ISIFUNDO 23
INGOMA 28 Ukuba Ngumngane KaJehova
UJehova Uyasinxusa Ukuthi Size Etendeni Lakhe
“Itende lami lizakuba phakathi kwabo. Ngizakuba nguNkulunkulu wabo.”—HEZ. 37:27.
ESIZAKUFUNDA
Sizabona ukuthi kutshoni ukwamukelwa nguJehova etendeni lakhe lokuthi utshengisa njani ukuthi uyasinakekela nxa singabangane bakhe.
1-2. UHubo 15:1 utshengisa ukuthi izinceku zikaJehova ezithembekileyo zingathola siphi isibusiso?
NXA ubungabuzwa ukuthi umbona njani uJehova, ubungaphendula njani? Mhlawumbe ubungathi, ‘UJehova unguBaba, unguNkulunkulu wami futhi ungumngane wami.’ Engxenye kulamanye amabizo okuhlonipha owasebenzisayo nxa ukhuluma ngoJehova. Kodwa ubona angani angakwamukela yini etendeni lakhe?
2 INkosi uDavida yafanisa ubungane obuba khona phakathi kukaJehova lenceku zakhe ezithembekileyo lendlela umninimuzi aphatha ngayo umuntu omvakatshele emzini wakhe. Wabuza wathi: “Awu Jehova, ngonjani umuntu omamukela etendeni lakho? Ngubani ongahlala entabeni yakho engcwele?” (Hubo. 15:1) Amazwi la atshengisa ukuthi uJehova angasamukela etendeni lakhe sibe ngabangane bakhe. Kuyisibusiso sibili lokhu.
UJEHOVA UFUNA SIZE ETENDENI LAKHE
3. Ngubani owaba ngowokuqala ukwamukelwa etendeni likaJehova njalo yena loJehova babelobudlelwano obunjani?
3 UJehova wayeyedwa engakadali ezinye izinto. Kodwa ngokuhamba kwesikhathi wadala iNdodana yakhe elizibulo futhi wayamukela etendeni lakhe. Kwamthokozisa kakhulu ukuba layo. IBhayibhili lithi uJehova ‘wayethokoziswa’ yiNdodana yakhe. INdodana le yaba ngeyoqala ukwamukelwa etendeni likaJehova futhi ‘yayijabula phambi kwakhe izikhathi zonke.’—Zaga. 8:30.
4. Ngobani abanye abemukelwa nguJehova etendeni lakhe?
4 UJehova wadala lezingilosi futhi lazo wazamukela etendeni lakhe. IBhayibhili libiza izingilosi ngokuthi ‘ngamadodana kaNkulunkulu’ futhi litshengisa ukuthi ziyakukholisa ukuba loJehova. (Jobe. 38:7; Dan. 7:10) Okweminyaka eminengi abangane bakaNkulunkulu kwakuyilabo ayehlala labo ezulwini kuphela. Kodwa ngokuhamba kwesikhathi wadala abantu futhi labo babengabuya etendeni lakhe babe ngabangane bakhe. Abanye abamukela etendeni lakhe ngu-Inokhi loNowa lo-Abrahama kanye loJobe. Abantu laba kwathiwa bangabangane bakaNkulunkulu futhi bahamba “loNkulunkulu weqiniso.”—Gen. 5:24; 6:9; Jobe. 29:4; Isaya. 41:8.
5. Sifundani esiphrofethweni esikuHezekheli 37:26, 27?
5 Kusukela kudala uJehova ubelokhu enxusa abangane bakhe ukuthi baze etendeni lakhe. (Bala uHezekheli 37:26, 27.) Ngokwesibonelo, isiphrofetho sikaHezekheli sitshengisa ukuthi uNkulunkulu ufuna ukuthi izinceku zakhe ezithembekileyo zibe ngabangane bakhe. Uthembisa ukuthi uzakwenza lazo “isivumelwano sokuthula.” Isiphrofetho lesi sikhuluma ngesikhathi lapho labo abalethemba lokuphila ezulwini kanye lalabo abalethemba lokuphila emhlabeni abazamanyana khona etendeni lakhe babe “ngumhlambi owodwa.” (Joh. 10:16) Lokhu yikho okwenzakalayo lamuhla.
UJEHOVA UYASINAKEKELA KUNGELANI LOKUTHI SINGAPHI
6. Umuntu kumele enzeni ukuze amukelwe etendeni likaNkulunkulu njalo itende lakhe litholakala ngaphi?
6 Kudala itende kwakuyindawo lapho umuntu ayephumula khona futhi wayecatsha kulo nxa umkhathi umubi. Nxa umuntu wayengavakatshela omunye etendeni lakhe wayengakhangelela ukuphathwa kuhle. Lathi uJehova uyasamukela etendeni lakhe nxa singazinikela kuye. (Hubo. 61:4) Etendeni lakhe sithola konke okusinceda ukuthi siqinise ukholo lwethu futhi siba ngabangane babanye abaphakathi kwalo. Kodwa itende likaJehova alikho endaweni eyodwa. Engxenye wake wavakatshela kwelinye ilizwe, mhlawumbe usiyangena umhlangano wesabelo oqakathekileyo. Lapho owaya khona wahlangana labanye abalesibusiso sokuba setendeni likaNkulunkulu. Lokhu kutshengisa ukuthi itende likaJehova litholakala loba ngaphi okulezinceku zakhe ezithembekileyo.—Isam. 21:3.
7. Kuyini okwenza sithi abantu abafa bethembekile balokhu besetendeni likaJehova? (Khangela lomfanekiso.)
7 Abantu abafa bethembekile bona ke? Singathi balokhu bekhona yini etendeni likaJehova? Ye singatsho njalo! Ngenxa yani? Ngenxa yokuthi uJehova ulokhu ebakhumbula futhi kuye kufana lokuthi basaphila. UJesu wathi: “UMosi laye wakuveza endabeni yesihlahla sameva ukuthi abafileyo bazavuswa. Wabiza uJehova ngokuthi ‘nguNkulunkulu ka-Abrahama loNkulunkulu ka-Isaka loNkulunkulu kaJakhobe.’ UnguNkulunkulu wabaphilayo hatshi owabafileyo ngoba kuye bonke bayaphila.”—Luk. 20:37, 38.
Abantu abafa bethembekile singathi balokhu bekhona etendeni likaNkulunkulu (Khangela indima 7)
IZIBUSISO ESIZITHOLAYO LALOKHO OKUMELE SIKWENZE
8. Labo abasetendeni likaJehova bathola ziphi izibusiso?
8 Njengoba itende liyindawo yokuphumula futhi livikela umuntu nxa kulomkhathi omubi, letende likaJehova livikela abaphakathi kwalo ukuthi kungabi lento ephambanisa ubungane babo laye futhi liyabanceda ukuthi bahlale belethemba. Nxa singahlala siseduze loJehova, loba yini uSathane asenza yona iyabe ingeyesikhatshana nje. (Hubo. 31:23; 1 Joh. 3:8) Emhlabeni omutsha uJehova uzaqhubeka encedisa izinceku zakhe ezithembekileyo ukuthi zibe ngabangane bakhe futhi uzaqeda lokufa.—Isam. 21:4.
9. UJehova ukhangelele ukuthi abantu abasetendeni lakhe benzeni?
9 Kuyisibusiso esikhulu ukuba setendeni likaJehova! Singenelisa ukuba ngabangane bakhe kuze kube nini lanini. Kodwa kumele senzeni nxa sifuna ukuhlala sisetendeni lakhe? Nxa umuntu engakunxusa emzini wakhe uyabe ufuna ukuba leqiniso lokuthi awenzi izinto ezizamcaphula. Ngokwesibonelo, bangabe bekhipha izicathulo bengakangeni endlini, yikho lawe uzalandela khonokho abakwenzayo. Ngendlela efananayo, lathi sifuna ukwazi lokho okumele sikwenze ukuze siqhubeke sisetendeni likaJehova. Kumele sizimisele ukwenza konke okusemandleni ethu ukuthi ‘simthokozise kukho konke’ ngenxa yokuthi siyamthanda. (Kol. 1:10) Lanxa uJehova engumngane wethu kumele sihlale sikhumbula ukuthi unguNkulunkulu wethu loBaba wethu, yikho kumele simhloniphe. (Hubo. 25:14) Kumele simesabe, singakhohlwa ukuthi unguNkulunkulu. Nxa simhlonipha asisoze senze izinto ezizamcaphula. Sifuna ukuhlala sihamba loNkulunkulu wethu ngokuzithoba.—Mik. 6:8.
UJEHOVA WAYEWAPHATHA NGENDLELA EFANANAYO AMA-ISRAYELI
10-11. Indlela uJehova ayephatha ngayo ama-Israyeli enkangala yaseSinayi yatshengisa njani ukuthi kakhethi?
10 UJehova ubaphatha ngendlela efananayo labo abamukela etendeni lakhe. (Rom. 2:11) Indlela uJehova ayephatha ngayo ama-Israyeli ngesikhathi esenkangala yaseSinayi isinceda sizwisise ukuthi kakhethi.
11 UJehova wathi esekhulule abantu bakhe ebugqilini eGibhithe wabeka abaphristi ababezasebenza ethabanikeli. AmaLevi wona ayesenza eminye imisebenzi etendeni lelo elingcwele. Lokho sekusitsho yini ukuthi ababesebenza ethabanikeli kumbe ababehlala eduze kwalo babeqakathekiswa kakhulu nguJehova ukwedlula abanye? Hatshi! Phela uJehova kakhethi.
12. Kuyini okunye okutshengisa ukuthi uJehova wayewaphatha ngendlela efananayo ama-Israyeli ngesikhathi esenkangala? (U-Eksodusi 40:38) (Khangela lomfanekiso.)
12 Wonke ama-Israyeli ayengaba ngabangane bakaJehova kungelani ukuthi ayesenza yiphi imisebenzi kumbe ukuthi ayehlala ngaphi kwethabanikeli. Ngokwesibonelo, uJehova wayeqiniseka ukuthi isizwe sonke sasisenelisa ukubona insika yeyezi kanye lensika yomlilo okwakuphezu kwethabanikeli. (Bala u-Eksodusi 40:38.) Lalabo ababekhatshana lethabanikeli babesenelisa ukubona nxa iyezi selisuka. Yikho labo babehle baqalise ukuqoqa impahla zabo, badilize amatende abo besebesuka labanye. (Nani. 9:15-23) Kanti njalo kwakulamacilongo esiliva amabili ayetshaywa nxa sekumele isizwe sisuke. Bonke babewezwa amacilongo la nxa ekhala. (Nani. 10:2) Kuyacaca ukuthi labo ababehlala eduze lethabanikeli ayisikho ukuthi babethandwa kakhulu nguJehova ukwedlula abanye. Kodwa wonke nje um-Israyeli wayengemukelwa etendeni likaJehova njalo angathandabuzi ukuthi wayezamkhokhela futhi amvikele. Lathi lamuhla singaqiniseka ukuthi uJehova uzahlala esithanda, esinakekela futhi esivikela kungelani lokuthi sihlala ngaphi.
Ithabanikeli elaliphakathi laphakathi kwenkamba yama-Israyeli lalitshengisa ukuthi uJehova kakhethi (Khangela indima 12)
LAMUHLA UJEHOVA UTSHENGISA NJANI UKUTHI KAKHETHI?
13. Lamuhla yiphi eyinye indlela uJehova atshengisa ngayo ukuthi kakhethi?
13 Lamuhla abanye oFakazi bakaJehova bahlala eduze lamawofisi ethu amakhulu njalo abanye bahlala eduze kwamawofisi egatsha aboFakazi bakaJehova. Kanti njalo abanye basebenza endaweni lezo. Lokhu kwenza bathole ithuba lokuncedisa emisebenzini etshiyeneyo eyenziwa endaweni lezo baphinde bathole lethuba lokubazi ngcono abakhokhelayo. Kanti njalo kulababonisi beziqinti labanye abasenkonzweni yesikhathi sonke abenza imisebenzi etshiyeneyo. Nxa uphakathi kwabanengi abangenzi imisebenzi le yenkonzo, qiniseka ukuthi uJehova uyakwamukela etendeni lakhe lokuthi uyakuthanda. Ulendaba lathi sonke. (1 Phet. 5:7) Bonke abantu bakaNkulunkulu bayaluthola ulwazi olubaqinisa ukholo njalo uyabakhokhela aphinde abavikele.
14. Kuyini okunye okutshengisa ukuthi uJehova kakhethi?
14 Eyinye indlela uJehova atshengisa ngayo ukuthi ubaphatha ngendlela efananayo abantu abemukela etendeni lakhe yikuthi wenza ukuthi bonke abantu benelise ukuthola iBhayibhili. IMibhalo Engcwele yaqala yabhalwa ngesiHebheru lesi-Aramu kanye lesiGrikhi. Kambe lokhu kutsho ukuthi abantu abenelisa ukubala iBhayibhili ngendimi lezo baba lobudlelwano obuqinileyo loJehova ukwedlula labo abangenelisi ukuzibala? Hatshi.—Mat. 11:25.
15. Kuyini okunye okutshengisa ukuthi uJehova kakhethi? (Khangela lomfanekiso.)
15 UJehova uyasamukela sonke. Kakhethi abantu kusiya ngokuthi bafunde kanganani kumbe ukuthi bayazikhuluma yini indimi iBhayibhili elalibhalwe ngazo kuqala. UJehova unika abantu ukuhlakanipha kungelani lokuthi bafundile kumbe abafundanga. ILizwi lakhe eliphefumulelweyo iBhayibhili selihunyutshwe ngezindimi ezinengi kakhulu. Yikho bonke abantu bangenelisa ukuncedwa yilokho abakubala kulo baphinde bafunde ukuthi bangenzani ukuze babe ngabangane bakaNkulunkulu.—2 Thim. 3:16, 17.
Ukutholakala kweBhayibhili ngendimi ezinengi kutshengisa njani ukuthi uJehova kakhethi? (Khangela indima 15)
QHUBEKA ‘USAMUKELWA’ NGUJEHOVA
16. ImiSebenzi 10:34, 35 itshengisa ukuthi kumele senzeni ukuze uJehova aqhubeke esamukela?
16 Kuyisibusiso esikhulu ukwamukelwa nguJehova etendeni lakhe. Phela akulamuntu olomusa lothando ukwedlula uJehova njalo ubaphatha kuhle kakhulu labo abamukelayo. Kanti njalo kakhethi, uyasamukela sonke kungelani lokuthi sihlala ngaphi, sikhuliswe njani kumbe sifunde kangakanani. Kalandaba lokuthi singumhlobo bani, singanani kumbe ukuthi singabesilisa loba singabesifazana. Lanxa kunjalo wamukela labo abazimisele ukumlalela kuphela.—Bala imiSebenzi 10:34, 35.
17. Sizaxoxa ngani esihlokweni esilandelayo?
17 KuHubo 15:1 uDavida wabuza wathi: “Awu Jehova ngonjani umuntu omamukela etendeni lakho? Ngubani ongahlala entabeni yakho engcwele?” UJehova wamsebenzisa ukuthi ayiphendule imibuzo leyo. Esihlokweni esilandelayo sizaxoxa ngalokho okumele sikwenze ukuze uJehova aqhubeke esamukela etendeni lakhe.
INGOMA 32 Woba NgokaJehova!
