1-2. Cilanio cika ue ku hana Yehova ku vakua ku mu pangela?

 NGA va mi hula nguavo: Yehova ua pua iya kuli yenu, vati mu kumbulula? Mu hasa ku kumbulula nguenu: ‘Yehova ua pua Tata, Njambi yange na Kavusamba.’ Mu hasa naua ku singanieka ha vinkumbu vikuavo, via Yehova. Vuno ua pua naua Mukua ku zumbula ni?

² Muangana Ndaviti ua setekesele vusamba vua Yehova na vakua ku mu pangela, ku vangendzi vendi. Ua handekele nguendi: “Yehova, iya a ka li sukila mu mbalaka yove? Iya a ka kala ha muncinda uove ua ku lela?” (Visa. 15:1) Eci cinimbu ca muesa ngecize, Yehova ua tu lania tu pue vangendzi mu mbalaka Yendi, ni nguetu, ku pua vavusamba Vendi. Mua vusunga, eci ca pua civezikiso ca kama!

YEHOVA A TONDA TU PUE VANGENDZI VENDI

3. Iya ua pua ngendzi ya Yehova ua ku livanga, kaha vati Yehova na Yesu va livuile ku tuala hali umo na mukuavo?

³ Ntsimbu kanda a tange viuma viose, Yehova ua kele likaliendi. Vunoni mu ku hita ca ntsimbu, Njambi ua tambuile Munendi ua ku livanga mu mbalaka Yendi ya cimueso. Kaha ua kele na ndzolela ya kama mu ku lingamo. Mbimbiliya ya muesa ngecize Yehova na Muanendi va viukilile hamo lika. Nguayo: “[Yesu ua] puile ndzolela yeni . . . [na] ku viukilila ntsimbu yose ku meso [Yehova.]”— Visi. 8:30.

4. Veya naua Yehova ua laniene mu ku pua vangendzi vendi?

 ⁴ Yehova ua tangele naua tungelo, kaha ua va laniene ku pua vangendzi vendi. Mbimbiliya ye ku tumbula tungelo nguayo, “vana va Njambi” kaha ve kuivua ndzolela mu ku kala na Yehova. (Yombi 38:7; Ndan. 7:10) Mu miaka ya yingi, vangendzi, ni nguetu vavusamba va Njambi, va puile lika vaze va kele Nendi muilu. Mu ku hita ca ntsimbu, ua lanieneko naua vangendzi vakuavo ngeci mua: Enoke, Noa, Avilahama na Yombi. Kaha Mbimbiliya ya muesa nguayo, va puile vavusamba va Yehova muomu va muononokele.—Njen. 5:24; 6:9; Yombi 29:4; Isaya 41:8.

5. Vika tu hasa ku lilongesa ku vupolofeto vua ku Ezekiele 37:​26, 27?

⁵ Mu ku hita ca miaka, Yehova ali na ku tualeleleho ku lania vavusamba vendi linga va pue vangendzi vendi. (Tandenu Ezekiele 37:​26, 27.) Ca ku muenako, vupolofeto vua Ezekiele vua muesa nguavuo, Njambi a tonda vangamba vendi va likuate vusamba nendi. Ua kulahesa ku “litavasiana litavasiano lia ciyulo navo.” Ovu vupolofeto vua handeka via ntsimbu i ve ku lipandakanene mu mbalaka ya Yehova ya cimueso, vaze va kala na lulavelelo lua ku yoyela muilu na vaze va kala na lulavelelo lua ku yoyela ha mavu, mu ku pua “vutanga vumo lika.” (Yoa. 10:16) Evi vili na ku lipuisamo mu ntsimbu ino vene!

NJAMBI UE KU TU NIUNGA KUOSE KU TUA KALA

6. Vati tu hasa kupua vangendzi mu mbalaka ya Yehova? Kaha kulihi tu hasa ku uana mbalaka Yendi?

⁶ Ku laza mbalaka ya puile cihela ci va kele na ku huimina vantu, vunoni ya kele na ku va niunga ku mutania na niondzi. Vangedzi vakele na ku lavelela ku va niunga vuino ku muntu na va tambula mu mbalaka yendi. Na vuno vene, mu tue ku lihana kuli Yehova, tue ku pua vangendzi mu mbalaka yendi ya cimueso. (Visa. 61:4) Tua kala na viose vi tua tondeka mu ku kaniamesa vusamba vuetu na Yehova, kaha tua likuata vusamba na vaze va pua vangendzi va Yehova. Vantu mu mavu ose, va hasa kupua vangendzi mu mbalaka ya Yehova. Halumo muaya laza ku cifuti ceka na ku kunguluka ku ciuano ca muhato, ku mua uanene vamuanetu va kala na civezikiso ca ku kala mu mbalaka ya Yehova. Nga tue ku pangela Yehova mu vusunga, tu hasa kupua vangendzi mu mbalaka  ya Yehova kuose oko ku tua kala.—Ku-So. 21:3.

7. Vati tua tantekeya nguetu vangamba va Yehova va mu pangelele na mutima uose hanga va kala mu mbalaka Yendi? (Talenu naua cikupulo.)

⁷ Ambaco vangamba va Yehova va mu pangelele na mutima uose kaha vatsa? Vuno navo hanga va kala mu mbalaka ya Yehova ni? Eyo! Omo lia vika tu handekela ngoco? Muomu Yehova ka va suvile. Yesu ua lomboluele nguendi: “Vatsi va ka sanguka, Mosesa vene ua muesele haze ha va tumbula ciputa, omo a tumbula Muangana, Njambi ya Avilahama, Njambi ya Isake, Njambi ya Yakomba. Vuno ikeye kati Njambi ya vatsi vunoni ya vakua ku yoya; muomu vose va mu yoyela ikeye.”—Luka 20:​37, 38.

VIVEZIKISO VI TUE KU TAMBULA NA VIUMA VI TUA PANDE KU LINGA

8. Vivezikiso vika tue ku tambula omo lia ku kala mu mbalaka ya Yehova?

⁸ Muntu a hasa ku huima mu mbalaka na ku liniunga ku mutana na niondzi. Na vuno vene, mbalaka ya Yehova ye ku tu niunga ku viose vi hasa ku tsiha vusamba vuetu Nendi, na ku tu hana lulavelelo lua ku lutue. Mu tue ku suena mu hiehi na Yehova, Satana ke ku hasa ku linga viuma vi tsiha vusamba vuetu na Yehova ku miaka yose. (Visa. 31:23; 1 Yoa. 3:8) Kaha mu mavu a aha, Yehova a ka tualelelaho ku niunga vavusamba vendi kati lika ku viuma vi hasa ku tsiha vusamba vuavo nendi, vunoni na ku kutsa.—Ku-So. 21:4.

9. Vika Yehova ua lavelela ku vangendzi vendi?

⁹ Mua vusunga, capua ku vezika ca kama kupua vangendzi mu mbalaka ya Yehova. Muomu tue ku likuata vusamba nendi, vu hasa ku kalako ku miaka yose. Vika tua pande ku linga mangana tu tualeleleho kupua vangendzi va Yehova? Nga kuli umo na mi lania ku ndzivo yendi, mua vusunga mu ka tonda ku linga via tonda muntu uaco. Ca ku muenako, ngendzi ka kele na mpoko ya ku lihanguila hondo ya kosa, vunoni ue ku hitukila hali ivene ndzivo. Na vuno vene, linga tu tualeleho mu mbalaka ya Yehova, tua pande ku tantekeya vika ua lavelela kuli yetu. Kaha cilemo cetu kuli Yehova ce ku tu kuasa ku linga cose mu “ku mu ya ku mutima mu viose.” (Kolo. 1:10) Vutuhu Yehova ua pua Kavusamba ketu, vunoni ua pua naua Njambi na Tatetu. Ngeci mukemuo ua fuila ku mu singimika. (Visa. 25:14) Ka tua pandele ku suva vusunga vuaco, na ku mu singimika cikuma ntsimbu yose. Kasingimiko kaco ka tu kuasa ku hona ku linga viuma vi mu vavalesa ku mutima. Mua vusunga, tu tonda “ku enda na ku konkama hamo na Njambi.”—Mika 6:8.

YEHOVA KA MUESELE KAHANGU KU VAISALELI

10-11. Vika Yehova ua lingilile vaIsaleli mu vindinda via Sinayi, kaha vati via muesa ngecize ka puile mukua kahangu?

¹⁰ Yehova ke ku muesa kahangu ku vangendzi vendi. (Loma 2:11) Vusunga vuaco tue ku vu muena ku viuma via lingilile vaIsaleli mu vindinda via Sinayi.

¹¹ Mu nima ya ku va patula ku vundungo mu Ingito, Yehova ua hanguile vasasendote va pangele ku tavenakulu. Yehova ua kundikile vaLevi vipanga vikuavo naua. Vuno Yehova ua niungile lika vaze va kele na ku pangela ku tavenakulu ni vaze lika va yoyelele mu hiehi nayo ni? Houe! Yehova ka puile mukua kahangu.

12. Vati cifua ca niungililemo Yehova vaIsaleli mu vindinda ca muesa ngecize ka puile mukua kahangu? (Ezundu 40:38) (Talenu naua cikupulo.)

¹² VaIsaleli vose va kele na vukovelelo vua  ku likuata vusamba na Yehova. Ambe vaze va pangelele ku tavenakulu ni kuahi, vaze va yoyelele mu hiehi nayo, ni vaze va yoyele ku lahako. Ca ku muenako, Yehova ua hakele ngundzi ya liselua na ngundzi ya tuhia helu lia tavenakulu, kaha vaIsaleli vose va kele na ku vi mona. (Tandenu Ezundu 40:38.) Liselua mu lia kele na ku fuma ha tavenakulu, ambe vaze va kele ha lahako nayo va limuene. Kaha va kele na ku longekeya vikuata viavo na ku kava liselua hamo na vantu vose. (Num. 9:​15-23) Vantu vose mu va kele na kuivua cikumo ca maluneta avali a palata, va pandele ku putuka kuenda. (Num. 10:2) Ku kala mu hiehi na tavenakulu ka ca lombolokele ngecize muntu ua likuatele vusamba vua cili na Yehova, ku hiana vaze va kele ku lahako. Vunoni, vaIsaleli vose va hasele ku likuata vusamba na Yehova na ku kala na vusunga nguavo, Ue ku va tuamenenene na ku va niunga. Na vuno vene, kuose oko ku tua kala tu kalenu na vusunga nguetu, Yehova ua tu lema kaha ue ku tu niunga.

NA LELO LINO YEHOVA KE KU MUESA KAHANGU

13. Lelo lino, vati Yehova ue ku muesa ngecize ka puile mukua kahangu?

¹³ Ha kati ka vangamba va Njambi, vamo va yoyela mu hiehi na cikota ca kama ni mu hiehi na mbetele. Kaha vamo kukekuo ku ve ku pangela. Ku lingamo, ve ku kuasa ku puisamo vipanga via vingi na ku likata na vaze ve ku va tuamenena. Vamo va pua tuniungi va ku zinguluka ni va kala mu cipanga ceka ca ku lifuila. Kaha ambe nga ka mua kele mu cipanga ca ntsimbu yose, kalenu na vusunga nguenu Yehova ua lema vose. A tu tantekeya vuino, ngeci ue ku tu hana viose vi tua tondeka. (1 Pet. 5:7) Yehova ue ku hana via kulia via mu lutsilielo ku vangamba vendi vose, kaha ue ku va tuamenena na ku va niunga.

14. Vati naua Yehova ue ku muesa nguendi ka puile mukua kahangu?

 ¹⁴ Yehova ue ku muesa naua ngecize ka puile mukua kahangu, mu ku linga cose mangana vantu mu mavu ose va hase ku tanda Mbimbiliya. Visoneka via ku Lela va vi sonekele mu malimi atatu: ciHevelu, ciAlamaiku, na ciNgelengu. Vuno vaze ve ku tanda Mbimbiliya mu malimi aco va likuata vusamba vua cili na Yehova, ku hiana vaze ka ve ku tanda malimi aco ni? Houe!—Mat. 11:25.

15. Vika via muesa ngecize Yehova ka puile mukua kahangu? (Talenu naua cikupulo.)

¹⁵ Linga tu pue vavusamba va Yehova, ka ca tondeka tu lilongese cikuma ni ku handeka malimi a va sonekele Mbimbiliya. Yehova ue ku hana mana ku vantu vose, kati lika vaze va lilongesa cikuma. Ngeci mukemuo, Mbimbiliya va i langulula mu malimi a engi linga vantu va hase ku tambula vukuasi ku vilongesa viayo na ku tantekeya vati va hasa ku likuata vusamba na Yehova.—2 Tim. 3:​16, 17.

TUALELENUHO KUPUA VANGENDZI VA YEHOVA

16. Kuliya na Vilinga 10:​34, 35, vati tu hasa ku tualelelaho kupua vangendzi va Yehova?

¹⁶ Capua ku vezika ca kama kupua vangendzi mu mbalaka ya Yehova ya cimueso. Muomu ua pua Mukua Ngozi, ue ku muesa cilemo na vuhuanga ku hiana vose. Yehova ka puile mukua kahangu, muomu ue ku tambula vantu va ku visemua viose, miyati yose, ambe nga tua lilongesa ni kuahi ni vene citso cetu. Vunoni, Yehova ue ku tambula lika vaze ve ku muononoka.—Tandenu Vilinga 10:​34, 35.

17. Kuiko tu hasa ku uana mizimbu ikuavo ku tuala ha vati tu hasa kupua vavusamba va Yehova?

¹⁷ Ku Visamo 15:​1, Ndaviti ua huile nguendi: “Yehova, iya a ka lisukila mu mbalaka Yove? Iya a ka kala ha muncinda uove ua ku lela?” Yehova ua pangesele Ndaviti mu ku kumbulula vihula viaco ku Visamo 15. Mu cilongesa ci na hatako, tu ka lilongesa vi tua pande ku linga mangana tu vuise Yehova ndzolela na ku tualelelaho kupua vavusamba vendi.