SULA MAR PUONJRUOK 23
WER 28 Mako Osiep gi Jehova
Jehova Gweli Mondo Ibed Wendone
“Hemba nobed kodgi, kendo anabed Nyasachgi.”—EZE. 37:27.
GIMA SULANI WUOYE
Sulani biro konyowa ng’eyo kaka wanyalo kawo mapek thuolo ma wan-go mar bedo wend Jehova kod yore moritowago kaka wende.
1-2. En thuolo mane makende ma Jehova miyo jotichne momakore kode?
INENO Jehova kaka ng’a? Samoro inyalo dwoko ni, ‘Aneno Jehova kaka Wuora, Nyasacha, kendo Osiepna.’ Nitie nyinge mamoko mag pak ma bende itiyogo kiwuoyo kuom Jehova. Kata kamano, be ineno Jehova kaka ng’ama orwaki mondo ibed wendone?
2 Ruoth Daudi nopimo osiep ma bedoga e kind Jehova gi jotichne, gi osiep manie kind welo gi ng’at morwakogi. Nopenjo kama: “A Jehova, ng’ano ma nobed wendo e hema mari? Ng’ano ma nyalo dak e godi maler?” (Zab. 15:1) Wechegi nyiso ni wanyalo bedo wend Jehova, tiende ni osiepene. Donge mano en thuolo makende ma Jehova miyowa?
JEHOVA DWARO NI WABED WENDE
3. Ng’ano ma nokwongo bedo wendo Jehova, to Jehova gi wendoneno nowinjo nade?
3 Ka ne Jehova pok ochueyo gimoro amora, ne en-ga mana kende. Kata kamano, bang’ kinde nochueyo Wuode ma miderma mi norwake e hema mare. Jehova osebedo ka mor ahinya gi thuolo ma en-go mar bedo jarwak welo. Muma wacho ni Jehova ‘nohero ahinya’ Wuodeno. Wuode bende ‘ne mor bedo e nyime pile’ kaka wendone mokwongo tik tik.—Nge. 8:30.
4. Ere kaka Jehova nochako rwako ji e hema mare mosmos?
4 Bang’e, Jehova nochueyo malaike mamoko kendo gin bende norwakogi mondo gibed wende. Malaikego iluongo ni “yawuot Nyasaye” kendo gimor bedo kanyachiel gi Jehova. (Ayub 38:7; Dan. 7:10) Kuom kinde moko, malaike kende e ma ne gin-ga osiepe Nyasaye. Bang’e, nochueyo dhano e piny, kendo gin bende nomiyogi thuolo mar bedo e hema mare. Kaka kinde ne medo kalo, moko kuom joma nobedo wende ne gin Enok, Noa, Ibrahim, kod Ayub. Jotich Nyasayego noluong ni osiepe Nyasaye kata joma ne “wuotho gi Nyasaye madier.”—Cha. 5:24; 6:9; Ayub 29:4; Isa. 41:8.
5. Ang’o ma wapuonjore e weche ma nokor e Ezekiel 37:26, 27?
5 Kaka kinde ne medo kalo, e kaka Jehova nomedo gwelo ji mondo gibed wende. (Som Ezekiel 37:26, 27.) Kuom ranyisi, e weche ma Ezekiel nondiko, wafwenyo ni Nyasaye dwaro ni jotichne momakore kode obed gi winjruok machiegni ahinya kode. Owacho ni obiro timo kodgi “singruok mar kuwe.” Weche ma nokorgo nyiso ni nitie kinde ma jotich Jehova ma nigi geno mar dak e polo kod ma nigi geno mar dak e piny ne dhi tiyo kanyachiel e hema mare ka gin “kueth achiel.” (Joh. 10:16) Mago e kinde ma wadakiegi!
NYASAYE RITOWA KAMORO AMORA MA WANTIERE
6. Ere kaka ng’ato bedo wendo e hema mar Jehova, to hemano yudore kanye?
6 E kinde ma nindikoe Muma, hema ne en kama ng’ato ne nyalo yueyoe, kata kama ng’ato ne geng’oree ne chieng’ kata koth. Wendo ma norwak e hemano niritoga maber. Sama wachiwore ne Jehova, wabedo welo e hema mare. (Zab. 61:4) Mano miyowa thuolo mar chamo chiemb chuny modhuro kanyachiel gi joma Jehova oserwako mondo obed wende. Hema mar Jehova ok ogur kamoro sie. Samoro isegadhi e piny machielo e chokruok moyiedhi, kendo romo gi ji mang’eny ma gin welo e hema mar Jehova. Inyalo yud hemano kamoro amora ma jotichne nitie.—Fwe. 21:3.
7. Ang’o momiyo wanyalo wacho ni joma notho komakore gi Jehova pod gin welo e hema mare? (Ne picha bende.)
7 To nade joma notho komakore gi Jehova? Be wanyalo wacho ni gin bende pod gin welo e hema mar Jehova? Ee! Nikech ang’o? En nikech e wang’ Jehova, jogo pod ngima. Yesu nowacho kama: “Kuom wach chiero jo motho, kata mana Musa nowacho mano e sigand yiend kudho, ka noluongo Jehova ni, ‘Nyasach Ibrahim, Nyasach Isaka, kendo Nyasach Jakobo.’ En Nyasach jo mangima to ok Nyasach jo motho, nimar e wang’e jogo duto ngima.”—Luka 20:37, 38.
Kata joma notho komakore gi Jehova pod gin welo e hema mare (Ne paragraf mar 7)
GUETH MA WAYUDO KOD TING’ MA WAN-GO SAMA WABEDO WELO E HEMA MAR JEHOVA
8. Gin gueth mage ma joma nie hema mar Jehova yudo?
8 Mana kaka hema masie konyo ng’ato mondo obed kama okuwe kendo geng’one koth kod liet mar chieng’, e kaka hema mar Jehova geng’onwa gik ma nyalo ketho winjruokwa kode kendo miyo wabedo gi geno. Ka wasiko e hema mar Jehova, onge gimoro amora ma Satan nyalo timonwa ma nyalo kelonwa hinyruok mosiko. (Zab. 31:23; 1 Joh. 3:8) E piny manyien, Jehova biro geng’o ne jotichne gimoro amora ma nyalo ketho winjruokne kodgi, kata ma nyalo kelonegi tho.—Fwe. 21:4.
9. Gin ang’o ma Jehova dwaro ni welo manie hema mare otim?
9 En thuolo makende bedo e hema mar Jehova, tiende ni bedo gi winjruok maber kendo mosiko kode. Ang’o ma dwarore ni watim mondo wadhi nyime bedo welo e hema mar Jehova? Sama ng’ato orwaki e ode, nitie gik ma doher ni itim kod ma ok doher ni itim. Kuom ranyisi, onyalo dwaro ni igol wuoche ka pok idonjo e ode, to mano e gima ibiro timo mondo obed mamor. Wan bende onego wang’e gik ma Jehova dwaro ni watim mondo wasik e hema mare. Hera ma waherogo Jehova chwalowa mondo watim duto ma more kendo ‘wabed malong’o chuth’ e wang’e. (Kol. 1:10) Bende, ka Jehova obedo Osiepwa, wabiro nene kaka Nyasachwa kendo Wuonwa mowinjore omi luor. (Zab. 25:14) Mano biro miyo wiwa kik wil gi osiep ma wan-go kode kendo rito osiepno. Ok wabi timo gik ma chwanye. Kar mano, wabiro ‘wuotho gi Nyasachwa ka wabolore.’—Mika 6:8.
JEHOVA NE OK OBUONO JO-ISRAEL KA NE GIN E THIM
10-11. Ere kaka yo ma Jehova notayogo Jo-Israel e thim nyiso ni ok obuon ji?
10 Jehova ok buon-ga wende. (Rumi 2:11) Wanyalo puonjore wachno ka wanono yo ma Jehova notayogo Jo-Israel ka ne gin e thim.
11 Bang’ ka ne Jehova osereso Jo-Israel ma giwuok Misri, noyiero jodolo mondo oti e hema mare mar lamo kata e tabernakel. Jo-Lawi ne imiyoga tije mopogore opogore ma ne ginyalo timo e hema maler. Be joma ne tiyo e hema kata ma nodak machiegni gi hema, ne yudo rit makende moloyo jomamoko? Ooyo! Jehova ok buon ji.
12. Ere kaka Jehova nonyiso ni ne ok obuono Ja-Israel moro amora? (Wuok 40:38) (Ne picha bende.)
12 Ji duto ne nigi thuolo mar bedo osiepe Jehova, bed ni ne gin gi migepe moko makende kata bed ni ne gidak machiegni kata mabor gi hema. Kuom ranyisi, oganda duto mar Jo-Israel ne nyaloga neno bor polo kod siro mar mach ma ne bedoga e wi hema. (Som Wuok 40:38.) Sa asaya ma ne bor polo ochako sudo, kata joma ne ni mabor kode ne nyalo nene mi gichak choko gigegi, muko hembegi, kendo wuok kanyachiel gi Jo-Israel wetegi. (Kwan 9:15-23) Ji duto ne nyalo winjo ka tarumbeta ariyo mag fedha ywak kendo mano ne miyo ging’eyo ni onego giwuogi. (Kwan 10:2) Nenore maler ni dak machiegni gi hema mar lamo ne ok nyis ni koro ng’ato nigi winjruok machiegni gi Jehova moloyo jowetene. Kar mano, Ja-Israel moro amora ne nyalo bedo gadier ni onyalo bedo wendo Jehova ka en gadier ni Jehova biro taye kendo rite. Kamano bende, bed ni wadak kanye, Jehova biro tayowa kendo ritowa.
Chenro mar bedo gi hema mar lamo ne nyiso kaka Jehova ne en Nyasaye ma ok buon ji (Ne paragraf mar 12)
KAKA JEHOVA OSENYISO NI OK OBUON JI E KINDEWAGI
13. Yo achiel ma Jehova nyisogo ni ok obuon ji e kindewagi en mane?
13 E kindewagi, nitie jotich Nyasaye modak machiegni gi ofiswa maduong’ kata gi bad ofisewa. Moko to tiyo e ofisego. Nikech mano, ginyalo konyo e tije mopogore opogore mitimo kuondego kendo gin gi thuolo mar tudore achiel kachiel gi owete matayo jotich Jehova. Moko tiyo ne Jehova kuom thuologi duto kaka jorit-alwora kata e migepe mamoko. Ka po ni ok in achiel kuom jogo, bed gadier ni Jehova ohero wende duto moriwo nyaka in, kendo oritogi giduto. (1 Pet. 5:7) Jehova pidho jotichne chiemb chuny kendo otayogi.
14. Yo machielo ma Jehova nyisogo ni ok obuon ji en mane?
14 Yo machielo ma Jehova osenyisogo ni ok obuon ji en ni osemiyogi thuolo mar yudo Muma kamoro amora ma gintie. Ndiko Maler chon ne yudore mana e dhok adek: Dho-Hibrania, Dho-Aram, kod Dho-Grik. Dibed ni joma nyalo somo dhokgo e ma ni machiegni gi Nyasaye moloyo joma ok nyal somogi? Ooyo, ok en kamano.—Mat. 11:25.
15. En ang’o ma nyiso ni Jehova ok buon ji? (Ne picha bende.)
15 Jehova ok yie kodwa mana nikech sombwa kata lony ma wan-go e wacho dhok mopogore opogore. Ok ochiwo riekone mana ne joma osomo ahinya, kar mano, omiyo ji duto thuolo mar ng’eyo Wachne, bed ni gisomo ahinya kata ooyo. Wachne oselok e dhok mang’eny, to mano osemiyo ji duto e piny mangima oyudo thuolo mar puonjore e wiye kendo bedo osiepene.—2 Tim. 3:16, 17.
Bedo ni ji nyalo yudo Muma kamoro amora ma gintiere, ere kaka mano nyiso ni Nyasaye ok buon ji? (Ne paragraf mar 15)
DHI NYIME TIMO KINDA MONDO JEHOVA OYIE KODI
16. Ka luwore gi Tich Joote 10:34, 35, ere kaka wanyalo dhi nyime timo kinda mondo Jehova oyie kodwa?
16 En thuolo makende bedo wendo e hema mar Jehova mar ranyisi. Jehova ng’won gi wende, oherogi, kendo opidhogi maber moloyo ng’ato ang’ata. E wi mano, ok obuon ji kendo orwako ng’ato ang’ata mondo obed wendone, bed ni odak kanye, oa e oganda mane, osomo ma romo nade, owacho dhok mane, oduong’ kata otin, en dhako kata dichwo. Kata kamano, mana joma oyie timo dwache kende e ma orwako mondo obed wende.—Som Tich Joote 10:34, 35.
17. Ang’o ma wabiro nono e sula ma luwo?
17 E Zaburi 15:1, Daudi nopenjo kama: “A Jehova, ng’ano ma nobed wendo e hema mari? Ng’ano ma nyalo dak e godi maler?” Kokalo kuom roho maler, Daudi nodwoko penjogo owuon. E sula ma luwo, wabiro nono moko kuom gik ma nyaka watim mondo Jehova oyie kodwa.
WER 32 Bi Ichung’ Kor Jehova!
