleya enao akwide? N’nga pyovweya onga ira aliwa mbaalendo mutenda la Yohova? Ee. Mwasiwa ngwan’ni ninoonga e-no? Namwasa oi Yohova unowathuulelave, wa liye mbaingumi. Yesu atoonga ira: “Vyoi atu okwa anodha venyathi-iwa masiki Mose atoonga vamwasa wa thakuru la minga vaongile liye ira, ‘Yohova ndi ‘Nlungu wa Abrahamu, Nlungu wa Izaki na Nlungu wa Yakobo.’ Liye ngu Nlungu waatu aingumi, a-kala okwa, namwasa oi wa liye othene enala mbaingumi.”—Luk. 20:37, 38.
Masiki atu ororomeleya enao akwide anokhalave alendo tendani mwa Nlungu (Muone ndima 7)
UPAMA OKHALA ALENDO A YOHOVA THITHO VYONGO VINOFWANELA I-YO IRANA
8. N’nga alendo a Yohova anoganyali a-vi namwasa okala tendanimwee?
8 Mofwanafwana na tenda mwemo munokhala mutu ira avume thitho vithalamo, navolowa tendani mwa Yohova ninobareleya uvyongo vinanonge uxamwali-u na liye thitho ninokhaana idedi-edho. Nadhowanave khala vauxamwali na Yohova, Satana kanaode irana yongo iliyothene yeyo inaniphei-e modhowa nodhowa. (Sal. 31:23; 1 Ju. 3:8) Yohova unodha dhowanave barela afwee ororomeleya wu vyongo vinaaphei-e mwauzimu masiki wukwa.—Apk. 21:4.
9. N’nga Yohova unofuna ira alendwee tairengan’ni?
9 Onga mwaimbarimbari, ndi ngari ilukulu khala alendo tendani mwa Yohova thitho ninosangalala khala vauxamwali na liye modhowa nodhowa. N’nga ninofwanela iranan’ni ira nidhowenave khala alendwee? Akala mutoitaniwa na fwinyu, munooda funanga idhiwa vyongo vinodhiveliwana liye ira muviirena. Mofwanafwani-a, venango fwinyuo unodha funanga ira muungule sapato mwa-anavolowe m’mba thitho nyo kamunaode konda. Molandana na vyevi, i-yo thitho ninofuneela idhiwa vyongo vinadhiveliwena Yohova ira atu anofuna khala alendo tendanimwee taviirengana. M’dhiveliwana Yohova unonilimbi-a ira niirenga vyongo vyothene vinaode i-yo ira “nim’sangalali-enga va yongo iliyothene.” (Ako. 1:10) Mbwenye angalive ira Yohova ngu fwi-u, ninozindiyela ira liye ngu Nlungu na Babi-u thitho ngofwanelela ira nim’lemezenga. (Sal. 25:14) Kanidiwalenga irana vyongo vyevi thitho hora dhothene nim’va-enga lemezo nlukulu. Vyevi vinodha nikami-a rambela vyongo vinam’sukwali-e. Ee-no nili ofunechecha ira “niwendenga modhiyevi-a na Nlungwi-u.”—Mik. 6:8.
YOHOVA ANOOIRA VYONGO MO-OKAANA SAKULO AISRAELI VYALI ALIWA KOKOLANI
10-11. N’nga Yohova athonyi-edhe a-vi ira kaana sakulo voira vyongo na Aisraeli vyali aliwa kokolani wu Sinai?
10 Yohova kanoira vyongo mwasakulo na alendwee. (Aro. 2:11) Ninoona umboni wa vyevi nathuulela mwemo mwairela liye vyongo na Aisraeli kokolani wu Sinai.
11 Angavulumuchile atwee udhaari wu Iguputu, Yohova atoosakula alimbo velela sembe ira talabenga vasasani. Alevi tatoova-iwa mabasa o-iyana i-yana opambuleya. N’nga atu talaba vasasani naatu takala duzi na sasuo, tanoosamaleliwa na Yohova kwaranya atu enango? Khabe. Ninoonga e-no namwasa oi Yohova kana sakulo.
12. N’nga Yohova athonyi-edhe a-vi ira kaana sakulo voira vyongo na Aisraeli enao tali alendwee? (Ekisodo 40:38) (Muone thitho iruthiruthi.)
12 Muisraeli uliwethene atookaana ngari yokhala vauxamwali wapama na Yohova mo-obala ira alaba urumiwi wavakhundu venango akhala vaduzi na sasa. Mofwanafwani-a, Yohova atoonechecha ira Aisraeli othene taodenga ona vyongo vyodabwi-a ninga ipilala ya rambo na ipilala ya mulo yeniyo yakhala vadhulu va sasa. (Muleri Ekisodo 40:38.) Rambo waroma wenda, masiki atu tali undendai na sasa tanooda ona, mangi-a mitolwiwa thitho fudha matenda noroma wenda vambo-i na afwiwao. (Num. 9:15-23) Mutu uliwethene anooda uvwa ula wa malipenga menli a siliva othonyi-edha ira mutu uliwethene avenyathi. (Num. 10:2) Va pyooneelatu ira khala vaduzi na sasa kwaali umboni othonyi-edha ira mutuo uli vauxamwali wapama na Yohova. Malomwee, muisraeli uliwethene anooda kala lendo tendani mwa Yohova thitho liye ngwam’sogolelenga nom’barela. malamboano, akala nili wani Yohova unonidhiveliwana, nisamalela thitho nibarela.
Vyongo vyaireya va sasani vinothonyi-edha ira Nlungu kana sakulo (Muone ndima 12)
MODA MUNOTHONYI-EDHELA YOHOVA IRA KANA SAKULO MALAMBOANO
13. N’nga Yohova unothonyi-edha a-vi ira kana sakulo malamboano?
13 Enango mwaatu a Nlungu malamboano, anokala duzi na sede li-u venango ofesi ya tambi. Thitho enango mwaaliwa anolaba weo. Ee-no aliwa anoira vyongo vinjinji vyevyo vinoireya mumamburo enala thitho anogumanana abali anosogolela. Enango anolaba ninga anamaing’anela isa venango anoira urumiwi wavakundu wahora dhothene. Mbwenye akala muli mugurupu laatu anjinji enao ta-ana ngari yen’na, idhiwani ira Yohova unouonanive ira muli alendwee thitho unoudhiveliwanani. Yohova unosamelela rumiwee uliwethene. (1 Pe. 5:7) Atu othene a Nlungu anowachela yodya yauzimu, malangi-o na ibarelo inofuneela aliwa.
14. N’nga ndi ifwanafwani-o inango iivi yothonyi-edha ira Yohova kana sakulo malamboano?
14 Ifwanafwani-o inango yothonyi-edha ira Yohova kana sakulo malamboano, choi unokami-a atu availambo yothene yavathi ira takaena Bibilya. Malemba opambuleya talembiwile muviongelo viraru: Ieberi, Iaramu na Igiriki. N’nga atu anoonga pama viongelo vyoromavi, mbenao baa-i anokhala vauxamwali wapama na Yohova kwaranya atu enango? Khabe kai e-no.—Mat. 11:25.
15. N’nga ndi umboni unango uvi othonyi-edha ira Yohova kana sakulo? (Muone thitho iruthiruthi.)
15 Yohova kanoniitana ira nikale alendwee namwasa oi nitofunjedha maningi venango ninoidhiwa onga viongelo vyoroma vya Bibilyani. Ee-no Yohova unorumeli-a ira atu availambo yothene taidhiwe zeludhee, akala ngofunjedha venango khabe. Bibilya lelo nli mandhwee litothapuleliwa muviongelo vinjinji thitho atu availambo yothene anooda nganyali na vinofunji-a aliwa noidhiwa vinaire aliwa ira takale afwee.—2 Ti. 3:16, 17.
N’nga fwanyeya wa Bibilya muviongelo vinjinji, unothonyi-edha a-vi ira Yohova kana sakulo? (Muone ndima 15)
MUDHOWENAVE KALA ALENDO A YOHOVA
16. Movwelana na lemba la Mayirelo 10:34, 35, n’nga ninaire a-vi ira nidhowenave kala alendo a Yohova?
16 Ndi ngari ilukulu kala alendo a Yohova mutendalee lopipirisa. Yohova unowachela alendwee moriya rima, mwaudhivela thitho unowasamalela pama maningi. Wenjedhela vevo, liye ngo-okaana sakulo thitho unowachela mutu uliwethene mo-obala unokhala liye, ikhalelwee, mafunji-edho airile liye, tundu, tunga, akala ndi lombwana venango i-yana. Mbwenye atu anoawachela liye ninga alendwee, ndi ale ano-arela makhundwee.—Muleri Mayirelo 10:34, 35.
17. N’nga ninafwanye wani makhundo owenjedheleya enao ananikami-e kalave alendo mutendani mwa Yohova?
17 Movwelana na lemba la Salimo 15:1, Davide atoofuka ira: “Nyo Yohova, n’nga mbaani unakale lendo tendani mwinyu? N’nga mbaani unakale mwangoni mwinyu opambuleya?” Mulimbo lemba masalimula atoowandeliwa lemba vyowakula vya vyofuka vyevi. Yofunjedha yo-arela inodha onga vyongo vinango vinofwanela i-yo irana ira nidhowenave m’sangalali-a Yohova thitho kala afwee.
NYUMBO 32 Khalani Okhulupirika kwa Yehova
