MUSORO WO KUJIJA WO 23
NDUMBO 28 Kuwana Ushamwari hwa Jehovha
Jehovha Ari Kutikoka Kuti Tive Varendo Vake
‘Tende yangu inozogara pakati pavo: inini ndinozoita Mwari wavo.’—EZEKIELI 37:27.
ZVATICAJIJA
Tiri kuda kuvona manera atingaengejera kubongesera kwedu mukoka wa Jehovha wo kutikoka kuti tigare mu tende yake yokuezanisira no manera aanotitaja inga Mutungamiriri wedu.
1-2. Ngowapi mukoka unoithwa ndi Jehovha kuno vanamati vake vakagondeka?
KUDARI ari wese akamuvhunjisa kuti Jehovha ndiyani wenyu, maizomudavirisa kudini? Imwimwi mungamudavira kuti ‘Jehovha ndi Baba wangu, Mwari wangu, no shamwari yangu.’ Cimwenizve, imwimwi mungatorangariravo njira jimweni jamungananga ndijona kuti Jehovha ndiyani wenyu. Asi imwimwi, munovona Jehovha inga Mutungamiriri wenyu?
2 Tecibhuya ngo pamusoro po ushamwari na Jehovha, Mambo Dhavhidhi wakaezanisa Jehovha no Mutungamiriri, woezanisa vanamati vake no varendo. Iyena wakavhunjisa kudari: “Jehovha, ndiyani anofanera kuva murendo mutende yenyu? Ndiyani anofanera kugara pa dundhu renyu rakacena?” (Nduyo 15:1) Kuvha ku masoko aya akafemehwa, itusu tinokwanisa kuzwisisa kuti tingava varendo mutende ya Jehovha kana kuti tingava shamwari jake. Imwimwi amuvoni kuti mukoka watiri kupuwari ndi Jehovha unoshamaisa maningi?
JEHOVHA ANOKOKA VARENDO VAKE
3. Ndiyani wakava murendo wokutanga wa Jehovha, ushamwari hwavo hwainga hwakadini?
3 Jehovha acito asika zviro zvese, wainga ega. Perapo Jehovha wakazosika Mwana wake wodangwe. Jehovha inga Mutungamiriri, wainga atanga kukoka murendo wake wokutanga kuti aviye mutende yake. Izvi zvakamudakajisa maningi. Bhaibheri rinonanga kuti Jehovha ‘waidakara maningi’ ngo Mwana wake. Ngo divi rimweni, murendo uwu wokutanga, ‘waidakara maningi ndi Jehovha njiku jese.’—Mazwi Akangwara 8:30.
4. Ndiyanizve wakava murendo wa Jehovha?
4 Perapo, Jehovha wakasikavo ngirozi, ijo jiri varendo vake. Bhaibheri rinodaninja ngirozi kuti ‘vana va Mwari’, irona rinonangazve kuti ijona jakadakara maningi ngo kuva na Jehovha. (Jobe 38:7; Dhanyeri 7:10) Ko makore akawanda varendo va Mwari vainga basi vayani vaigara naye kudenga. Asi pakufamba ko nguva, Jehovha wakazoengejera tende yake kuti adirevo vandhu vo pa nyika kuti vave varendo vake. Vamwe vo varendo ava vakava Inoki, Nowa, Abhirahama na Jobe. Bhaibheri rinonanga kuti ivona vainga shamwari ja Mwari ngokuti vakamuzwira no “kufamba na Mwari wo cokwadi.”—Genesi 5:24; 6:9; Jobe 29:4; Isaia 41:8.
5. Tinojijenyi kuvha ku ciporofita ca Ezekieli 37:26, 27?
5 Ko mazana o makore, Jehovha ari kwenderera mberi ecikoka shamwari jake kuti jive varendo vake. (Verenganyi Ezekieli 37:26, 27.) Inga muezaniso, pa ciporofita ca Ezekieri takajija kuti Jehovha anoda kuti vanamati vake vave no ushamwari hwakavanga naye. Iyena anogondesa kuti “anozoita naivona citenderano co kunyarara.” Ciporofita ici cinobhuya ngo mukuvo umweni wokuti, vaya vano vetero yokuzorarama kudenga na vaya vano vetero yokuzorarama pasi pano, vanozova vari pamwepo mu tende yake inga “mushambi umwe.” (Johani 10:16) Ciporofita ici ciri kukwanirisika nyamasi uno.
KURI KWESE KWATINONGA TIRI, JEHOVHA ANOTITAJA
6. Ari wese angaitisa kudini kuti ave murendo mu tende ya Jehovha, tendeyo iri kwapi?
6 Mu nguva yokare, tende yainga ndau yokuti mundhu waizorororemo nokuva akajiviririka ku ngozi. Mundhu waigumira mu tende pa mukuvo wiya, waivetera kuti mune wo tende amutaje ushoni. Patinopira upenyu hwedu kuna Jehovha, tinova varendo mu tende yake yokuezanisira. (Nduyo 61:4) Mu tende iyi, itusu tino zvokuha zvakakwana zvatinoda zvokumujimu, kuti tikwanise kwenderera mberi tino ushamwari hwakavanga na Jehovha no ushamwari no vamweni vanongavo vari varendo vake. Tese tingava varendo mu tende ya Jehovha. Kaingaije imwimwi makamboita hwendo kwenda ku nyika jimweni. Inga muezaniso, ku gungano. Konayo imwimwi makazivavo vamweni vakadakara maningi ngokuva mu tende ya Jehovha. Tende ya Jehovha iri mu ndau jese jinowanika vanamati vake.—Apokaripsi 21:3.
7. Ngenyi vashandiri vakagondeka va Jehovha vakapera kufa, vaciri varendo mu tende yake? (Vonanyi foto.)
7 Waro tingativo kudini ngo pamusoro po vashandiri vakagondeka va Jehovha vakapera kufa? Kureva kuti ivona vaciri varendo mu tende ya Jehovha? Zvakajeka kuti hina. Ngenyi tingananga zvondhozvo? Ngokuti Jehovha aciri kunasa kuvaceukija kamare, kwaari ivona vaciri penye. Jesu wakasanangura kudari: “Asi vakafa vanozomuswa, pikija Mosi, wakazvinanga paainga ecitara ngo zvakaitika pa pfiba ro muzwa, paakananga kuti Jehovha, ndi ‘Mwari wa Abhirahama, Mwari wa Izaki na Mwari wa Jakobe. Iyena asipi Mwari wo vakafa, asi ndi Mwari wo vanopona, ngokuti kwaari, vese vanorarama.”—Ruka 20:37, 38.
Pikija vashandiri vakagondeka vakafa kare, ivona vangavoniwa inga varendo mu tende ya Jehovha (Vonanyi ndima 7)
NGORAPI BESERO RATINOASHIRA, ASI ZVICINYI ZVATINODIKANA KUITA?
8. Ngorapi besero ratinoashira ngokuva mutende ya Jehovha?
8 Tende ya Jehovha inojivirira varendo vake ku ciri cese haco cingakhuvaza ushamwari hwavo naye, cimwenizve, inopa vetero yokadi kuitira kumbeji. Patinogara phedo na Jehovha Sathana aakwanisi kuita ciro cingatikhuvaza kwenda no kwenda. (Nduyo 31:23; 1 Johani 3:8) Mu nyika imbza, Jehovha anozoenderera mberi ecijivirira shamwari jake jakagondeka haiwa basi ku divi ro kumujimu asi pa rufu.—Apokaripsi 21:4.
9. Jehovha anovetera kuti varendo vake vave vandhu vakadini?
9 Ngozvokadi kuti i cidakajiso cikuru maningi kuva murendo mutende ya Jehovha no kuva no ushamwari hwakavanga naye hwo kwenda no kwenda. Kudari tecida kwenderera mberi tiri varendo vake, tinodikana kuitenyi? Kudari imwimwi makokwa ku muzi ko ari wese, mukaguma konayo munovetera kuti mune wo muzi amuvhunje zvamunodikana kuita. Inga muezaniso, mune wo nyumba angada kuti imwimwi muvhise sapato mucito manghwina mumba make, imwimwi munozotendera kuita zvondhozvo. Mu njira yakaezana, itusu tinoda kuziva kuti Jehovha anoda kuti tiitenyi mu tende yake inga varendo. Rudo hwedu na Jehovha unotindundira kuti tiite zvese zvatinokwanisa kuti ‘tinase kumudakajisa.’ (Vakorose 1:10) Jehovha wakadari inga shamwari yedu, asi tinodikana kuceukijavo kuti iyena ndi Mwari wedu na Baba, ndiyo ndava tinodikana kumureremeja. (Nduyo 25:14) Narini atidikani kukanganwa zviro izvi nokumureremeja mukuvo wese. Kuceukija zviro izvi kunozotibesera kuti titame kuita zviro zvicikadakajisi Jehovha. Pacina kukana-kana, itusu tinoda ‘kujidodokesa’ patinofamba na Mwari wedu.—Mikeya 6:8.
JEHOVHA WAKAKHOMBIJA KUTAMA KUVA NO MUKHETO KU VAIZIRAERI MU ZVIPARE
10-11. Manera Jehovha akataja Vaiziraeri mu zvipare zvo Sinai, akakhombijisa kudini kuti iyena aakheti?
10 Jehovha paanotaja varendo vake, iyena aakheti. (Varoma 2:11) Itusu tingakwanisa kunasa kuzwisisa ushoni kutama kuva no mukheto kwa Jehovha ngo manera aakataja Vaiziraeri pavainga mu zvipare zvo Sinai.
11 Paakapera kusujunura vandhu vake kuvha ku uranda ku Ejipita, Jehovha wakagaja vapiri kuti vashande mu tabherinake. Varevhi vakagajwa kuti vaite mabasa amweni mu tabherinake. Kureva kuti vaya vaishandiraya mu tabherinake, no vaiitaya mabasa amweni mukatimo, ndivona vaitajwa ushoni ndi Jehovha kupinda vamweni? Haiwa. Kuna Jehovha vandhu vese vakaezana, iyena aakheti.
12. Manera Jehovha akataja Vaiziraeri mu zvipare akakhombijisa kudini kuti kwaari vandhu vese vakaezana? (Exodo 40:38) (Vonanyi foto.)
12 Mu Iziraeri umwe nga umwe wainga no ushamwari hwophedo na Jehovha, azvinenyi kuti iyena waishandira mu tabherinake kana kuti haiwa, kana kuti kwaaigara kwainga phedo no tabherinake. Inga muezaniso, Jehovha wakaita nasiriro kuti jinja rese ro Vaiziraeri ritevere gore no murazvu wo muriro zvaigara pa nyezuru po tabherinake. (Verenganyi Exodo 40:38.) Gore paraimuka rotanga kutevera gwanja, pikija vaya vainga vakagara ndhambo no tabherinake vaikwanisa kuzvivona. Ngo kudaro, ivona vaikwanisa kurongeja zviro zvavo, kupwanya-phwanya zvimatende zvavo votanga kufamba pamwepo no vandhu vamweni. (Bziverengo 9:15-23) Kunja kwa zvondhozvo, vese vainasa kuzwa ushoni kurijwa ko mbaya-paya mbiri jo sirivha ico cainga civoniso kuitira kuti jinja ribude kuvha mu koponi. (Bziverengo 10:2) Ngo kudaro, zvakajeka kuti kugara phedo no tabherinake, azvicairevepi kuti mundhu waizova no ushamwari wakavanga maningi na Jehovha kupinda vaya vaigara ndhambo no tabherinake. Mukusiyana, Vaiziraeri vese vaikwanisa kuva varendo va Jehovha no kuva no cokwadi cokuti iyena waizovatungamirira no kuvangwarira. Mu njira yakaezana, itusu nyamasi uno, azvinenyi no kwatinogara mu nyika ino, tingakwanisa kuashira rudo, kutajwa no kujivirihwa ndi Jehovha.
Nasiriro yo tabherinake yakaithwa ndi Jehovha yaivonesa kuti iyena ndi Mwari acikakheti (Vonanyi ndima 12)
KUTAMA KUVA NO MUKHETO KWA JEHOVHA NYAMASI UNO
13. Nyamasi uno Jehovha anokhombijisa kudini kuti aakheti?
13 Vandhu va Jehovha vamweni nyamasi uno, vanogara phedo no muimiriri wo cine kana phedo no bheteri ro Zvapupu zva Jehovha. Vamweni vanoshandira mu ndau jondhojo. Inga muviyo, vandhu ava vangakwanisa kuita mabasa mazinji anoithwa pa ndau jondhojo no kuva pamwepo na vaya vanotungamirira mu sangano ra Jehovha. Vamweni vanoshanda inga vavonereri vo ndharaundha no mabasa amweni o mu nguva yakazara. Asi kudari imwimwi amuiti amwe o mabasa ese ataperari kubhuya apa, mungakwanisa kuva no cokwadi cokuti Jehovha Mutungamiriri wedu, ku vese vari varendo vake, iyena anovada maningi kubatanijavo na imwimwi. Iyena anozomupa zvese zvamunoda. (1 Pedhru 5:7) Vese vanoita divi ro mbhuri ya Jehovha vanoashira zvokuha zvokumujimu, ndhungamiriro no jiviriro yavanoda.
14. Ngowapi muezaniso umweni watinawo nyamasi uno unovonesa kuti Jehovha aana mukheto?
14 Muezaniso umweni unokhombija kuti Jehovha aakheti inga Mutungamiriri wakanaka, ngowokuti iyena anoita nasiriro kuti Bhaibheri riwanike ku vandhu vese vari mu nyika. Matahwa Akacena akatanga kutahwa kamare mu ndumi ndhatu: Cihebheru, Ciaramaiko no Cigiriki. Kureva kuti vaya vanokwanisa kuverenga Bhaibheri mu ndumi yakatanga kushandiswa kuti Bhaibheri ritahwe pakutanga, ndivona vano ushamwari hwophedo maningi na Jehovha kupinda vaya vacikakwanisi kuverenga ndumijo? Haiwa andizvopi.—Mateu 11:25.
15. Ngocapi cokwadi catinaco nyamasi uno cinokhombija kuti Jehovha aakheti? (Vonanyi foto.)
15 Jehovha aatikoki kuti tive shamwari jake basi kudari itusu tiri vandhu vakajija maningi kana kuti tinokwanisa kuverenga ndumi jakatanga kushandiswa kuti Bhaibheri ritahwe pakutanga. Jehovha anopa ushamwari hwake no uzivi hwake ku vandhu vese vo mu nyika haiwa basi ku vaya vakajija maningi. Soko ra Mwari Bhaibheri rakafemehwa, rasandujwa mu ndumi jakawanda maningi. Ngo njira iyi, vandhu mu nyika yese vanozovona kuti ngenyi ngozvaushoni mukuvo wese kuzwira zvaanojijisa, vova shamwari jake.—2 Timoti 3:16, 17.
Ngenyi kuwanika ko Bhaibheri nyamasi uno kuitira vandhu vese, i civoniso cokuti Mwari aakheti? (Vonanyi ndima 15)
ENDERERANYI MBERI “MURI” VARENDO VA JEHOVHA
16. Mukuzwirana na Mabasa o Vapostori 10:34, 35, ngozvapi zvatinodikana kuita kuti tienderere mberi tiri varendo va Jehovha?
16 I cidakajiso cikuru maningi kukokwa ndi Jehovha kuti tive varendo vake mu tende yake yokuezanisira. Iyena i Mutungamiriri wakanaka mwoyo, ano rudo no anoashira varendo kupinda zviya zvatingarangarira. Kusiyapo izvo, kwaari vandhu vese vakaezana. Iyena anokoka vandhu vese, aana mukheto. Azvinenyi no kwavanogara, manera avakareriwa, kujija kwavakaita, jinja ravo, mupira wavo, nokuti mwanarume kana kuti mwanakaji. Asi Jehovha anoashira vaya vanomuzwira kuti vave varendo vake.—Verenganyi Mabasa o Vapostori 10:34, 35.
17. Ngokwapi kwatingawana masoko amweni ngo pamusoro pokuva varendo mu tende ya Jehovha?
17 Mukuzwirana na Nduyo 15:1, Dhavhidhi anoita muvhunjo iji: “Jehovha, ndiyani anofanera kuva murendo mutende yenyu? Ndiyani anofanera kugara pa dundhu renyu rakacena?” Jehovha wakashandisavo Dhavhidhi endhowo kuti adavire muvhunjo iji. Mu cijijo cinotevera, tinozovona zviro zvatinodikana kuita kuti tidakajise Jehovha no kwenderera mberi tiri shamwari jake.
NDUMBO 32 Beseranyi Jehovha!
