1-2. Yehova ali na kulanya bangamba bendi balinge bika?

 MWASA kukumbulula bati nga munu umo amihula ngwendi, mwamona bati Yehova? Hamo mwasa kukumbulula ngweni, ‘Yehova wapwa Tate, Njambi yange na kabusamba kange.’ Kuli mazina akwabo atwasa kusanesa Yehova aje anapande. Oloni kuma mwamona Yehova kupwa muka-kutambula banu ndi?

² Mwene Devidi wesekesele busamba bwa Yehova na banu bendi ku bangenzi na babenya njibo. Wehwile ngwendi: “Obe Yehova, iya asa kupwa mungenzi mu tenti yobe? Iya asa kukala ha munkinda wobe wa kujela?” (Samu 15:1) Ei vesi itukwasa tumone ngwetu twasa kupwa bangenzi mu tenti ya Yehova, kulumbununa kupwa babusamba bendi. Kuma keti kubezika kutulanya kuli Yehova ndi?

YEHOVA ASHAKA NGWENDI TUPWE BANGENZI BENDI

3. Iya wapwile mungenzi wa Yehova wakulibanga, co Yehova na mungenzi wendi balizibile bati?

³ Simbu kanda atange byuma byoshe, Yehova wakele likalyendi. Oloni mu kwita kwa simbu watambwile munendi wa ntwantwa mu tenti yendi ya cifwisa. Yehova wabwahelelele manene kutambula mungenzi Wendi wakulibanga. Mbimbiliya imwesa ngwayo, Yehova ‘wazemene manene’ Munendi. Co mungenzi wendi Yesu ‘wabwahelelele ku mesho a [Yehova] simbu yoshe.’​—Prov 8:​30.

4. Beya bakwabo balanyele Yehova kupwa bangenzi mu tenti yendi?

⁴ Yehova watangele lalo tungelo, co nabo wabalenyele  kupwa bangenzi mu tenti yendi. Tungelo bendi baka-basana ngwabo ‘bana ba Njambi,’ co banabwahelela kukala hamo na Yehova. (Yombi 38:7; Ndanye 7:10) Ha myaka yaingi bangenzi ba Njambi bapwile lika baje bakele kwilu. Mu kwita kwa simbu watangele banu, co nabo bakupwile bangenzi mu tenti yendi. Bamo babo bapwile Inoke, Nowa, Abrahamu, na Yombi. Aba bangamba ba Njambi ba kulongwa babatumbwile ngwabo babusamba bendi nambe baje ‘bendele na Njambi wa busunga.​—Gene 5:​24; 6:9; Yombi 29:4; Isaya 41:8.

5. Bika bitulilongesa ku bupolofweto buli ku mukanda wa Ezekiele 37:​26, 27?

⁵ Kushwa lika kunima, Yehova natwalelelaho kulanya bangamba bendi bapwe bangenzi mu tenti yendi. (Tandeni Ezekiele 37:​26, 27.) Cakumwenako, kwitila mu bupolofweto buli ku mukanda wa Ezekiyele tulilongesa ngwetu Njambi atonda ngwendi bangamba bendi ba kulongwa balikute nendi busamba bwa kukanyama. Nakulahesa ‘kulikumiiya nabo cikumiiyo ca kwoloka.’ Obu bupolofweto bunatalesa ku simbu ije baje bali na lilabelelo lya kukayoya mwilu na baje bali na lilabelelo lya kuyoya hano hasi bakalikwatasana hamo mu tenti ya Yehova ya cifwisa ha kupwa “butanga bumolika.” (Iwano 10:16) Ebi bikebyo bili na kulingiwa ano matangwa!

NJAMBI WATWAKA MBUNGE KWOSHE-KWOSHE KUTULI

6. Munu asa kupwa bati mungenzi mu tenti ya Yehova, co ei tenti yendi ya cifwisa iwaniwa kuli?

⁶ Mu simbu ibasonekele Mbimbiliya, tenti yapwile mwela mwa kulala na kulinyungilila ku byuma bya kufwa ngwe lisika, nyonzi na kushaluka kwa litanya. Mungenzi wakulahelele babenya tenti ngwendi amunyunga. Nga tulikundika kuli Yehova, co tupwa bangenzi mu tenti yendi ya cifwisa. (Samu 61:4) Tuli na byakulya bya ku sipilitu byabingi na babusamba baje banapu bangenzi mu tenti ya Yehova. Tenti Yendi ya cifwisa kuyakele lika ku mutambela umo. Hamo mwayaho laja ku lifuti lyeka, ku ciwano ca kulitila, co mwakaliwanene na bandolome na bandokazi baje banabezika kukala mu tenti ya Njambi. Tenti ya Yehova iwaniwa kwoshe-kwoshe kuje kwakala bangamba bendi.​—Kujo 21:3.

7. Mwafwa bika twendekela ngwetu bangamba ba Njambi ba kulongwa baje banatsi nabo bacili mu tenti yendi? (Taleni na cikupulo.)

⁷ Batico bangamba ba Njambi baje banatsi? Kuma twasa kwendeka ngwetu nabo banapu bangenzi mu tenti ya Njambi ndi?  Eyo! ­Mwafwa bika twendekela ngoco? Mwafwa Yehova anga acibanuka. Yesu wendekele ngwendi: “Ha ñanda ya kusanguka kwa batsi, Mosesa nendi wendekeleho mu muzimbu wa ciputa ca mingonga, mwasanene Yehova ngwendi wapwa ‘Njambi ya Abrahamu, Njambi ya Isaki na Njambi ya Jakobu.’ Kapwile Njambi ya batsi, oloni wapwa Njambi ya baje bali na kuyoya, mwafwa kuli ikeye boshe bali na kuyoya.”​—Luka 20:​37, 38.

KUBEZIKA KUTUWANA HA KUKALA MU TENTI YA YEHOVA NA BYUMA BITUNAPANDE KULINGA

8. Bibezikiso muka bibawana bangamba ba Njambi ha kukala mu tenti yendi?

⁸ Tenti ya Yehova ikanyungilila bangamba bendi ku byuma bije byasa kutsiya busamba bwabo nendi, co lalo ikabakwasa batwaleleleho kukala na lilabelelo lya byuma bya kulutwe. Nga tutwalelelaho kushwena kuyehi na Yehova, co Satana kasa kutunenela bukalu ku myaka yoshe. (Samu 31:23; 1 Iwa 3:8) Mu kaye kakaha Yehova akatwalelelaho kukwasa bangamba bendi ku mubila na ku sipilitu, co kubakatsi.​—Kujo 21:4.

9. Yehova ashaka ngwendi bangamba bendi balinge bika?

⁹ Kunapu kubezika kwakama kupwa mungenzi mu tenti ya Yehova na kutwalelelaho kupwa kabusamba kendi. Bika bitunapande kulinga mangana tutwaleleleho kupwa bangenzi mu tenti ya Yehova? Nga munu umo namilanya ku njibo yendi, tukulahela ngwetu mulinga byuma mu ngila inapande. Cakumwenako, nasa kubandamena ngwendi mushulula makatulo simbu kanda mukobele mukati. Mu ngila imolika, tushaka kuzibuka byatonda Yehova ngwendi tulinge mangana tutwaleleleho kupwa bangenzi mu tenti yendi. Kuzema Yehova kutulingisa tulinge byuma byoshe byashaka mangana “tumuzibise kubwaha mu byuma byoshe.” (Kolo 1:10) Yehova wapwa kabusamba ketu, nameme ngoco wapwa lalo Njambi na Tate yetu uje itunapande kusingimika. (Samu 25:14) Tunapande kutwalelelaho kwanuka ei simpi, kulinga ngoco kutukwasa mangana tutwaleleleho kumusingimika. Nga tumusingimika manene, co kutulingi byuma bije bimuzibisa kubabala ku mbunge. Tushaka ‘kuyoya mu kulikehesa’ kuli Njambi yetu.​—Mika 6:8.

YEHOVA KAMWESELE BAISALELE KANGU

10-11. Yehova walingile bati baIsalele ha mukinda wa Sinai, co byuma byalingile bimwesa bati ngwabyo kakele kangu?

¹⁰ Yehova wazema bangenzi bendi boshe, co kakele na kangu. (Loma 2:​11) Tulilongesa ngwetu Yehova kakele na kangu nga tusinganyekesesa mwalingililemo baIsalele ha mukinda wa Sinai.

¹¹ Munima ya kwobola bangamba bendi mu bundungo mu Ijipiti, Yehova wangwile tupilistu mangana bapangele ku tabanakele. Wangwile Balebi mangana bapange bipangi bimo bya kujela bya ku tabanakele. Kuma Njambi wakele lika mbunge baje bakele na kupangela ku tabanakele nambe baje bakele lika muyehi nayo ndi? Embwe. Yehova kakele na kangu.

12. Yehova mwalingililemo baIsalele mu mambo kumwesa bati ngwabo kakele na kangu? (Kutuhuka 40:38) (Taleni na cikupulo.)

¹² KaIsalele woshe wasele kupwa kabusamba ka Njambi nameme kapangelele ku tabanakele nambe wakele kulako nayo. Cakumwenako, Yehova wamwene ngwendi baIsalele boshe bakele na kumona lishelwa lije lyakele ha tabanakele mutanya, co butsiki lyatengulukile kupwa tuhya. (Tandeni Kutuhuka 40:38.) Lishelwa mulyakele na kukatuka munu woshe wasele kulimona nameme baje  bakele ­kulako manene na tabanakele, co basele kulongekeya bitenga byabo, kushomona matenti abo na kwendelela hamo na mbunga yoshe. (Kula 9:​15-23) Banu boshe bakele na kuziba cilumo ca malupembo abali a siuva, cije cilumo cakele na kukwasa banu boshe bashangumuke kwenda. (Kula 10:2) Kukala muyehi na tabanakele kukwalumbunwine ngwabo munu wakele na busamba bwa kukanyama na Yehova kutubakana banu baje bakele kulako nayo. Kaisalele woshe wasele kukala na busamba bwa kukanyama na Yehova na kukulahela ngwendi amutwamenena na kumunyungilila. Mu ngila imolika, kwoshe-kwoshe kutuli tunapande kukulahela ngwetu Yehova watuzema, watwaka mbunge, co atunyungilila.

YEHOVA KAKELE NA KANGU

13. Yehova ali na kumwesa bati ngwendi kakele na kangu ano matangwa?

¹³ Bangamba ba Njambi bamo ano matangwa bakala kuyehi na Cikota ca Bakaleho ba Yehova nambe ku minango ya Bakaleho ba Yehova bamoco, hakeho bene habakapangela. Ngeci, aba bandolome na bandokazi ba kuliseza-seza banasa kulingako bipangi bimo bili na kulingiwa aha ha mitungo na kulikwatasana na baje bali na kutwamenena. Bamo bapwa tunyungi ba kuzenguluka bekaco bali na kupanga bipangi bikwabo bya kulitila bya simbu yoshe. Nga kumwesi mu cipangi ca simbu yoshe kulaheleni ngweni Yehova wamizema, co mwasa kupwa bangenzi mu tenti Yendi. Yehova amizibuka mwamubwa, co amyana byuma bimutonda. (1 Pita 5:7) Yehova akana byakulya bya ku sipilitu kuli umo na umo wa bangamba bendi, co akabatwamenena na kubanyungilila boshe.

14. Ngila muka ikwabo yakamweselamo Yehova ngwendi kakele na kangu?

¹⁴ Yehova namwesa lalo ngwendi kakele na kangu ha kulingisa Mbimbiliya ikale mu bindaka byabingi mangana banu babangi mu kaye koshe base kulitandelayo. Hakulibanga,  Mbimbiliya baisonekele mu bindaka bitatu; Cihebelu, Cialamaiki, na Cigriki. Kuma baje basa kutanda Mbimbiliya mu bindaka byakulibanga mubaisonekele bakebo lika basa kukala na busamba bwa kukanyama na Njambi ndi? Embwe, keti mukemwo.​—Mate 11:25.

15. Bukaleho muka bumwesa ngwabo Yehova kakele na kangu? (Taleni na cikupulo.)

¹⁵ Yehova kesi kulanya lika baje banalilongesa manene nambe baje bazibuka ndaka yakulibanga mubasonekele Mbimbiliya kupwa babusamba bendi. Yehova nasholola mana endi ku banu boshe mu kaye koshe, keti ku banu lika baje banalilongesa. Lijwi Lyendi banalinungulula mu bindaka byabingi mangana banu mu kaye koshe base kulilongesa byendi na kupwa babusamba bendi.​—2 Timo 3:​16, 17.

TWALELELENIHO KUPWA BANGENZI BA YEHOVA

16. Kwesekesa na mukanda wa Bilinga 10:​34, 35, twasa kutwalelelaho bati kupwa bangenzi mu tenti ya Yehova ya cifwisa?

¹⁶ Kunapu kubezika kwakama manene kupwa bangenzi ba Yehova mu tenti yendi ya cifwisa. Kukwesi munu akatambula mwamubwa bangenzi ngwe Yehova, mwafwa wakala manene na ngozi na cizemo. Kakele na kangu, co akatambula banu boshe nameme ba kutunda ku bisemwa byeka, bindaka, ba myaka yakuliseza-seza, ba bushwamwa bwoshe, bakulilongesa nambe bakujeneka kulilongesa. Nameme ngoco, baje lika bononoka mashiko endi bakebo basa kupwa babusamba bendi.​—Tandeni Bilinga 10:​34, 35.

17. Kuli kutwasa kuwana biñanda bikwabo bije bimwesa mutwasa kupwila bangenzi mu tenti ya Yehova?

¹⁷ Ngwe mubanendekela ku mukanda wa Samu 15:​1, Devidi wehwile ngwendi: “Obe Yehova, iya asa kupwa mungenzi mu tenti yobe? Iya asa kukala ha munkinda wobe wa kujela?” Yehova wahwimininine Devidi akumbulule ebi bihula bili ku mukanda wa Samu 15. Mu cilongesa cinatako, tusimutwiya ha byuma bimo bitunapande kulinga mangana tutwaleleleho kupwa bangenzi mu tenti ya Yehova.