CIPANDE CA KUSAMBILILAMO 23
LWIMBO NA. 28 Vya Kuya Cuza Wako Yeova
Yeova Akalonda Ukuti Tuye ya Cuza Yakwe
“Tulaikalamo pamwi na alio, nupya nemo indaya Leza wao.”—EZEK. 37:27.
VINO TUMASAMBILILAPO
Tumasambilila pali vino cikapiliula ukuya umwi taalu lyakwe Yeova ilyaunkolanya alino na vino akatusakamala lino tuli umwi taalu kwene lii .
1-2. I syuko cii lino Yeova wapeela aomvi yakwe acisinka?
I VYANI vino mungalanda umwi nga wamuzya pali Yeova? Limwi mungasuka ukuti, ‘Yeova a Tata, Leza wane, nupya Cuza wane.’ Nupya, limwi mungelenganya pa nzila na zyuze zino mungalondolwelamo vino Yeova akamucitila. Nomba uzye mwatala mwelenganyapo ukuti wamwama ukuti mwaikala umwi taalu lyakwe?
2 Umwene Devedi wakolinye ucuza uno Yeova akakwata na yakapepa yakwe acumi, kuli ucuza ukaya pali wino ataama umwi alino na wino iyama. Uzizye ati: “uzye aweni alingila umwi taalu lyako? Uzye aweni alikala apa mwamba wako uwamuzilo?” (Masa. 15:1) Amazwi yaa yakalangilila ukuti tungikala umwi taalu lyakwe Yeova kuli kuti ukuya ya cuza yakwe. Twasyuka sana vino Yeova watwama ukwikala umwi taalu lyakwe?
YEOVA WATWAMA
3. Aweni wino Yeova watandikilepo ukwama, nupya yonsi yoili yuvwile uli?
3 Lino Yeova atatala watandika ukuumba, wali sile wenga. Nomba wizile aumba Umwanakwe iyeli. Cali kwati Yeova wama umuntu wa kutandikilako umwi taalu lyakwe, nupya uvwile ningo sana pali vino wacisile. Baibo ikalangilila ukuti ‘wazangilanga umu mwanakwe’. Nupya umwanakwe nawe kwene, ‘wali ni nsansa’—Mapi. 8:30.
4. Aaweni na yauze yano Yeova wamile umwi taalu lyakwe?
4 Yeova lyene waumvile ya malaika nu kuyama umwi taalu lyakwe ilya unkolanya. Baibo ikaama ya malaika yaa ukuti “ana” yakwe Leza nupya ikalondolola nu kuti yakauvwa ningo ukuya pamwi na Yeova. (Yobo 38:7; Dan. 7:10) Ikazile na Leza pa myaka iingi nupya yali ivyuza vyakwe. Lyene wizile aumba antu nu kuyazumilizya ukwikala umwi taalu lyakwe. Yamwi ali umwi taalu lyakwe Yeova aa Inoki, Nowa, Abulahamu, alino na Yobo. Baibo ikalangilila ukuti yakwanisye ukuya ya cuza yakwe Leza pano yali ni cuvwila kuli aliwe.”—Utan. 5:24; 6:9; Yobo 29:4; Eza. 41:8.
5. I vyani vino tungasambilila uku usesemo uwaya pali Ezekelo 37:26, 27?
5 Yeova watwalilile ukwama ya cuza yakwe umwi taalu lyakwe. (Belengini Ezekelo 37:26, 27.) Wakwe, uku usesemo wakwe Ezekelo tukasambilila ukuti Yeova akalonda aakamupepa na ucisinka yakwate ucuza na aliwe. Walaya ukupangana “upangano” wa mutende nayo. Usesemo uu ukalozya kuli vino cilaya lino apakwe alino na yano yakwata upaalilo wa kwikala pano nsi yalaya “iumba lyonga.” (Yoa. 10:16) Nupya vikwene ivikucitika ndakai.
YEOVA AKATUSAKAMALA KONSI KUNO TULI
6. Cikaya uli pakuti umwi aikala umwi taalu lyakwe Yeova nupya uzye taalu kwene lii tungalizana kwi?
6 Mu nsita ino ivyalumbulwa muli Baibo vyacitikanga, itaalu lyayanga incende isuma umwakupuzila. Ndi cakuti umwi yamwama ukuti aye ukwi taalu lyakwe umwi ala amaenekelanga ukuti yamamusakamala ningo sana. Ndi cakuti twaipeela kuli Yeova, cikaya kwati twatandika ukwikala umwi taalu lyakwe. (Masa. 61:4) Twakwata vyonsi vino tukalondekwa pakuti ucuza witu na Yeova utwalilile ukuya ukome nupya tukaipakizya ucuza na antu yano yaya umwi taalu lyakwe ilya unkolanya. Yeova asizumilizya sile antu aku ncende imwi ukuya umwi taalu lyakwe ilya unkolanya lelo akazumilizya antu aku ncende zyonsi. Limwi mwatala mwaya uku mpanga yuze, umu kulongana ukongano uiyele kuno mwaile imuzana antu akaipakizya ukuya umwi taalu lyakwe Yeova. Taalu lyakwe Yeova lyaya konsi kuno kwaya antu aya ni cuvwila akamupepa.—Kuso. 21:3.
7. Umulandu cii uno tungalandila ukuti aomvi acisinka afwa yacili yakaikala umwi taalu lyakwe Yeova? (Loliniko ni cikope.)
7 Nga aomvi autailo afwa? Uzye yacili umwi taalu lyakwe Yeova? Ee. Umulandu cii uno twalandila vivyo? Pano Yeova acili akaiusya. Yesu walondolwile ukuti: “ukulozya ku kutuutululwa kwa yafwe, nanti sile a Mose walenzile cimanyikwe umwi lyasi ilikalanda pa cimpuza ca moto, lino wamile Yeova ati, ‘Leza wakwe Abulahamu, Leza wakwe Isaki, na Leza wakwe Yakobo.’ Asi Leza wa yafwe, lelo a Leza wa yantu ya umi. Pano kuli aliwe yonsi aumi.”—Luka 20:37, 38.
Na yano yafwa kwene yangatwalilila ukuya umwi taalu lyakwe Yeova (Lolini palaglafu 7)
VINO TULUNZILE UKUCITA ALINO NU USUMA UWAYA UMU KWIKALA UMWI TAALU LYAKWE YEOVA
8. I vyani vino akaikala umwi tenti lyakwe Yeova yakaipakizya?
8 Wakwe vino itaalu lya cumi cumi lingaya incende isuma umwakupuzila, Yeova akacingilila antu akaikala umwi taalu lyakwe kuli vyonsi ivingalenga ucuza wao na aliwe ukononeka nu kuyapeela upaalilo wa cumi cumi. Ndi cakuti twatwalilila ukuya ya cuza yakwe Yeova, satana atanga atucitile iviipe ivingalenga twacula amanda pe. (Masa. 31:23; 1 Yoa. 3:8) Umu nsi ipya, Yeova alacingilila ya cuza yakwe acisinka uku vintu ivingalenga ucuza wao na aliwe ukoneka alino nu kumfwa.—Kuso. 21:4.
9. I vyani vino Yeova akalonda ukuti ya cuza yakwe yacita pakuti yatwalilile ukuya umwi tenti lyakwe?
9 Umucinzi ukulu sana uno twapelwa uwa kuya umwi taalu lyakwe Yeova kuli kuti ukutwalilila ukuipakizya ucuza na aliwe. I vyani vino tulinzile ukulacita pakuti tutwalilile ukuya umwi taalu lyakwe? Ndi cakuti mwatandalila yamwi uku ng’anda mungatemwa ukumanya vino mulinzile ukucita pakuti yuvwe ningo. Wakwe, limwi yanguvwa ningo ndi cakuti mwazula insapato pa kwingila umu ng’anda, nupya mungalondesya ukucita vivyo kwene. Vikwene avino tukalonda ukucita kuli Yeova, tukalonda ukumanya vino akalonda ukuti twacita pakuti tutwalilile ukuya umwi tenti lyakwe. Tukaezya na maka ukucita vyonsi vino tungakwanisya pakuti ‘twamuzanzya.’ (Kolo. 1:10) Nupya nanti cakuti twamanya ukuti Yeova acuza witu, tukaiusya ukuti a Leza witu nupya Tata uwalinga ukupokelela umucinzi. (Masa. 25:14) Fwandi tutalinzile ukwilila ivintu vii nu kuleka ukumupeela umucinzi. Ukumucindika kulatwazwa ukutaluka uku kucita ivintu ivingalenga asoke. Ukwaula nu kutwisika tukalonda u “kupita mu ufuuke” na Leza witu.—Mika 6:8
YEOVA WALI NU MULINGANYA UKU INA IZLAELI
10-11. Uzye vino Yeova wacitanga uku ina Izlaeli lino yali umu lwanga vikalangilila uli ukuti ataya na kapatulula?
10 Yeova waya nu mulinganya uku antu akaikala umwi tenti lyakwe. (Loma 2:11) Tungasininkizya vivyo ndi cakuti twasambilila pali vino wacisile uku ina Izlaeli lino yali umu lwanga lwa Sinai.
11 Pa cisila cakuti Yeova wapususya antu yakwe ukufuma umu uzya umu Ijipti, wasonsile ya simapepo akuomba api tenti lya kupepelapo. Aina Levi nayo yali nu kulaomba imilimo yuze iya pi tenti lya kupepelapo. Uzye Yeova wasakamalanga ningo yano yaombelanga api tenti lya kupepelapo, nanti yano ikalanga umupipi ni tenti lya kupepelapo, ukucila asyala? Awe. Yeova ataya na kapatulula.
12. Uzye Yeova walangilile uli ukuti wali nu mulinganya uku Ina Izlaeli lino yali nu lwanga? (Kufuma 40:38) (Loliniko ni cikope.)
12 Yonsi kwene aikalanga umu nkambi yakweti isyuko lya kuipakizya ucuza na Yeova umu nzila iliimwi, asi mulandu ni milimo ino yapeezilwe api Itenti lya kupepelapo nanti kuno ikalilanga. Wakwe, walesile ukuti yonsi yalola ikumbi alino ni cimbilimbili ca moto icali papela iitenti lya kupepelapo. (Belengini Kufuma 40:38.) Ndi cakuti ikumbi lyatandika ukuya kuze, yonsi kwene kumwi sile na ikalanga ukutali yalilolanga nu kutandika ukulonga iviya vyao, kupangulula ma tenti, alino nu kutandika ukupitila pamwi. (Mpe. 9:15-23) Yonsi kwene yuvwanga iciunda icipusaneko ica mapenga yaili alilanga pa kuyamanyisya ukuti yalinzile ukutandika ukupita. (Mpe. 10:2) Ukwaula nu kutwisika ukwikala umupipi ni tenti lya kupepelapo kutalangilanga ukuti yamwi yakweti ucuza upalamisye na Yeova ukucila auze. Lelo Aina izlaeli yonsi yakweti isyuko lya kwikala umwi tenti lyakwe Yeova nu kutaila ukuti wali nu kulayasakamala alino nu kuyacingilila. Vikwene avino caya na ndakai kwene, asi mulandu na kuno tukaikala, Yeova watutemwa, akatusakamala nupya akatucingilila.
Itenti lya kupepelapo i lyayanga pakasi ka nkambi lyalangililanga vino Yeova atakwata kapatulula (Lolini palaglafu 12)
VIKALANGILILA UKUTI YEOVA ATAYA NA KAPATULULA NDAKAI
13. Uzye Yeova akalanga uli ukuti waya nu mulinganya ndakai?
13 Yamwi pa antu yakwe Yeova yakaikala umupipi na maofesi yakalamba mu nsi yonsi yakwe ya Nte Yakwe Yeova. Yamwi yakaombela pa maofesi kwene yaa. Cii cingalenga yaomba imilimo ipusane pusane pa ncende kwene ii alino nu kulolana na aonsi akatungulula. Yamwi nayo yakatandalila ivilongano nanti ukuomba imilimo yuze iyaya umu mulimo wa nsita yonsi. Nanti cakuti limwi mwemo musiombako imilimo ii, mungasininkizya ukuti mukaikala umwi taalu lyakwe Yeova nupya wamutemwa. Wamumanya ningo nupya akamupeela vino mukalondekwa. (1 Pet. 5:7) Yeova lyonsi akapeela aomvi yakwe vyonsi vino yakulondekwa muli vyakwe Leza, utunguluzi, alino nu kuyacingilila.
14. Inzila cii na yuze ino Yeova walangilamo ukuti atakwata kapatulula?
14 Inzila na yuze ino Yeova walangilamo ukuti atakwata kapatulula, ukuleka ukuti antu umu nsi yonsi yakwate isyuko lya kubelenga Baibo. Baibo walembilwe umu ndimi zitatu kuli kuti Ciebele, Cialamaiki,alino ni Cigiliki. Uzye antu aakabelenga Baibo umu ndimi zii yakwata ucuza upalamisye na Yeova ukucila yayo aasibelenga? Awe foo.—Mate. 11:25.
15. I cani cikalenga tusininkizye ukuti Yeova atakwata kapatulula? (Loliniko ni cikope.)
15 Ukusambilila nanti ukumanya indimi zino Baibo yalembilwemo asi vingalenga tuye ya cuza yakwe Yeova. Yeova Ataleka sile ukuti antu asambilile sana ali yano yakwate isyuko lya kumanya amano yakwe lelo walenga ukuti antu mu nsi yonsi yakwate isyuko lii. Izwi lyakwe lyasenulwa umu ndimi izingi sana, cii calenga ukuti antu ukuzinguluka insi yonsi yakwate isyuko lya kumanya vino Baibo ikasambilizya nu kumanya vino yangacita pakuti yaye ivyuza vyakwe.—2 Tim. 3:16, 17.
Uzye vino Baibo yasalanganyiziwa vikalangilila uli ukuti Yeova atakwata kapatulula? (Lolini palaglafu 15)
TWALILILINI UKUZANZYA YEOVA
16. Ukulingana na Milimo 10:34, 35, tungacita uli pakuti tutwalilile ukuzanzya Yeova?
16 Isyuko sana vino Yeova watwama ukwikala umwi taalu lyakwe ilya unkolanya. Wakwata sana icikuuku, kutemwa, nupya akapokelela ningo sana. Nupya, atakwata kapatulula, akaama yonsi kwene asi mulandu na kuno yakaikala, nkulilo, masambililo, nkanda, mutundu, musinku, aonsi nanti anaci. Lelo Yeova akapokelela sile yayo aya ni cuvwila kuli aliwe.—Belengini Milimo 10:34, 35.
17. Aemwi muno tulazana ivyeo na vyuze ivikulanda pali vino tungacita pakuti tutwalilile ukuya umwi taalu lyakwe Yeova?
17 Pa Masamu 15:1, Devedi uzizye ati: “We Yawe, uzye aweni alingila umwi taalu lyako? Uzye aweni alikala apa mwamba wako uwamuzilo?” Yeova waomvizye Devedi ukwasuka mauzyo yaa. Mu cipande cilondelilepo tulasambilila vino tungacita pakuti twazanzya Yeova alino nu kutwalilila ukuya ya cuza yakwe.
LWIMBO NA. 32 Mwaya Uku Lusansa Lwakwe Yeova!
