1-2. Le i lwito’ka lwita Yehova batōtyi bandi ba lulamato?

 LELO umonanga Yehova namani mu bobe būmi? Padi ubalondolola’mba, ‘Yehova i Tata wami, Leza wami, kadi Mulunda nami.’ Kadi kudi bitenta bikwabo nansha majina obwanya kumwityila’po. Ino le umumonanga ne bu Mwinē kofikīle?

² Mulopwe Davida wādingakenye kipwano kipwene Yehova na batōtyi bandi ba lulamato, na kipwano kikalanga pa bukata bwa mufikilwa na bandi beni. Wāipangwile’mba: “A Yehova, i ani ubwanya kwikala mweni mu pema obe? I ani ubwanya kwikala mu lūlu lobe lujila?” (Ñim. 15:1) Kupityila ku bino binenwa bya ku bukomo bwa mushipiditu, tumona’mba tubwanya kwikala beni ba Yehova—ko kunena’mba balunda nandi. Mwene luno i lwito lukatampe lwitwita Yehova?

YEHOVA USAKA TWIKALE BENI BANDI

3. Le i ani wāikele mweni mubajinji wa Yehova, ne i muswelo’ka obēivwene umo ku mukwabo?

³ Kumeso kwa kupanga bintu, Yehova wādi bunka. Inoko kufika kitatyi kampanda, wāpanga wandi Mwana umbajinji. Pano bidi pamo bwa Yehova wātundaile mweni mubajinji mu pema wandi wa kyelekejo, kadi wāsangele bininge. Bible ulombola’mba Yehova ‘wādi usenswe bikatampe’ wandi Mwana. Wandi Mwana nandi, ‘wādi usangele ku meso a Yehova kitatyi kyonso.’—Nki. 8:30.

4. Le i bāni bakwabo bāityilwe na Yehova bu beni mu pema wandi?

 ⁴ Kupwa Yehova wāpangile bipangwa bikwabo bya ku mushipiditu ne kwibita nabyo bikale bu beni bandi. Bible utela bamwikeulu bu “bana ba Leza,” kadi ulombola’mba basangedile kwikala pamo na Yehova. (Yoba 38:7; Dan. 7:10) Mu bula bwa myaka mivule, i enka bipangwa bya ku mushipiditu byādi bishikete momwa mūlu byādi bipwene na Leza. Mwenda mafuku, wāpangile bantu ne kwibapa mukenga wa kwikala bandi beni. Kimfwa, mu bano beni mwābadīlwe Enoke, Noa, Abalahama, ne Yoba. Bano batōtyi ba bine bātelelwe bu balunda na Leza nansha bu boba bādi bananga “na Leza wa bine.”—Ngo. 5:24; 6:9; Yoba 29:4; Isa. 41:8.

5. Le i bika byotwifunda ku bupolofeto budi mu Ezekyele 37:​26, 27?

⁵ Mu bula bwa myaka tutwa na tutwa, Yehova wāendelele kwita balunda nandi bekale beni bandi. (Tanga Ezekyele 37:​26, 27.) Kimfwa, twifunda mu bupolofeto bwa Ezekyele amba Leza usakanga batōtyi bandi ba lulamato bekale nandi mu kipwano kya mpwaninine. I mulaye kusamba “nabo kipwano kya ndoe.” Buno bupolofeto bufunkila pa kitatyi kikalungilwa mu bumo boba badi na lukulupilo lwa kwenda mūlu ne boba badi na lukulupilo lwa kwikala pano pa ntanda mu pema wa kyelekejo bu “luombe lumo.” (Yoa. 10:16) Kitatyi’kyo kyo kino’ki!

LEZA WITUKWATAKANYANGA NANSHA SHI TUSHIKATANGA KWEPI

6. Le muntu wikalanga namani bu mweni mu pema wa Yehova, ne i kwepi kubwanya kutanwa pema wandi?

⁶ Mu kitatyi kyālembelwe Bible, pema wa muntu kyādi kifuko kya kukōkolokelwa’mo ne kikinga, kimfwa ku dyuba, ku mvula, ku mashika ne ku bikwabokwabo. Mweni udi mu pema wa muntu wādi utengela’mba ukakwatakanibwa senene. Shi tubepāna kudi Yehova twikalanga beni bandi mu pema wandi wa kyelekejo. (Ñim. 61:4) Twikalanga’mo na byakudya bivule bya ku mushipiditu ne kupwana’mo na bantu bakwabo bekala bu beni ba Yehova. Pema wandi wa kyelekejo kadipo mu kifuko kimo. Ye uno kodi mwende mu ntanda ya bweni padi mwanda wa kukatanwa ku kitango kya pa bula ne kwitana’mo na bantu bakwabo basangedile kwikala mu pema wa Leza. Uno pema utanwa konso kudi batōtyi ba Yehova ba kikōkeji.—Kus. 21:3.

7. Mwanda waka tubwanya kunena’mba bantu ba kikōkeji bafwile bakidi’nka beni mu pema wa Yehova? (Tala ne kifwatulo.)

 ⁷ Le tunene namani pa bantu ba kikōkeji ke bafwe? Le tubwanya kunena’mba bakidi’nka beni mu pema wa Yehova? En-en! Mwanda waka tubwanya kunena namino? Mwanda bano bantu i bōmi mu luté lwa Yehova. Yesu wānenene amba: “Mwanda wa amba bafwile basangulwanga, ne Mosesa wāyukenye’o mu nsekununi ya kimuna kya miba paātelele Yehova bu ‘Leza wa Abalahama, Leza wa Izake, ne Leza wa Yakoba.’ Aye i Leza wa bōmi, ke wa bafwepo, aa, mwanda kwadi bonso i bōmi.”—Luka 20:​37, 38.

BYABUYABUYA NE BISELWA

8. Le beni ba Yehova bamwenanga namani mu kwikala mu pema wandi?

⁸ Monka mubwaninya kwikala pema bu kifuko kya kukōkolokelwa’mo, kya kufyama’mo dyuba, mvula nansha mashika, ne pema wa Yehova nandi ukiñanga beni bandi ku byaka bya ku mushipiditu, ne kwibapa lukulupilo lwa būmi bwa kumeso. Shi tushale nyeke pabwipi na Yehova, Satana kabwanyapo kwitulonga kintu kiketusanshija lonso. (Ñim. 31:23; 1 Yo. 3:8) Mu ntanda mipya, Yehova ukendelela kukinga balunda nandi ba kikōkeji ku byaka bya ku mushipiditu ne ku lufu.—Kus. 21:4.

9. Le Yehova usakanga beni bandi beendeje namani?

⁹ Na bubine, i dyese dikatampe kwikala bu mweni mu pema wa Yehova—ko kunena’mba kupwana nandi kipwano kya mpwaninine kine kikalādila nyeke. Le i muswelo’ka otufwaninwe kwiendeja shi tusaka kwikala nyeke bu beni bandi? Shi muntu kampanda wakwite kwandi, ukasaka kuyuka byofwaninwe kulonga mwanda wa kumusangaja. Kimfwa, padi ubwanya kukunena uvūle bilato kumeso kwa kutwela mu njibo, nobe ubwanya kulonga’byo na mutyima tō. Ne batwe netu, tusakanga kuyuka byobya bisaka Yehova ku boba bakimba kwendelela kwikala beni mu pema wandi. Buswe botusenswe Yehova bwitutononanga tulonge byonso byotubwanya mwanda “wa kumusangaja ne pa mfulo.” (Kol. 1:10) Na bubine Yehova i mulunda netu, inoko kadi i Leza wetu ne Tata otufwaninwe kulēmeka. (Ñim. 25:14) Na ino milangwe mu ñeni, tufwaninwe nyeke kukwatwa nzuba pa mwanda wandi, ne kuleka kwilwa nansha dimo mwine mwaikadile. Buno bulēme buketukwasha tuleke kwikala na mwiendelejo umufītyija mutyima. Tusakanga nyeke ‘kunanga na butūkanye’ na Leza wetu.—Mika 6:8.

KUBULWA MBOLOJI KWA YEHOVA MU NTANDA MUTUPUTUPU

10-11. Le muswelo wāikele Yehova na bene Isalela mu ntanda mutuputupu ya Shinai, ulombola namani amba kadipo na mboloji?

¹⁰ Yehova ulongelanga beni bandi bintu kwampikwa mboloji. (Loma 2:11) Tubwanya kujingulula kubulwa mboloji kwa Yehova mu muswelo wawāikele na bene Isalela mu ntanda mutuputupu ya Shinai.

¹¹ Yehova pa kupwa kunyongolola bantu bandi mu bupika mu Edipito, wātongele’ko babitobo ba kwingila ku kipema. Bene Levi bāpelwe kwingila mingilo mikwabo ku kino kipema kijila. Le boba bādi bengila ku kipema, nansha boba bādi bashikata kubwipi nakyo, bādi bakwatakanibwa na Yehova kutabuka bantu bakwabo? Aa! Yehova kadipo na mboloji.

12. Le muswelo wāikele Yehova na bene Isalela mu ntanda mutuputupu ulombola namani amba kadipo na mboloji? (Divilu 40:38) (Tala ne kifwatulo.)

¹² Mwine Isalela yense wādi mu nkambi, ekale wādi wingila ku kipema nansha kādipo  wingila’ko, kadi nansha shi wādi ushikata kubwipi na kipema nansha kulampe nakyo, wādi na mukenga umo onka wa kwikala pabwipi na Yehova. Kimfwa, Yehova wālongele bukomo amba muzo onso mutuntulu ubwanye kumona dilenga dya dikumbi dya kingelengele ne dilenga dya mudilo dyādi pangala pa kipema. (Tanga Divilu 40:38.) Pādi pashilula kutaluka dikumbi mwanda wa kwenda ku kifuko kikwabo, enka ne boba bādi kulampe na kipema bādi babwanya kwidimona ne kushilula komeka bintu byabo, kutalula mapema a byabo bisaka ne kwendela pamo na muzo onso. (Umb. 9:​15-23) Bonso bādi babwanya kwivwana kuvuma kwa bimpungidi bibidi bya ndalama byādi bilombola muntu yense amba ke kitatyi kya kutaluka. (Umb. 10:2) Na bubine, kwikala kubwipi na kipema kekyādipo kilomboji kya kwikala pabwipi na Yehova. Inoko, muntu yense wa mu uno muzo mupya wa Yehova, wādi ubwanya kwikala mweni wandi ne kumwena mu bwendeji ne bulami bwandi. Ne dyalelo nadyo, nansha shi tushikatanga kwepi, Yehova witusenswe, witukwatakanyanga ne kwitukinga.

BIMFWA BYA MU ANO ETU MAFUKU BILOMBOLA AMBA YEHOVA KADIPO NA MBOLOJI

13. Le i muswelo’ka umo bidi ulombolanga’mo Yehova amba kadipo na mboloji?

¹³ Bamo mu bantu ba Leza dyalelo bashikatanga kubwipi na kité kya ntanda yonso, nansha na bilo ya musambo ya Batumoni ba Yehova. Kadi bakwabo ye kwine kobengidila. Kino kilengejanga bano banabetu bengile mingilo mivule ingilwa ku bino bifuko ne kupwana’ko na batutu batangidile mwingilo. Bamo bengilanga bu batadi bendakana nansha mu mingilo mikwabo ya mu mwingilo wa pa bula wa kitatyi kyonso. Shi ubadilwa mu kibumbo kikatampe kya boba kebadipo pano na dyese dya kwingila ino mingilo, kulupila’mba Mufikilwa wetu Yehova usenswe beni bandi bonso baitabije. Kadi ukwatakanyanga bonso. (1 Pe. 5:7) Yehova  upanga bantu bandi bonso byakudya bya ku mushipiditu bya bumeni, wibendeja ne kwibakinga.

14. Le i muswelo’ka mukwabo ulombolanga’mo Yehova amba i Mufikilwa wetu wampikwa mboloji?

¹⁴ Muswelo mukwabo ulombolanga’mo Yehova amba i Mufikilwa wetu wampikwa mboloji, i na kulengeja bantu bonso pano pa ntanda bekale na Bible. Bisonekwa Bijila byālembelwe dibajinji mu ndimi isatu: Kihebelu, Kialamia, ne Kingidiki. Le i enka boba babwanya kutanga ndimi mibajinji yālembelwe’mo Bible badi mu kipwano kya pabwipi na Yehova kutabuka boba kebabwanyapo kwiitanga? Aa.—Mat. 11:25.

15. Le i kika kilombola’mba Yehova kadipo na mboloji? (Tala ne kifwatulo.)

¹⁵ Yehova ketwitabijangapo pa mwanda wa masomo otufundile nansha ndimi yotwisamba. Pa kyaba kya kupāna tunangu twandi enka ku boba bafundile bininge, inoko Yehova upānanga’to ku bantu bonso pano pa ntanda ekale i bafunde bininge nansha kebafundilepo. Bible Kinenwa kyandi kya ku bukomo bwa mushipiditu, i mwalamunwe mu ndimi tununu ne tununu; mu uno muswelo, bantu ba ntanda yonso i babwanye kuyuka bufundiji budi’mo ne muswelo wa kupwana nandi.—2 Tm. 3:​16, 17.

‘ITABIJIBWA’ NYEKE NA YEHOVA

16. Le kukwatañana na Bilongwa 10:​34, 35, i muswelo’ka otubwanya kwitabijibwa nyeke na Yehova?

¹⁶ I dyese dikatampe kutundailwa na Yehova bu beni mu pema wandi wa kyelekejo. I Mufikilwa muyampe, wa buswe, kadi wa kizaji kya kutendelwa. Ne kadi kadipo na mboloji. Witutundailanga batwe bonso nansha shi tushikatanga kwepi, ba mu bibidiji’ka, bafunde nansha bampikwa kufunda, ba lukoba’ka, ba kabila’ka, batame nansha banuke, bana-balume nansha bana-bakaji. Inoko, i enka boba balonda misoñanya yandi bo baitabijanga bu bandi beni.—Tanga Bilongwa 10:​34, 35.

17. Le i kwepi kotukatana myanda mikwabo itulombola mwa kwikadila beni mu pema wa Yehova?

¹⁷ Davida wāipangwile mu Ñimbo ya Mitōto 15:1 amba: “A Yehova, i ani ubwanya kwikala mweni mu pema obe? I ani ubwanya kwikala mu lūlu lobe lujila?” Uno kaimba wa mitōto wāpelwe bukomo bwa mushipiditu wālondolola bino bipangujo. Kishinte kilonda’ko kikesambila pa bisakibwa bimo byotufwaninwe kubwanya pa kwitabijibwa nyeke na Yehova.