1-2. Nwopelo taani Yehova onapakeiye wa alapeli awe oororomeleya?

 WAKHALA wi muchu ohookohaani wi, Yehova taani wa nyuwaano? Mwaahaala waakhula hai? Akhweya munahaala waakhula wi: ‘Yehova Tiithi aka, Muluku aka, ni Nthamwene aka.’ Nave tho aakhalavo masina makina a ncicimiho ni masu yaawo enamuloca Yehova. Apwanne nyuwaano mohintoko wuupuwela wi Yehova ori ntoko mulipa Oowaakhela Aleco?

² Alocaka vooloca sa onthamwene awe ni Yehova mwene Tavite aahimulikanyiha Yehova ntoko mulipa oowaakhela aleco nave alapeli Awe oororomeleya notko aleco. Owo aahikoha: “Khwoo Yehova, taani oni awerye okhala muleco mmuxakalani mwanyu? Taani oni awerye omaka va mwaako anyu waweela?” (Sal. 15:1) Moorweela wa masu yaala ooveereliwa hiyaano niiwexenxe wi nnanwerya okhala aleco mmuxakalani wa Yehova—naari wi nnanwerya okhala asinthamwene awe. Apwanne hamunoona wi ola nwopelo wootikhiniha yoowo Yehova onanipakeleiye?

YEHOVA ONACHUNA WI NIKHALE ALECO AWE

3. Taani aari muleco oopacerya a Yehova, nave onthamwene taani waarivo wa mukina ni mukhwaawe?

³ Yehova ahaakumve opatuxa ichu soothesene owo aari mukhateiye. Voocharela owo aahimpatuxa Mwanawe oopacerya. Waari ntoko Yehova aari mulipa Oowopa, anwopaka muleco awe oopacerya mmuxakalani mwawe nave owo aahihakalala va weerano yeeyo. Piipiliya onaloca wi mwaana a Yehova aari “nihakalaliho nawe.” Vakina vaya mwanawe ‘aaneeliwa murima vamithoni va [Yehova] mahiku oothene.’—Mas. 8:30.

4. Taani Yehova aanwompeiye voocharela wi akhale muleco mmuxakalani mwawe?

⁴ Voocharela Yehova aahaapatuxa ankeelo, yaawo tho eri aleco awe. Ankeelo awe anniichaniwa “anamwane a Muluku” nave  annalociwa Mpiipiliyani mukhalelo yaaryaaya oohakalalaxa wanthowa na okhala asinthamwene a Yehova. (Yupu 38:7; Tan. 7:10) Mu iyaakha sincipale sene aleco a Yehova yaari pahiru yaawo yaakhala wirimu ni yoowo. Voocharela, Yehova aahaaceererya muxakala awe wi aaphitaanyeryemo achu a veelaponi ya vathi ntoko aleco awe. Akina a aleco yaawo yaari Enoki, Nowa, Aparahamu ni Yupu. Piipiliya onaloca wi awo yaari asinthamwene a Muluku nthowa nawi yaanamwiiwelela nave yaaheeca ‘ni Muluku eeparipari.’—Map. 5:24; 6:9; Yupu 29:4; Yes. 41:8, TNM.

5. Tiheeni nnahuseryaahu ni yooloherya ya Esekiyeli 37:26, 27?

⁵ Mu iyaakha masana masaneene Yehova onnatitelela waawopa asinthamwene awe wi ekhale aleco awe. (Mwaalakhanye Esekiyeli 37:26, 27, PMM.) Ntoko yootakiherya, mu yooloherya ya Esekiyeli noohuserya wi Yehova onachuna wi alapeli awe ekhaleno onthamwene woolipa ni yoowo. Owo oororomeliha opaka “waataana wa murecele ni yaawo.” Yooloherya yeela ennaloca vooloca sa elukuluku yeeyo alapeli oothanliwa a Yehova ni yaale arino ewehereryo ya okhala veelaponi ya vathi, wi enamukhala vamoha mmuxakalani mwawe ntoko “muhuwo mmoha.” (Yoh. 10:16) Yooloherya yeela ennaakhwanela olelo!

YEHOVA ONNANIKHAPELELA MU NIPURO VYAKALA NRYAAHUVO

6. Ti mwawiihai muchu onakhaleiye muleco mmuxakalani wa Yehova, nave muxakala owo ori woowi?

⁶ Mu elukuluku ya khalai muxakala waari nipuro nenlo muchu aaweryeiye wiichuuwamo ni okhala ookhapeleleya mu echu vyakala. Wakhala wi muleco ori mmuxakalani yoola, owo haakhala awuukhuwa asuwelaka wi aahaala okhala ookhapeleleya. Vaavaa nniiveleelaahu wa Yehova, hiyaano ninnakhala aleco mmuxakalani mwawe wooxiphela. (Sal. 61:4) Mmuxakalani yoola hiyaano nookhalano yoolya yoothene yoomunepani yeeyo nnachunaahu wi ntitelele okhala asinthamwene a Yehova, ni onthamwene ni akina yaawo tho eri aleco a Yehova. Moohipwacha weiwo nnakhalaahuwo, oothene ahu nnanwerya okhala aleco mmuxakalani wa Yehova. Akhweya nyuwaano mohintoko opaka mukwaha muyaaka mu elapo ekina, ntoko yootakiherya wi moonele muthukumano wa muceche wavameekhaaya, nave tho nwerya waasuwela akina yaawo ari ohakalala nthowa na okhala mmuxakalani wa Yehova. Muxakala wa Yehova ori mmapuro oothene weiwo eriwo alapeli awe oororomeleya.—Wup. 21:3.

7. Ntakhara heeni nnanwerya oloca wi alapeli oororomeleya yaawo ekhwile nlelo aleco mmuxakalani mwawe? (Moone tho eruku.)

⁷ Hanka vooloca sa alapeli a Yehova yaawo  akhwile? Apwanne nnanwerya oloca wi nlelo awo aleco mmuxakalani wa Yehova? Mweeparipari aai! Ntakhara heeni nnalocaahu yeela? Nthowa nawi wa Yehova achu yaawo nlelo akumi mmuupuweloni mwawe. Yesu ooloca: “Nyenya sa oviihiwa mookhwani wa alipa ookhwa, ophiyerya tho wi Mose aasuweliha mu yaweereya ya mwiri waavarela, vaavaa aamwiichanneiye Yehova ntoko: ‘Muluku a Aparahamu, Muluku a Isaki, ni Muluku a Yakopo.’ Owo Muluku, ohiya a achu ookhwa nto a akumi, ntakhara oothene annakhala akumi mwa yoowo.”—Luka 20:37, 38.

MIPHURELO NI YEEYO NNAPHWANELAAHU WEERA

8. Mphurelo taani aleco a Yehova aryaayano?

⁸ Hiiha ntoko muxakala wawooneya oryaaya nipuro nawiichuuwavo ni vawiipithavo, muxakala wa Yehova tho onnaavaha aleco awe okhapeleleya wa yawoopiha vyakala yoomunepani, nave tho onnanivaha ewehereryo ya omwaahiyu. Vaavaa nnamwaacamelaahu Yehova, Satana hawerya opaka echu yeeyo enahaala onivolowela okhala wookhala. (Sal. 31:23; 1 Yoh. 3:8) Mu elapo evyaani, Yehova onahaala otitelela waakhapelela asinthamwene awe oororomeleya ohiya pahiru wa yawoopiha yoomunepani, nyenya tho wa okhwa.—Wup. 21:4.

9. Ti heeni Yehova onaweheryeiye wi aleco awe yeere?

⁹ Mweeparipari ekari etokweene ya okhala aleco mmuxakalani wa Yehova—ni owerya okhalano onthamwene woolipa ni yoowo, onahaala okhala elukuluku yoothene. Waakhanle wi na aleco awe, tiheeni nnaphwanelaahu weera? Wakhala wi moowompwa vaate va muchu, nyuwaano munamuchuna osuwela yeeyo muchu onaweheryeiye wi nyuwaano mpake. Ntoko yootakiherya, mwaneene a vaate onanwerya ochuna wi murule isapato muhaakumve ovolowa nave nyuwaano munahaala weemererya weerano yeeyo. Mmukhalelo mmohamoha, hiyaano nnaphwanela osuwela yeeyo Yehova onachuneiye wi neere wi ntitelele okhala aleco mmuxakalani mwawe. Omusivela wahu Yehova onnanceenyerya opaka eri yoothene yeeyo nnaweryaahu ‘wi nimuhakalalihe moomalela.’ (Ako. 1:10) Yehova ori ntoko nthamwene ahu, nyenya nnaphwanela wuupuwela wi owo tho Muluku ahu ni Tiithi, nave ti nthowa nene owo onaphwaneleiye waakhela ncicimiho nahu. (Sal. 25:14) Nuupuwela sa yeela, nnaphwanela omucicimihaka Yehova ilukuluku soothene nave nihirwe ncuwale wi owo taani. Wuupuwela hiiha enahaala onikhaviherya osepa opaka echu vyakala yeeyo yaahaala omuhiciha Yehova. Moohikhwa minikwa, hiyaano nnaphwanela ‘weecaka mwa wiiyeviha’ ni Muluku ahu.—Mik. 6:​8, PMM.

YEHOVA HAARI A NTHALU WA AISARAYELI

10-11. Ti mwawiihai mukhalelo Yehova aakhalinheiye Aisarayeli mu ntakhwa na o Sinai, enooniheryaaya wi wa owo achu oothene toolikana?

¹⁰ Yehova hano nthalu vaavaa onaakhaliheiye aleco awe. (Aro. 2:11) Nnanwerya wiiwexexa yeela mukhalelo Yehova aakhalinheiye Aisarayeli vaavaa yaaryaaya mu ntakhwa na Osinai.

¹¹ Amanle waataphula achu wookapuroni o Ikuputu, Yehova aahaathanla anamukucho wi erumeeleke mu tapernaakulu. Aleevi yaahithanliwa wi ephareke miteko mikina mwawiiwanana nnipuro nenle naweela. Apwanne yaale yaarumeela mu tapernaakulu naari yaale yaakhala moorukurerya mwa yoowo, yaanaakhela okhapelela wavameekhaaya wa Yehova waapwaha akina? Hooye! Wa Yehova achu oothene toolikana, owo tahi a nthalu.

12. Mukhalelo Yehova aakhalinheiye Aisarayeli enooniherya hai wi owo haano nthalu? (Mukwaha 40:38) (Moone tho eruku.)

¹² Moohipwacha waakhanle wi muxakala aya waakhala vakhiviru naari ocai wa tapernaakulu, oothene yaanapuha onthamwene ni Yehova. Ntoko yootakiherya, Yehova aahiroromeliha wi nloko noothene niweryeke woona neeku  nootikhiniha ni mooro yoowo waakhala vasulu va tapernaakulu. (Mwaalakhanye Mukwaha 40:38.) Vaavaa neeku naapaceryaaya weeca niyaaka makupa makina mavyaani, naamwi yaale yaakhala ocai wa tapernaakulu yaanawerya woona nenlo, mwawiihiiha imusi saanawerya othukumanya sookhalano saya, okhula ni orehererya mixakala saya ni ochaanana vamoha ni muloko. (Nam. 9:15-23) Ohiya yeeyo, oothene yaanwerya wiiwa mookwakwaleya ovuwa wa mapeca meeli a eparata, yaawo yaavaha eneneeryo nloko noothene opacerya weeca. (Nam. 10:2) Naari wi, okhala vakhiviru va tapernaakulu hiyaataphulela wi muchu aahaala okhalano onthamwene woolipaxa ni Yehova waapwaha yaale yaakhala ocai. Moohiyana ni yeeyo, oothene a munloko nenle nawiiveleela wa Yehova yaanwerya waakhela ohoolela wawe ni okhapeleleya. Mmukhalelo mmohamoha olelo, moohipwacha weiwo nnakhalaahuwo oothene ahu nnanwerya woona osivela wa Yehova, opwacha wawe ni okhapelela wawe.

YEHOVA HAANO NTHALU MMAHIKU AHU

13. Mmukhalelo taani Yehova onooniheryeiye olelo wi owo haano nthalu?

¹³ Achu akina a Muluku mmahiku ahu anakhala waacamela o nipuro ntokweene naari o Epeteli vyakala. Ophiyerya tho wi akina anarumeela weiwo. Wa nthowa na yeeyo, ancipale annawerya opaka makupa mmiteko soohiyanahiyana seiyo ineereya mmapuro ene yaawo, nave tho okhala vamoha ni yaale arino murici wa ohoolela marehereryo. Nave tho akina anarumeela ntoko ooweherya a ekulucu naari mmiteko mikina sa elukuluku yoothene wavameekhaaya. Wakhala wi nyuwaano hamuri mmoha a yaawo, muroromele wi Namawopaahu Yehova onnaasivela aleco awe oothene, ophitaanyerya nyuwaano. Nave owo onamoovahani soothene munachunaanyu. (1 Pet. 5:7) Oothene yaawo anapaka makupa a achu a Muluku annaakhela yoolya yoomunepani, ohoolela ni okhapelela yoowo anachunaaya.

14. Yootakiherya taani ekina nryaahuno ya Yehova ya ohikhalano nthalu mmahiku ahu?

 ¹⁴ Yootakiherya ekina yeeyo enooniherya wi Yehova haano nthalu nave wi owo namawopa aphaama a achu, tiyawi owo oheeriha wi Piipiliya aphwanyeye wa achu orukurerya elapo yoothene. Soorempwa Saweela pahiru saarempwale mu ilocelo soopacerya raru: Ehepri, Eramaiku ni Ekriki. Apwanne yaawo anawerya waalakhanya ilocelo seiho soopacerya sa Mpiipiliyani, terino onthamwene woolipaxa waapwaha achu yaawo ahinaloca ilocelo seiyo? Mweeparipari hooye.—Mat. 11:25.

15. Sawooniherya taani nryaahuno sawi Yehova haano nthalu? (Moone tho eruku.)

¹⁵ Weemereryiwa ni Yehova honarweela mu ohuserya ixikola sa vasulu naari okhalano mavyakelo a oloca ilocelo sincipale. Yehova onnavaha onthamwene awe ni masuwelelo wa achu oothene orukurerya elapo, ohiya pahiru wa yaale arino mahusiheryo a vasulu. Masu ooveereliwa a Yehova Piipiliya, ootaphuleliwa mu ilocelo macikhwi ene, mmukhalelo yoola achu orukurerya elapo yoothene ananwerya woona mukhalelo oryaaya waphaama wiiwelela yeeyo owo onahusiheiye nave hiiha ananwerya okhala asinthamwene awe.—2 Tim. 3:16, 17.

MUTITELELE OKHALA “MULECO” A YEHOVA

16. Mwawiiwanana ni Saweeriwa ti Arummwa 10:34, 35 tiheeni nnaphwanelaahu weera wi nikhale aleco a Yehova?

¹⁶ Ekari etokweene owompwa ni Yehova wi nikhale aleco mmuxakalani mwawe. Yehova namawopa ooreera murima, oosivela ni oowaakhelaxa aleco waapwaha achu oothene. Ohiya yeeyoru, owo haano nthalu naari wi wa yene achu oothene toolikana, owo onnaawopa achu oothene moohipwacha weiwo anakhalaayawo, mukhalelo aphwiiwaaya, ohuserya waya, ekoore, nihimo, iyaakha naari waankhanle wi mulopwana naari muthiyana. Nyenya pahiru wa yaale anatitelela omwiiwelela Yehova ananwerya weemereryiwa okhala ntoko aleco awe.—Mwaalakhanye Saweeriwa ti Arummwa 10:34, 35.

17. Ti woowi nnahaalaahu ophwanyawo sooleeliherya vooloca sa okhala aleco mmuxakalani wa Yehova?

¹⁷ Mwawiiwanana ni Salmu 15:1, Tavite onnapaka makoho ala: “Khwoo Yehova, taani oni awerye okhala muleco mmuxakalani mwanyu? Taani oni awerye omaka va mwaako anyu waweela?” Nave Yehova aahimpharihela Tavite yoowo wi aakhule makoho yaala. Mwaha onacharela nnahaala ohuserya ichu ikina seiyo nnaphwanelaahu weera wi nimuhakalalihe Yehova ni otitelela okhala mmuxakalani mawe.