1-2. Invitasiɔ̃ mɛ Yehova ndo hɛ̃ azi mɛ ndo vɔrɔ lo nɛ?

 KWA mɛ Yehova ndo li na ya dungɔ lɛ ngɛ̃́ tɛ e nɛ? Ngoi mɛndɛ̃ mɔ lengbi ti hɛ̃ngɔ gbinya ya, ‘Yehova du to mɔ, Nzapa tɛ mɔ, nga kwa mɔ.’ Ni nga na atitrɛ mɛndɛ̃ mɛ mɔ lengbi ti salelangɔ ni ti ilingɔ na Yehova. Kanda, mɔ lengbi nga ti hũngɔ lo ya, lo du wa batangɔ mɔ?

² Gbia Davidi haka mangbi mɛ ndo du na popo tɛ awa kwa tɛ Yehova ti mbilimbili na mangbi mɛ nvɛ̃ da ndo du na ni ná azi mɛ lo ili ala kaya da tɛ lo. Lo hũndandó tɛrɛ lo na ndo ya: “Ee Yehova, zo mɛ mɔ lengbi ti ilingɔ lo ka gbɛ gofa tɛ mɔ ti tandi na? Zo mɛ lengbi ti dungɔ ka ndo ngomba tɛ mɔ mɛ santo na?” (Nz. 15:1) Tɛnɛ ti vɛrse mɛ ndo fa na e se mɛ elengbi ti tingɔ azi mɛ Yehova ili ala ka gbɛ gofa tɛ lo ti tandi nga akwa lo. Ta ni du kota invitasiɔ̃ mɛ alo ka tɛ Yehova ma?

YEHOVA YE YA E DU AZI MƐ LO ILI ALA

3. Zo ti uzu mɛndó Yehova ili lo na, wa Yehova ná zo mɛndó lo ili lo ndo bangbindó tɛrɛ la ngasia?

³ Uzu ti nɛngɔ ya Yehova li aye ko, lo bondó kɔi na bɛ lo. Kanda na ya ngoi kɔi ko, lo ilindó Nyi lo mɛ lo li uzu ya, lo ga lo li ka gbɛ gofa tɛ lo ti tandi ti yikayika. Bɛ Yehova dendó na ndo kumba tɛ lo ti fãnani ngama nvɛ̃ da. Ngbangɔ pa ya, Yehova “ndo yendó” Nyi lo. Ngoi zu, Nyi lo niko ti kɔzoni ngandó na “dengɔ bɛ gba ka gbɛlɛ Yehova.”​—Mas. 8:30.

4. Yehova lindó ya, gofa tɛ lo ti tandi ati kotani ngasia?

 ⁴ Yehova lindó azi mɛndɛ̃ mɛ na tɛrɛ ti nyingɔ, wa lo ili ngandó ala ya, ala du ka gbɛ gofa tɛ lo ti tandi. Ando ili ala ya, aangelo tɛ lo, ngoi mɛndɛ̃ “aya Nzapa” wa ala nga na dengɔ bɛ ti dungɔ kaya linɔ tɛ Yehova. (Yobo 38:7; Da. 7:10) Abulu gba na gesi, ta songo tɛ Yehova angbã bondó ka tɛ azi mɛ lo li la na tɛrɛ ti nyingɔ ka ndozu ma. Na gesi, lo lindó ya gofa tɛ lo ti tandi ati kotani na ndenge mɛndó lo kpã nga azi ge lɛ sese. Ka popo tɛrɛ azi mɛndó alua nzɔ̃ tangɔ li gɛrɛ ti lingɔ ka gbɛ gofa tɛ lo ti tandi ti yikayika adu: Noa, Abrahama nga na Yobo. Ngbangɔ fa ya, ando ilindó azi niko ya, akwa Yehova na lo mɛ ya,“ala ndo tɔndɔndó Lo.”​—Eb. 5:24; 6:9; Yobo 29:4; Yis. 41:8.

5. Ye mɛ elengbi ti mandangɔ na ndo prɔfesi mɛ kaya mbeti ti Ezekiele 37:26, 27 nɛ?

⁵ Bandangɔndó gã tee ndɛ, Yehova ndo ngbã bo lá kwɛ ilingɔ azi ya, ala ti akwa lo wa ala li nga ka gbɛ gofa tɛ lo ti tandi. (Di Ezekiele 37:26, 27.) Na ndakisa, prɔfesi tɛ Ezekiele fa na e ya Nzapa ye ya, awakwa tɛ lo ti mbilimbili adu na mangbi ti nzɔ̃ni na lo. Lo kokapa ti “tɛngbingɔ mbele ti siriri na ala.” Prɔfesi niko ndo fa ngoi mɛ gbandá azi mɛ na nzɔ̃ dangɔ bɛ ti gwengɔ ndozu nga na azi mɛ na nzɔ̃ dangɔ bɛ ti dungɔ ge lɛ sese na dungɔ ndoni kɔi ka gbɛ gofa tɛ lo ti tandi ngama “linɔ kɔi tɛ angasã gbaga.” (Yn. 10:16) Ni du ye mɛ ndo li tɛrɛ lo ndɛ!

NZAPA NDO BATA E NDO ZU MƐ E DA

6. Ngasia la azi mɛndɛ̃ ndo li ka gbɛ gofa tɛ Yehova ti tandi nɛ, wa gofa ni ndo du bo ka ndo kɔi?

⁶ Na ngoi ti gã, gofa dundó ndo mɛ zo ndo du da wa ni ndo bata ngandó lo na ya akpale gba. Na ngoi mɛ aili zo ka gbɛ gofa kɔi ko, lo ndo kũndó ya, abata lo nzɔ̃ni. Na ngoi mɛ e ndo hɛ̃ dungɔ lɛ ngɛ̃́ tɛ e so vɔrɔngɔ Yehova ko, e ndo ti azi mɛ ali ka gbɛ gofa tɛ lo ti tandi ti yikayika. (Nz. 61:4) E ndo du na dengɔ bɛ gba na lo ti tɛ ti nyingɔ mɛ e ndo lua nga tengbingɔ na azi mɛndɛ̃ mɛ Yehova ili ala. Ta gofa ti tandi tɛ lo ndo du bo ka ndo kɔi ma. Ngoi mɛndɛ̃ mɔ lindó vuayajɛ na lo ti kota bombi, wa mɔ tengbi ngandó na azi mɛndɛ̃ mɛ ala na nzɔ̃ sulu na lo mɛ ya, ala ka gbɛ gofa ti tandi ti yikayika tɛ Nzapa. Elengbi ti luangɔ gofa ti tandi tɛ Yehova ka ndo zu mɛ awa vɔrɔngɔ lo ti mbilimbili da.​—Suma 21:3.

7. Nda mɛ elengbi ti tɛnɛngɔ ya, awakwa tɛ Yehova ti mbilimbili mɛ kpili dɛ bo azi mɛ lo ili la ka gbɛ gofa tɛ lo ti tandi nɛ? (Ba nga Limɔ.)

⁷ Wa e tɛnɛ ya nɛ na lo tɛ azi ti mbilimbili  mɛ akpili wɛ nɛ? Elengbi ti tɛnɛngɔ ya ala dɛ bo ka gbɛ gofa ti tandi tɛ Yehova? Ĩi ala dɛ ka da! Nda mɛ e tɛnɛ ngaso nɛ? Na lo mɛ ya, ala dɛ kaya bingangɔ li tɛ Yehova. Yezo tɛnɛndó ya, “azi na songɔ, Moizɛ ye ngandó tɛnɛ ni na ngoi mɛndó lo ili Yehova ya, lo du ‘Nzapa tɛ Abrahama, Nzapa tɛ Yisaka nga Nzapa tɛ Yakobo.’ Lo Nzapa, ta lo du Nzapa tɛ awa kwa ni ma, kanda Nzapa tɛ azi mɛ na dungɔ lɛ ngɛ̃́, na lo mɛ ya ka tɛ lo, ala zu na dungɔ lɛ ngɛ̃́.”​—Luka 20:37, 38.

E NA ANZƆ̃ SULU NGA NA KUMBA

8. Anzɔ̃ sulu mɛ e ndo lua na lo mɛ ya, Yehova ili e ka gbɛ gofa tɛ lo ti tandi nɛ?

⁸ Ngama se mɛ gofa ndo bata zo na ya akpengba kpale ko, kwɛ kɔi gofa tɛ Yehova ndo bata azi mɛ lo ili ala na ya kpengba kpale mɛ alengbi ti gbɛ̃ngɔ mangbi tɛ ala na mbage tɛ lo, wa ni ndo hɛ̃ nga ala nzɔ̃ dangɔ bɛ na ndo bi mɛ na gangɔ. Se e ngbã dã na Yehova ko, ta Satana lengbi ti lingɔ e ye kɔi ti siɔni mɛ na ngbãngɔ bwai na bwai ma. (Nz. 31:23; 1 Yn. 3:8) Kaya gigi ti fãnani ko, ta Yehova na ngbãngɔ bo lá kwɛ batangɔ akwa lo ti mbilimbili na ya kpengba kpale ti nyingɔ ma, kanda lo nga na batangɔ ala na ya kwá.​—Suma 21:4.

9. Seliye mɛ Yehova ndo kũ ka tɛ azi mɛ lo ili la nɛ?

⁹ Adu kota ndima dungɔ azi mɛ Yehova ili ala ya, ala du ka gbɛ gofa tɛ lo ti tandi, nga dungɔ na dengɔ bɛ na lo ti mangbi ti nzɔ̃ni mɛ elengbi ti dungɔ na ni na lo. Se e ye ngbãngɔ lá kwɛ azi mɛ Yehova ili ala, seliye mɛ ayɔ ya e du na ni nɛ? Se zo kɔi ili mɔ kaya da tɛ lo ko, mɔ na gingɔ hĩngangɔ ye mɛ mɔ lengbi ti lingɔ ti hɛ̃ngɔ lo dengɔ bɛ. Na ndakisa, lo lengbi ti yɔngɔ ka ti mɔ ya, mɔ hã pɔlɔ uzu ti lingɔ ka yada tɛ lo, wa mɔ na lingɔ bo se mɛ lo yɔ na ni. Kwɛ kɔi, e ndo ye hĩngangɔ ye mɛ Yehova ndo yɔ ka ti azi mɛ lo ili la ti nɛngɔ ya, ala ngbã lá kwɛ ka gbɛ gofa tɛ lo ti tandi. Songo mɛ e na ni na lo tɛ Yehova ndo to e ya, e li zu mɛ elengbi ti lingɔ “ti hɛ̃ngɔ lo dengɔ bɛ.” (Kɔl. 1:10) Wa se e mu Yehova ya, lo du kwa e ko, e na hũngɔ lo ya, lo du Nzapa tɛ e nga To e mɛ ayɔ ya, e tɔndɔ lo. (Nz. 25:14) Se e du na bingangɔ li ti ngaso ko, ta bɛ e na lingɔ na ni ma ya, ayɔ ya e tɔndɔ bo lo ngoi zu. Lingɔ ngaso na zangɔ e ya, e kpɛ aseliye zu mɛ na hɛ̃ngɔ lo sɔngɔ bɛ. E na mungɔ ekateli ti “ngbãngɔ lá kwɛ nɔngɔ nɔ na mbilimbili” na Nzapa tɛ e.​—Mika 6:8.

TA YEHOVA LINDÓ KPALE TƐRƐ AYA IZRAƐLƐ KA BƐ NYAMA NA PƆNANGƆ LƐ MA

10-11. Ngasia la Yehova lindó ye tɛrɛ aya Izraɛlɛ ka bɛ nyama ti Sinai na zangangɔ pɔnangɔ lɛ nɛ?

¹⁰ Yehova ndo hũ azi mɛ lo ili ala ka lɛ lo kwɛ kɔi. (Roma 2:11) Elengbi ti hũngɔ se mɛ Yehova ndo li na kpale tɛrɛ azi kwɛ kɔi ngama se mɛndó lo li na ni ka tɛ aya Izraɛlɛ ka bɛ nyama ti Sinai.

¹¹ Na pɛ singɔ tɛ aya Izraɛlɛ ka gbɛ mbɛ ti Ezipito ko, Yehova pɔnandó Anganga nzapa ti nɛngɔ ya, ala li kwa ka tabɛrnaklɛ. Azi ti Levi ndó na kumba ti lingɔ akwa mɛndɛ̃ ti santo ka tabɛrnaklɛ. Ni ye fangɔ ya, azi mɛndó ndo li kwa ka tabɛnaklɛ bere azi mɛndó ndo li kwa ka dã na ni ndó na mangbi ti kpengbani na Yehova ɔngɔ azi mɛndɛ̃? Ipɔ! Ta Yehova ndo pɔna lɛ ma.

12. Ngasia la Yehova fa ya, ta lo ndo pɔna lɛ ma ngama nvɛ̃ da na bangɔ se mɛndó lo li na kpale tɛrɛ ndasewa ti fãnani nɛ? (Kobima 40:38) (Ba nga limɔ.)

¹² Azi zu mɛndó ka tabɛrnaklɛ ná ala mɛndó ka pɛnindó na nzɔ̃ tangɔ li gɛrɛ ti lɛkɛngɔ mangbi tɛ la na Nzapa abɛse kumba ná ndo mɛndó ala ndo du na ni adu ti ngasia. Na ndakisa, Yehova lindó ya ndasewa ni zu ahũ ye ti kpɛ̃nɛ mɛ lo li ti kpãngɔ dababa ná ngbo ti wá  ka ndo tabɛrnaklɛ. (Di Kobima 40:38.) Ngoi mɛ dababa ni ndo mundó lége mɛndɛ̃ ko, azi mɛndó dã na tabɛrnaklɛ ná ala mɛndó ka yɔngɔrɔni na ni ala zu ndo hũndó ni. (Mit. 9:​15-23) Azi zu ndo mandó mbana (nza) mɛndó ndo ulu ti fangɔ na ala ya, adɛ dã ala hã nɔ. (Mit. 10:2) Adu yangondo ya, ta dungɔ dã na tabɛrnaklɛ afa ya, zo na mangbi ti kpengbani na Yehova ma. Kanda, ayɔndó ya, azi zu ti ndasewa tɛ Yehova mɛ lo ili la akpã bɛ la na ndo litambwisi nga libateli tɛ lo. Kwɛ kɔi ndɛ lo mɛ ko, abɛse e ndo du ka kɔdɔrɔ ni nɛ, elengbi ti luangɔ nzɔ̃ sulu ti songo tɛ Yehova nga na libateli tɛ lo.

TA YEHOVA NDO PƆNA LƐ NDƐ NA NGOI TƐ E MA

13. Ndɛ lo mɛ ko, lége kɔi mɛ Yehova ndo fa ya, ta lo ndo pɔna lɛ ma nɛ?

¹³ Ndɛ lo mɛ ko, ambanga Atɛmwɛ tɛ Yehova mɛndɛ̃ ndo du dã na kota biro tɛ e bere ala ndo du dã na Béthel. Ambangani ndo li kwa kai. Ala lengbi ti hɛ̃ngɔ ti la na ya akwa gba mɛ ndo li tɛrɛ lo kai wa ala ndo du nga na mangbi na ayata mɛ ndo ba ndo kwa ni. Ambangani ndo li kwa tɛ awa bangɔ ndo kɛlɛkɛlɛ wa atãngani ndo li kwa ti ngoi zu. Abɛse ta mɔ ka popo tɛ azi mɛ ndo li akwa niko ti ngaso ma ko, hĩnga ya, Yehova mɛ nvɛ̃ da ndo ye azi zu mɛ lo ili ala. Lo hĩnga zo kɔi kɔi wa lo ndo hɛ̃ nga lo ye mɛ lo ndo du na gwɛ̃ni. (1 Pet. 5:7) Awakwa tɛ Nzapa zu lengbi ti luangɔ litambwisi tɛ lo nga na libateli mɛ ala na gwɛ̃ ni.

14. Ndenge mɛndɛ̃ mɛ Yehova ndo fa ya, ta lo ndo pɔna lɛ ma nɛ?

¹⁴ Ndakisa mɛndɛ̃ mɛ ndo fa ya, ta Yehova mɛ nvɛ̃ da ndo pɔna lɛ ma adu na ndenge mɛ lo li ya, azi ti lɛ sese zu ndo di Ngbangɔ. Ndó uzu ko, asu bondó Ngbangɔ na yanga taa: Ebre, Aramɛnyɛ nga na Grɛkɛ. Azi mɛndó na likoki ti dingɔ Ngbangɔ na ayanga niko ndó na mangbi ti kpengbani na Yehova ɔngɔ azi mɛndó ta ala na likoki ti dingɔ ni ma? Ipɔ, ta seni la ma.​—Mat. 11:25.

15. Ye mɛ ndo fa yangondo ya, ta Yehova ndo pɔna lɛ ma nɛ? (Ba nga limɔ.)

 ¹⁵ Ta Yehova ndo ili e ya, e ti akwa lo na bangɔ kalasi mɛ e li bere na lo ti ayanga mɛ e hĩnga ma. Na esika ti hɛ̃ngɔ ndara tɛ lo bo hɛ̃ azi mɛ li kalasi ko, Yehova hɛ̃ ni hɛ̃ azi zu ti ndo lɛ sese abɛse azi mɛ li kalasi bere azi mɛ ta ala li kalasi ma. Angbinyangbi Ngbangɔ na ayanga gba na lo ni la, azi ti ndo lɛ sese zu alengbi ti luangɔ nzɔ̃ tangɔ li gɛrɛ na ndo kpale mɛ ni ndo ha nga na mandangɔ se mɛ ala lengbi ti tingɔ akwa lo.​—2 Tim. 3:16, 17.

NGBÃ LÁ KWƐ “DUNGƆ ZO” MƐ YEHOVA NDO YE LO

16. Na bangɔ Awa Pangɔ Kwa 10:34, 35, ngasia la elengbi ti ngbãngɔ azi mɛ Yehova ndo ye la nɛ?

¹⁶ Adu kota ndima dungɔ azi mɛ Yehova ili ala ka gbɛ gofa tɛ lo ti tandi ti yikayika. Lo du nvɛ̃ da mɛ na songo gba, lo ndo ye e wa lo ndo yamba nga e na se mɛ ta elengbi ti dangɔ na bɛ e ma. Hãngɔni zingɔ, ta lo ndo pɔna lɛ ma wa lo ndo yamba e zu abɛse e ndo du ka wa, e lo wa bere e li kalasi gba, pɔrɔ tɛrɛ e, ndasewa tɛ e, bulu tɛ e, abɛse e du akɔli bere awali. Na lo ni la bo azi ko la ndo kokisa masengami la lo ndo ye ala wa lo ndo ili nga ala.​—Di Awa Pangɔ Kwa 10:34, 35.

17. Elengbi ti luangɔ awangɔ na ndo se mɛ Yehova ndo yamba e ka gbɛ gofa tɛ lo ti tandi ngasia?

¹⁷ Na bangɔ mbeti ti Nzembo 15:1, Davidi hũndandó tɛrɛ lo na ndo mɛ: “Ee Yehova, zo mɛ mɔ lengbi ti ilingɔ lo ka gbɛ gofa tɛ mɔ ti tandi na? Zo mɛ lengbi ti dungɔ ka ngomba tɛ mɔ mɛ santo na?” Yehova salelandó Davidi ti nɛngɔ ya, lo hɛ̃ gbinya ti ahũnda niko mɛ kaya mbeti ti Nzembo 15. Na pɔsɔ ti gesi, e na mandangɔ ambanga aye mɛ elengbi ti lingɔ ti nɛngɔ ya, e ngbã lá kwɛ azi mɛ Yehova ndo ye ala.