TLAMACHTIL 23
TLAKUIKALI 28 ¿Ken nimouikas iuan Jehová?
Matikpatioitakan Jehová techkalotia
“Nokaltsin inuan yetos. Ne niyetos niinDios” (EZEQ. 37:27).
NIN TLEN TIMOMACHTISKEJ
Nin tlamachtil techpaleuis matikpatioitakan toTajtsin Dios techkalotia uan noijki techpaleuis matikajsikamatikan ken techmaluia ijkuak techkalotia.
1, 2. ¿Tlen kinkauilia Jehová makichiuakan akinmej iuan mouikaj?
TLA ikaj mitstlajtlaniskia ken tikita Jehová xamo tikiluis ye “moyolikni, moTajtsin uan moDios”. Noso xamo tikiluis okseki tlajtoli tlen kiteititia ken tikita toTajtsin Dios. Pero ¿tikijtoskia ye mitskalotia?
2 Tekiua David okijto ijkuak toTajtsin Dios kuali mouika inuan itekipanojkauan yetoskia ken ijkuak ikaj kinyoleua iyolikniuan mamokalotikan ikalijtik. David okitlajtlani toTajtsin Dios: “Jehová, ¿akin uelis mokalotis mokalijtik? ¿Akin uelis chantis itech motepe tlen chipauak?” (Sal. 15:1). Tlen okijto David techmachtia Jehová uelis techkalotis uan non kijtosneki uelis iuan timouikaskej. Sapanoua miak ipati tlen techiluia toTajtsin Dios.
JEHOVÁ KINEKI TECHKALOTIS
3. ¿Akin achto okikaloti Jehová uan ken omomachiliaya?
3 ToTajtsin Dios okatka iselti hasta ijkuak ikaj okichijchi. Ye achto okikaloti iKone. Jehová oyolpakik miak ijkuak opejki tekalotia. Biblia kijtoua Jehová oyolpakiaya porque iKone iuan okatka uan iKone noijki oyolpakiaya (Prov. 8:30).
4. ¿Akinmej okinkaloti toTajtsin Dios?
4 Satepan toTajtsin Dios okinchijchi ángeles uan noijki okinkaloti. Biblia kijtoua yejuan ikoneuan toTajtsin Dios uan sapanoua oyolpakiayaj yetoskej iuan Jehová (Job 38:7; Dan. 7:10). Miak xiuitl Jehová san omouikaya inuan akinmej ochantiayaj ompa iluikak. Pero satepan noijki yetoskia ken okinkaloti sekimej tlakamej. Okinkaloti Enoc, Noé, Abrahán uan Job. Yejuan omouikayaj iuan toTajtsin Dios noso okichiuayaj tlen ye kipaktia (Gén. 5:24; 6:9; Job 29:4; Is. 41:8).
5. ¿Tlen techmachtia profecía tlen ijkuilitok itech Ezequiel 37:26, 27?
5 ToTajtsin Dios yimiak xiuitl kinyoleua iyolikniuan mamokalotikan ikalijtik. Ijkon kijtoua profecía tlen ijkuilitok itech Ezequiel 37:26, 27 (xiktlajtolti). Nin profecía techmachtia Jehová kineki mayolpakikan akinmej iuan mouikaj. Ye okichi se acuerdo para kuali mayetokan. Nin acuerdo mochiuas ijkuak tlapejpenalmej uan akinmej chantiskej nikan tlaltikpak kipiaskej san se tlajpixki. Ijkuak ijkon panos yetoskia ken san sekan kinkalotis toTajtsin Dios (Juan 10:16). Axkan yimochijtok tlen omoijto.
JEHOVÁ TECHMALUIA MASKI SAN KANIN TIKATEJ
6. ¿Keman peua techkalotia Jehová uan kanin kajki non kaltsintli?
6 Yiuejkika okinchiuayaj kaltsitsintin ika tsotsoli uan ompa omoseuiayaj. Noijki okinpaleuiaya amitlaj makinpano akinmej ompa omokauayaj. Akinmej okinyoleuayaj ompa mamokalotikan okimatiayaj kuali kinseliskiaj uan kinmakaskiaj tlen okinpolouaya. Ijkuak timotemakaj ixpan toTajtsin Dios yetoskia ken timokalotiaj ikalijtik (Sal. 61:4). Ompa tikpiaj miak tlamantli tlen techpaleuia matimouikakan iuan Jehová uan noijki timouikaj inuan oksekimej tlen noijki ompa mokalotiaj. Pero ¿kanin kajki non kaltsintli kanin tekalotia toTajtsin Dios? Nin kaltsintli san kanin kajki. Kajki kanin katej akinmej kitlakamatij Jehová. Ijkon yokitakej tokniuan tlen yauij okseki altepemej. Xamo ijkon okinpanok ijkuak oyajkej se ueyi nechikol uan ompa okinmixmatkej oksekimej tokniuan tlen noijki kinkalotijtok toTajtsin Dios (Apoc. 21:3).
7. ¿Tleka tikijtouaj Jehová ok kinkalotijtok itekipanojkauan maski yoixpolikej? (Noijki xikita foto).
7 ¿Tlen kinpanos itekipanojkauan toTajtsin Dios tlen yoixpolikej? ¿Ok kinkalotia Jehová? Kema. ¿Tleka ijkon tikijtouaj? Porque Biblia kijtoua Jehová kinmilnamiktok. Jesús okiyekijto: “Hasta Moisés okitematilti kinyolitiskej akinmej yoixpolikej ijkuak okijkuilo tlen okipanok xiuitl uitsyo. Ye okijto: Jehová ‘iDios Abrahán, iDios Isaac uan iDios Jacob’. Ye inDios akinmej yoltokej uan amo inDios akinmej yoixpolikej, porque ye nochtin kinmita ok yoltokej” (Luc. 20:37, 38).
Jehová ok kinkalotijtok itekipanojkauan maski yoixpolikej. (Xikita párrafo 7).
¿KEN TECHPALEUIA IJKUAK TECHKALOTIA JEHOVÁ UAN TLEN MONEKI TIKCHIUASKEJ?
8. ¿Ken techpaleuia tla tikkauiliaj Jehová matechkaloti?
8 Se kaltsintli techpaleuia amitlaj matechpano uan uelis ompa timoseuiskej. Ikaltsin toTajtsin Dios noijki techpaleuia kuali iuan matimouikakan uan satepan okachi kuali tiyetoskej. Satanás amitlaj techtoktis tla tejuan tikatej inauak Jehová (Sal. 31:23; 1 Juan 3:8). Jehová noijki techmaluis ijkuak tiyetoskej itech xochitlali para kuali iuan matimouikakan uan ayakmo tiixpoliuiskej (Apoc. 21:4).
9. ¿Tlen moneki tikchiuaskej tla tiknekij matechkaloti Jehová?
9 Tikpatioitaj toTajtsin Dios techkalotia porque techpaleuia nochipa iuan matimouikakan. ¿Tlen moneki tikchiuaskej tla tiknekij nochipa matechkaloti? Tla ikaj techyoleua matiakan ikalijtik, techpaktiskia matechilui tlen tikchiuaskej. Xamo monekis itlaj tikchiuaskej ijkuak ompa timokalotiskej uan amo tikualaniskej titlapaleuiskej. Tejuan noijki tiknekij Jehová matechilui tlen kipaktia matikchiuakan porque ye techkalotijtok. Sapanoua tiktlasojtlaj ikinon timochijchikauaj tikchiuaskej tlen ye kipaktia (Col. 1:10). Nochipa matikilnamiktokan tejuan timouikaj iuan Jehová uan tiktlakaitaj porque ye toTajtsin Dios (Sal. 25:14). Tla tiktlakaitaj amo tikchiuaskej tlen amo kipaktia. Tiknekij tiyetoskej tiyolyamankej ixpan toTajtsin Dios (Miq. 6:8).
JEHOVÁ AMO OKINCHIKOITAK ISRAELITAS IJKUAK OKATKAJ KANIN TLAUAKI
10, 11. ¿Tleka tikijtouaj Jehová nochtin kuali kinselia?
10 ToTajtsin Dios kuali kinselia nochtin akinmej kinkalotia (Rom. 2:11). Ijkon okinkaloti israelitas ijkuak okatka ompa Sinaí kanin tlauaki.
11 Jehová okintlali teopixkej matlapaleuikan itech tabernáculo ijkuak okinkixti israelitas ompa Egipto. Noijki okinmilui levitas matlapaleuikan itech non tabernáculo. ¿Kijtosneki Jehová okachi okinmaluiaya akinmej ompa otlapaleuiayaj noso akinmej ik ompa ochantiayaj? Amo. ToTajtsin Dios nochtin okinmaluiaya.
12. ¿Ken okiteititi Jehová okinseliaya nochtin israelitas ijkuak okatkaj kanin tlauaki? (Éxodo 40:38). (Noijki xikinmita dibujos).
12 Nochtin israelitas uelis mouikaskiaj iuan toTajtsin Dios. Uelis mouikaskiaj iuan Jehová maski amo tekipanoskiaj itech tabernáculo noso amo ik ompa chantiskiaj. Jehová okiteititi nochtin okinseliaya ijkuak okichi nochtin makitakan mixtli uan tlitl tlen omonextiaya ipan tabernáculo (xiktlajtolti Éxodo 40:38). Ijkon ijkuak mixtli omoliniaya nochtin okitayaj, okololouayaj tlen okipiayaj, okinxitiniayaj inkaluan uan nochtin san sekan oyayaj maski sekimej uejka okatkaj (Núm. 9:15-23). Noijki nochtin okikakiayaj ijkuak okinpitsayaj ome trompetas de plata ijkon okimatiayaj oksekan yaskiaj (Núm. 10:2). Non techititia amo san omouikayaj iuan Jehová akinmej ochantiayaj ik kanin okatka tabernáculo. toTajtsin Dios nochtin okinkalotiaya akinmej opouiayaj itech ialtepe, okinyekanaya uan okinmaluiaya. Axkan Jehová noijki ijkon techmaluia maski san kanin tichantij. Ye techtlasojtla uan techpaleuia amitlaj matechpano.
Jehová okiteititi okinseliaya nochtin israelitas porque tabernáculo okatka tlatlajko. (Xikita párrafo 12).
JEHOVÁ TINOCHTIN TECHSELIA
13. ¿Ken kiteititia Jehová tinochtin techselia?
13 Sekimej tokniuan chantij ik kanin kajki Betel uan oksekimej ompa tlapaleuiaj. Kichiuaj miak tekitl uan kinmixmatij tokniuan tlen ompa tlayekanaj. Sekimej tlapaleuiaj ken tlayekankej itech circuito uan oksekimej kichiuaj okseki tlamantli para okachi kitekichiuiliskej Jehová. Amo tinochtin uelis ijkon titlapaleuiskej. Pero matikilnamiktokan Jehová techtlasojtla, techkalotia uan techmaluia (1 Ped. 5:7). ToTajtsin Dios tinochtin techmaka miak tlamantli tlen techpaleuia kuali iuan matimouikakan, techyekana uan techmaluia.
14. ¿Ken kiteititia Jehová tinochtin kuali techselia?
14 Jehová tinochtin techselia porque techpaleuia tinochtin matikajsikamatikan tlen kijtoua Biblia. ITlajtol toTajtsin Dios omoijkuilo ika hebreo, arameo uan griego. Pero non amo kijtosneki okachi kuali mouikaj iuan toTajtsin Dios akinmej kitlajtoltiaj Biblia ika non tlajtoli (Mat. 11:25).
15. Xikijto okse tlamantli tlen kiteititia Jehová tinochtin techselia. (Noijki xikinmita fotos).
15 Jehová amo techselia porque otimomachtijkej miak noso porque tikmatij tlajtoli tlen ika omoijkuilo iTlajtol. ToTajtsin Dios nochtin kinmachtia uan amo san akinmej oyajkej escuela. Biblia yokitlajtolkopkej ika miak tlajtoli. Ikinon nochtin tlen chantij ipan nochi tlaltikpak uelij momachtiaj uan mouikaj iuan toTajtsin Dios (2 Tim. 3:16, 17).
Jehová kiteititia nochtin kinselia porque yokitlajtolkopkej Biblia ika miak tlajtoli. (Xikita párrafo 15).
MATIKPATIOITAKAN JEHOVÁ TECHKALOTIA
16. ¿Akinmej kinkalotia Jehová? (Hechos 10:34, 35).
16 Sapanoua tikpatioitaj matechkaloti toTajtsin Dios. San Jehová techiknomati, techtlasojtla uan techkalotia. Ye tinochtin techselia uan amo kita kanin otineskej, kanin tichantij, kox otimomachtijkej miak tlamantli, kox tiixchipajkej, keski xiuitl tikpiaj nion kox titlakamej noso tisiuamej. ToTajtsin Dios san kineki matikintlakamatikan itlanauatiluan (xiktlajtolti Hechos 10:34, 35).
17. ¿Tlen tikitaskej itech okse tlamachtil?
17 Itech Salmo 15:1, David okitlajtlani Jehová: “Jehová, ¿akin uelis mokalotis mokalijtik? ¿Akin uelis chantis itech motepe tlen chipauak?”. ToTajtsin Dios okinankili tlen okitlajtlani. Chikome tikitaskej tlen moneki tikchiuaskej tla tiknekij nochipa matechkaloti toTajtsin Dios.
TLAKUIKALI 32 ¡Nochipa niyetos inauak Jehová!
