1, 2. ¿Tlenon kimijlia Jehová itekipanojkauan?

 TLA mitstlajtoltiskiaj kenon tikita Jehová, kanaj titlanankiliskia: “Jehová noamigo, noTaj niman noTajtsin”. San ika ¿tikmatiya ika Jehová noijki se teseuijketl akin mitsnotsa ichan?

² Tekiuaj David okijto ika Jehová kiminotsa ichan itekipanojkauan akin itech melajkanemij. Yejua okijto: “NoTEKO, ¿Akinon uelis kalakis ipan moyektiopan? ¿Akinon uelis kalakis ipan on yektepetl kampa mochan?” (Sal. 15:1). Yejuin tlaxelojli techmachtia ika Jehová uelis technotsas niman techselis ichan, yejuin kijtosneki ika uelis iuan touikaskej. ¡Yejuin melak kualtsin!

JEHOVÁ TECHNOTSA ICHAN

3. ¿Akinon kachtopa okinots Jehová ichan, niman kenon nomachiliayaj Jehová niman iKoneuj?

³ Jehová nochipa san yejuatsin nemiya hasta ijkuak okichijchiuj iYenkuiyoj. Niman yejua akin kachtopa okinots ichan. ¡Jehová melak oyolpak pampa oteseui! Biblia kijtoua ika Jehová “nochipa yolpakiya”, niman iKoneuj, akin okiseui, ijkin okijto: “Nochipa ixpan niyolpakiya” (Prov. 8:30).

4. ¿Akinomej más okiminots Jehová para mauiyan ichan?

 ⁴ Sakin, Jehová okinchijchiuj sekimej ángeles niman noijki okiminots ichan. Biblia kintokayotia ikoneuan toTajtsin niman kijtoua ika yejuamej noijki melak yolpakiyaj pampa chantiyaj iuan Jehová (Job 38:7; Dan. 7:10). Ipan miyek xiujtin, Jehová san onouikak imiuan akin chantiyaj iluikak. San ika, sakin yejua okinchijchiuj tlaltikpakchanejkej niman noijki okiminots ichan. Yejua okiminots itekipanojkauan akin melajkanemiyaj, ken Enoc, Noé, Abrahán niman Job. Ipan Biblia kijtoua ika yejuamej iamigos katkaj toTajtsin niman ika nouikayaj “ken Dios kinekiya” (Gén. 5:24; 6:9; Job 29:4; Is. 41:8).

5. ¿Tlenon techmachtia teotlajtojli tlen nesi ipan Ezequiel 37:​26, 27?

⁵ Desde yeuejkaui, Jehová yokiminots sekimej iamigos para mayakan ichan. San matikteneuakan teotlajtojli tlen uajnesi ipan Ezequiel 37:​26, 27 (xpoua). Yejuin teotlajtojli techmachtia ika Jehová melak kineki nouikas imiuan itekipanojkauan. Yejua okijto ika imiuan kichiuaskia “sen pacto de yolseuilistli”. Yejuin nochiuaskia ijkuak itekipanojkauan akin yaskej ne iluikak niman akin nemiskej nikan ipan tlaltikpaktli san sekan nemiskiaj ichan Jehová (Juan 10:16). ¡Aman yejuin teotlajtojli inochiujtika!

JEHOVÁ TECHTLAJPIYA MASKI SAN KANON MATINEMIKAN

6. ¿Kemanon otikalajkej ichan Jehová, niman kanon chanti Jehová?

⁶ Yeuejkaui, tlaltikpakchanejkej chantiyaj ipan kajkaltsitsintin tlen tlachijchiujtin katkaj ika tlakentli. Ompa ueliyaj noseuiayaj niman nopaleuiayaj. Niman ijkuak yakaj kiseuiayaj ipan se kajkajli, kimatstoya ika akin ompa chanej kuajli kiseliskia. Aman tejuamej tikalakij ichan Jehová ijkuak itech tosentemakaj (Sal. 61:4). Ompa Jehová techmaka tlen ika tikchikauaskej totlaneltok niman ueli touikaj imiuan oksekimej akin Jehová noijki yokiminots. San ika ¿kanon chanti Jehová? Yejua xsan sekan chanti, yejua nochiuiyan chanti kampa nemij itekipanojkauan akin kitlakamatij. Niman miyekej tokniuan akin yoyajkej ipan okse país ijkon yokitakej, pampa kanaj oyajkej ipan se ueyi tlanechikojli niman ompa okimixmatkej miyekej tokniuan akin noijki nemij ichan Jehová (Apoc. 21:3).

7. ¿Tleka tikijtouaj ika itekipanojkauan Jehová akin yomijkej ok nemij ichan? (Noijki xkita tlaixkopinajli).

⁷ ¿Niman itekipanojkauan Jehová akin yomijkej ok nemij ichan? Kema. ¿Tleka ijkon  tikijtouaj? Pampa Biblia kijtoua ika Jehová ok kimilnamiktok. Jesús ijkin okijto: “Hasta Moisés otechmachistij ika on mikatsitsimej yoliuij niman nokuiteuaj. Ijkuak on tlakotepajsojli tlikuitikatka, toTEKO Dios ompa okijlij Moisés ika yejua iDios Abraham, Isaac niman Jacob. Tikmatij ika Dios xejua iminDios on mikatsitsimej, yej yejua iminDios on yoltokej, pampa para yejua melauak nochimej kipiyaj nemilistli” (Luc. 20:​37, 38).

KENON TECHPALEUIYA TLA TINEMIJ ICHAN JEHOVÁ NIMAN TLENON NONEKI TIKCHIUASKEJ

8. ¿Kenon techpaleuiya pampa tinemij ichan Jehová?

⁸ Ipan se kajkajli uelis timopaleuis, noijki ijkon, ijkuak tinemij ichan Jehová kentla ompa topaleuiskiaj pampa yejua techtlajpiya itech tlen ueliskia kijtlakos ken iuan touikaj. Noijki, ipan se kajkajli uelis timoseuis, kuakon, ijkuak tinemij ichan Jehová, kentla toseuiskiaj pampa yejua techmaka se tlamachialistli. Ijkuak nisiuj tinemij itech Jehová, Satanás xueli texchiuilia tlen xok uelis noyektlalis (Sal. 31:23; 1 Juan 3:8). Niman ipan yenkuik tlaltikpaktli, Jehová ok kintlajpiyas iamigos niman ijkon uelis nochipa imiuan nouikas, niman noijki kinmakixtis itech mikilistli (Apoc. 21:4).

9. ¿Tlenon noneki kichiuaskej akin kinekij nemiskej ichan Jehová?

⁹ ¡Melak kualtsin ika Jehová techkauilia matinemikan ichan, noso, iuan matouikakan! San ika ¿tlenon noneki tikchiuaskej niman ijkon nochipa matechseli ichan? Matikonnemilikan yejuin: yakaj technotsa ichan, niman ijkuak tajsij, akin otechnots techijlia tla uelis toikxipojpouaskej pampa melak yotoikxisokiyotijkej. Niman tejuamej ika toyojlo tikchiuaskiaj tlen techijlia. Noijki ijkon, akin tinemij ichan Jehová tiknekij tikmatiskej tlenon kineki matikchiuakan. Tejuamej melak tokojtiliaj tikyolpaktiskej Jehová pampa melak tiktlasojtlaj (Col. 1:10). Melak noneki matikilnamiktokan ika Jehová xsan toamigo, yejua noijki toTajtsin niman toTaj, ika yejon, melak noneki matiktlakaitakan (Sal. 25:14). Tla nochipa tiktlakaitaj, xtikchiuaskej tlen ueliskia kiyolkokos niman techpaleuis nochipa iuan matikistinemikan ika yolyemanilistli (Miq. 6:8).

JEHOVÁ XOKINCHIKOITAK ITEKIPANOJKAUAN IPAN TLALUAKTLI

10, 11. ¿Kemanon okiteititi Jehová ika xkinchikoita itekipanojkauan?

¹⁰ Jehová xkeman kinchikoita akin kiminotsa ichan (Rom. 2:11). Matikitakan kenon yejua xkeman okinchikoitak israelitas ijkuak onokajkaltijkej ipan tlaluaktli Sinaí.

¹¹ Sakin ika Jehová okinkixti israelitas itech Egipto niman okinuikak ipan tlaluaktli, yejua okintlapejpeni teopixkej para matlapaleuikan ipan tabernáculo. Noijki okimijli levitas makichiuakan okseki tekitl tlen nonekiya ipan tabernáculo. Kuakon, ¿Jehová san okintlajpix akin tlapaleuiayaj ipan tabernáculo noso akin ompa nisiuj chantiyaj? Ka, Jehová nochimej san noijki okintlajpix pampa yejua xtechikoita.

12. ¿Kenon Jehová okimititi israelitas ika xkinchikoitaya ijkuak nemiyaj ipan tlaluaktli? (Éxodo 40:38; noijki xkimita tlaixkopinaltin).

¹² Nochimej akin nemiyaj ipan ikalpan Jehová ueliskiaj iuan nouikaskej. Matikonteneuakan yejuin: Jehová okitlali se “moxtli” niman se “tlimilinajli” ikuatipan tabernáculo, niman nochimej akin nemiyaj ipan ikalpan ueliyaj kitayaj maski san tlen tekitl kipiayaj ipan tabernáculo noso maski tla uejka noso nisiuj chantiyaj itech tabernáculo (xpoua Éxodo 40:38). Kuakon, nochimej  kitayaj ijkuak yejuin moxtli nejkuaniaya, niman ijkuak ijkon kitayaj, yejuamej nimantsin kimejyeuayaj inkajkaluan niman tlen kipixtinemiyaj para nejkuaniskej imiuan nochimej israelitas (Núm. 9:​15-23). Noijki, nochimej ueliyaj kikakiyaj ijkuak kinpitsayaj ome tlapitsaltin tlen tlachijchiujtin katkaj ika plata, ijkon kimatiyaj ika inejkuaniskiaj (Núm. 10:2). Kuakon, maski sekimej más nisiuj chantiyaj itech tabernáculo, xkijtosnekiya tla yejuamej más kuajli nouikayaj iuan Jehová. Nochimej akin nemiyaj ipan ikalpan Jehová ueliskiaj kalakiskej ichan niman ijkon makinyekana niman makintlajpiya. Aman noijki ijkon panoua: maski san kanon matichantikan, Jehová techtlasojtla niman techtlajpiya.

AMAN JEHOVÁ NOIJKI XTECHIKOITA

13. ¿Aman kenon techititia Jehová ika xtechchikoita?

¹³ Sekimej tokniuan chantij nisiuj oficina kampa noyekanaj nochi sucursales noso nisiuj itech se sucursal. Oksekimej hasta ompa tekitij. Niman pampa ompa tlapaleuiyaj, noijki ueli tekitij imiuan sekimej tokniuan akin kiyekanaj tekitl tlen nochiua ipan ikalpan Jehová. Oksekimej tokniuan tekitij ken tlayekankej ipan circuito noso kipiyaj okse tekitl ipan ikalpan Jehová. San ika, timiyekej xueli ijkin titlapaleuiyaj, maski ijkon, noneki kuajli matikmatstokan ika Jehová techtlasojtla, techselia ichan niman techtlajpiya (1 Ped. 5:7). Kema, Jehová kinyekanas nochimej itekipanojkauan, kinmakas tlen ika kichikauaskej intlaneltok niman kintlajpiyas.

14. ¿Kenon noijki techititia Jehová ika xtechikoita?

¹⁴ Okse matikitakan itech kenon Jehová techititia ika xtechikoita niman nochimej kinselia ichan. Jehová yokichiuj ika ipan nochi tlaltikpaktli nochimej mauelikan makiamapouakan Biblia. ITlajtol Biblia onoijkuilo ika hebreo, arameo niman griego. San ika, yejuin xkijtosneki tla san akin uelij tlaamapouaj ika yejuin tlajtoltin uelis más kuajli iuan nouikaskej (Mat. 11:25).

15. Okse xteneua itech kenon Jehová techititia ika xtechikoita (noijki xkimita tlaixkopinaltin).

 ¹⁵ Jehová xsan nouika imiuan akin melak onomachtijkej ipan escuela noso imiuan akin ueltokej tlajtoltin tlen ika onoijkuilo Biblia. Jehová nochimej kinmaka tlamachilistli, maski tla melak onomachtijkej noso xonomachtijkej ipan escuela. Niman iTlajtol Biblia yonotlajtolkuep ika miyek tlajtoltin, ika yejon, ipan nochi países tlaltikpakchanejkej uelis nomachtiskej niman uelis iuan nouikaskej (2 Tim. 3:​16, 17).

NOCHIPA MATINEMIKAN ICHAN JEHOVÁ

16. ¿Akinomej kinselia Jehová ichan? (Hechos 10:​34, 35).

¹⁶ ¡Melak tiyolpakij pampa tinemij ichan Jehová! Xnemi okse teseuijketl ijkon ken Jehová. Yejua melak kuajli techseuiya niman melak techtlasojtla. Yejua xtechchikoita niman tinochimej techselia maski san kanon matiualeuakan, maski san tlen tlajtojli matitlajtokan, maski tla melak otomachtijkej noso xmás otomachtijkej, maski san kech xiuitl tikpiyaj noso maski tla titlakamej noso tisiuamej. Jehová san techtlajtlanilia matikintlakamatikan itlanauatiluan (xpoua Hechos 10:​34, 35).

17. ¿Tlenon tikitaskej ipan okse tlamachtijli?

¹⁷ Ipan Salmo 15:​1, David ijkin okitlajtolti Jehová: “NoTEKO, ¿Akinon uelis kalakis ipan moyektiopan [noso mokajkal]? ¿Akinon uelis kalakis ipan on yektepetl kampa mochan?”. Sakin Jehová okichiuj ika David makinnankili yejuin san no ompa ipan Salmo 15. Ipan okse tlamachtijli tomachtiskej tlenon noneki tikchiuaskej niman ijkon uelis nochipa tinemiskej ichan Jehová.