LARTIK LETID 23
KANTIK 28 Gagn Lamitie Zeova
Zeova Anvi ki Nou Vinn So Bann Invite
“Mo latant pou avek zot; ek mo pou vinn zot Bondie.”—EZE. 37:27.
PWIN PRINSIPAL
Nou kapav vinn bann invite Zeova anba so latant. Sa lartik-la pou montre nou seki sa vedir, ek nou pou trouve osi kouma Zeova pran swin so bann invite.
1-2. Ki linvitasion Zeova donn so bann serviter?
KI PLAS Zeova ena dan to lavi? Sirman to pou dir, ‘Zeova Li mo Papa, mo Bondie, ek mo Kamarad.’ Ouswa to kapav osi servi bann lezot tit ki dekrir Zeova. Me eski to pou dir, ‘Mo Zeova so invite?’
2 Lerwa David ti konpar lamitie ki Zeova ena ar So bann fidel serviter, ar relasion ki ena ant bann invite ek sa kikenn ki’nn invit zot la. Li ti dir: “A Zeova, kisann-la to pou invit dan to latant? Kisann-la ki pou res dan to montagn sakre?” (Ps. 15:1) Sa bann parol-la montre nou ki nou kapav vinn Zeova so bann invite, setadir so bann kamarad. Se enn gran loner ki Li fer nou, pa vre!
ZEOVA ANVI KI NOU VINN SO BANN INVITE
3. Kisann-la ti Zeova so premie invite, ek ki Zeova ek Zezi ti resanti pou zot kamarad?
3 Zeova ti tousel avan ki Li koumans kree tou kitsoz. Me apre, Li’nn kree so Garson Premie-Ne. Zeova ti bien kontan parski so Garson ti so premie invite ki’nn vinn anba so latant. Labib dir ki Zeova “bien kontan” so Garson, ek Zezi osi “ti touletan dan lazwa devan [Zeova].”—Prov. 8:30.
4. Avek letan, kisann-la ankor Zeova ti invit anba so latant?
4 Apre sa, Zeova ti kree bann anz, ek zot osi zot ti vinn bann invite anba so latant. Labib apel bann anz “bann garson Bondie” ek li montre ki zot bien ere ar Zeova. (Zob 38:7; Dan. 7:10) Pandan plizir santenn lane, bann invite Zeova ti zis bann ki ti res ansam avek Li dan lesiel. Me apre, Zeova ti osi donn bann dimounn posibilite pou vinn anba so latant. Parmi sa bann dimounn-la, ti ena so bann fidel serviter kouma Enok, Noe, Abraam, ek Zob. Labib montre ki zot ti bann kamarad Zeova parski zot ti obeir Li.—Zen. 5:24; 6:9; Zob 29:4; Iza. 41:8.
5. Ki nou kapav aprann ar profesi ki trouv dan Ezekiel 37:26, 27?
5 Pandan plizir santenn lane, Zeova inn kontign invit so bann kamarad pou vinn so bann invite. (Lir Ezekiel 37:26, 27.) Par exanp, dan profesi Ezekiel, nou trouve ki Zeova vremem anvi ki so bann fidel serviter vinn pros ar Li. Li’nn promet zot ki Li pou fer “enn lalians lape avek zot.” Sa profesi-la koz lor lepok kot bann serviter Zeova ki ena lesperans pou al dan lesiel ek bann ki ena lesperans pou viv lor later, pou ansam anba latant Zeova kouma “enn sel troupo.” (Zan 10:16) Sa profesi-la pe realize dan nou lepok!
ZEOVA PRAN NOU SWIN NINPORT KOTSA NOU ETE
6. Kouma enn kikenn kapav vinn enn invite anba latant Zeova, ek kotsa kapav trouv So latant?
6 Dan Labib, enn latant se enn plas kot enn kikenn kapav repoze ek gagn proteksion kont lapli, divan, ek soley. Kan enn kikenn ti invit enn lot dimounn anba so latant, li ti okip bien sa dimounn-la. Kan nou donn nou lavi Zeova ek nou pran batem, nou vinn enn invite anba latant Zeova. (Ps. 61:4) Gras-a sa, nou gagn tou seki nou bizin pou ki nou kontign ena enn bon lamitie ar Zeova, ek nou kapav osi profit konpagni bann lezot invite Zeova. Latant Zeova, li pa zis dan enn sel plas. Ninport kotsa enn kikenn reste, li kapav vinn anba latant Zeova. Kitfwa to’nn deza al dan enn lot pei pou asiste enn lasanble, ek to’nn zwenn bann lezot serviter Zeova ki anba so latant. Wi, latant Zeova li ninport kotsa so bann fidel serviter ete!—Rev. 21:3.
7. Kouma nou kone ki bann fidel serviter Zeova ki’nn mor, zot ankor touzour bann invite Zeova anba so latant? (Get zimaz osi.)
7 Kan bann fidel serviter Zeova mor, eski zot ankor touzour bann invite Zeova anba so latant? Wi. Pou Zeova, zot ankor vivan dan so memwar! Se pou sa rezon-la ki Zezi ti dir: “Konsernan rezireksion bann mor, mem Moiz ti fer konn sa dan zistwar ki koz lor touf pikan, kan li ti apel Zeova ‘Bondie Abraam, Bondie Izaak, ek Bondie Zakob.’ Li pa Bondie bann mor, me Bondie bann vivan, parski pou li zot tou vivan.”—Lik 20:37, 38.
Bann fidel serviter Zeova ki’nn mor ankor touzour bann invite Zeova anba so latant (Get paragraf 7)
BANN BIENFE EK BANN KONDISION
8. Ki bienfe nou gagne kan nou anba latant Zeova?
8 Parey kouma enn latant li enn proteksion ek enn plas pou repoze, latant Zeova li enn proteksion pou so bann invite. Sa latant-la li protez nou kont ninport ki kitsoz ki kapav gat nou lamitie avek Li, ek li donn nou enn vre lespwar pou lavenir. Li vre ki Satan pou atak nou, selman kan nou kontign res pros ar Zeova, Satan pa pou kapav kontign fer nou ditor. (Ps. 31:23; 1 Zan 3:8) Dan lemond nouvo, Zeova pa pou zis kontign protez so bann kamarad kont Satan, me Li pou osi protez zot kont lamor.—Rev. 21:4.
9. Kouma bann invite Zeova bizin konport zot?
9 Se vremem enn gran loner pou vinn enn invite Zeova anba so latant. Gras-a sa, nou kapav ena enn bon lamitie avek Li, ek sa lamitie-la kapav dire pou touletan. Me kouma nou bizin konport nou si nou anvi kontign res enn invite Zeova? Si enn kikenn invit twa kot li, sirman to pou anvi kone kouma to kapav fer li plezir. Par exanp, kitfwa li pou demann twa pou tir to soulie avan ki to rant kot li, ek sirman to pou aksepte pou fer sa. Dan mem fason, nou anvi kone seki Zeova anvi nou fer pou ki nou kontign res bann invite anba so latant. Nou bien kontan Zeova, akoz sa nou anvi fer tou seki nou kapav “pou fer li plezir dan tou kitsoz.” (Kol. 1:10) Ek mem si Zeova Li nou Kamarad, Li osi nou Bondie ek nou Papa. Akoz sa, nou bizin ena enn gran respe pou Li. (Ps. 25:14) Alor, fode zame nou bliye kisann-la Zeova ete, ek nou bizin touletan ena enn gran respe pou Li. Koumsa, nou pou evit fer bann kitsoz ki kapav ofans Li. Wi, nou vremem anvi kontign “mars avek [nou] Bondie avek limilite!”—Mish. 6:8.
ZEOVA PA TI FER PREFERANS DAN LEPASE
10-11. Kouma Zeova ti tret bann Izraelit kan zot ti dan dezer Sinai, ek kouma sa montre ki Li pa fer preferans?
10 Zeova tret tou so bann invite parey; Li pa fer preferans. (Rom. 2:11) Nou kapav trouv sa dan fason ki Li ti tret bann Izraelit kan zot ti dan dezer Sinai.
11 Apre ki Li ti fer bann Izraelit sorti dan Lezip, Zeova ti etabli bann pret pou servi dan tabernak. Li ti osi donn bann Levit bann lezot travay pou fer kot tabernak. Me eski Zeova ti okip pli bien bann ki servi dan tabernak ouswa bann ki ti res pli pre ar tabernak? Non. Kifer? Parski Zeova Li pa fer preferans.
12. Kouma fason ki Zeova ti tret bann Izraelit dan dezer montre ki Li pa ti fer preferans? (Exod 40:38) (Get zimaz osi.)
12 Mem si zot pa ti servi dan tabernak, ouswa mem si zot ti res lwin ar tabernak, tou bann Izraelit ti kapav vinn bann kamarad Zeova. Par exanp, Zeova ti fer sir ki lepep an-antie kapav trouv kolonn niaz ek kolonn dife ki ti lao tabernak. (Lir Exod 40:38.) Kan niaz-la ti koumans bouze pou al dan enn nouvo direksion, tou dimounn ti kapav trouv li. Lerla, zot ti ramas zot bann zafer, kas zot latant, ek al ansam ar bann lezot Izraelit. (Nonb 9:15-23) Tou dimounn osi ti kapav tann son sa de tronpet an-arzan la. Kan zot ti tann sa son-la, zot ti kone ki zot ti bizin koumans bouze. (Nonb 10:2) Alor, si enn kikenn ti res pre ar tabernak, sa pa vedir ki li ti pli pros ar Zeova. Okontrer, tou bann Izraelit ti kapav vinn bann invite Zeova, ek Zeova ti pou gid zot ek protez zot. Li parey pou nou azordi. Ninport kotsa nou reste lor later, Zeova kontan nou, Li pran nou swin, ek Li protez nou.
Bann dispozision ki Zeova ti pran pou tabernak montre ki Li pa fer preferans (Get paragraf 12)
ZEOVA PA FER PREFERANS AZORDI OSI
13. Kouma Zeova montre ki Li pa fer preferans azordi?
13 Azordi, ena plizir serviter Zeova ki res pre ar Biro Mondial ouswa ar bann Betel, ek ena osi sertin ki al donn enn koudme laba. Sa bann frer ek ser la gagn lokazion pou partisip dan boukou aktivite ki fer dan sa bann plas-la. Zot gagn osi lokazion pou frekant bann frer ki diriz nou laktivite. Ena osi bann frer ek ser ki servi dan servis sirkonskripsion ek osi dan lezot form servis spesial aplintan. Si to form parti bann frer ek ser ki pena sa bann privilez-la, pa bliye ki Zeova kontan tou so bann invite parey. Li konn twa personelman ek Li pran twa swin. (1 Pier 5:7) Par exanp, Zeova donn tou so bann serviter zot manze spiritiel, Li gid zot, ek Li protez zot.
14. Sit enn lot fason kot Zeova montre ki Li pa fer preferans.
14 Enn lot kitsoz ki montre ki Zeova pa fer preferans, se ki Li fer an-sort ki bann dimounn lor later antie kapav lir Labib. O-koumansman, Labib ti ekrir zis dan trwa lang: Ebre, Arameen, ek Grek. Me eski savedir ki bann ki kapav lir sa trwa lang-la, zot ena enn pli bon lamitie ar Zeova konpare ar bann ki pa kapav lir sa bann lang-la? Non.—Mat. 11:25.
15. Ki prev nou ena ki Zeova pa fer preferans? (Get zimaz osi.)
15 Zeova pa invit zis bann dimounn ki ena ledikasion, ouswa bann ki konn lir Ebre, Arameen, ek Grek, pou vinn so kamarad. Okontrer, Li anvi ki tou bann dimounn lor later gagn so sazes. Akoz sa, Li’nn fer tradir Labib dan plizir milye lang. Koumsa, ninport kisann-la kapav gagn bann bienfe ar bann lansegnman ki ena dan Labib, ek zot kapav vinn so kamarad.—2 Tim. 3:16, 17.
Lor later antie bann dimounn kapav lir Labib ek sa montre ki Bondie pa fer preferans (Get paragraf 15)
KONTIGN GAGN “FAVER” ZEOVA
16. Dapre Zistwar Bann Zapot 10:34, 35, kouma nou kapav kontign gagn faver Zeova?
16 Se vremem enn gran loner pou vinn enn invite Zeova ek pou res anba so latant! Zeova, sa Kikenn ki’nn invit nou la, Li vremem bon, Li bien kontan nou, ek Li bien zenere. Anplis, Li pa fer preferans; ki nou enn zom ouswa enn fam, ninport kotsa nou reste, ninport kouma nou’nn grandi, ninport ki laz ek ledikasion nou ena, ek ninport ki ras nou ete, Zeova akeyir nou tou anba so latant. Selman, Li akeyir kouma so bann invite zis bann ki obeir Li.—Lir Zistwar Bann Zapot 10:34, 35.
17. Pou ki nou kapav kontign res anba latant Zeova, kotsa nou kapav gagn bann lezot linformasion?
17 Dan Psom 15:1, David ti poz sa bann kestion-la: “A Zeova, kisann-la to pou invit dan to latant? Kisann-la ki pou res dan to montagn sakre?” Ek dan bann verse apre, David ti reponn sa bann kestion-la. Dan prosin lartik, nou pou get sertin kitsoz ki nou bizin fer pou fer Zeova plezir ek pou res so kamarad.
KANTIK 32 Pran Par pou Zeova!
