ZÃMSGÃ YĨNGA 23
YƖƖLL 28 Ãnd n tõe n paam a Zeova zoodo?
A Zeova boond-y lame tɩ y wa sig-a sãando
“Mam fu-roogã na n zĩnda ne-ba. M na n yɩɩ b Wẽnnaam.”—EZE. 37:27.
D SẼN NA N BÃNGE
Sõs-kãngã na n sõng-d lame tɩ d bãng sig sãand a Zeova fu-roogẽ wã sẽn dat n yɛɛlga, la a sẽn get tõnd yell to-to a sẽn yaa d Gãag soabã yĩnga.
1-2. Bõe la a Zeova kɩt tɩ sẽn maand-b sɩd ne-a wã tõe n paam tɩ yaa zu-zẽkr tɛkẽ?
NED sã n sok yãmb yaa: “A Zeova yaa yãmb bõe?” Y na n leok-a lame tɩ bõe? Tõe tɩ y na n leokame yaa: “A Zeova yaa mam Ba, mam Wẽnnaam la m Zoa.” Tõe tɩ y na n tagsa gom-biis a taab yelle. La yãmb zoe n yeelame t’a Zeova yaa yãmb Gãag soab bɩ?
2 Rĩm a Davɩɩd maka a Zeova ne gãag soaba, la a mak neb nins sẽn tũud-a ne b sũy fãa wã ne sãamb sẽn sig a nengẽ. A sokame yaa: “Zeova, ãnda n tõe n sig sãand yãmb fu-roogẽ wã? Ãnda n tõe n zĩnd yãmb tãn-sõngã zugu?” (Yɩɩn. 15:1) Gom-kãensã a Zeova sẽn vẽneg tɩ b gʋlsã wilgdame tɩ d tõe n siga sãand a fu-roogẽ wã, rat n yeel tɩ n lebg a zo-rãmba. Pa zu-zẽkr tɛkẽ sɩda?
A ZEOVA RATAME TƖ D SIG-A SÃANDO
3. Ãnda n yɩ pipi n sig a Zeova sãando, la a Zeova ne yẽ soabã tagsg ra yaa wãn ne taaba?
3 Sɩngrẽ wã a Zeova ra yaa a yembre. La a wa n naana a pipi Bi-riblã tɩ yaa wa a sẽn bool-a a fu-roogẽ. A Zeova sẽn lebg Gãag soabã ra noom-a-la wʋsgo. Biiblã wilgame t’a Zeova ra nonga a Bi-riblã wʋsgo, t’a Bi-riblã sẽn yɩ pipi n sig a Zeova fu-roogẽ wã me ra ‘maand sũ-noog a Zeova taoor wakat fãa.’—Yel. 8:30.
4. Ãnd dãmb me n sig a Zeova sãando?
4 La a Zeova naana malɛgs a taab tɩ yaa wa a reega bãmb me sãando. Biiblã boola malɛgsã tɩ “Wẽnnaam kom-dibli,” la a yeel tɩ b sũur nooma ne b sẽn be ne a Zeova wã. (Zoob 38:7; Dãn. 7:10) Maana yʋʋm wʋsg tɩ Wẽnnaam sãambã ra yaa sẽn be-b ne-a saasẽ wã bala. La a Zeova wa n naana ninsaalb tẽngã zugu, tɩ bãmb me tõe n sig-a sãando. Ninsaalbã sʋka neb kẽer n sig-a sãando. Wala makre, a Enoke, a Nowe, a Abrahaam la a Zoobe. B boola b kẽer tɩ Wẽnnaam zo-rãmb wall neb sẽn da ‘kẽnd ne Wẽnnaam.’—Sɩng. 5:24; 6:9; Zoob 29:4; Eza. 41:8.
5. Ezekɩyɛll 37:26, 27 bãngr-gomdã wilgda tõnd bõe?
5 Hal pĩnd wẽndẽ n tãag masã, a Zeova ket n boonda a zo-rãmbã tɩ b wa sig-a sãando. (Karm-y Ezekɩyɛll 37:26, 27.) Wala makre, a Ezekɩyɛll bãngr-gomdã wilgdame tɩ Wẽnnaam rata ne a sũur fãa tɩ sẽn maand-b sɩd ne-a wã lebg a zo-rãmb hakɩɩka. A pʋlmame t’a “na n maana laafɩ kaool ne-ba.” Bãngr-gomd-kãng wilgdame tɩ wakat n wat t’a Zeova na n tigim sẽn saagd-b n na n tɩ vɩɩmd saasẽ wã ne sẽn saagd-b n na n vɩɩmd tẽngã zugã a fu-roogã pʋgẽ, tɩ b yɩ “yãgr a yembre.” (Zã 10:16) Yaa wakat kãng la woto!
D SẼN BE ZĨIG NING FÃA, WẼNNAAM GETA D YELLE
6. Ned sã n dat n sig a Zeova fu-roogẽ wã bõe la a segd n maane? A Zeova fu-roogã bee yɛ?
6 Pĩnd wẽndẽ wã, fu-roog yaa zĩig ned sẽn da tõe n kẽ n vʋʋse, la a koglg a meng ne saag la sobgo. Ned sã n da sig sãand a to fu-roogẽ, a miime t’a gãag soabã na n gesa a yell sõma. Wakat ning d sẽn dɩk d meng n kõ a Zeova wã, d lebga wa sãamb sẽn sig a fu-roogẽ wã. (Yɩɩn. 61:4) D paamda bũmb nins sẽn yaa tɩlɛ d tẽebã kengr yĩngã tɩ sekdẽ, la d paam n be ne neb a taab me sẽn sig a Zeova sãando. La a fu-roogã pa be zĩig takɩ ye. Tõe tɩ y zoe n toga sor n kẽng tẽng a to n tɩ maan tigis-kãsenga, n yã neb a taab me sẽn paam n be Wẽnnaam fu-roogã pʋgẽ. A Zeova fu-roogã bee zĩig ning fãa wẽn-tũudb hakɩɩk sẽn beẽ.—Vẽn. 21:3.
7. Bõe n kɩt tɩ d tõe n yeel tɩ neb nins sẽn da tũud a Zeova ne b sũy fãa n maan kaalmã ket n bee a fu-roogẽ wã? (Ges-y fotã me.)
7 La neb nins sẽn da tũud a Zeova ne b sũy fãa n maan kaalmã yẽ? B ket n bee a Zeova fu-roogã pʋgẽ bɩ? N-ye! Bõe n kɩt tɩ d tõe n yeel woto? Yaa t’a Zeova ket n tẽera b yelle. A Zeezi yeelame yaa: “Kũum na vʋʋgã wɛɛngẽ, a Moyiiz meng wilga rẽ kibar ning sẽn gomd gõos tuugã yellã pʋgẽ, a sẽn bool a Zeova t’a ‘Abrahaam Wẽnnaam, a Izaak Wẽnnaam, la a Zakoob Wẽnnaamã.’ A pa kũ-rãmb Wẽnnaam ye. A yaa nin-vɩɩs Wẽnnaam. Bala Wẽnnaam nifẽ b fãa vɩɩme.”—Luk 20:37, 38.
Baa neb nins sẽn da tũud a Zeova ne b sũy fãa n maan kaalmã ket n bee a fu-roogã pʋgẽ (Ges-y sull a 7)
NAFA NINS D SẼN PAAMDE, LA D SẼN SEGD N MAANE
8. Nafa-bʋs la d paamda, d sẽn be a Zeova fu-roogẽ wã yĩnga?
8 Fu-roog yaa zĩig ned sẽn tõe n kẽ n vʋʋse, la a paam koglg ne saag la sobgo. Woto me, a Zeova fu-roogã kogenda neb nins sẽn sig-a sãandã tɩ bũmb pa tõe n sãam bãmb ne a Zeova zoodã wall kɩt tɩ b pa le tẽed manegr ye. D sã n kell n yɩ a Zeova zo-rãmba, bũmb pa be a Sʋɩtãan sẽn tõe n maan tõnd tɩ tɩɩm kae ye. (Yɩɩn. 31:23; 1 Zã 3:8) Dũni-paalgã pʋgẽ, a Zeova na n kell n kogla a zo-rãmbã sẽn maand sɩd ne-a wã tɩ bũmb ra sãam b tẽebã ye. La pa rẽ bal ye. A na n kogl-b lame tɩ bũmb ra yãk b yõorã me ye.—Vẽn. 21:4.
9. Bõe la a Zeova rat tɩ neb nins sẽn sig-a sãandã maane?
9 D sẽn paam n sig sãand a Zeova fu-roogẽ wã yaa zu-zẽkr tɛkẽ! D paam n yaa a zo-rãmba, tɩ d zoodã tõe n kaoos wakat fãa yĩnga. D sã n dat n kell n pa a fu-roogẽ wã, bõe la d segd n maane? Ned sã n deeg yãmb a zakẽ, y na n baoo n bãnga bũmb ning sẽn noom-a, n maan rẽ. Wala makre, a tõe n datame tɩ y yãk y neooda wã n yaool n kẽ a roogẽ wã. Y na n sak n maana rẽ ne yamleoogo. Woto me, yaa vẽeneg tɩ y na n bao n bãnga a Zeova sẽn dat tɩ neb nins sẽn be a fu-roogẽ wã maanã. D sẽn nong a Zeova wã kɩtame tɩ d maand d sẽn tõe fãa sẽn na yɩl n “ta a yam zãnga.” (Kolo. 1:10) Yaa sɩd t’a Zeova yaa d zoa. La a yaa d Wẽnnaam la d Ba me n zems ne waoogre. (Yɩɩn. 25:14) D pa segd n yĩm rẽ ye. D segd n waood-a-la ne d sũur fãa. D sã n waoogd-a woto, na n sõng-d lame tɩ d ra wa maan bũmb n sãam a sũur ye. Sãmbg sẽn kae, d rat n ‘sika d meng n kẽn’ ne d Wẽnnaamã wakat fãa.—Mis. 6:8
A ZEOVA SẼN WILG WE-RAOOGẼ WÃ TO-TO T’A PA BAKD NED YE
10-11. Wãn to la a Zeova manesem sẽn yɩ to-to ne Israyɛll nebã Sinayi we-raoogẽ wã wilgd t’a pa bakd neda?
10 A Zeova manesem sẽn yaa to-to ne a zo-rãmbã wilgdame t’a pa bakd ned ye. (Rom. 2:11) A sẽn tall manesem ning ne Israyɛll nebã Sinayi we-raoogẽ wã wilgda rẽ.
11 A Zeova sẽn yiis a nin-buiidã Ezɩpt yembdẽ wã poore, a yãka maan-kʋʋdb tɩ b tʋmd sɛk-roogã pʋgẽ. A yãka Levi buudã nebã me tɩ b tʋmd tʋʋm kẽer sɛk-roogã pʋgẽ. Neb nins sẽn da tʋʋmd sɛk-roogẽ wã, wall fu-rot sẽn da pẽ sɛk-roogã ra paamdame t’a Zeova get b yell sõma n yɩɩd neb a taabã bɩ? Ayo! A Zeova pa bakd ned ye.
12. Israyɛll nebã sẽn wa n be we-raoogẽ wã, bõe la a Zeova maan tɩ wilg t’a pa bakd neda? (Yikri 40:38) (Ges-y fotã me.)
12 Israyɛll ned kam fãa ra tõe n paama zood sõma ne a Zeova. Rẽ ra pa be ne a sã n tʋmda sɛk-roogẽ wã bɩ a fu-roogã sã n pẽe sɛk-roogã ye. Wala makre, a Zeova ra kɩtame tɩ buudã neb fãa ra tõe n yã sawadgã la bugmã sẽn da be sɛk-roogã zugẽ wã. (Karm-y Yikr 40:38.) Sawadgã sã n da wa zẽk n loogdẽ, baa neb nins sẽn da zãr ne sɛk-roogã n yɩɩdã ra tõe n yãame. B ra tõe n sẽba b teedã, n siig b fu-rotã n tũ neb a taabã n looge. (Sõd. 9:15-23) Nebã fãa ra tõe n wʋma tãntãadã a yiibã peebg sẽn wilgd tɩ b ra segd n yik n dɩka sorã. (Sõd. 10:2) Vẽenega, ned fu-roog sã n da be sɛk-roogã sɛɛga, rẽ bal ra pa wilgd t’a tara zood sõma ne Zeova ye. Israyɛll ned fãa ra tõe n paamame t’a Zeova reeg-a sãando, la a paam t’a wilg-a sor la a kogl-a. Rũndã-rũndã me, baa d sẽn be zĩig ning fãa d tõe n paamame t’a Zeova nong-do, n get d yell la a kogend-do.
Sɛk-roogã sẽn da be Israyɛll nebã sik-zĩigã tẽn-sʋkã wilgdame t’a Zeova pa bakd ned ye (Ges-y sull 12)
A ZEOVA KET N PA BAKD NED YE
13. Bõe la a Zeova maand rũndã-rũndã tɩ wilgdẽ t’a pa bakd neda?
13 Rũndã-rũndã a Zeova Kaset rãmb kẽer zags n pẽ d biru-kãsengã wall Betɛlle. Sãnda meng tʋmda zĩ-kãense. Rẽ kɩtame tɩ b tõe n paam n kẽes b toog bũmb wʋsg b sẽn maand be pʋsẽ, wall b mi n paam n sõs ne taoor lʋɩtbã. A Zeova Kaset rãmb a taab yaa tigims sull yel-gɛtba, wall b kẽesa b mens zãng Wẽnnaam tʋʋmdã pʋgẽ n tʋmd tʋʋm a taaba. La baa y sã n pa tʋmd tʋʋm a woto, y tõe basa y yam t’a Zeova nonga neb nins fãa sẽn sig sãand a fu-roogẽ wã. A geta b fãa yell sõma. (1 Pɩy. 5:7) Neb nins fãa sẽn tũud a Zeova wã paamdame t’a kõt-b bũmb nins sẽn kengd b tẽebã, t’a wilgd-b sor la a kogend-ba.
14. Bõe me n wilgd t’a Zeova sẽn yaa d Gãag soabã pa bakd neda?
14 Bũmb a to sẽn wilgd t’a Zeova sẽn yaa d Gãag soabã pa bakd ned yaa a sẽn kɩt tɩ ned buud fãa sẽn be dũniyã zug tõe n paam Biiblã n karmã. Sɩngrẽ wã, b ra gʋlsa Biiblã ne buud-goam a tãabo. Yaa Ebre, Arameyẽ la Gɛrke. Neb nins sẽn tõe n karem Biiblã buud-goam nins pʋsẽ b sẽn gʋls-a sɩngrẽ wa tara zood sõma ne a Zeova n yɩɩd neb a taabã bɩ?—Mat. 11:25.
15. Bõe n wilgd t’a Zeova pa bakd neda? (Ges-y fotã me.)
15 Pa tõnd sẽn karem n zãage, wall d sẽn wʋmd buud-goam ninsã n kɩt tɩ d tat a Zeova yam ye. Pa neb nins sẽn karem n zãagã bal n tõe n paam yam ning sẽn yit a Zeova nengẽ wã ye. A kɩtame tɩ neb nins fãa sẽn be dũniyã zugã tõe n paam yam-kãngã. B lebga Biiblã sẽn yaa a Gomdã buud-goam tusa pʋsẽ. Rẽ kɩtame tɩ neb nins fãa sẽn be dũniyã zugã tõe n dɩ a zãmsgã yõodo, la b bãng b sẽn tõe n maan to-to n lebg a zo-rãmba.—2 Tɩm. 3:16, 17.
Bõe yĩng tɩ d tõe n yeel tɩ b sẽn lebg Biiblã buud-goam tusa pʋsẽ wã wilgdame t’a Zeova pa bakd neda? (Ges-y sull 15)
KELL-Y N PA-Y-YÃ A ZEOVA FU-ROOGẼ WÃ
16. Sã n yaa ne Tʋʋm 10:34, 35 wã, bõe la d tõe n maan n kell n ta a Zeova yam?
16 D sẽn paam t’a Zeova reeg-d a fu-roogẽ wã yaa zu-zẽkr tɛkẽ! A sõmblmã, a nonglmã la a sẽn nong sãamb reegrã kɩtame t’a yaa Gãag soab sẽn ka to. Sẽn paase, a pa bakd ned ye. A reega tõnd fãa a fu-roogẽ wã, n pa ges d sẽn be zĩig ninga, d karem zãagame tɩ d pa karem n zãage, d yĩngã kõbgo, d buudã, d yʋʋmã, wall d yaa pag bɩ rao ye. La yaa neb nins sẽn tũud a noyã bal n tat a yam n tõe n kell n pa a fu-roogẽ wã.—Karm-y Tʋʋm 10:34, 35.
17. Yɛ la d tõe n paam sagls sẽn wilgd d sẽn segd n maan n paam t’a Zeova reegd a fu-roogẽ wã?
17 Yɩɩn-sõamyã 15:1 wã pʋgẽ, a Davɩɩd sokame yaa: “Zeova, ãnd n tõe n sig sãand yãmb fu-roogẽ wã? Ãnda n tõe n zĩnd yãmb tãn-sõngã zugu?” Wẽnnaam vẽenega yɩɩn-gʋlsdã t’a leok sogs-kãensã. Sõsg ning sẽn pʋgdã pʋgẽ, d na n goma bũmb nins d sẽn segd n maan n ta a Zeova yam la d kell n pa a fu-roogẽ wã kẽer yelle.
YƖƖLL 32 D zĩnd a Zeova poorẽ
