1, 2. ¿Toni techiluia Jehová maj tikchiuakan?

 KOMO mitsoniluiskiaj keniuj tikonita Jehová, xa tikonijtoskia: “Jehová notasojikniuj, noTajtsin uan noDios”. Oso xa tikonijtoskia okseki taman kemej kinotsaj. Sayoj ke ¿tikonijtoskia ke yejua mitsonselijya ichan?

² Tekiuaj David kijtoj ke Jehová kemej yeskia aksa akin kuali kinselia akin mokauaj ichan. Yejua kijtoj: “Jehová noDios, ¿akoni uelis mokauas mochan? ¿Akoni uelis nemis itech tepet tein tikijitak?” (Sal. 15:1). Nejin tajtolmej kinextiaj ke tinochin uelis tietoskej ichan Jehová, tein kijtosneki ke uelis kuali iuan timouikaskej. ¡Nejin semi kualtsin!

JEHOVÁ KINEKI MAJ TIMOKAUAKAN ICHAN

3. ¿Akoni yekinika kalakik ichan Jehová, uan keniuj momachiliayaj nochin omen?

³ Jehová yetoya iselti hasta ke kichijchiuak iKonetsin. Yejua akin yekinika kemej yeskia kalakik ichan Jehová, uan yejuatsin semi kiuelitak kiselis. Biblia kijtoua ke Jehová kiteltasojtaya iKonetsin uan ke Jesús no semi ‘yolpakia nochipa yetos iixpan’ (Prov. 8:30).

4. ¿Akonimej no kinyoleuak Jehová ichan?

⁴ Satepan, Jehová kinchijchiuak okseki ángeles uan no kinyoleuak ichan. Biblia kijtoua ke yejuan “ikoneuan Dios” uan ke semi yolpakiaj keman iuan yetoyaj (Job 38:7; Dan. 7:10). Miak xiujmej, sayoj akin nemiaj ne iluikak ueliaj mouikayaj iuan Dios. Sayoj ke satepan,  no kinyoleuak sekin akin nemiaj nikan taltikpak para maj yetonij ichan. Sekin akin kuali iuan mouikakej katkaj Enoc, Noé, Abrahán uan Job. Biblia kijtoua ke sejsemej kuali mouikakej iuan Dios oso ke ‘kichiujkej tein toTajtsin Dios kinekia’ (Gén. 5:24; 6:9; Job 29:4; Is. 41:8).

5. ¿Toni techmachtia tein moijtojka ke mochiuaskia itech Ezequiel 37:​26, 27?

⁵ Miak xiujmejya, Jehová kisentokani kinyoleuani oksekin maj no yetokan ichan (xikonixtajtolti Ezequiel 37:​26, 27). Tein kijtoj Ezequiel techmachtia ke Dios semi kineki maj itekitikauan kuali mouikakan iuan. Jehová motenkauak iniuan “ke nochipa yolseujtoskiaj”. Nejin mochiuaskia keman taijitalmej uan akin nemiskej nikan taltikpak ‘senyetoskiaj’ uan kuali mouikaskiaj itech ichan Jehová (Juan 10:16). Uan yejua nejon tein panotok axkan.

JEHOVÁ TECHYEKPIA KAMPA YESKI TIETOSKEJ

6. ¿Kemanian tikalakij ichan Jehová, uan kani moajsi ichan?

⁶ Ne uejkauj, itech se kaltsin tein chijchiujtoya ika tasal aksa uelia moseuiaya uan mopaleuiaya keman kiouia. Uan keman aksa ompa mokauaya porin kiyoleujkaj, kimatia ke akin ompa nemia kuali kiseliskia uan kimakaskia tein kipoloskia. No ijkon, keman timotemaktiaj iuan Jehová kemej yeskia tikalakij “ichan” (Sal. 61:4). Uan keman ompa tietokej tikpiaj miak taman tein techpaleuia maj tiksentokakan kuali iuan timouikakan uan maj tikinixmatikan okseki tokniuan. Sayoj ke ichan Jehová amo moajsi sayoj seko, ta yetok kampa yeski kampa moajsij itekitikauan akin kitakamatij. Ijkon kiitanij miakej akin yanij se ueyi nechikol itech okseki altepemej, uan kinixmatinij oksekin akin no yetokej kampa kemej yeskia ichan Dios (Apoc. 21:3).

7. ¿Keyej ueli tikijtouaj ke akin nochipa kitekitilijkej Jehová uan amo keman kikaujkej kisentokaj yetokej ichan Jehová? (No xikonita taixkopin).

⁷ ¿Uan toni kinpanos itekitikauan Jehová akin nochipa kitekitilijkej uan momikilijkejya? ¿No kisentokaj yetokej ichan Jehová? Kemaj. ¿Keyej ijkon tiknemiliaj? Porin Jehová kuali kinelnamiktok uan kinita kemej yeskia yoltokejok. Jesús kijtoj: “Tein ijkuiliujtok  ke panok itech kouit tein uitsyoj, hasta Moisés kinextij ke mikemej oksepa nemiskej, yejua kinotsak Jehová, ‘iDios Abrahán, iDios Isaac uan iDios Jacob’. Yejua amo ininDios mikemej, ta ininDios akin yoltokej, porin yejua kinita ke nochin yejuan yoltokej” (Luc. 20:​37, 38).

¿KENIUJ TECHPALEUIA UAN TONI MONEKI TIKCHIUASKEJ?

8. ¿Keniuj techpaleuia komo tietokej ichan Jehová?

⁸ Se kaltsin de tasal tapaleuia para se moseuis uan para se mopaleuis keman kioujtok. No ijkon, ichan Jehová tapaleuia maj tiksentokakan kuali iuan timouikakan uan maj tikchiakan tein kuali. Keman tietokej iuan Jehová, Satanás amo ueli techchiuilia nion teyi tein uejkauas nochipaya uan tein amo uelis tikxikoskej (Sal. 31:23; 1 Juan 3:8). Uan itech xochital Jehová kisentokas kinyekpias itasojikniuan para maj kisentokakan kuali iuan mouikakan. Uan no kinpaleuis maj amo momikilikanok (Apoc. 21:4).

9. ¿Toni moneki kichiuaskej akin yetokej ichan Jehová?

⁹ ¡Semi tiktasojkamatiliaj Jehová porin techkaua maj tietokan ichan, ijkon uelis kuali iuan timouikaskej nochipaya! Sayoj ke, ¿toni moneki tikchiuaskej para maj ueli tiksentokakan tietokan ichan? Komo aksa techyoleua ichan tikuelitaskiaj maj techilui toni kineki maj tikchiuakan. Komo techelnamiktiskia maj timometschipauakan achto ke tikalakiskej ichan, ijkon tikchiuaskiaj. No ijkon, akin tietokej ichan Jehová tiknekij tikmatiskej toni moneki tikchiuaskej para maj tiksentokakan ompa. Kemej semi tiktasojtaj, timochikauaj tikchiuaskej tein kiyolpaktia (Col. 1:10). Tikmatij ke Jehová totasojikniuj, sayoj ke no toDios uan toTajtsin, yejua ika moneki tikpoujkaitaskej (Sal. 25:14). Nejon amo keman moneki tikelkauaskej. Komo tikmojkatokaj Jehová techpaleuis maj amo tikchiuakan tein amo kiyolpaktia uan maj tinemikan kemej yejua kineki (Miq. 6:8).

JEHOVÁ AMO KINCHICHIKOTASOJTAK ISRAELITAS ITECH TALUAKYAN

10, 11. ¿Keniuj tikmatij ke Jehová amo kinchichikotasojta itekitikauan?

¹⁰ Jehová amo keman kinchichikotasojtani akin yetokej ichan (Rom. 2:11). Uan tikmatij nejin keman tikitaj keniuj kinitaya israelitas itech taluakyan ompa Sinaí.

¹¹ Satepan ke Jehová kinkixtij israelitas de Egipto, kinixtalij tiopixkamej para maj tekitikan itech ikaltsin Dios. Uan no kinixtalij levitas maj kichiuanij okseki tekimej ompa. ¿Okachi kuali kinyekpiak Jehová akin tekitiaj itech ikaltsin oso akin amo uejka nemiaj de ompa? Amo, Jehová kinyekpiak nochin.

12. ¿Keniuj Jehová kinextij ke amo kinchichikotasojtaya israelitas itech taluakyan? (Éxodo 40:38; no xikonita taixkopimej).

¹² Nochin israelitas uelia kuali mouikayaj iuan Jehová maski tekitiskiaj itech ikaltsin oso amo, uan maski uejka nemiaj oso amo. Jehová kichiuak maj nochin israelitas ueli kiitakan mixti uan tit tein yetoya ajko den kaltsin (xikonixtajtolti Éxodo 40:38). Ijkon, keman mixti peuaya mooliniaya para yas okseko, hasta akin okachi uejka nemiaj  ueliaj kiitayaj, kiyektaliayaj tein kipiayaj, kiuejuelouayaj ininkaltsitsin uan nochin senyayaj (Núm. 9:​15-23). Uan no, nochin uelia kimatiaj keman monekia yaskejya porin keman kipitsayaj ome trompetas de plata chikauak kakistiaj (Núm. 10:2). Nejin kinextia ke maski aksa uejka nemia den kaltsin no uelia kuali mouikaya iuan Jehová, porin nochin israelitas uelia yetoyaj ichan Jehová uan kimatiaj ke yejuatsin kinixyekanaskia uan kinpaleuiskia. No ijkon axkan, kampa yeski tinemiskej Jehová techtasojta, techyekpia uan techpaleuia.

AXKAN JEHOVÁ AMO NO TECHICHIKOTASOJTA

13. ¿Keniuj Jehová technextilia ke amo techichikotasojta?

¹³ Seki tokniuan amo uejka nemij de kali kampa techixyekanaj oso de Betel. Uan oksekin hasta ompa tapaleuiaj. Ompa ueli kichiuaj miak taman uan kinixmatij tokniuan akin ompa taixyekanaj. Uan no, seki tokniuan takalpanouaj itech circuito oso kitekitiliaj Jehová miak tonalmej. Sayoj ke, maski tejuatsin amo ueli ijkon tikontekitilia Jehová, xikonyekmati ke no tionyetok ichan uan ke yejuatsin mitsontasojta (1 Ped. 5:7). Jehová kinmaka nochin itekitikauan tein moneki para maj kuali iuan mouikakan, uan kuali kinixyekana uan kinyekpia.

14. ¿Keniuj no kinextia Jehová ke amo kinchichikotasojta akin kinyoleua ichan?

¹⁴ Jehová no kinextia ke kuali techselia ichan keman kiita maj itech nochi taltikpak ueli kipiakan ininBiblia. ITajtol Dios moijkuiloj itech eyi tajtolmej: hebreo, arameo uan griego. ¿Okachi kuali mouikaj iuan Jehová akin ueli kiixtajtoltiaj Biblia itech semej nejon tajtolmej? Amo (Mat. 11:25).

15. Xikonijto okse taman tein kinextia ke Jehová amo techichikotasojta (no xikonita taixkopimej).

 ¹⁵ Jehová amo kineki maj kuali iuan timouikakan porin tel kuali timomachtijkej oso porin tikajsikamatij tajtolmej tein ika moijkuiloj Biblia. Yejuatsin kineki maj nochin kimatikan keniuj tamati uan toni kinemilia, amo sayoj akin kuali momachtijkej. Biblia motajtolkepani itech miak tataman tajtolmej. Yejua ika, itech nochi altepemej ueli kimatij toni tamachtia uan uelis kimatiskej keniuj kuali mouikaskej iuan Dios. (2 Tim. 3:​16, 17).

MAJ TIKSENTOKAKAN TIETOKAN ICHAN JEHOVÁ

16. ¿Akonimej kinselia Jehová ichan? (Hechos 10:​34, 35).

¹⁶ Semi timotasojkamatij maj ueli tietokan ichan Jehová. Yejua semi yolkuali, techtasojta uan kuali techselia, amo akin kichiua ijkon kemej yejua. Amo techichikotasojta maski tataman kampa tinemij, tataman tein timomattokej tikchiuaskej, tataman kemej techiskaltijkej, tataman xiuit tikpiaj, nion komo titakamej oso tisiuamej. Sayoj ke Jehová kinselia sayoj akin kitakamatij (xikonixtajtolti Hechos 10:​34, 35).

17. ¿Toni tikitaskej itech okse tamachtilis?

¹⁷ Itech Salmo 15:1 David tajtanik nejin: “Jehová noDios, ¿akoni uelis mokauas mochan? ¿Akoni uelis nemis itech tepet tein tikijitak?”. Satepan Jehová kichiuak maj David kinankiliani nejin netajtanilmej. Itech okse tamachtilis tikitaskej seki taman tein moneki tikchiuaskej para uelis tiksentokaskej tietoskej ichan Jehová.