1-2. Mutambi muka eji kuvilikanga Yehova kuli vaka-kumulemesa vakushishika?

 NGE mutu namihulisa ngwenyi, ‘Uno Yehova apwa iya kuli yenu?’ namumukumbulula ngwenu ika? Munahase kumukumbulula ngwenu, ‘Yehova apwa Tata, hiKalunga kami, kaha nawa Sepa lyami.’ Kwatwama nawa jivulukiso jikwavo jize munahase kuvuluka Yehova. Kutala mwamona Yehova kupwa hiMuka-Kutambula vangeji tahi?

² Mwangana Ndavichi afwanyishile Yehova kuli Muka-Kutambula vangeji, kaha vaka-kulemesa Yehova vakushishika avafwanyishile kuli vangeji. Ahulishile Yehova ngwenyi: “Ove Yehova, iya nahase kupwa ngeji mumbalaka yove? Iya nahase kutwama hapili yove yajila?” (Samu 15:1) Mazu kana awa vahwima atunangula nge tunahase kupwa tuvangeji jaYehova, kulumbununa masepa jenyi. Ou himutambi wamwaza chikupu wakufuma kuli Yehova.

YEHOVA ASAKA TUPWENGA TUVANGEJI JENYI

3. Uno iya apwile ngeji yaYehova watete, kaha Yehova nangeji yenyi vevwilenga ngachilihi hakupwa hamwe?

³ Shimbu kanda Yehova atenge vyuma vyosena, apwilenga ukawenyi. Oloze mukuhita chalwola, atengele Mwanenyi watwatwa nakumusanyika apwenga mumbalaka yenyi yachifwanyisa. Yehova awahililile chikuma hakupwa namulimo wauhya wakutambula ngeji yenyi watete. Mbimbiliya yasolola ngwayo Yehova “evwililenga kuwaha chikuma” Mwanenyi. Kaha ou ngeji yenyi watete naikiye nawa “[awahilililenga] kumeso [aYehova] lwola lwosena.”—Vishi. 8:30.

4. Uno mukuhita chalwola, Yehova asanyikile cheka veya mumbalaka yenyi?

 ⁴ Kutwala muze, Yehova atengele nawa vangelo nakuvasanyika vapwenga vangeji jenyi. Ava vangelo vavavuluka ngwavo “vana vaKalunga,” kaha vavalumbununa kupwa vakuwahilila hakupwa hamwe naYehova. (Yopa 38:7; Ndanye. 7:10) Hamyaka yayivulu, Kalunga apwilenga kaha navangeji jenyi vakushipilitu vaze vapwilenga hamwe naikiye mwilu. Kutwala muze, atengele nawa vatu hano hamavu vapwenga vangeji mumbalaka yenyi. Mukuhita chalwola, havatu kana hapwile Enoke, naNowa, naApalahama, naYopa. Ava vaka-kulemesa Kalunga vamuchano vavavuluka ngwavo masepa jaKalunga, chipwe ngwavo vaze vatambukilenga “naKalunga wamuchano.”—Kupu. 5:24; 6:9; Yopa 29:4; Isa. 41:8.

5. Vyuma muka natulinangula kuupolofweto watwama hali Ezekele 37:​26, 27?

⁵ Hamyaka yayivulu, Yehova natwaleho kusanyika masepa jenyi vapwenga vangeji jenyi. (Tangenu Ezekele 37:​26, 27.) Chakutalilaho, tweji kulinangulanga kuupolofweto waEzekele ngwetu Kalunga asaka chikupu vaka-kumulemesa vakushishika vapwenga nausoko wamwenemwene naikiye. Alishika navo “lushiko lwakuunda.” Upolofweto kana watalisa kulwola luze vatu vaze vatwama nalutalililo lwakukayoyela mwilu navaze navakayoyela hano hamavu navakalinunga hamwe mumbalaka yenyi yachifwanyisa hakupwa vatu ‘vamuutanga umwe.’ (Yowa. 10:16) Upolofweto kana uli nakutesamo makumbi ano.

KALUNGA EJI KUTUZAKAMANGA KALA KWESHOKWO TULI

6. Uno mutu nahase kupwa ngachilihi ngeji mumbalaka yaYehova, kaha kulihi tunahase kuwana mbalaka yenyi?

⁶ MuMbimbiliya, mbalaka yapwa chihela chize mutu anokelelelengamo nakumukinga kujingonde jakulisezaseza. Ngeji uze engililenga mumbalaka kana asakiwilenga kumuzakama kanawa. Nge tunalihane kuli Yehova nakupwa nausoko wakukola naikiye, kaha natupwa tuvangeji mumbalaka yenyi yachifwanyisa. (Samu 61:4) Tweji kulivwisanga kuwaha kulya chachivulu chakushipilitu nakupwa namasepa vavavulu vaze vapwa nawa vangeji jaYehova. Mbalaka yenyi yachifwanyisa kayatwama kaha kuchihela chimweko. Pamo mwayile kukukunguluka chakulipwila kulifuchi lyeka, kuze mwakawanyine vatu vaze veji kulivwisanga kuwaha kupwa mumbalaka yaKalunga. Mbalaka kana munahase kuyiwana kala kuchihela kwatwama vaka-kulemesa Kalunga vakwononoka.—Kuso. 21:3.

7. Mwomwo ika natwambila ngwetu vatu vakushishika vaze vafwa lyehi hanga vachili vangeji mumbalaka yaYehova? (Talenu nawa muvwimbimbi.)

 ⁷ Nyi ngachilihi vatu vakushishika vaze vafwa lyehi? Kutala tunahase kukukulula ngwetu, hanga vachili vangeji mumbalaka yaYehova tahi? Eyo. Mwomwo ika tunambila ngocho? Mwomwo Yehova eji kwanukanga lika vatu kana, ngocho kuli ikiye vanapu vavatonyi. Yesu alumbunwine ngwenyi: “Kutalisa kuchihande chavafu vaze navakasangula, naMose ahanjikileho mumujimbu wachiputa omu avulukile Yehova ngwenyi, ‘Ikiye Kalunga kaApalahama, Kalunga kaIsaka, Kalunga kaYakova.’ Ikiye kapwa Kalunga kavafuko, oloze wavava vavatonyi, mwomwo kuli ikiye vosena vavatonyi.”—Luka 20:​37, 38.

VYUMA TWEJI KUNGANYALANGA NAVYUMA TWATELA KULINGA

8. Uno vangeji jaYehova veji kunganyalanga ngachilihi hakupwa mumbalaka yenyi?

⁸ Ngana muze mbalaka yivene yapwa chihela chakunokela, kaha nawa chakutukinga kujingonde jakulisezaseza, nambalaka yaYehova yeji kukinganga vangeji jenyi kuponde yakushipilitu nakuvakafwa vapwenga nalutalililo. Nge natutwalaho lika kupandama kuli Yehova, kaha Satana keshi kulinga vyuma vize navitwingisa muponde haya myakako. (Samu 31:23; Yowa. 1, 3:8) Mukaye kakahya, Yehova mwakatwalaho lika kukinga masepa jenyi vakushishika kuponde yakushipilitu nakukufwa.—Kuso. 21:4.

9. Vyuma muka Yehova asaka vangeji jenyi valingenga?

⁹ Chapwa hikutokwa chikuma kupwa tuvangeji mumbalaka yaYehova, kulumbununa kulivwisa kuwaha usepa wakukola naikiye haya myaka yosena. Uno vyuma muka twatela kulinga kachi nge tuli nakusaka kutwalaho lika kupwa tuvangeji jaYehova? Kachi nge mutu umwe namisanyika kuzuvo yenyi, namufwila kutachikiza kanawa vyuma ali nakusaka mulinge. Chakutalilaho, uze namisanyika mwasaka muzule sapato shimbu kanda mwingile muzuvo, kaha twafwelela ngwetu mukiko vene namulinga. Chochimwe nawa, twafwila kutachikiza vyuma asaka Yehova kuli vatu vaze vasaka kutwalaho kupwa vangeji mumbalaka yenyi. Kuzanga Yehova cheji kutulingisanga tuzate nangolo mangana “[tumwivwisenga] kuwaha chikuma.” (Kolo. 1:10) Numba tuhu tweji kumonanga Yehova kupwa Sepa lyetu, oloze tweji kumumonanga nawa kupwa Kalunga ketu kaha nawa hiSetu uze twatela kuvumbika. (Samu 25:14) Twatela kwanukanga chuma kana nakutwalaho lika kumwivwa woma. Echi nachitukafwa tulihende kukulinga vyuma vize navimwivwisa kupihya. Shikaho twafwila kupwa ‘vakulinyisa hakutambuka’ naKalunga ketu.—Mika 6:8.

YEHOVA KATALILENGA VATU KUMESO MUPAMBOKO

10-11. Uno jila Yehova azakaminyinengamo vaIsalele mupambo yaShinai yasolola ngachilihi nge katala vatu kumesoko?

¹⁰ Yehova katala vatu kumesoko, chikumanyi vangeji jenyi. (Loma 2:11) Tunahase kutachikiza chuma kana hakumona omwo Yehova azakaminengamo vaIsalele mupambo yaShinai.

¹¹ Yehova atongwele vapilishitu vazachilenga hatavanaku hanyima yakusokola vatu jenyi muEjipitu muundungo. Atongwele nawa vaLevi vazakamenga milimo yeka hatavanaku. Kutala Yehova azakaminenga chikuma vaze vazachililenga hatavanaku chipwe vaze vatwaminenga kwakamwihi nayikiko, kuhambakana vatu veka tahi? Nduma. Yehova katala vatu kumesoko.

12. Vyuma muka vize Yehova alingile kumuyachi waIsalele vize vyasolwele nge kavatalilenga kumesoko? (Kulovoka 40:38) (Talenu nawa muvwimbimbi.)

¹² VaIsalele vosena vapwilenga nausepa  wakukola naYehova, numba nge vazachililenga hatavanaku nyi chiku, numba nge vatwaminenga kwakamwihi nayikiko nyi chiku. Chakutalilaho, Yehova azachile nangolo mangana muyachi wosena umone panda yalivwi napanda yakakahya vize ahakileko mujila yakukomwesa hatavanaku. (Tangenu Kulovoka 40:38.) Nge livwi linaputuka kutalisa kumutamba weka, kaha navaze vatwaminenga hahasuku natavanaku vapwilenga nakumona livwi kana. Kaha vaputukile kulongejeka viteli vyavo nakukasununa jimbalaka javo nakuputuka kutambukila hamwe navatu vosena. (Kula. 9:​15-23) Vatu vosena vevwilenga vivumo vyakulisezaseza vyajineta jivali japalata jakulweza vatu vakatuke nakuputuka kutambuka. (Kula. 10:2) Chikupu vene, kutwama kwakamwihi natavanaku kachapwile hiunjiho wakusolola nge mutu kana apwile nausepa wakukola naYehovako. Oloze vaIsalele vosena vapwile vangeji jaYehova, kaha nawa vafwelelele ngwavo mwavatwaminyina nakuvakinga. Chochimwe nawa namakumbi ano, Yehova atuzanga kaha nawa atuzakama nakutukinga, chamokomoko nokwo twatwama.

VYAKUTALILAHO VYAMAKUMBI ANO VYASOLOLA NGE YEHOVA KATALA VATU KUMESOKO

13. Uno makumbi ano Yehova nasolola ngachilihi ngwenyi katala vatu kumesoko?

¹³ Vangamba jaKalunga vamwe makumbi ano vatwama kwakamwihi nachikota chetu, chipwe naofesi yamutango yaVinjiho jaYehova. Veka nawa vazachila havihela kana. Echi cheji kulingisanga vatu kana vazate milimo yakulisezaseza yatwama havihela kana nakulikata navaze vali nakutwaminyina. Vamwe nawa veji kuzatanga mwatulama vakutambwojoka chipwe mumilimo yeka yashimbu yosena yakulipwila. Shikaho, nge muli hamukana wavatu vavavulu vaze kaveshi nakulivwisa kuwaha vyuma kaneviko, kaha fwelelenu ngwenu Yehova uze apwa Muka-Kutambula vangeji, azanga vangeji vosena vaze etavila. Kaha vosena avazakama mutu himutu. (Petu. 1, 5:7) Vatu  jaKalunga vosena veji kuvahizumunanga kushipilitu, nakutambula jindongi nakuvakinga.

14. Chakutalilaho muka chikwavo chasolola nge Yehova katala vatu kumesoko hakupwa Muka-Kutambula vangeji?

¹⁴ Chakutalilaho chikwavo chasolola nge Yehova katala vatu kumesoko hakupwa Muka-Kututambula shina, nalingisa Mbimbiliya yipwenga kuvatu vosena mukaye kosena. Visoneka Vyajila hakavanga vavisonekele mumalimi atatu. Vavisonekele muchiHepeleu, nachiAlamayiki namuchiHelase. Kutala vaze vatangilenga Mbimbiliya mumalimi akulivanga vapwile nausoko wakukola naYehova kuhambakana vaze kavatangilenga mumalimi kanako tahi? Nduma.—Mateu 11:25.

15. Vyuma muka vyasolola nge Yehova katala vatu kumesoko? (Talenu nawa muvwimbimbi.)

¹⁵ Yehova katwivwila kuwaha mwomwo yakutanga chikuma mashikola akukaye, chipwe uhashi wakutachikiza malimiko. Yehova nalingisa mangana enyi vawatachikize kuvatu vosena hano hamavu, numba vapwa vakutanga chikuma chipwe chiku. Mbimbiliya yize yapwa Mazu enyi vahwima vanayalumuna mumalimi amavulu chikuma, ngocho vatu vavavulu mukaye kosena vanahase kunganyala kuvyuma yeji kunangulanga nakulinangula mwakupwila masepa jenyi.—Chimo. 2, 3:​16, 17.

TWALENUHO LIKA KUPWA VANGEJI JAYEHOVA

16. Kweseka naVilinga 10:​34, 35, tunahase kutwalaho lika ngachilihi kupwa tuvangeji jaYehova?

¹⁶ Chapwa hikutokwa kutusanyika kuli Yehova tupwenga tuvangeji jenyi mumbalaka yenyi yachifwanyisa. Apwa walikoji chikuma, wazangi, kaha nawa wachisambo. Kaha nawa katala vatu kumesoko, ngocho asanyika vatu vosena chamokomoko nakuchihela vatwama, chipwe okwo vafuma, namashikola, navikova, namalimi, namyaka, chipwe kupwa lunga chipwe pwevo. Chipwe ngocho, vaze kaha veji kukavangizanga jishimbi jenyi vakiko kaha etavila kupwa vangeji jenyi.—Tangenu Vilinga 10:​34, 35.

17. Kulihi tunahase kuwana mijimbu yikwavo yakutalisa kukupwa ngeji mumbalaka yaYehova?

¹⁷ Hali Samu 15:​1, Ndavichi ahulishile ngwenyi: “Ove Yehova, iya nahase kupwa ngeji mumbalaka yove? Iya nahase kutwama hapili yove yajila?” Muka-kwimba jisamu vamuhwiminyinyine akumbulule vihula kana. Chihande nachikavangizaho nachishimutwila havyuma vimwe twatela kulinga, mangana tutwaleho lika kupwa tuvangeji jaYehova.